В 1168 году при митрополите Киевском Константине в этот день устанавливается празднование Всемилостивому Спасу, который в народе получил название «Первый Спас». Поводом к установлению этого празднования на Руси послужила победа 1 августа 1164 г. князя Андрея Боголюбского над волжскими булгарами.
Канон, глас 8-й
Общее начало и конец всем канонам →
Порядок чтения по уставу
Тропарь, глас 8-й
С вышних призирая, убогия приемля, призри Спасе, и посети нас озлобленыя грехи, Владыко Всемилостиве, молитвами Богородицы, даруй душам нашим велию милость.
Песнь 1. Ирмос
Море огустил еси, погрузив со оружием, лютаго фараона. И люди спасл еси от работы, и введе их в гору святыни вопиюща, воспоем Тебе Богу нашему песнь победную, яко прославися.
Запев: Милостиве Господи, услыши молитву раб Своих, молящихся Тебе (поклон).
Грядите вернии, хвалами и песньми светоносную Церковь ублажающе, благочестия Держателем просиявшу. В ней же Всемилостиваго Христа Бога нашего, да прославим вопиюще, поем Тебе Богу нашему, яко прославися.
Запев. Ум да возвышается всех верных к Небеси, выспрь седящему, в Пребожественей Его Церкви. И ликовствующе верно, божественое празднество, смирившаго земная с небесными.
Слава. Богородичен. Скрижаль богописанна утроба Твоя Богородице, в ней же Слово Отчее написася, Его же чювствено нам порождьши, к Нему молися, избавити ны от всякия нужди и скорби.
И ныне. Богородичен. Веселится светло верх пророческии, о Тебе Девице. Исаия безмужное Твое рожество видя, пророчествует: Отчее бо Слово рождьши нам и по рожестве Девою пребысть.
Катавасия: Сохрани от бед рабы Своя Милостиве, яко усердно к Тебе прибегаем к милостивому Избавителю и всех Владыце Господу Исусу (поклон). Господи помилуй (3 раза с поклонами).
Песнь 3. Ирмос
Утвердися сердце мое о Господе, вознесеся рог мой о Бозе моем, разширишася уста моя на враги моя, возвеселихся о спасении Твоем.
Запев. Ликовствуют с нами днесь купно вся ангельская чиноначалия, не чювствено, но духовно обступающе Владыко, Твою святую Церковь. Ты же свыше мир Свой подаждь нам, яко Всемилостив.
Запев. Ликует днесь с нами лик пророческии, купно же и апостольскии Спасе, и вси мученичестии лицы, Духом прозряще Тебе многоименитаго Бога, верными славима.
Слава. Богородичен. Давыдски Ты именовася усыренна гора Девице, безлетное Слово Отчее, омладевшееся во утробе си прием, и рождьши плотию, Божию составную мудрость.
И ныне. Богородичен. Мысленыи сокрушися томитель, от горняго неисцельную язву прием камене, от чрева Твоего Христа Бога нашего. Прошед бо земная с небесными совокупи. Катавасия.
Слава, и ныне. Седален, глас 4-й. Скорое, и твердое и крепкое утешение, Всемилостиве посли нам. Да Ти во гласе хваления, трисвятую песнь возсылаем, душею сокрушенною припадающе молимся, Спасе всего мира, Ты еси Бог кающихся.
Песнь 4. Ирмос
Пророк Аввакум умныма очима провиде Господи пришествие Твое. Тем же и взываше, от юга приидет Бог, слава силе Твоей, слава Христе пришествию Твоему.
Запев. Шестокрильнии Милостиве, и многоочитии Херувими Владыко, Твоему Престолу предстояще славят. Их же посли нам верным, и освяти Твою Божественую Церковь с вопиющими: слава силе Твоей, слава Христе пришествию Твоему.
Запев. Давыд возвеличися Спасе, Твоим Божественым просия Духом, проповедавыи от Девы Твое рожество. Ты же яко Всемилостив, возвеличи и возвыси Твою святолепную Церковь Божественую.
Слава. Богородичен. Лук крепкаго миродержца, Твоим прижитием Владычице сокрушися. Ты бо плоть божественаго воплощения, светоносне подавши удице Отчу Слову, прадедна улови нашего врага. Тем Ему вопием, слава силе Твоей Господи.
И ныне. Богородичен. Давыдски возвеличися, и гласы пророчески, гора Божия усырена явися Девице. Камень усеченыи от чрева Твоего раждается Христос Бог, Ему же поем, слава силе Твоей, слава Христе пришествию Твоему. Катавасия.
Песнь 5. Ирмос
Господи Боже наш, Твое смирение даждь нам. Господи Боже наш, стяжи нас. Господи, разве бо Тебе иного не знаем, имя Твое именуем.
Запев. Царствует присно Твое пребожественое имя, Отче Слове же и Душе. Любящим Тя свыше яко Милостив, мирную управляй жизнь.
Запев. Веком сыи Творец, смотрением си плоти приближися. Да плоть обожив возвел еси на высоту ко Отцу, и к Своему хотению.
Слава. Богородичен. Трапезу Слова жизненаго браконеискусная Марие, разумехом Тя вернии, от плода поползшиися. Плодом же чрева Твоего, к свету разумному приведени быхом.
И ныне. Богородичен. Сияют пророчестии гласи, яко солнце лучи пресветлыя пущающе, Твое провозвещающе безмужное Дево рожество: Отец изволи, Сын же хотением во чреве Твоем младеньствует, действом Святаго Духа, и пребываеши Девою. Катавасия.
Песнь 6. Ирмос
Яко воды морьския Человеколюбче, волны житейския погружают мя. Тем же яко Иона, Тебе вопию Слове, возведи из тли живот мой благоутробне Господи.
Запев. Торжествует весело днесь великоименитыи град, христоименитии людие, от Тебе свыше просят великих даров Спасе. Ты же яко Благ и Всемилостив, стадо Свое сохраняй.
Запев. Крепкое утвержение, свыше посли Христе Спасе, крепкаго Тя сведущим, и Всемилостиваго Бога, и христоименитую Церковь утверди яко всемогай.
Слава. Богородичен. Избави мя лютых Девице, умолящи победителя лютому врагу, и сподоби мя достойно одесную стати Твоего Сына.
И ныне. Богородичен. Ты обожи мя Владычице, Бога рождьши. Ты мертвеное существо ми от смерти к жизни преведе. Да моего преступления клятву потребит, божественою любовию Тя ублажающа. Катавасия.
Слава, и ныне. Кондак, глас 4-й. Всякия скверны, Всемилостивыи Спасе, аз бых делатель, и во отчаяния ров впадся. Но стеню от сердца, и вопию к Тебе Слове, ускори Щедрыи, и потщися на помощь нашу, яко Милостив.
Икос. Имуще Тебе Всемилостивыи Спасе крепкое утвержение, и пречистую Матерь Твою, стену неразориму, и тихое пристанище, не убоимся никогда же вражиих востании. Твоим бо невидимым разумом сохраняеми и покровом, видимыя и невидимыя враги побеждаем. Твою пречистую Матерь имеюще помощницу, вражиих козней яко от сетей избегаем. Радостию воспеваем, Прерадованная, ускори Щедрыи и потщися на помощь нашу, яко Милостив.
Песнь 7. Ирмос
Халдейская пещь огнем распалаема, прохлаждашеся Божия Духа наитием, отроцы же пояху, благословен Бог отец наших.
Запев. Ты еси небеснаго круга верхотворче Господи, Тя сведуще Всемилостиваго припадаем Ти вопиюще, ускори Щедрыи и потщися на помощь нашу, отрочески поющих, благословен Бог отец наших.
Запев. Дверь милосердием отверзл еси нам неизглаголанныя пищи. Отверзи и ныне Всемилостиве Спасе, Твоя свыше божественыя дары Тебе верно вопиющим, благословен Бог отец наших.
Слава. Троичен. Отца прославим, и Сына и Духа, во Едином Божестве, трисоставное естество, существо нераздельно, несозданно, безначально, и пресуществено.
И ныне. Богородичен. Прообразиша Твою неопалимую утробу, неопалимыя в пещи огненей юноши, огнем Божества прохлажаеми. Его же приимши породи Бога Слова поющим, благословен Бог отец наших. Катавасия.
Песнь 8. Ирмос
Ангели Небес, иже на Престоле славы носимаго, и яко Бога непрестанно славимаго, благословите, и превозносите Его во веки.
Запев. Державу царствия сохраняй Слове, яко Всемилостив, праотец молитвами, крепкою Ти силою. Крепость же и силу, неоскудно на противныя подаждь, да вопием, благословите вся дела Господня Господа.
Запев. Песнь божественую приносяще Тебе Всемилостиве в пречистей Церкви, избраннии людие Твои Тебе хвалят. Ты же яко Всемилостив, осени вышнею Ти силою, да вопием Ти, благословите вся дела Господня Господа.
Слава. Богородичен. Клас животен неделанен возрастивши божественыи, чистая Дево, тричислена Божества сияние, Отчее безлетное Слово в лето порождьши. К Нему же за ны яко Мати молися, о поющих Тя.
И ныне. Богородичен. Безначальна Родителя недр не отступль, в недрех Девицы водворяяся, и рождься плотию, очищая ми плоть и душу падшую. Ему же поем, благословите, хвалите, и превозносите Его во веки. Катавасия.
Песнь 9. Ирмос
Чюже есть матерем девьство, и странно девам дети раждати, на Тебе Богородице обоя смотришася. Тем же Тя вся племена земная непрестанно величаем.
Запев с поклоном. Чювственно Владыко днесь хвалят Тя божествении собори, в пречюдней Ти церкви, цари купно и люди, и священных собори. Ты же яко милостив спасай, да Тя вся колена земная непрестанно величаем.
Запев. Песнь возсылаем днесь вернии, многоименитому Тебе Христу Богу всех, и Твое Всемилостиве духовно празднующе празднество, просим от Тебе, да утвердиши недвижимо державу нашю.
Слава. Богородичен. Еммануила, Бога же и Человека, Отца безначальнаго Слова, явися Мати Девице, Владычество призывающее Тя призри и утвержай, противныя покаряющи в день брани.
И ныне. Богородичен. Отъими о, Девице, вещь тленную ума моего, Ум небесныи плотию рождьшая. Просвети глубокую тму моего неразумия, Свет прижившая, и превзыти мя сподоби крилома разумныма, в тишину божественаго хотения. Катавасия.
Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.
Отпуст: Господи Исусе Христе Сыне Божии, молитв ради пречистыя Ти Матере, и всех святых, помилуй и спаси нас, яко Благ и Человеколюбец. Аминь.