Блаженный Андрей, Христа ради юродивый, жил в X веке в Константинополе. Видя его величайшее смирение и душевную чистоту, Господь в видении призвал блаженного Андрея нести подвиг юродства. Святой Андрей немало претерпел унижения, оскорбления, насмешек, побоев от людей, обличая их пороки. Он сносил голод, жажду, стужу. Многие души были приведены им ко спасению. Святой сподобился узреть явление Пресвятой Богородицы во Вла- хернском храме в г. Константинополе, когда Небесная Заступница покрыла молящихся Своим омофором (в воспоминание этого события установлен праздник Покрова Пресвятой Богородицы). Господь обещал блаженному Андрею, что в день Страшного Суда он получит великую награду за свой добрый подвиг. Молясь канон великому угоднику Божию, блаженному Андрею, будем просить святого, чтобы он, находясь в сияющих Обителях Вечности, не переставал молиться о спасении наших душ и усиливал своими молитвами наши молитвенные воздыхания ко Господу. Память св. блаженному Андрею, Христа ради юродивому 2 октября (15 октября по гражданскому стилю).
Канон, глас 4.
Общее начало и конец всем канонам →
Порядок чтения по уставу
Тропарь, глас 1-й.
Глас апостола Твоего Павла услышав глаголюща мы юроди Христа ради. Раб Твой Андрей, юрод бысть на земли Тебе ради Христе Боже. Тем же ныне память его почитающе Тебе молим, Господи спаси душа наша. (Дважды).
Слава, и ныне. Богородичен. Гавриилу провещавшу Ти Дево, еже радуися. И со гласом воплощашеся всех Владыка, в Тебе святем киоте, яко же рече праведныи Давыд. Явися пространнейши небес, поносивши Зиждителя Своего. Слава всельшемуся в Тя, слава прошедшему ис Тебе, слава свободившему нас рожеством Своим.
Песнь 1. Ирмос
Отверзу уста моя и наполнятся духа, и слово отрыгну Царице Матери, и явлюся светло торжествуя, и воспою радуяся Тоя чюдеса.
Запев: Преподобне отче Андрее, моли Бога о нас (поклон).
Отверзи ми устне, подвигни ми язык, и исправи ми смысл, вся умудряяи Боже, да похвалю угодника Твоего Андрея юрода бывшаго на земли Тебе ради.
Запев. Андрее блаженне, ты измлада Христа возлюбил еси, и к Нему единодушно возжелев. Како тя по достоянию похвалим, на диавола вооружившася, и сего козни победивша силою Христовою.
Слава. Молитвами Богу моляся, и диаволу досаждая. И многаго его толчения в двери хизины твоея аще вмале и устрашився, но неподвижен умом пребыл еси, силою Христовою укрепляемь.
И ныне. Богородичен. О Пресвятая Госпоже Дево Богородице покрый нас чюдным Своим амфором, и сохраняй град Свой от бед и скорбей. Яко же Тя преблаженныи виде Андрей в Лахернстей церкви молящуся.
Катавасия: Избави от бед рабы своя, преподобне отче Андрее, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Песнь 3. Ирмос
Твоя певцы Богородице живыи нетления источниче, лик Себе совокупльши духовен утверди, и в божественней Ти славе, венцем славы сподоби.
Запев. С ефиопом брався, и сего победил еси, от Христа дерзновение приим. Многу печаль бесом сотворил еси, святым же ангелом веселие и радость. С ними же ныне водворяешися.
Запев. Во сне Христа прежде видел еси, на бесы тя укрепляюща, и венец тебе подающа. И с ефиопом братися поучающа, ныне же не сновидением, но в неизреченнем свете славы Его видя, за ны молися.
Слава. Христа послушал еси повелевшаго тебе юроду быти, и Царство Небесное обещавша. Тому последовав, неизреченная благая Его восприят, Андрее досточюдне.
И ныне. Богородичен. Прииди ныне в славе во Свою си церковь Богородице с соборы святых, яко же Тя виде святыи Андрей на воздусе светле за христианы молящуся. И подаждь нам Госпоже велию милость. Катавасия.
Седален, глас 8-й. Узы и железы связан быв в церкви седя Андрее, многи страсти от бесов подъял еси. И помощника си обрете апостола Христова возлюбленнаго Иоанна, иже повеле тебе терпети Христа ради. С ним же ныне водворяешися, за ны молися чтущыя память твою.
Слава, и ныне. Богородичен. В напасти многоплетенныя впад, от враг невидимых и видимых, бурею одержюся безчисленых моих прегрешении. И яко к теплому заступлению и покрову моему Пречистая, пристанищу прибегаю Твоей благости. Тем же Пречистая, из Тебе рождьшагося без семене, моли о всех рабех Своих непрестанно поющих Тя Богородице пречистая. Молящи Его прилежно, прегрешением оставление даровати, покланяющымся рожеству Твоему (поклон).
Песнь 4. Ирмос
Седяи во славе на престоле божественем, на облаце легце прииде Исус Пребожественныи от пречистыя Девы. Спасе же вопиющыя, слава Христе силе Твоей.
Запев. Седяща на престоле Христа Царя видел еси. Горкия сея жизни образ разсмотрил еси, горчае пелыни сущи. Потом же нетленныя сладости вкус приял еси.
Запев. Тогда во сне и в восторзе Христа видел еси. Ныне же со безплотными силами водворяяся, славу Божию видиши непостижимую и неизглаголанную. Поминай нас Андрее чтущих память твою.
Слава. От видения разумов уверившагося Андреа похвалим вернии. На земли бывша юрода Христа ради, на небесех же ныне премудра духовною благодатию, со ангелы предстояща всех Богу.
И ныне. Богородичен. Кто изглаголати может Твоего рожества таиньство; или кто исповесть Твоея молитвы силу, аще не бы Сама еси показала Андрееви юродивому в церкви в Лахерньстей честныи Твой покров. Катавасия.
Песнь 5. Ирмос
Удивишася всяческая о божественей славе Твоей. Ты бо браконеискусимая Девице прият во утробе надо всеми Бога, и родила еси безлетнаго Сына, всем воспевающым Тя, мир подавающа.
Запев. Удивление бысть всем видящым Андреево житие. На сметьищи легание, и посреде града обнажение, и колесничное попрание. Но сия вся бысть ему пути правление в Небесное Царствие.
Запев. Удивишася вси видящии терьпение твое. Мученицы бо во едино время страсть претерпеша. Ты же вся дни живота своего злыя муки терпел еси, в Небесное Царство желая вселитися. Еже получив ныне, радуешися бесконечною радостию.
Слава. Сокровенная быша тебе откровена, и вся бесплотныя аки плотьска видел еси. Ничто же бо земных не возлюбил еси. Тем же и небесная врата отверзошатися, в неизглаголанную радость Господа своего блаженне вшел еси.
И ныне. Богородичен. Поют Тя чини ангельстии, и славят Тя земных роди. Ты бо небесная Царице Андрееви явилася еси, покрывающи люди в церкви нетленным Ти покровом. За вся поющыя Тя непрестанно молящися. Катавасия.
Песнь 6. Ирмос
Божественое се и всечестное совершающе праздньство богомудрении Божия Матере, приидите руками восплещем, от Нея рождьшагося верою славяще.
Запев. Апостола Павла сбысться глас на тебе отче. Слово крестное погибающым убо юродство вменися. Тебе же спасающемуся сила Божия бысть, Андрее всехвалне.
Запев. Христов глас сбысться на тебе. Иже рече блажени нищии духом, яко тех есть Царство Небесное. Ты бо обнища духом, и Царство Небесное восприял еси.
Слава. Епифания иногда юношу суща на путь правыи наставил еси. Ему же и прорекл еси во святительском сану быти, и учити люди. Вся бо предняя яко пред очима суща видел еси.
И ныне. Богородичен. Припадаем Ти Богородице мы грешнии, да и на нас ныне простреши невидимыи покров Твой. К Сыну Своему и Богу нашему, да принесеши молитвы Твоя за ны, яко же Тя древле Андрей виде. Катавасия.
Слава, и ныне. Кондак, глас 4-й. В юродство претворився волею, мира сего красоты отнюд возненавиде, плотьская играния увядил еси постом и жаждею, зноем и студению. От дождя и снега и от прочия воздушныя тягости никогда же не уклонися. Душу же очистил еси яко злато в горниле, Андрее всечестне.
Икос. Приидите христолюбцы, приидите нищелюбцы, восхвалим блаженнаго страдалца, премудраго Андреа бьюша юрода Христа ради. Волею мира и яже в нем уметы вменивша по апостолу, и во след Христа усердно потекша. Плоть же свою постом и жаждею и зноем и дождем и снегом воздушною тягостию смиривша. Душу же от страстей свободну соблюдша, и светлу добродетелми соделавша, и небесное житие со всеми святыми вечно наследовавша, и молящася Христу Богу о чтущих его верою и любовию. К нему же возопием: радуйся угодниче Христов Андрее всечестне.
Песнь 7. Ирмос
Не послужиша твари богомудрении паче Зиждителя, но огненое прещение мужески поправше. Радовахуся поюще, препетыи иже отцем Господь и Бог благословен еси.
Запев. Не изволив ничто же любити на земли паче Зиждителя, но посреде храмов скитаяся блаженне Андрее, радовашеся поя, препетыи отец наших Боже благословен еси.
Запев. Не пощаде плоти своея, но предаде ю на подвиги и труды, нуждное пребывание. Тем козни бесовския мужески поправ блаженныи Андрей. Пояше, препетыи иже отцем Господь и Бог благословен еси.
Слава. Ничто же земныя славы не восхоте, Христа же паче возлюбил еси блаженне Андрее. И к Нему востече радуяся, болезнем своим приемля воздаяние. И поя присно, благословен Бог отец наших.
И ныне. Богородичен. Блаженне Андрее, и ныне помолися Царице Богородице, Юже виде за мир молящюся, да нас покрыет непобедимою Своею милостию. Тоя бо покровом вси вернии сохраняемся. Катавасия.
Песнь 8. Ирмос
Отроки благочестивыя в пещи рожество Богородиче спасло есть. Тогда образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.
Запев. Богатаго умерша иногда видел еси, чювьственою честию проводима, силами же зле сводима во глубину адову блаженне Андрее. И о нем плачася, и моля Господа.
Запев. Безплотнаго ангела плачющася о погибели души богатаго, в житии сем не покаявшася, от плача пременил еси Андрее блаженне. С ним же поеши, Господа воспевайте дела, и превозносите Его во веки.
Слава. Сребролюбна черноризца видев от злаго змия стужаема, Андрее блаженне, и сего от сребролюбнаго недуга избавив, вразумил еси пети и превозносити Господа во веки.
И ныне. Богородичен. От Андреева видения покров Твой уведевше Царице Богородице, молимтися прилежно, покрый нас милостию Твоею поющих Сынови Твоему, и превозносящих Его во веки. Катавасия.
Песнь 9. Ирмос
Всяк земен да взыграется Духом просвещаемь. Да ликоствует же бесплотных умов естество, почитая святое торжество Божия Матере. И да поют, радуися Преблаженная Богородице чистая присно Дево.
Запев с поклоном. По Христову словеси за биющыя тя моляся святе. Тем же небесная врата отверста, и душа праведных во образе ластовиц летающыя видел еси. С ними же ныне водворяешися Андрее блаженне.
Запев. Христа Бога истинно возлюбив, себе отверглся еси. И Тому последовав, яко же Он рекл есть, любяи душу свою спасти, погубит ю. Тем же душу свою в живот вечныи соблюл еси, достохвалне святе Андрее.
Слава. Великая и преславная ныне сбышатися в Небеснем Царствии. Аще и юрод был еси мирови, но Христови мудрец явися достохвалне. Призирай с небеснаго круга, на ны чтущыя память твою.
И ныне. Богородичен. Всяк земен покрывается покровом Твоим, преславная заступнице Богородице, яко же блаженныи Андрей Тя виде за мир молящюся, не созданному Существу, в созданное естество от Тебе оболкшемуся. Катавасия.
Отпуст: Господи Исусе Христе, Сыне Божии, молитв ради пречистыя Твоея Матере, и святаго блаженнаго Андрея, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.