Глас 8.
Песнь 1. Ирмос.
Грядите людие, поем песнь Христу Богу, раздельшему море, и проведшему люди, яже испусти из работы египетския, яко прославися.
Запев с поклоном: Святителю Христов Василие, моли Бога о нас.
Твоему гласу подобаше приити Василие, начати хотящим хвалы твоя. Но отче молбу прием, обычай подавай независтно нам.
Добродетелей ты жестокии шествовал еси путь, в гладкии достигл еси, и не сопротивныи небесныи восход. И всем явися образ Василие.
Запев. Страсное взыграние томящее плоть, любомудрия желанием наказал еси. Тем же в нетленных водворяешися царьствиих, отче Василие.
Душевныя страсти, благопотребно Василие, вкупе же и телесныя, духовным посекл еси мечем. Себе Владыце жертву принесл еси.
Слава. Ты, быв не изреченным таинник Василие, Христову царствию научил еси священне отче. Яве Троическии Свет облистал еси нам.
И ныне. Кто изрещи Твое достойно возможет, еже паче слова Зачатие. Бога бо родила еси плотию Пречистая, нам явльшася Спаса и Господа.
Катавасия: Избави от бед рабы своя святителю Христов Василие, яко вси по Бозе к тебе прибегаем, ты бо молиши о нас Христа Бога нашего.
Песнь 3. Ирмос.
Утверди нас Собою Господи, древом умерщвеи прегрешения, и страх Твой всади в сердца наша, яко Человеколюбец.
Запев. Спритече Христову, и спросия память твоя отче, Рожеству. Его же несказанное таиньство, своими ученьми яве сотворил еси.
Страхом Господним утвержаемь, начало бо мудрости сей есть. Любовию лучшею вперися премудрости, о Василие.
Запев. Наказания быв всякого исполнь, не токмо долняго и попираемаго, много паче лучшаго, явился еси свет мирови, Василие.
Слава. Василие премудре, вшел еси деянием, и деяние в шествие видения Божественейша показа. И сущих разуму научил еси яве.
И ныне. Без семене во чреве Бога зачала еси, и раждаеши несказанно воплощаема. Нань же зрети не смеют Чистая небесныя силы, Приснодево. Катавасия.
Седален, глас 8. Премудрости Слова навык, и писание Закона отложь, всем проповедал еси благодати слово. И душам скрижали угладил еси словесы своими, в них же начертал еси божественая учения. Тем же и мрак прошед облаком покрова телесе, просиял еси духом святителю Василие. Моли Христа Бога, грехом оставление подати, чтущым любовию святую память твою.
Слава, и ныне. Радуйся яже от ангела миру Радость Приимшая. Радуйся, Рождьшая Творца твари. Радуйся, Сподобльшаяся быти Мати Христа Бога
Песнь 4. Ирмос.
Услышах Господи, слух Твоего смотрения, и прославих Тя Едине Человеколюбче.
Запев. Украшается яко же Рожеством, Христова невеста Церкви, тако и памятию твоею преблаженне.
Непоборен явился еси, Богови сподобьствуя Василие, иже всем Того повелением покаряяся.
Запев. Церкви подастся от Бога, ограждение, и стена тверда, Василие всеблаженне.
Слава. Сопротивобожным, сечиво ты секателно, и огнь поядая прелесть, явися отче Василие.
И ныне. Молим Тя Чистая, яже Бога без семене заченшую, присно молити за рабы Своя. Катавасия.
Песнь 5. Ирмос.
Света Подателю, и веком Творче Господи, во свете Твоих повелении направи нас. Иного бо разве Тебе Бога не знаем.
Запев. Водити воистинну сугуб Церкви праздник днесь, Обрезания, яко Младенцу Владыце явльшуся на земли, и память раба мудра и треблаженна.
Неподвижимыи свет почив на тебе преподобне, пресветлу свещю мирови тя показа Христос. Тем же память твою поем Василие.
Запев. Иже все темно написанное в Синаи бытие Моисеом, ты сказая от Божественых сокровищ, начертал еси всем преблаженне Василие.
Слава. Ни законоположник Моисей, ни первее закона Иосиф бысть, иже по тебе пищи пшеницомеритель. Божественыя бо плоти, сам раздробитель явися Василие.
И ныне. Тебе рождьшей Христа, иже всему Содетеля, зовем. Радуися Чистая. Радуися яже Свет возсиявшая нам. Радуися вмещьшая Бога Невместимаго. Катавасия.
Песнь 6. Ирмос.
Бездна согрешении обыде мя последняя, но яко пророка Иону, Господи, Господи возведи из истления живот мой.
Запев. Напитал еси душа, тающыя гладом нищих, независтно. И алчущым сердца, всякаго насытил еси Василие Божественаго веселия.
Напитал еси богатно алчющыя, пищею небесною. Хлеб бо ангельскии есть слово твое Василие, им же изряден пшеницодавец был еси.
Запев. Собрал еси пчелныи, Василие любоболезнено, добродетели всяк цвет, и худог быв, в них же ублажаешися.
Слава. Потщался еси мира отлучитися, и с Богом пожити. Тем же нестоятелных и тленных, преблаженне Василие оставль, пребывающая, яко мудре стяжал еси.
И ныне. Спаси от бед стадо Твое Богородице, яко вси с Богом к Тебе прибегаем. Яко к Нерушимей Стене и Предстателнице. Катавасия.
Кондак, глас 4. Подобен. Явился еси днесь.
Явися столп неподвижимыи Церкви, подая всем некрадомое богатьство земным, запечатлея твоими ученьми, небоявленне Василие преподобне.
Икос. Целомудрия чаша, уста премудрости, и степень учением, Василие Великии, всем облистает мыслено. Приидите убо и станем в дому Божии, тепле воззирающе, чюдесми сего красящеся, яко же лечею облиставшеся жития, чистым духом прохлаждьшеся, подобящеся того вере, и теплоте и смирению, им же дом явися естества Божия. К нему же вопиюще поем, небо явленне Василие преподобне.
Песнь 7. Ирмос.
Телу златому премудрыя дети не послужиша, и в пламень сами поидоша, и боги их обругаша. Среди пламене возопиша, и оброси их Ангел, услышася уже уст ваших молитва.
Запев. Образ Отечь Сын, и Сыну Дух есть. Ты же Духу, о Василие несквернено зерцало, дом же всей Троице. Блаженна память твоя, и славящии ея возпрославляются.
Углубив ум, во глубины Божия не постижимыя. И собрав многоценныи ты бисер разума, наполнил еси мир премудрости. И звати научил еси, благословен Бог отец наших.
Запев. О едино дохновение ума, священных супруг. Иже яко едина душа, во двою телеси неразделно, в Григории Василие, желанием Божественым совокуплени, в Василии же Григорие, ныне молите Христа о стаде вашем.
Отец сирым, и вдовицам защитник, и богатьство нищим. Болящим утешение, и сущим в богатьстве окормление. Старости жезл явися, и наказание юности. И инокующым добродетели правило, Василие.
Слава. Очищь от всякого тиннаго сквернения ум Василие, посетил еси духовная желанным ти духом. Тем же воспевая Троицу, с дерзновением взываше, благословен Бог отец наших.
И ныне. Тя купину Моисей, в горе Синайстей огнем палящу Чистая провидяше. Приемшую не опално непостоянную зарю, Неизглаголаннаго Существа. Соединьшуся дебельством плоти, во Един иже в Ней святых Состав. Катавасия.
Песнь 8. Ирмос.
Неизреченною мудростию составльшаго всяческая, Бога Слова, и от несущих в бытие приведшаго, благословите дела Господня Господа.
Запев. Иже несказанным промышлением, даровавшаго Василия мирови свет благочестия, трубу же богословия, благословите вся дела Господня Господа.
Иже богатным действом всельшася в мудраго Василия, и тем благочестно богословльшаго, благословите дела Господня Господа.
Запев. Иже божественых твоих словес наслаждьшиися Василие, непрестанно в твоей памяти торжествующе вопием, благословите дела Господня Господа.
Слава. Зарю словес послал еси Василие мирови, светом наставляющю Едино чтити Троическое Естество. Благословите дела Господня Господа.
И ныне. Иже от Отца прошедшаго прежде век, и безлетнаго Бога Слова, и в последняя восиявша от Девы, благословите вся дела Господа. Катавасия.
Песнь 9. Ирмос.
Яже прежде Солнца светильника Бога восиявша, плотию к нам пришедша из боку Девичу, неизреченно вочеловечьшася, Благословеная Чистая, Тя Богородице величаем.
Запев с поклоном. Перваго пастыря, яко овча верно Христово Василие, живоносным стопам последовал еси. Мучителю бо свою душю отче предал еси доблественне, и прежде в беде сущи Церкви, всеблаженне.
Запев. Церковное всесвященное Христово видев совокупление, твоим украшено святительством мудре. Всегубитель яко от грома тресновен быв, падеся мучитель. Сущия бо иже в тебе Духа зари нестерпе, Василие.
Слава. Апостольским седалищем, ликом же страдалец Христовых, патриарх сени, и праведных пищи, и радости пророк, сподобися Василие. Богородице бо служитель, и Троице таинник был еси.
И ныне. Иже напраснаго древняго погубления осуждение, и праматере исправление, юже к зиждителю мост, тя Богородице величаем. Катавасия.