Праздник Успения Пресвятой Богородицы является непереходящим, всегда отмечается 28 августа (15 августа по старому стилю) и имеет 1 день предпразднества и 9 дней попразднества. В этот день заканчивается Успенский пост, но если праздник совпадает со средой или пятницей, то пища разрешается только с рыбой, а разговляются после поста на следующий день.
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 1-й
В рожестве девство сохранила еси, и во успении мира не остави Богородице: преставибося к животу, Мати сущи Живота, и молитвами Твоими, избавляеши от смерти душа наша.
Канон, глас 1-й
Песнь 1. Ирмос
Преукрашена божественою славою, священная и славная Дево память Твоя, вся собра на веселие верныя, начинающи Мариам, с лики и тимпаны, Твоему поюще Единородному, славно яко прославися.
Запев: Пресвятая Госпоже Богородице, услыши молитву раб Своих, молящихся Тебе (поклон).
Да провождают невеществении чинове, небошественое в Сион божественое тело Твое. Внезапу же стекшеся апостол множество, от конец Богородице, Тебе предсташа купно, с ними же Пречистая, Твою честную Дево память славим.
Запев. (Повторяем стих).
Слава. Победныя почести взят на естество Чистая, Бога рождьши, обаче же подобящися Творцу Своему и Сыну, паче естества повинуешися естественым законом. Темже умерши, с Сыном востаеши вечнующи.
И ныне. (Повторяем стих).
Катавасия: Спаси от бед рабы Своя Богородице Дево, яко вси по Бозе к Тебе прибегаем, яко к нерушимей стене и заступлению (поклон). Господи помилуй (3 раза
с поклонами).
Песнь 3. Ирмос
Содетельная и содержащая вся, Божия сила и мудрость, непреклонну и недвижиму, Церковь Свою утверди Христе. Един бо еси свят, и на святых почиваяи.
Запев. Жену Тя мертвену, но паче естества и Матерь Божию, видевше Пренепорочная славнии апостоли, ужасно прикасахуся руками, славою облистающу, яко богоприятное селение видяще.
Запев. (Повторяем стих).
Слава. Постиже суд руце досадителя дерзаго, усечение нанесыи: Богу сохраньшу, честь одушевленому киоту, славою Божества, в Нем же слово плоть бысть.
И ныне. (Повторяем стих). Катавасия.
Слава, и ныне. Ипакой, глас 5-й. Блажим Тя вси роди Богородице Дево, в Тя бо невместимыи Христос Бог наш, вместитися изволи: блажени есмы, и мы Предстательницу Тя имуще, день бо и нощь молишися за ны, и скипетры Царствия Твоими молитвами утвержаются. Тем благодаряще вопием Ти, радуися Обрадованная Господь с Тобою.
Песнь 4. Ирмос
Речи пророк и гадания, воплощение прорекоша от Девицы Твое Христе: свет блистания Твоего, в свет языком изыдет, и возгласит Ти бездна с веселием, силе Твоей слава Человеколюбче.
Запев. Видите людие и чудитеся, гора бо святая явственая Богу, в небесныя обители превыше вземлется, небо земленое, в небесное и нетленное селение вселяемо.
Запев. (Повторяем стих).
Слава. Жизни присносущныя и лучшия, смерть Твоя бысть преходна Чистая, от тленныя, к божественей воистину и непреходимей преводя Тя Чистая, с веселием Сына зрети Своего и Господа.
И ныне. Взяшася двери небесныя, и Ангели воспеша, и приятова Христос, девства Своея Матере сосуд, Херувими подъяша с веселием, Серафими же славят радующеся. Катавасия.
Песнь 5. Ирмос
Божию и неизреченную доброту, дел Твоих Христе исповем: от присносущныя бо славы, присносущное сличное просвещеи сияние, из девически утробы, сущим во тме и сени воплощься восия Солнце.
Запев. Яко на облаце Дево апостольскии лик носим к Сиону от конец, служити Тебе облаку легкому собирашеся, от Нея же Вышнии Бог, сущим во тме и сени, праведное возсия солнце.
Запев. (Повторяем стих).
Слава. Труб богоприятнии языцы, богословных мужей, благогласнее Богородице вопияху, исходную возглашающе песнь пояху духом, радуися нетленныи Источниче, Божия живоначальнаго и спасенаго всем воплощения.
И ныне. (Повторяем стих). Катавасия.
Песнь 6. Ирмос
Морскии пучинородныи китов, внутрь Божии огнь, тридневнаго Ти погребения воображение, Ему же Иона пророк явися, спасен бо яко же прежде страждаше, неврежден вопияше, пожру Ти со гласом хваления Господи.
Запев. Дает Ти яже превыше естества Царь всех и Бог, в рожестве бо Деву якоже сохрани, тако и во гробе тело соблюде нетленно, и спрослави божественым преставлением, честь Тебе яко Сын Матери даруя.
Запев. (Повторяем стих).
Слава. Воистину Тя яко светел свещник невещественаго света, кадильницу златую божественаго угля, во Святая Святых всели, ручку и жезл, скрижаль богописанну, ковчег святыи, трапезу слова жизни, Дево рожество Ти.
И ныне. (Повторяем стих). Катавасия.
Слава, и ныне. Кондак, глас 2-й. В молитвах неусыпающую Богородицу, и в заступлениих известное упование, гроб и смерть не удержаста: яко бо Живота Матерь, на живот престави, иже во утробу вселивыися приснодевственую.
Икос. Огради ми помышления Спасе мой, ибо стену миру воспети дерзаю, пречистую Матерь Твою. На столпе глагол укрепи мя, и в тяжких мыслех заступи мя. Ты бо взывающим, и просящим верою, моления исполняеши, Ты убо даруй ми язык приносен, и помысл непостыден, всяко бо даяние сияния, о Тебе низпосылается Светоподателю, иже во утробу вселивыися приснодевственную.
Песнь 7. Ирмос
Безстудней ярости же и огню, божественое желание сопротивляяся, огнь убо орошаше, ярости же смеяшеся, богодухновенною словесною преподобных, тривещанною цевницею противу вещая, мусикийским пищалем, посреди пламене, препрославленыи отец наших Боже благословен еси.
Запев. Богоделанныя скрижали Моисей, писанныя Божественым Духом, яростию сокрушь: но сего Владыка, рождьшую невреждену в небесныя сохрань домы, ныне внутрь всели, с нею играюще вопием Христови, препрославленыи отец наших Боже благословен еси.
Запев. (Повторяем стих).
Слава. В кимвалех усты чистыми, мусикийски же, сердцем светлым, доброгласною трубою, высокою мыслию, Девыя и Чистыя в нарочитыи избранныи день преставления, детельными плещуще руками вопием: препрославленыи отец наших Боже благословен еси.
И ныне. Богомудрии соберитеся людие, Божия бо славы селение, от Сиона преставляется, к небесному жилищу, идеже глас чист празднующих, глас несказанна радования, и в веселии вопиющих Христови, препрославленыи отец наших Боже благословен еси. Катавасия.
Песнь 8. Ирмос
Пламень орошая преподобныя, злочестивыя же опаляя, Ангел Божии всемощныи, показа отроком. Живоначальныи же источник содела Богородицу, тлю смерти, и живот точащую поющим, Содетеля Единаго поем избавлении, и превозносим Его во веки.
Запев. Глаголы последоваху, божественому ковчегу священному, все множество богословец в Сионе, камо идеши ныне скиние зовуще, Бога живаго; не оскудей призирающи верою поющия, Содетеля Единаго поем избавлении, и превозносим Его во веки.
Запев. (Повторяем стих).
Слава. Яко да воздевши руце, исходиши Всенепорочная, руце ими же Бога носила еси плотию, с дерзновением яко Мати рече к Рожденному, яже Ми дал еси, во веки сохрани вопиющия Ти: Содетеля Единаго поем избавлении, и превозносим Его во веки.
И ныне. (Повторяем стих). Катавасия.
Песнь 9. Мрмос
Побеждаются естества пределы, в Тебе Дево чистая. Девствует бо рожество, и живот обручает смерть. По рожестве Дева, и по смерти жива, спасаеши присно, Богородицу Тя величающия.
Запев с поклоном. Дивляхуся Ангельския силы, в Сионе смотряюще своего Владыку, женскую душу рукама носяща; пречисто бо Рождьшей, сынолепно провозглашааше, гряди Чистая, с Сыном и Богом прославлена буди.
Запев. (Повторяем стих).
Слава. Опрята лик апостольскии, богоприятное тело Твое, со страхом зряще, и гласом велиим вещающе, в небесныя домы к Сыну восходиши, спасай присно Богородице достояние Свое.
И ныне. (Повторяем стих). Катавасия.
Задостойник: Величай душе моя, иже от земли на Небо честное преставление Божия Матери.
Ангели Успение Пречистыя зряще удивишася како Девая восходит от земли на Небо.
Побеждаются естества пределы, в Тебе Дево чистая. Девствует бо рожество, и живот обручает смерть. По рожестве Дева, и по смерти жива, спасаеши присно, Богородицу Тя величающия. (Поклон земной)
Отпуст: Господи Исусе Христе Сыне Божии, молитв ради пречистыя Твоея Матере, честнаго и славнаго Ея Успения, святых славных и всехвальных апостол, и всех святых, помилуй и спаси нас, яко Благ и Человеколюбец. Аминь.