Канон Святому Духу

К Духу Святому обращено все, имеющее нужду в освящении. Он есть начало и неисчерпаемый источник нашего освящения, без которого невозможно вечное спасение. Без Духа Святаго никто не может ни греха избежать, ни исполнять заповеди Божии. Поэтому будем всегда стремиться к тому, чтобы Дух Святый был в нас и с нами. Для этого надо поддерживать чистоту своего душевного сосуда, молитвенно прославлять Третью Ипостась Пресвятой Троицы. Лучшим молитвенным прославлением Духа Святаго будет постоянное возношение Ему помещаемого ниже канона. Этот канон также обязательно нужно помолиться на праздник Святаго Духа (в понедельник после праздника Святой Троицы).
 

——————————————————————

Общее начало и конец всем канонам →
Порядок чтения по уставу
——————————————————————
 

Тропарь, глас 8-й

Благословен еси Христе Боже наш, иже премудрыя ловцы явлеи, послав им Дух Святыи, и теми уловлеи вселенную, Человеколюбче слава Тебе.
 

Канон, глас 1-й
 

Песнь 1. Ирмос

Люты работы избыв Израиль и непроходимо пройде яко по суху. Врага зря потопляема, песнь в веселии поет Богу, чудотворящему мышцею высокою. Яко прославися.

Запев: Слава Тебе Боже наш, слава Тебе (поклон).

Божественыи Душе Святыи, иже всем раздаваяи дарования, и вся творя волею. Вдохни ми светоносное Твое дарование. Яко да славлю Тя со Отцем и Сыном совокупляема.

Запев. Иже небесным силам, святостнаго дохновения Твоего, благодать давыи Утешителю. Моего смысла скверну изчистив, святости Твоея покажи исполнена.

Слава. Источниче жизни веруемыи, и струя Божественыя благости. Душе Божии Святыи. Ум мой умерщвеныи животворя, Твоим действом воскреси, пети Твою благость.

И ныне. Богородичен. Храм Дево бысть Божии, нашествием Духа содетелною силою Его. Силу дарующа рожествену Благодатная. Радуися яже содила еси плотию Слово безначалное.

Катавасия: Сохрани от бед рабы Своя, Душе Святыи Боже наш, яко усердно к Тебе прибегаем, к милостивому Избавителю и всех Владыце Господу и Богу (поклон). Господи помилуй (3 раза с поклонами).
 

Песнь 3. Ирмос

Первовечному от Отца рожденну нетленну Сыну. И в последняя лета от Девы воплощену без семени, Христу Богу возопием. Воздвигнувыи рог наш, Свят еси Господи.

Запев. Имея по естеству, хотения силу сточну. Небесныя премирны яко Бог соблюдая. Дух Святыи непрестанно учит вопити, Свят еси Господи.

Запев. Хвалами немолчными, облиставшия благодать Духа, богогласным апостолом, в дыхании бурне. Согласно славим со безплотными лики вопиюще, Свят еси Господи.

Слава. Едину власть, и Божество едино и силу. Едино начало и Царство Святыя Троица. Мудрствующе вопием. В трисвятем гласе вопиюще, Свят еси Господи.

И ныне. Богородичен. Колесниценосна, и светло пребывалище Всечистая. Херувим вышьши бысть, Бога на руку носившия. Тем же Ти вси воспеваем Чистая. Радуися Всеблаженая. Катавасия.

Слава, и ныне. Седален, глас 4-й. Праздника преполовение, и конечныи праздник празднуем вернии светло, еже есть пятьдесятница, обещания исполнение и любве, в сей бо огнь утешителев сниде на землю, яко в видении язык, и ученики просвети, и сих небесныя таинники показа: свет бо прииде утешителя, и мир просвети.
 

Песнь 4. Ирмос

Жезл ис корене Иессеова, и цвет от него Христе от Девы прозябл есть. Из горы хвалныя присенныя часты, прииде воплощься от Безмужныя безплотныи Бог. Слава силе Твоей Господи.

Запев. Велика даруя нам Дух Всесвятыи. Апостолом найде яко Божественен, яко благ. Яко исполняя всяческая. Яко боготворя, яко освящая. Яко всех творителен владычески и самовластен.

Запев. На престоле Христе отеческом седе, низпослал еси учеником Твоим утешителя якоже обещася Спасе, яко Бога грядуща. Посылая же яко нечюжа. Яко всех содетеля. Иже из Отца изходяща.

Слава. Глаголав языки пророк будущая, научи Дух древле Всесвятыи. Языки же премудрых апостол вещает, во гласе дыхания бурнейша, величия Божия. Ныне существене сбываем.

И ныне. Богородичен. Врата умнаго света именуем Тебе Богомати, имиже вниде к нам Христос. Красен явися блистаньми Божества, в плотьсте одеянии покровен. Невидим яко Бог, ныне же по нас видим. Катавасия.
 

Песнь 5. Ирмос

Бог сыи мира, Отец щедротам. Великаго совета Ти ангела, мир подавающа послал еси нам. Тем к свету Богоразумия наставляеми, от нощи утренююще, славословим Тя Человеколюбче.

Запев. Иже Духом премудрости и страха Божия, истины и света и разума, мир подаваяи, вселися в ны. Яко да освятившеся Твоим вселением, из нощи утренююще славословим Тя Человеколюбче.

Запев. Иже вся содержаи, и всем сыи Господь. Иже тварь соблюдаяи непадаему. Подаждь святьбу нам и просвещение. Яко да насытившеся Твоего светодательства. Из нощи утренююще славословим Тя Человеколюбче.

Слава. Иже древле закон нанертавыи Моисею. Новаго завета повеления, и закон благодати излагает ясно, во апостольских сердцих написав. Божественыи Утешитель пришед. Яко Человеколюбец.

И ныне. Богородичен. Клятву Евжину всех матере, Твоим рожеством Дево упразднила еси, миру благословение возсиявши Христа. Тем же радующеся, усты и нравом Богородицу воистину Тя исповедающе блажим. Катавасия.
 

Песнь 6. Ирмос

От утробы Иону цела изверже, морскии зверь. Якова прият. В Девицу убо вселився Слово, и плоть приим, пройде сохранив неистленну. Еже бо не пострада истления, рождьшую сохранив невреженну.

Запев. Своим учеником исполняя обещание. Духа Христе сим послал еси. Действом великих чудес дарующа. И языки огнезрачныя дарствующа. Да Твоего познания языком стада исполнят.

Запев. Прийди к нам Душе Святыи, причастники Твоея содевая святости. И света не вечерняго, и Божественыя жизни, и благоуханнейшаго раздаяния. Ты бо река Божества, из Отца Сыном изходящи.

Слава. Спаси Утешителю, иже верно поющих Боголепное пришествие Твое. Сыном исходящии. И очисти от всякия скверны, яко благоутробен. И покажи достойных Твоего осияния. И светом Твоим Боговиднейшим сотворяя несквернена зерцала.

И ныне. Богородичен. Всяк лик пророческии, от Бога тайно учим. Предвидяще таиньство неизреченнаго и Божественнаго воплощения. Бога Слова из Тебе Дево Мати возвещаше. Ты бо истиннейшии и древнии свет явила еси. Катавасия.

Слава, и ныне. Кондак. Егда сошед языки размеси, разделяше племена вышнии. Егда же огненныя языки раздая, в совокупление вся призва, единогласно славити Всесвятыи Дух.

Икос. Скоро и твердо даруй утешение рабом Своим Исусе, внегда унывати Духом нашим, не отлучайся от душ наших в скорбех, и не удаляйся от смысл наших в напастех, но присно нас предвари, и приближися к нам, приближися иже везде сыи, якоже апостолом Твоим спребывал еси всегда, тако и любящим Тебе, соедини Себе Щедре, да совокуплени Тебе поем, и славим Всесвятыи Дух.
 

Песнь 7. Ирмос

Отроцы во блазей вере воспитани, нечестива веления небрегше. Огненаго прещения не убояшася. Но посреде пламени стояще пояху, отцем Бог благословен еси.

Запев. Ныне обетования предузаконение Христово исполнися. Разделение бо языком, Духа пришествие сказа учеником. Облиставшие Троицы единаго Пребожественаго.

Запев. Древле убо разделися, согласие языком безсловесно. Ныне же ко единому сложению яве собрашася. Самодействующу Честному и Божественому Духу, от Троица Пребожественыя единому.

Слава. Свыше носиму дохновению Святаго Духа. Величия Божия преславно вещаху, апостоли Христовы. Согласно поюще, иже отцем Бог благословен еси.

И ныне. Богородичен. Образ Твоего рожества, трие отроцы в пещи показаша. Яко бо пребыша огнем не вредими. Сохранися Чиста, приемши во чреве Огнь нестерпимыи. Иже отцем Бога благословенаго. Катавасия.
 

Песнь 8. Ирмос

Чюдо превелие, росодавицу вообрази пещь образом. И яже бо прият неопали юных, такоже и огнь Божественыи Дево, юже пройде Чисту. Тем поюще возопием. Да благословит тварь всякая Господа, и превозносит Его во веки.

Запев. Святыи Душе происходяи от Бога. Святость всем подаждь иже в Тя верующим. Свят и подателен человеком святости Ты еси. Тем же воспевающе взываем. Да благословит тварь всякая Господа, и превозносит Его во веки.

Запев. Даеши подателне яко благодетель дар благости, Тебе поющим Утешителю. Благих бо подателен еси, и благости пучина. Темже Тя хваляще воспеваем. Да благословит тварь всякая Господа, и превозносит Его во веки.

Слава. Истинен животворив есть Дух. Самодвижим самовластен. Разделяя яко хощет даров раздаяния. Самовладычен, самоповеленен, безначален. Ему же ныне поклоняющеся (поклон) воспеваем. Да благословит тварь всякая Господа, и превозносит Его во веки.

И ныне. Богородичен. Кто Твоему премножеству благоутробия не дивится, безначалее Слове. Нас ради обнищал еси богат сыи, и во чрево Девы Святыя вселися. Тем же воспевающе взываем. Да благословит тварь всякая Господа, и превозносит Его во веки. Катавасия.
 

Песнь 9. Ирмос

Радуися девственная похвала. Радуися Мати Пречистая. Юже вся тварь Божественными песньми величаем.

Запев с поклоном. Се к нам Утешителя другаго низпослал еси. Единосущном Тебе Слове и Отцу Твоему сопрестолна.

Запев. Спаси от искушении Утешителю, единомудрствующих Тя. И славословящих Твое превечное бытие.

Слава. Прииди к нам Утешителю, Твоего утешения насыщая. Славу Твою богословящим неизреченную.

И ныне. Невеста Божия Всенепорочная. Иже почитающих Тя достойно, избави от искушении молитвами си. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Иже в видении огненых язык низпослав Пресвятыи Дух в день пятьдесятныи, на святыя Своя ученики и апостолы, Господи Исусе Христе Сыне Божии, молитв ради Пречистыя Твоея Матере, и всех ради святых помилуй и спаси нас яко Благ и Человеколюбец. Аминь.

+

Авторизация

* *
*

Регистрация

*
*
*
*

Проверочный код Time limit exceeded. Please complete the captcha once again.


Восстановление пароля