Великую духовную пользу получит христианин, если будет молиться каноны святым, память которых Св. Церковь вспоминает в текущий день. Для тех верующих, у кого нет канонов тем или иным святым, можно молиться данный канон святителю, подставляя в текст общего канона имя того святого, кому молишься канон. Каноны тем или иным святым можно молиться независимо от того, вспоминает ли Святая Церковь их память в данный день или нет. Если усердно молиться святым, они всегда будут нам помощниками в достижении спасения.
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 4-й
Правило вере и образ кротости, воздержанию учителя, яви тя Господь стаду Своему, яже вещем истина. Сего ради стяжав смирением высокая, и нищетою богатая. Отче наш святителю (имя рек), моли Христа Бога спастися душам нашим. (Дважды).
Слава, и ныне. Богородичен. Иже от века утаенное, и ангелом несведомое таиньство. Тобою Богородице земным явися, Бог в неразмесне снятии воплощаемь. И крест волею нас ради восприим. Им же воскресив первозданнаго, и спасе от смерти душа наша.
КАНОН, глас 6-й
Песнь 1. Ирмос
Яко по суху ходив Израиль, по бездне стопами, гонителя фараона видя потопляема, Богу победную песнь поя вопияше.
Запев: Святителю Христов (имя рек), моли Бога о нас (поклон).
С вышними лики яко святитель. Яко Божии служитель предстоя, о нас прилежно молися, получити нам вечных благ молитвами твоими.
Запев. Избран быв Господеви служити честному Евангелию, блаженне (имя рек), во благоразумии люди, учении премудрыми отче возрастил еси.
Слава. Разумом Божиим обогащься, слово животное от сердца источил еси. Напояя душя олядевшия страстьми, премудре святителю Божии (имя рек), богоблаженне.
И ныне. Богородичен. Священныи лик пророческии проявляше издалеча, хотящую Тя Божию истинную родительницу Чистая, вышшую Херувим и всея твари.
Катавасия: Избави от бед рабы своя, святителю Христов (имя рек), яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Песнь 3. Ирмос
Несть свята яко же Ты Господи Боже мой, вознесыи рог верных си Блаже, и утверждь их на камени исповедания Ти.
Запев. Искапая божественую сладость, из устну твоею отче. И горкаго безбожия изсушил еси капли. Напоив благочестивых пития, Божияго разума блаженне.
Запев. Божиим судом произбран быв, святитель показася, безкровны жертвы Богови принося, пожренному нас ради, отче святителю (имя рек).
Слава. Гроб идеже лежит честное тело твое, благоухание источает яко Рай Божии, облагоухая верных, святителю преславне и всечестне (имя рек).
И ныне. Богородичен. Разумети рожества Твоего Чистая, неизреченныя глубины недоумеет ум человечь. Бог бо Себе смири щедрот ради во чреве Твоем, всего мя обнови. Катавасия.
Седален, глас 4-й. Правоверно преподобне Церковь Христову упасл еси. Еретическия отгнал еси горкия плевелы. В вышних водворяешися блаженне.
Слава, и ныне. Богородичен. Слово Отчее Христа Бога нашего, из Тебе воплощьшееся разумехом Богородице Дево едина чистая и благословеная. Его же ради непрестанно Тебе воспевающе величаем.
Песнь 4. Ирмос
Христос мне сила Бог и Господь, честная Церкви боголепно зовет вопиющи, от совести чисты, о Господе празднующи.
Запев. Ты исполнен Святаго Духа, священныи отче (имя рек), лукавыя духи от человек отгнал еси, верны же духовными учении своими сотворил еси.
Запев. Единицу несозданну богословил еси, треми Лицы разделяему, непресекому и несмесну, просвещая благочестивых священными богословии твоими.
Слава. Умертвив первие плотьская мудрования, воздержанием и труды, святитель божествен показася, и предстоятель Троице всесвященен.
И ныне. Богородичен. Клятва разорися прабабняя, Тобою Богомати. Ты бо нам Пречистая источника породи святыни присносущнаго Живота. Катавасия.
Песнь 5. Ирмос
Божиим светом Ти Блаже, утренюющих Ти душя любовию, просвети молюся, Тя ведети Слово Божие истиннаго Бога, от мрака греховнаго изимающа.
Запев. Божия божествене свершая, и чистейшим помыслом чистым прикасаяся, непорочен явися, служа Богови, яко Божии святитель священнейшии.
Запев. Идольстии угодницы, быша угодницы Богу, твоими учении честными. Их же от недостойных изимая, достоин явися угодник Богу Вседержителю.
Слава. Благодатию призван быв, разрушил еси безбожия идольская, одождением словес твоих преподобне. Оляденевшая сердца плодоносна соделал еси, Божиею благодатию.
И ныне. Богородичен. По рожестве Ти страннем пребыла еси Девою, яко же прежде. Бог бо бе рождеися, и претворяя вся волею, безмужная Марие богоневестная. Катавасия.
Песнь 6. Ирмос
Житейское море, воздвизаемо зря напастей бурею, в тихо пристанище притек вопию Ти, возведи от тли живот мой Многомилостиве.
Запев. Язык твой Духом изощрен разумно, яко трость скорописца, написа в сердца благочестивых, слово благодатное всесвященне отче, Божиим мановением.
Запев. Божественым поучаяся, яко входя в мысленая, святая святых верных совершаеши Духом, троическою зарею, священныи отче всесовершеннейшии (имя рек).
Слава. Струями велении твоих, заградив мутная нечестивых веления. Яко река показася мирная, благочестия напояя составления верных, святителю всечестне.
И ныне. Богородичен. Слово во чреве Твоем вселися без Семене, и человек явися совершен, обновляя естество боголепно, яко же Сам весть един, богоприятная Отроковице всенепорочная. Катавасия.
Слава, и ныне. Кондак, глас 2-й. Божественыи гром, труба духовная, вере насадителю, и отсекателю ересем, Троице угодниче великии святителю (имя рек), со ангелы предстоя, присно моли непрестанно о всех нас.
Икос. Леностию окаянныи аз отпадох, и в смерть уснух. Но яко пастырь добр воздвигни мя отче, и страсти моя успи, иже зле мучащыя мя, яко да востав чисте воспою, твое светоносное торжество. Еже Владыка вселенней прослави достойно, яко раба вернейша, и яко учителя премудра, яко друга и таинника, и яко строителя своим преданием, их же добре сохранил еси, помазание нескверно, (имя рек) премудре. Присно моли непрестанно о всех нас.
Песнь 7. Ирмос
Хладодательну убо пещь сотвори ангел, преподобным детем. Халдеи же опали велением Божиим. Мучителя увеща вопити: благословен Бог отец наших.
Запев. Просвещаемь духовною благодатию, еже к божественному мановению причащении, светодателная бысть звезда, просвещая мудре поющих: благословен Бог отец наших.
Запев. Святейша церковь быв, озаряема добродетельными деянии. Живущу имел еси в тебе священно Троицу несозданную. Вопия: благословен Бог отец наших.
Слава. Дремание от очию отринув, божествеными бодростьми, Божия сияния прият от ангела света, столп и подпор верным, святителя истинна совершающа тя.
И ныне. Богородичен. Седяи в недрех Родителя неописан, в недрех Твоих Пречистая ныне седит описан, Твоим обложен образом, за спасение Адамле описан быв. Катавасия.
Песнь 8. Ирмос
Ис пламене святым росу источи, а праведнаго жертву и воду попали. Вся бо твориши Христе елика хощеши, тем Тя превозносим Господа во веки.
Запев. Гордаго змия, смирением своим смирил еси блаженне, возвышаемь к Богу чистыми твоими разумы. Тем же тя чтем Христа превозносяща во веки.
Запев. Воплощенно Слово богословил еси, и люди от работныя льсти спасл еси, отгоняя идольская нечестия, отче святителю (имя рек), премудре и богоносе.
Слава. Житие свое Владыце твоему имея подобно, и слово житию имея подобящееся. Исполнь быв дней духовных отче, в вышняя прейде покоища.
И ныне. Богородичен. Избавльшеся первыя клятвы Твоим рожеством, преблагословеная Отроковице богорадованная. Глас Гаврииль возсылаем Ти: радуися вина всех спасению. Катавасия.
Песнь 9. Ирмос
Бога человеком невозможно видети, Нань же не смеют чини ангельстии зрети. Тобою бо Пречистая явися нам Слово воплощенно, Его же величающе, с небесными вои Тя величаем.
Запев с поклоном. В землю кротких ты вселился еси святителю, кроток и незлобив быв. С вышними совокупляяся воиньствы, весь украшен добродетельными светлостьми, и светом добродетелей преодеян.
Запев. Зриши Божия, и ангельския светлости, патриарх, и мученик, и апостольския красоты, моля с ними Человеколюбца, оставление грехов и житию исправление, даровати нам преподобне хвалящим тя.
Слава. Яве престол первие украсил еси светло, всех председящих градов. В нем же пожив яко ангел, и святительством сего украсив, помазав освятил еси, соверши люди богомудры.
И ныне. Богородичен. Яко же капля небесная, во Твое чрево Девице дождь сниде, и изсуши потоки летныя. Одолжил есть нетление всем человеком. И избавление Тобою Богорадованная даровася. Катавасия.
Отпуст: Господи Исусе Христе, Сыне Божии, молитв ради пречистыя Твоея Матере, и иже во святых отца нашего (имя рек), и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.