Священномученик Антипо — ученик св. апостола Иоанна Богослова — жил в I веке от Р. X. и был епископом Пергамской Церкви. За его неустанную проповедь о Христе разъяренные языческие жрецы бросили святого в раскаленного медного вола, куда обычно они бросали жертвы идолам. В раскаленной печи угодник Божий усердно молился Господу об укреплении веры христиан и спокойно преставился, как бы уснув. Христиане издревле прибегают в своих молитвах к священномученику Антипе, чтобы он сохранил от зубной боли. Память священномученику Антипе 11 апреля (24 апреля по гражданскому стилю).
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 4-й
Идольския льсти упраздни Антипо, и диявольскую поправ силу, противу богоборцем, дерзновенно Христа исповеда. Тем же со ангельскими чины в вышних водворяяся, Владыце всех славословие принося, и о нас молебное благодарение предлагая, благодать цельбы даруя. Сего ради тя чтем, священномучениче Антипо, моли Христа Бога, да спасет душа наша. (Дважды).
Слава, и ныне. Богородичен. Иже от века утаенное и ангелом несведомое таиньство. Тобою Богородице земным явися, Бог в неразмесне снятии воплощаемь. И крест волею нас ради восприим. Им же воскресив первозданнаго, и спасе от смерти душа наша.
КАНОН, глас 4-й
Песнь 1. Ирмос
Моря Чермнаго пучину, немокрыми стопами, древле шествовав Израиль, крестообразно Моисеовыма рукама, Амаликову силу, в пустыни победил есть.
Запев: Святыи священномучениче Антипо, моли Бога о нас (поклон).
Зарею трисолнечныя благодати сияя, светлыи твой сий праздник творящия озари, страстнаго избавляя мучениче Антипо омрачения.
Запев. Слово Божие тя премудре, свидетеля ближня, своим показа страстем. Злочестие потребляюща, и бесом всяко лукавство побеждающа.
Слава. Умертвив плотская мудрования, многими воздержании, святительства божественаго, священною украсися одежею. И безкровно пожерл еси, иже тебе ради мертва бывшаго.
И ныне. Богородичен. Света Твоего блистаньми озари Отроковице всенепорочная, еже в нощи страстей и искушении, одержимое сердце мое. Правде солнце всем неизреченно возсиявши.
Катавасия: Избави от бед рабы своя, святыи священномучениче Антипо, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Песнь 3. Ирмос
Веселится о Тебе, Церкви Твоя Христе, зовущи, Ты ми крепость Господи, и прибежище и утвержение.
Запев. Источил еси реки учения, верных напояющия. И мутныя воды многобожия изсушил еси.
Запев. Крепостию блаженне Христовою, гонящих крепость ссекл еси, и терпеливно пострадал еси, и мученически венчася.
Слава. Бесом служащия, чести Бога истиннаго уверил еси, плоть мертвеную преподобне, богатьством милосердия понесшаго.
И ныне. Богородичен. Избавляющаго человеки пленения мысленаго Чистая, Избавителя родила еси. Тем же благочестно Тя славим. Катавасия.
Седален, глас 3-й. Божественными угльми, и огнем любве разжегомь мучениче Антипо, безбожия пламень угасил еси. И в разжжен вложен бысть коноб, к невечернему свету отшел еси, отче преподобне. Христа Бога моли, грехом оставление даровати нам.
Слава, и ныне. Богородичен. Божественаго естества неотлучься, плоть быв во утробе Твоей. Но Бог вочеловечься пребысть, иже по рожестве Матерь Деву Тя, яко же прежде рожества сохранив непорочну Едину Господь. Того прилежно моли, даровати нам велию милость.
Песнь 4. Ирмос
Воздвижена Тя, видевши Церкви на Кресте, Солнца Праведнаго, ста в чину Своем, достойно взывающи, слава силе Твоей Господи.
Запев. Не поколеба столпа твоего сердца, беззаконнующих противление, мучениче страстоносе. Тем же распалаемь ревностию веры, явился еси огня сильнейши.
Запев. Дреманием нечестия одержимыя, возбужая прехвалне учении Святаго Духа. К разуму воздвигл еси, истиннаго познания.
Слава. Смирил еси возношение бесом, к Богу возношеньми Антипо прилежа. И восхожденьми божествеными обожаемь, и боговиден познаваемь.
И ныне. Богородичен. По рожестве яко же преже рожества сохранися Дево Мати нетленная. Зиждителя бо всем породила еси, из Тебе человеческое тело волею понесшаго. Катавасия.
Песнь 5. Ирмос
Ты Господи ми свет, в мир пришел еси. Свет святыи, обращая из мрачна неведения, верою воспевающия Тя.
Запев. Возшел еси на гору добродетелей блаженне, и в разум вниде крайняго мрака, и Богу беседовал еси.
Запев. Глагол твоих пленицами, из глубины безбожия, уловил еси святителю заблуждьшия человеки, и благодатию спасл еси.
Слава. Тело огневи на снедь предал еси, вышнюю святителю от Бога, божественую росу богатно приемля.
И ныне. Богородичен. Сыи в зраце Божии пребожественыи, вселися во чрево Твое. В зрак мой облекся Господь Пренепорочная. Катавасия.
Песнь 6. Ирмос
Пожру Ти со гласом хваления Господи, церкви вопиет Ти. От бесовския крове очищьшися, милостию от ребр истекшею Ти кровию.
Запев. Распен воздержанием уды блаженне, постными подвиги и мученическими венчася, их же подъял еси ума Антипо твердостию.
Запев. Стояше на судищи, проповедуя воплощение, иже тебе ради воплощьшагося. И Пилатову судищу представша страстотерпче, и крестом врага уморившаго.
Слава. Болящим врачевство есть церкви. В ней же блаженне мучениче, терпеливое твое лежит тело, божественую зарю дарованием испущает Духа.
И ныне. Богородичен. Святыи Исус вселивыися во утробу Твою, иже во святых Дево почивая, и прославляя иже верою истинною, Сего Отроковице славящия. Катавасия.
Слава, и ныне. Кондак, глас 4-й. Апостолом сопрестольник, и святителем украшение бысть блаженне, мученически прославлься, возсиял еси яко же солнце, всех просвещая, Антипо священне. Разрушил еси безбожия нощь глубокую. Сего ради тя почитаем, яко божественаго суща священномученика, и целеб подателя.
Икос. Верно любовию совокупльшеся, в память священнаго страдальца, и сего песньми восхвалим днесь, яко да благодати от него насладимся. Душа бо спасает от страстей и бед, яко мученик, и яко верен святитель, и поборник молящим его от души. Тем же вопием ему, от бед избави ны присно своими мольбами, отче наш Антипо.
Песнь 7. Ирмос
В пещи авраамския си дети персидстей, любовию благоверия паче, нежели пламенем опаляеми взываху, благословен еси в церкви славы Твоея Господи.
Запев. Юны три отроки изображая, Антипо мудре, яко же посреди пещи стал еси, люто разжженнаго меднаго сосуда, зовыи, благословен еси в церкви славы Твоея Господи.
Запев. Да света неприступнаго явишися причастник. Тму лукавых духов, Богом просвещен мимо текл еси. Благословен еси Боже мой, зовыи, Господи.
Слава. Страсти различны, рукодейством Антипо Духа, утоляеши человеком мучениче. Христовем подобяся страстем. Благословен еси Боже мой, зовыи, Господи.
И ныне. Богородичен. От кровей Отроковице девических Твоих, воистину воплощься, слово Отчее пребезначальное. Наше сокрушение исправляя. Благословена Ты в женах пренепорочная Владычице. Катавасия.
Песнь 8. Ирмос
Руце распростер Даниил, Львова зияния в рове затче. Огненую же силу угасиша, добродетелию поясавшеся, иже благочестия любители отроцы взывающе, благословите вся дела Господня Господа.
Запев. Ныне не в зерцалех зриши, ни в гаданиих, добрых последнее. Лицем же паче к лицу, прешедшим сенем. Вопия радостно, тя прославльшему, благословите вся дела Господня Господа.
Запев. Тя началнаго пастыря Христа, божественыя овцы добре упасша, егова стада премудре. Яко агня беззаконницы всего сожигают огнем, Антипо, поюща, благословите вся дела Господня Господа.
Слава. На камени божественых заповедей сердца твоего утвердил еси стопы. Лютых мук ветры, и ласкателными бурями не поколебася, поя Антипо премудре. Благословите вся дела Господня Господа.
И ныне. Богородичен. Яко Мати всех Творца, яко божественая церкви Вседержителя. Яко земля неделанна клас прозябши, Дево Мати. Верные вопиюща сохрани. Благословите вся дела Господня Господа. Катавасия.
Песнь 9. Ирмос
Камень нерукосечныя горы, от несекомыя Тя Девицы краеугольныи отсечеся Христос, совокупив разстоящаяся естества. Тем веселящеся, Тя Богородице величаем.
Запев с поклоном. Святительски святителю священное скончал еси течение. Со священною жизнию своею, добре совершив. Радуяся потекл еси, ко иже к тебе любимому, Антипо мучениче священне.
Запев. Яко добродетельными виды удобрен быв, славою мучения всеблаженне освятися. И пришел еси к красному Господу, причастием обожаем богоприятне.
Запев. Ты Господнею любовию разжегся мучениче Антипо. В разжжен усердно вниде сосуд, всесожжен. И Богови приятна, отче жертва принесеся.
Слава. Иже священных твоих мощей, священная блаженне рака, миро исцелении точит, злосмрадныя страсти отгонящи, и твою славящих память яве благоухающи.
И ныне. Богородичен. Носящая Христа на руку, мановением носящаго вся, сего яко Бога и Владыку, Чистая, моли ущедрити нас. Иже Богородицу чистую исповедающих Тя всегда, Непорочная. Катавасия.
Отпуст: Господи Исусе Христе, Сыне Божии, молитв ради пречистыя Твоея Матере, и святаго священномученика Антипы, епископа Пергамо-Ассийскаго, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.