Глас 6
Песнь 1. Ирмос.
Яко посуху ходив Израиль, по бездне стопами, гонителя фараона видя потопляема, Богу победную песнь поя вопияше.
Запев с поклоном: Святителю Христов Леонтие, моли Бога о нас.
Светом Твоего божества Христе, мрак неведения души моея озарив, просвети Милостиве. И даждь ми слово Слове, да воспою светло, твоего рачителя торжество.
Запев. Мастию священною помазан быв, от руки Вседержителя Бога, святителю славне Леонтие, моли о хвалящих твою память, получити грехов простыню, и напастей избавление.
Слава. Души самоволное житие, и доброродство веры стяжав, богопорученныя тебе люди, честно показав преблаженне, священне Леонтие, приведе я ко Христу Богу.
И ныне. Языком избавление, Тобою явися Пречистая Владычице, прежде падшим во тлю. Прадеда Адама преступлением. Ты бо Христа пророди, всяческим Творца и Господа.
Катавасия. Избави от бед рабы своя Святителю Христов Леонтие, яко вси по Бозе к тебе прибегаем, ты бо молиши о нас Христа Бога нашего.
Песнь 3. Ирмос.
Несть свята яко же Ты Господи Боже мой, вознесыи рог верных си Блаже. И утверждь их на камени исповедания Ти.
Запев. Свободен сыи ум от страстей соблюд, и сосуд освящен Духу Пресвятому бысть. Всего себе пригвождь к вышнему, любовию преблаженне.
Запев. Твой богоглаголивыи язык бысть, прием Христа внутрь в сердцы глаголющь божия вития, Леонтие. Тому помолися за ны.
Слава. Креста Господня силою укрепляяся блаженне. Пощением бо верныя ти молитвы, стремления бесовская низложив поверже.
И ныне. Велика слава церковная, паче древняго собора Израилева. Ты бо Церкви Божия Богородице, в ней же Христос пожил есть, спасение содела нам. Катавасия.
Седален. Глас 8. Подобен. Премудрости.
Твердостию разума украшаяся, плотьския тягости гордыню попрал еси. Бысть обителище избранно Духу Пресвятому. Неуклонным разумом простираяся к Любящему тя. Тем и ревностию божественою разгараяся славне. Многокозненнаго стрелы притупил еси, и явися ангелом собеседник, святителю Леонтие. Моли Христа Бога, согрешением оставление даровати, чтущим любовию святую память твою.
Слава, и ныне. Яко Всенепорочная Невесто Творцу, яко Неискусомужная Мати Избавителя, Приятелище яко сущи Утешителя Вспетая, беззаконию мя суща скверно жилище, и бесом игралище в разуме бывша, потщися и сих злодействия мя избавити, светло жилище добродетельми соделавши. Светодателная и Нетленная. Разжени облак страстей, и вышняго причастия сподоби, и Свету Невечернему молитвами Си.
Песнь 4. Ирмос.
Христос мне Сила Бог и Господь, честная Церкви боголепно зовет вопиющи, от совести чисты о Господе празднующи.
Запев. Христа да похвалим вси вернии, таковаго святителя давшаго, пречестное удобрение, славней церкви Своея Пречистыя Матере.
Запев. Духа даровании благодатию славне, в ризу свыше облачаяся, аки Аарон незлобием преподобием и правдою. Предстал еси престолу Христову.
Слава. Духовен стяжа, язык же и уста тихая, честными ти словесы, яко от потока пищна точаща учения медоточная. Жизнь безконечную, исходатайствуя нам.
И ныне. Христа нам Божию Силу и Мудрость, Ты породи Пречистая Владычице, Богорадованная Дево. Спаси люди и град, к Тебе уповающыя, Богородице Пренепорочная. Катавасия.
Песнь 5. Ирмос.
Божиим светом Ти Блаже, утренюющих Ти душа любовию, просвети молюся, Тя ведети Слово Божие Истиннаго Бога. От мрака греховнаго изимающа.
Запев. Блажен ты явися. Добро ти бысть. Яко в молитвах чистое, и во бдениих крепкое, успешно пострадал еси, священныи святителю отче Леонтие. Тако бо благословится всяк бояися Господа.
Запев. Божиим хранением блюдомо, всечестное тело твое, преблаженне Леонтие. Многими леты землею покровено, явися невредимо. Яко цвет неувядом, верных сердца веселящо.
Слава. Гроб честнаго ти телесе, показася верным людем, душам благословение. И телесем исцеление, обилно изливая точит, и всякия страсти тму отгоняет.
И ныне. Божиим украшена светом, Богопрерадованная Мати. Ты бо породи краснейша всех, паче сынов человеческих, Истиннаго Бога, от льсти мир избавльшаго. Катавасия.
Песнь 6. Ирмос.
Житейскаго моря воздвизаема зря, напастей бурею, в тихо пристанище притек вопию Ти, возведи от тля живот мой Многомилостиве.
Запев. Единьство Троицы проповеда ясно, святителю Леонтие. И немудрых сердца волнуема укроти, равно славословити. Рождьшагося Слова Сопрестолна.
Запев. Нетерпя видети враг, лестное его погибающе сетование, подвиже устремление людское, на святопомазанную ти главу. Ты же молитвами си разслаблены и немощны поверже я.
Слава. Богоразумием, светло имеюще души своея умное, красят раку мощей твоих, стекающеся к похвалению чюдес твоих празднолюбцы, священныи наш учителю.
И ныне. Дивит ума же и слуха, Твое Прижитие Девице Господоименитая. Раждаеши бо Невидимаго Бога. Се уже видима нашим существом, яко человек, спасаяи человеки. Катавасия.
Кондак. Глас 4. Подобен. Явился еси днесь.
Жития чистоты Всевидец Господь, свет Свой насади в души твоей, вразумити люди многия твоими учении, Леонтие преподобне.
Икос. Новоразумну языку, великоименитей стране, блаженней земли, свято разумен проповедник, боголепныя веры Христовы, омраченая наша сердца озарив, из глубины нечестия исторже. Прежде бо ны неуки суща, словес благодатию укротив. И наказа славити праведное и великое в Троице Божество, священныи наш учителю, от круга небеснаго посещай молитвами си, хвалящыя твою память, Леонтие преподобне.
Песнь 7. Ирмос.
Хладодателницу убо пещь сотвори ангел, преподобным детем, халдея же опали велением Божиим, мучителя увеща вопити, благословен Бог отец наших.
Запев. Учении бо крепкими премудрых словес твоих, яко чадолюбивыи отец, незлобивых детей множество усвоив церкви, увеща вопити, благословен Бог отец наших.
Запев. Тобою освятил есть Господь град великии славныи Ростов, венценосче Леонтие. Людие бо его вразумлени тобою, поют Христу, благословен Бог отец наших.
Слава. Гасяща убо свещю, у честныя ти раки блаженне, утрапив и не глаголати сотворив. Твоея же святыни молитвою, исцеление прият. С ними же и мы, веселящеся вопием Христу, благословен Бог отец наших.
И ныне. Умертвися пресмыкаемыи змий, Твоим Прижитием Пречистая Девице. Порождьши Невместимаго Бога небесы. Спаси от бед хвалящыя Тя, Благословеная Чистая Приснодевая. Катавасия.
Песнь 8. Ирмос.
Ис пламене святым росу источи, а праведнаго жертву и воду попали. Вся бо твориши Христе елико хощеши. Тем Тя превозносим Господа во веки.
Запев. Ликуют чинове ангельстии на небесех, и верных сонмища на земли, Твою память похваляюще, святителю Леонтие. Христа превозносим во веки.
Запев. Тленныя вещи оттряснув, и в пери в небесная душу си. Яко жертва благоприятна, в воню благоухания принеся Христу. Его же превозносим вовеки.
Слава. Воспоем успешно песньми Христа Бога, преподобнаго торжество видяще славим. Вся бо действует Христос, елико хощет. Его бо славящыя прославляет во веки.
И ныне. Из Пречистаго Ти Чрева Богомати, небеснаго дождя капля нам укану, отмывающа скверну душ наших. Тем Тя блажим Чистую во веки. Катавасия.
Песнь 9. Ирмос.
Бога человеком не удобь видети, Нань же не смеют чини ангельстии зрети. Тобою бо Пречистая явися нам Слово воплощенно. Его же величающе, с небесными вои Тя величаем.
Запев с поклоном. Яко звезда светоносивая явися, тучами духовными, верных сердца просвещая, светом разума божественаго, богомудре Леонтие. Тем ныне со ангелы водворяяся, спасай хвалящыя твою память.
Запев. Делы духовными украшен, в пищи райстей веселяся, помяни хвалящыя твою память, заступая от бед и скорбей, преблаженне священносвятителю Леонтие. Да непрестанно тя ублажаем.
Слава. Имеяи Царство непременно, Царю Сыи вышних сил Христе, десницы Твоея крепостию, враг нечестивых выю низверзи, под нозе правоверной державе нашей.
И ныне. Егда судиши Милостиве, яростию не обличи, ни гнева же сотвори противу беззаконии. Аще ли, то кто постоит, молитвами рождьшия Тя Чистыя Матере, огня геенскаго избавитися молимся, и причастником быти Царьства Небеснаго. Катавасия.