Смертоносная язва на языке церковных понятий — это эпидемия любой страшной болезни, уносящей многие человеческие жизни. В наше время над человечеством нависла угроза ухудшающейся на Земле экологической обстановки (загрязнение химикатами и вредными промышленными отходами воздуха, воды, почвы) может вызывать массовые заболевания людей, приводящие к смерти.
Церковь Христова как заботливая, мудрая Мать, зная о том, что в разные времена люди могут подвергаться разным эпидемиям, предлагает своим духовным чадам данный назидательный канон, чтобы, молясь его с теплым душевным усердием, мы просили Господа уберегать нас от любой эпидемии, а если наше тело уже подверглось заболеванию, просить Господа об исцелении.
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 6-й
Помилуй нас Господи, помилуй нас. Всякого бо ответа недоумеюще, сию Ти молитву яко Владыце, грешнии раби Твои приносим. Помилуй нас Господи, помилуй нас.
Слава. Господи, помилуй нас, на Тя бо уповахом. Не прогневайся на ны зело, ниже помяни беззаконии наших. Но призри на ны яко Милосерд, и избави нас от враг наших. Ты бо еси Бог наш, и мы людие Твои. И вси дела руку Твоею, и имя Твое призываем.
И ныне. Богородичен. Милосердия двери отверзи нам, благословеная Богородице Дево. Надеющиеся на Тя не погибнем. Но да избавимся Тобою от бед. Ты бо еси спасение роду христианскому.
КАНОН, глас 6-й
Песнь 1. Ирмос
Помощник и Покровитель, бысть мне во спасение. Се ми есть Бог, и прославлю Его. Бог Отца моего и вознесу И. Славно бо прославися.
Запев: Милостиве Господи, услыши молитву раб Своих, молящихся Тебе (поклон).
Умиления Христе, и покаяния отверзи дверь. Даруй ми стенание, и слезам источники, и прилежное рыдание, от сердца истинно. Яко да покаютися.
Запев. Время конца, прииде предста посреде. Спешит посечение, належит зелне. Приидете рыдаем. Судию возлюбленнии покаянием постигнем.
Запев. Страшное горкое, смертное разрешил еси древле, страстию Ти честною, и смертию Христе. Но делы безместными, страшнейшу ту окаяннии показаем.
Слава. Належащую безстудне, греховную тлю устави. Утоли злое смертное посечение. Молящих приими, честных Ти ученик, о нас Долготерпеливе.
И ныне. Богородичен. Боголюбных Благая, деянии и слов отложих, друг сластей нечистых явихся. Но прежде конца, обративши Чистая, Своему Сыну премени.
Катавасия: Сохрани от бед рабы Своя Милостиве, яко усердно к Тебе прибегаем к милостивому Избавителю и всех Владыце Господу Исусу (поклон). Господи помилуй (трижды с поклонами).
Песнь 3. Ирмос
Утверди Господи на камени заповедей Твоих, подвигшееся сердце мое. Яко един Свят еси и праведен.
Запев. Путь им же течем жития, воистину сень и сон. Яко птищь скоро мимо ходит. Что прелести таковыя не приимем чювьство.
Запев. Преклонихся страстем безсловесным, увы мне и покорихся. И яко связан последую. Предахся увы мне смерти безумныи.
Запев. Стонем и восплачем, общее составим вси рыдание. Гнева Божия нерастворенное, покаянием и слезами растворити потщимся.
Слава. Слово умертвися, дело всякого студа исполнь. Иже слова божествении проповедницы, предстаните ми в час скорби.
И ныне. Богородичен. Да видят вси, земнии концы Богородице, спасеное заступление, еже приемлет всяк, иже с любовию прибегает Ти. Катавасия.
Слава, и ныне. Седален, глас 6-й. Молитвенице теплая. И стена непреборимая. Милости пучино. Мирови прибежище. Прилежно зовем Ти, Богородице Владычице предвари, и от бед избави нас, Едина вскоре заступающи.
Песнь 4. Ирмос
Услышав пророк пришествие Твое Господи и убояхся. Яко хощеши от Девы родитися, и человеком явитися, и глаголаше. Услышах слух Твой, и убояхся. Слава силе Твоей.
Запев. Давыд убо Богоотец, любодейством душе и убийством победися древле. Но покаянием же и слезами, абие победи светлейше. Мы же душе моя немилостивне согрешающе, смерти предахомся.
Запев. Указание покаяния, ниневитяны окаянная душе моя приими, поревнуй о нех смирению. Слезами Зиждителя умилостиви. Смерти убежи вскоре греха, и поживеши без конца.
Запев. Унынием изжив, лето живота моего окаянныи, увы мне. Всякого же беззакония и скверны, явихся жилище. И боюся часа оного, отсецающаго душу мою, от окаяннаго ми телесе.
Слава. Да не поставиши мя Исусе мой сладчаишии, на Суде от левыя. Да не божественое лице Твое скрыеши ми. Да не Твоего имени лишиши мя. Лик священныи молит Тя апостол, Единаго благопременна.
И ныне. Богородичен. Избавися осуждения, род человечь Тобою Дево. И смерти держава отбеже, и гнева праведнаго свободихомся. Но и зде предвари и разреши гнев праведныи, ныне нас казнящии. Катавасия.
Песнь 5. Ирмос
Из нощи утренююща Человеколюбче, просвети молюся. И настави нас на повеления Твоя. И научи мя Спасе творити волю Твою.
Запев. Иже разбойники и блудница приимыи Господи. Господи и нас смиренных ныне никако же презри, в плачи сердца и страха приходящих.
Запев. Паче всякого человека беззаконновах Господи Господи. И предзрю тамошнюю муку, паче естества. Но иже естеством Благ, пощади создание Свое.
Запев. Целомудрия всякого преобидех Господи Господи. И тине страстем яко вепрь впадох. И от смерти в смерть страшно шествую.
Слава. Ученицы слова милостивнеишии, разрешите молю, губительство и тлю, и общее рыдание. Яко дерзновение много к Нему стяжавше.
И ныне. Богородичен. Общее пристанище известное, Владычице Владычице. Согрешении бездну, и смущении бед спаси злых, Тебе чтущии град. Катавасия.
Песнь 6. Ирмос
Житейскаго моря воздвизаема зря напастей бурею, в тихо пристанище притек вопию Ти. Возведи от тля живот мой Многомилостиве.
Запев. Согрешихом вси, беззаконновахом вкупе. Щедроты Твоя Владыко, безумие обратихом на гнев. Но ослаби Долготерпеливе, Твой страх вчти к покаянию.
Запев. Огнем скорбей, и плача пламенем, очистив яви мя. Огня гееньскаго яко Благ, свободи молюся, и плача оного Многомилостиве.
Запев. Отступихом Владыко, праваго Ти пути. И по стезям ходихом беззаконии непроходных, яко злочастни. Но абие обрати, заповедьми света Твоего, славе сыи солнце.
Слава. Каплю жаждуща мя в пламени искушениих, яко же немилосердаго богата, прохладити умилосердитеся молю апостоли славнии. Реки бывше божественыя благодати.
И ныне. Богородичен. Смерти мя избави. Безсмертию и животу вечному Владычице, причастника мя яви молю. Яже смерть разрушивши, и живот рожеством Своим исходатайствовавши. Катавасия.
Слава, и ныне. Кондак, глас 6-й. Душе моя душе моя, востани почто спиши. Конец приближается, и хощеши молвити. Воспряни убо, да пощадит тя Христос Бог. Иже везде сыи, и вся исполняяи.
Песнь 7. Ирмос
Согрешихом и беззаконновахом. Не оправдихомся пред Тобою. Ни соблюдохом ни сотворихом, яко же заповеда нам. Но не предаждь нас до конца, отеческии Боже.
Запев. Очисти Многомилостиве, вси зовем яко же мытарь, яко же сын блудныи, страхом Ти припадающе. Глас взывающе умилен, несмы отнюд достойни, нарицатися сынове, иже отцем Богу.
Запев. Расточих имение Твое, снедох божественое богатьство. Блудником и прелюбодеем спожих. Тимением питаем, пищею яко же вепрь горкою, но приими мя зовуща, согреших. Иже отцем Боже благословен еси.
Запев. Мука вечна, и Суд Твой грозен и страшен. Трепета и подвига вся исполнь свершаемая тамо, поживших скверно. Его же ради страшуся познания окаянныи, смертнаго посечения.
Слава. Стрясает мя, и смущает мя, страх общая смерти. Трепещу, да не начало ми будет, се мучение, еже в геене горкое. Но предварите избавити апостоли, обдержащаго гнева.
И ныне. Богородичен. Разрешихомся Тобою Дево Владычице, уз смертных вси, мир воистину избавися, весь рожеством Твоим, первородныя язвы. Его же ради устави яко Благоутробен, поток належащия тли. Катавасия.
Песнь 8. Ирмос
Его же воиньства небесная славят и трепещут Херувими и Серафими. Всяко дыхание и тварь, пойте благословите, и превозносите Его во веки.
Запев. Пропасть грозна братие утвердися, разделяя грешники, истинныя славы и Зиждителя. Потщимся прежде конца, сию преити. Час бо належит.
Запев. Избави нас огня вечнаго, и тмы злыя. Избави Благии. Избави Христе и сея тмы и плача. Преложив в естество, паче естества вся.
Запев. Виждь Христе общее покаяние, плачь и печаль, озлобление наше. Устави казнь Свою. Спаси яко ниневиты, страхом утвердив, и спаси во веки.
Слава. Столпи крепцыи, церковнии поборницы, роду християньскому к свету наставницы, Петре премудрыи и Павле. Паству вашу сию избавите болезни, и тления страннаго.
И ныне. Богородичен. Всю на Тя надежду возложихом, и тела и души. Владычице чистая, избави пламене гееньскаго безконечнаго, избави и настоящаго пламене гнева Господня. Катавасия.
Песнь 9. Ирмос
Честнейшую Херувим, и славнейшую воистину Серафим. Без истления Бога Слова рождьшую, сущую Богородицу Тя величаем.
Запев с поклоном. Час Христе мой страшныи смертныи трепещу, множество имея грехов. Но прежде конца, молбами Матери Твоея, время ми покаяния даруй.
Запев. Упование Дево живота и спасения возложихом на Тя. Ходатайствуй, спаси, изми бед, люди согрешившая и погубленныя.
Запев. Призри Владыко и Сыну, Матерьняго моления воньми Милостивне, Свое создание изми страшнаго мучения, и ныне на лежащаго яко Милостив.
Запев. Мати Моя, множество лукавых деянии мучит, и прежде осуждения непокорных. Имя бо Мое обносят всуе, делы же я отрицаются всех Господа.
Запев. Ущедри Сыну Мой яко Милостив. Яко Благоутробен естеством, не презри рыдания. Озлобления виждь смиренных, остави яко Щедр всем согрешения.
Запев. Преклонишася Мати яко зриши, и стенют вси, но страхом язвы. Язвами внутренними неисцелно болят, целбы покаяния отлагающе.
Слава. Претерпел еси Владыко, и крест и язвы Сыну Мой, и смерть страшную. Яко да избавиши тленных горкия смерти. И ныне яко Милостив туне ущедри.
И ныне. Богородичен. Воздвигнем вси глас, и очи и руки и сердца прилежне. И спасение прославим мирное, единую Богородицу. Ею же спасаемся. Катавасия.
Отпуст: Господи Исусе Христе, Сыне Божии, молитв ради пречистыя Твоея Матере, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.