Тропарь, глас 4.
Преподобнии священнострадальцы, истиннии ученицы Спасовы, вы первее постом и бдением, и жестоким житием миру распястеся, и страсти плотския умертвивше, последи же и заколения веры ради претерпесте, тем же и кровь ваша землю освящает, и мощи ваша источают исцеления, сего ради вопием вам, радуйтеся Константине и Аркадие, земли Уральския похвало и утвержение (дважды).
Слава и ныне. Богородичен.
Иже от века утаенное и ангелом несведомое таинство, Тобою Богородице земным явися Бог в неразмесне снятии воплощаем, и крест волею нас ради восприем, имже воскреси первозданнаго, и спасе от смерти душа наша.
Песнь 1. Ирмос.
Волною морскою, Скрывшаго древле гонителя мучителя, под землею скрыша спасенных дети, но мы, яко отроковицы, Господеви поем, славно бо прославися.
Запев с поклоном: Святии преподобномученицы Константине и Аркадие, молите Бога о нас.
Господи Боже мой, даждь ми недостойному Твою благодать, достойно воспети святых Твоих, ихже прославил Еси чюдесы и знаменьми.
Запев. Господи Боже мой, слава Твоему милосердию, яко от сухия отпадшия маслины, плодоносную лозу израстил еси, верою и житием прекрасно цветущих, Константина и Аркадия.
Слава. Братия духовная боголюбезная, от юности Христова царствия взыскавше, мирскии мятеж остависте, и отеческое заблуждение отринусте, Божию закону прилежно поучающеся, блаженным путем непорочно поидосте.
И ныне. Богородице упование наше, просвети наша сердца, молимтися, и направи на спасительныи путь, от греховных соблазн и всякия скверны, и от борения страстей, рабы своя свобождающи.
Катавасия: Избавите от бед рабы своя, святии преподобномученицы Константине и Аркадие, яко вси по Бозе к вам прибегаем, вы бо молите о нас Христа Бога нашего.
Песнь 3. Ирмос.
Тебе на водах повесившаго всю землю неодержимо, тварь видевши на Лобнем висяща, ужасом одержима бе, несть свята разве Тебе Господи взывающа.
Запев. Иже вседетельною силою, на водах землю Утвердившаго, при исходищих вд спасеных вкоренистеся, делы благими и терпением, и многострадальным вашим житием, сторичныи плод Тому воздасте.
Запев. Страсти безпрестанно мучащия, постом и воздержанием крепким увядивше, Евангельскими словесы души просвещающе, отеческое неразумие оставивше, и к свету богоразумия преидосте.
Слава. На камени церковнем честныя ноги водрузивше, ум непреклонно к Богу вперисте, вся прилоги вражия до конца отринусте, и доблии воини Христови показастеся.
И ныне. Царице преблагословенная, небу и земли Владычице, сподоби и мене многогрешнаго, одесную стати Сына Твоего, матерним заступлением Твоим, и молитвами преподобных Твоих. Катавасия.
Седален, глас 6, подобен. Еже о нас совершив.
Отцы преподобнии, призрите на ны, и избавите нас от болезней и зол лютых, и неможение душ наших и телес укрепите, и от пагубы греховныя оградите, присно будите с нами, и никтоже на ны.
Слава и ныне. Воззри на ны, всепетая Богородице, восияй просвещение в сердца помраченая, и озари стадо Свое, Пречистая. Елика бо хощеши, можеши, яко Мати сущи Зиждителя Своего, и вопиеши любящим Тя, Аз есмь с вами, и никтоже на вы.
Песнь 4. Ирмос.
Удивися Твой разум от мене, услышавшу преславная веления смотрения Твоего, укрепижеся возлюблением Твоего схождения, Ты бо моея нищеты не отвержеся.
Запев. Удивляется всяк разум о чудесех ваших, ихже от гроба своего страдальцы точите, неисцельныя бо недуги отгоними бывают, и демонския козни посрамляются.
Запев. Аще и от неразумных человек, завистию убиени, в пусте месте повержени бысте, но не умолче праведное слово, и по смерти бо Христову истину возвещаете, чудесы вашими преславными.
Слава. Прежде иноческими светлостьми просиявше, достойно священства саном украсистеся, темже молитвами ваю преподобнии, утвердите иерейскии чин и мнишескии, на стезях божественных добродетелей.
И ныне. К Твоему, Пречистая, взираю Божественому образу, умилением и страхом сердца моляся, презри множество грехов моих, не отрини мене, Чистая, посрамлена, но молитвою Твоею помилуй и спаси мя. Катавасия.
Песнь 5. Ирмос.
Союзом любве связуеми апостоли, владущему всеми себе Христу предавше, красны ноги умываху, благовествующе всем мир.
Запев. Союзом любве неразрывно связуеми, всю скорбь пустыннаго жития претерпесте, вкупе дары Богови священно приносяще, и ныне предстоите жертвеннику мысленному пренебесному, за ны молящеся, братия боголюбная.
Запев. Друг другу евангельски служаще,союз любве духовныя храняще опасением, вкупе духи Владыце в руки предасте, и в небесная селения вселистеся, темже и нас ко братолюбию наставите.
Вода при гробех ваших текущая, многую прият исцелении благодать, юже с верою радостно почерпающе, ублажаем вас, Божия любве хранители.
Слава. Две свещи иже единым пламенем, у престола Царя славы негасимо горящия, и ныне от честнаго гроба вашего, людем на уверение, чюдныи свет в нощи испущаете.
И ныне. Любовию Сына Твоего, иже отпадшия грехом, даже до Креста и смерти возлюбившаго, просвети нас, Пречистая Владычице, да и свету безсмертия явимся причастницы, егда приидет во славе Своей. Катавасия.
Песнь 6. Ирмос.
Житейскаго моря воздвизаема зря напастей бурею, в тихо пристанище притек вопию Ти, возведи от тли живот мой, Многомилостиве.
Запев. Житейскую пучину невредно преплывше, и землю кротких наследовасте, помозите ныне и мне окаянному, непотоплену быти волнами греховными.
Запев. Погружаем волнами страстей моих, и к смерти греховней приближився, увы мне, яко от кита Иона взываю, да взыдет из истления живот мой, молитвами вашими, преподобнии.
Слава. Корабль жития своего, Константине и Аркадие, в пристанище спасения управивше, ныне помозите кораблю церковному, злыми и лютыми ветры колеблему.
И ныне. О благословенная Дево, Мати Божия, в мори плавающим явися звезда пресветлая, к небесному отечеству наставляющи, иже Тя Богородицу чистую верно исповедающих. Катавасия.
Кондак, глас 4. Подобен. Возбранной воеводе.
Христови возвавшу вас, усердно последовавше, и Крест Свой на рамо вземше, в путь заповедей его радостно потекосте, и священства боготканною одеждею, и пощение чистотою облекостеся, последиже венцем мучения венчавшеся, радуйтеся Константине и Аркадие богоблаженнии.
Икос. Евангельскии глас преподобнии услышавше, тогда оставили есте вся суетная мирская пристрастия, неразумие сродник своих до конца отринувше, и ко благодати источником припадше, животворных таинств Христовых насытившеся, священнии служителие сим явистеся, спасение Христово ненаказанным людем проповедасте. Темже за истину убиени бывше, знаменьми и чудесы прославистеся, и от мощей ваших неоскудную благодать исцелении точите. Еяже и нас грешных причастники сотворите, песненно вам взывающих, радуйтеся Константине и Аркадие богоблаженнии.
Песнь 7. Ирмос.
Согрешихом и беззаконновахом, и не оправдихомся пред Тобою, ни соблюдохом, ни сотворихом, якоже заповеда нам, но не предаждь нас до конца, отеческии Боже.
Запев. Согрешихом неправдою, беззаконьми растлихомся, и во глубине отчаяния ныне утопаем, но к цельбоносней раце руки воздеюще, преподобных страдальцев подвижем на молитву, не предаждь нас до конца, отеческии Боже.
Запев. Воистину несть во время се, ни князя, ни пророка, ни вожда, ни веры, ни любве, ни крепости закона, но всяко земное упование отложьше, отрочески взываем, молитвами преподобных Твоих, не предаждь нас до конца, отеческии Боже.
Не по беззаконием нашим накажи нас, ни по грехом нашим воздаждь нам, но по велицей милости Твоей, по множеству чудес Твоих спаси нас, с преподобными Тебе, Христе, взываем, не предаждь нас до конца, отеческии Боже.
Слава. Боже и Содетелю мира, в Единосущней Троице прославляемыи, даждь славу имени Твоему святому, и сокруши борющих нас, да разумеют колико может православных вера, молитвами преподобных, едине Человеколюбче.
И ныне. Радуися граде великаго Царя непреборимыи, верным стено нерушимая, заступи и сохрани стадо Свое, иже на Тя упование имущее, да присно Тя величаем, и Тя прославляем, Дево Богорадованная. Катавасия.
Песнь 8. Ирмос.
По закони Отчи преблаженнии, в Вавилоне юнии беду приемлюще, царюющаго небрегоша повеления безумнаго, и совокуплении в немже не изваришася огни, Держащему достойно возсылаху песнь, Господа пойте дела и превозносите Его во веки.
Запев. По законе Божии преблаженнии, мужески отцы смерть приемлюще, безумныя ярости не убоявшеся, совокуплени единомышлением души, Христу достойно возсылаху песнь, Господа пойте дела, и превозносите Его во веки.
По заповедем Владыки своего, во всем житии достойно шествуя, достигоша врат Иеросалима Небеснаго, предпутие очервленивше своею кровию, червлены священныя ризы носяще, Господа поюще дела, и превозносяще Его во веки.
Запев. Аще и безвестно скрыты быша, рукою убийственною, святая телеса ваша, но паче чаяния нетленны обретошася, чудес благодатию благоухающе, людем радостно глаголющим, Господа воспевайте дела, и превозносите Его во веки.
Слава. О Троице святая и нераздельная, Твоею милостию и изволением, ныне честныя мощи преподобных, преславно во храм священныи принесошася, идеже всеми поклоняемы бывают, людем любовию целующим, и благодарственно Господеви поющим, и превозносящим Его во веки.
И ныне. Хвалим Тя, благословим Тя, поклоняемтися Богородице, и преподобных чудеса прославляюще, Сыну Твоему непрестанно вопием, Господа воспевайте дела и превозносите Его во веки. Катавасия.
Песнь 9. Ирмос.
Не рыдай Мене, Мати, взирающи во гробе, Егоже плотию без семене зачала еси Сына. Востану убо и славен буду, и вознесу со славою немолчно, яко Бог, верою и любовию Тя величающия.
Запев с поклоном. Не рыдания воистину, но радости исполнен, день кончины вашея, Константине и Аркадие, от земли бо возшедеше, на небесная преселистеся, идеже глас красен празднующих, глас непрестанна радования веселит вся.
Запев. Окаянен убоя вися безумныи, иже руку простер на праведных неправедно, душу свою с телом вечной погибели предал есть, святии же от скорбей жития прешедше, в чертозе небесном радуются, на земли же струями исцелении своих, церковь Божию веселяще.
Слава. Не плачите вернии людие, в трудех и болезнех воздыхающе, вам бо теплии заступницы явистася, всем недужным безмезднии целителие, всем обидимым крепцыи поборницы, сиротам и вдовицам предстатели, всем скорбящим радости ходатаи.
И ныне. О Марие, Мати всепетая, воставша из мертвых Сына Своего узревши, радуися светло услышала еси, тоя же радости и нас сподоби, вечней Пасхи Его насладитися, иже верою и любовию Тя величающих. Катавасия.