Глас 1.
Песнь 1. Ирмос.
Люты работы избыв Израиль, и непроходимое пройде яко посуху, врага зря потопляема, песнь в веселии поет Богу, чудотворящему мышцею высокою, яко прославися.
Запев с поклоном: Преподобне отче Арамие, моли Бога о нас.
Лютыми страстьми побеждаемь есмь окаянныи. И сего ради молю Тя Христе Боже, от сих избавити мя. Яко да по достоянию возмогу воспевати Твоего угодника, Аврамия преподобнаго.
Запев. Лютых смущении свободи мя отче. Да наставляемь твоими молитвами, светло воспою твое торжество, богоносе Аврамие.
Слава. Лютаго идола искоренил еси отче преблаженне, и ко Христу приведе неверных соборища. И сих яко кедр иже в Ливане умножил еси твоими молитвами, во сто плодоносяща, и врага попирающих.
И ныне. Лютых напастей и многих прегрешении свободи мя Владычице. И отпуст подаждь ми, яко дерзнух написати от моея скверныя десницы святое Твое имя.
Катавасия. Избави от бед рабы своя, преподобне отче Аврамие, яко вси по Бозе к тебе прибегаем, ты бо молиши о нас Христа Бога нашего.
Песнь 3. Ирмос.
Да утвердится сердце мое в воли Твоей Христе Боже, иже над водами небо утверждеи второе, и основавыи на водах землю Всемогаи.
Запев. Да утвердится сердце мое молитвами твоими святе. И научи мя недостойнаго, похвалити по достоньству преславную память твою, богоносе отче наш Аврамие.
Запев. Да утвердиши нас богомудре на безплотныя враги, еже прогонити сих. Твою же память величати и Христа прославляти, иже тебе прославльшаго, отче Аврамие.
Слава. Да утвердимся на камени не поколебимем твоих молитв, да не поколеблют нас прилози льстиваго. И ум наш просвети светом заповедей Христовых, яко да верою воспеваем тя, преблаженне Аврамие.
И ныне. Да утвержден буду милостию Твоею Владычице, и покровен кровом крилу Твоею Богородице, и избегну сетей лукаваго, воспевая преславное Твое торжество. Катавасия.
Седален, глас 5. Апостолом ревнитель быв преподобне, сего ради и Богослову беседовати сподобися, и сего жезл приим, Велеса разрушил еси. И того козни до конца искоренил еси, и неверных ко Христове вере приведе. Ныне же Христа Бога моли, чтущих память твою, даровати нам мир и велию милость. Слава, и ныне. Богородичен. Победу имуще крепкую силу иже на Тя любовию верно надеющиися, Чистая Царице Дево Богородице. Враги покаряюще, Поборницу имуще Тя веселимся.
Песнь 4. Ирмос.
Разумех Всемогаи Твое смотрение, и со страхом прославих Тя Спасе.
Запев. Разумех преподобне свое недостоинство. И со страхом коснухся к твоему хвалению. Но ты святе приими яко убогия две цате, с верою тебе приносимое хваление, всехвалне отче Аврамие.
Запев. Разумел еси отче преблаженне коварствия лукаваго Велеса, и сего до конца низложил еси. Нас на молитву воздвигни днесь, да верно ликоствуем преблаженне в память твою, отче Аврамие.
Слава. Разумел еси святе демона во умывальницу твою вшедша, и пакость тебе сотворити хотяща, сосуд крестом покрыв, того опалил еси. Ныне же нас спаси от его ловления твоими молитвами, отче Аврамие.
И ныне. Разумела еси Владычице воплотившагося ис Тебе Христа Бога нашего. Того моли Богоблаженная, да Твоими молитвами сохранит нас от всякаго навета льстиваго. Катавасия.
Песнь 5. Ирмос.
От нощи утренююще хвалим Тя Христе Боже, обнищавшаго нас ради, и распятие и смерть плотию Си пострадавша.
Запев. От нощи тмы глубокия возвел еси люди своя, и покаяния светом просветив ко Христу приведе, богоносе Аврамие. И нас просвети блаженне сиянием твоея благодати, яко да присно тя ублажаем.
Запев. От нощи идольскаго бесования извлече отче множество людей. И сих погружением благодати озарив духовныя. И ныне нас озари Светом Невещественым, и молитвами си просвети, яко да подолгу величаем тя.
Слава. От нощи страстей моих возведи мя святе, и даруй ми свет мысленыи. Да возмогу недостойныи, от грубаго ума моего худое сие плетение принести к похвалению чюдес, преславнаго твоего торжества, богоносе Аврамие.
И ныне. От нощи ада преисподняго изведе нас Сын Твой Пречистая, и раю жителя паки соделав. Сего ради покланяющеся Ему, Тебе Дево ублажаем. Катавасия.
Песнь 6. Ирмос.
Отверже мя в глубину сердца морскаго. И спасл мя еси Спасе работы адовы, и разрешил еси юзы беззаконии моих.
Запев. Отвергошася неразумнии твоего учения блаженне, и к Велесу глуху идолу ниже глаголющу, ниже осязающу притекаху. И егда сего пробол еси тростию Богословлею, тогда и сих к разуму благочестия наставил еси, отче Аврамие.
Запев. Отвержен есмь в ров нечаяния многострастныи, но ты возведи мя, святе, на стезю покаяния, яко да отвергу вся моя злая деяния. И облекуся светом молитв твоих, отче Аврамие блаженне.
Слава. Отвержен быв окаянныи демон. Восхоте спону тебе сотворити, преобразуется в воина лукавыи, и предстает тогда владущему благоверному князю Владимиру, и того на тя вооружает. Ты же сего прогнав, болма прославляешися, и князя в вере утверждаеши.
И ныне. Отверзи ми Владычице двери милости Твоея, яко же Сын Твой отверзе разбойнику и блуднице и блудному двери милосердия. Яко да и аз Твоими молитвами улучу жизнь вечную, воспевая Твою благость. Катавасия.
Кондак. Глас 2. Иго Христово приим Аврамие, и Того Крест взем последова Ему. Насажден бо в дому Господни, и процвете яко финик. И яко кедр иже в Ливане умножил еси чада твоя, муж желании духовных. От возлюбленнаго бо апостола Иоанна Богослова благодать восприим, жезлом сокруши идола, и бысть яко прах. И от него много искушения претерпе, и долгии путь нуждно и безчестно прееха. И самодержцу области предста, и от него вопрошен и чести велицей сподобися. И чюдотворец велии всему миру возсия преподобне. Тем Христа Бога моли непрестанно о всех нас.
Икос. Аврамие богомудре, житие непорочно стяжал еси. Которыи язык человечь довлеет когда к похвале исповедати тя. Обаче воспоем Божию Мудрость, и твоя преподобне страсти и подвиги, яже на земли. Яко светилника тя явльшася всем человеком, и многим терпением в лице ангельстем возсиявша. Тем в песнех вопием ти сице. Радуися Аврамие преподобне и богоносе, небесныи человече, и земныи ангеле. Радуися Духа Святаго обитилище. Радуися целомудрия столпе, низложивыи беса многоковарьственаго. Радуися, яко от младых ногтей последова Христу. Радуися светилниче многосветлыи, приведыи ко Христу инок множества. Радуися разоривыи идола, и воздвигнувыи Христову Церковь. Радуися иже идолу поклонников, сотворил еси Пресвятей Троице поклонники. Радуися яко молитвами твоими беси побеждаются. Радуися граду Ростову похвала, яко первую общую обитель воздвигл еси, и в ней многия мнихи яко виноград Христов насадил еси, и Троицу славити научил еси. Радуися державе нашей похвала и утверждение, его же соблюди молитвами си от враг ненаветна. Да зовем ти, радуися отче Аврамие блаженне, и Христа Бога моли непрестанно о всех нас.
Песнь 7. Ирмос.
Явлеися в купине законодавцу огнем, и Рожество Девиче прображь в ней, благословен еси Господи Боже отец наших.
Запев. Явился еси в Руси светильник пресветлыи, отче Аврамие. Трисолнечными Светосиянии к Богоразумию нас приводя. И пети научая, благословен Бог отец наших.
Запев. Явися река медоточных учении богоносе, верных напаяя, грехи же потопляя. И к разуму благочестия всех возводя и научая пети, благословен Бог отец наших.
Слава. Явлься тебе ученик Христов богословеснейшии, и девьственик возлюбленныи, трость тебе блаженне дарова, ею же диявола прободе, и к тому невидима сего сотвори. И человеки научи вопити, благословен Бог отец наших.
И ныне. Явлеися яко человек Сын Твой Богоневесто, нас обожи, и к разуму милости возведе. И во Свете Неприступнем ликовати устрои, воспевающих и глаголющих, благословен Бог отец наших. Катавасия.
Песнь 8. Ирмос.
Песнь ти приносим ангельскую, яко отроцы иже в пещи, поюще глаголем, благословите вся дела Господня Господа.
Запев. Песнь ти приношю отче богоносе Аврамие, ею же проповедаю твоя подвиги и чюдеса, и прославляю твое величество, вопия, благословите вся дела Господня Господа.
Запев. Песнь приносиши Христу, ликуя со ангелы отче Аврамие. Тех бо житию поревнова, и нас в память твою ликовати устроил еси, поющих, благословите вся дела Господня Господа.
Слава. Песнь поеши херувимскую, им же и подобник был еси, криле огненеи восприем. Ими же горняго Иерусалима достиг, о нас молися отче Аврамие, поющих верно, благословите вся дела Господня Господа.
И ныне. Песнь приими Владычице, от несовершенаго ума нашего, и молися Сыну Своему и Богу нашему, подати нам оставление грехов, яко да воспеваем Тя во вся веки. Катавасия.
Песнь 9. Ирмос.
Живоносный Исток приснотекущь, светоносно Светило благодати. Церковь одушевленую, Покров славныи, небесе и земли пространнейшии, Богородицу Чисту величаем.
Запев с поклоном. Живоносныи источник благодатных вод явися, Аврамие богоблажене. Подаждь ми источник слезам, да омыю душевныя ми страсти. И убелю светом покаяния очерневшую душу мою.
Запев. Живоносныи Крест на рамо взем преподобне, распеншемуся на нем Христу последовал еси отче Аврамие. И вражия полки прогна. И нам проси милости торжествующим твое праздньство богоносе.
Слава. Живоносным крестом врага опалил еси. И сего в сосуде запечатлев, учеником работати отиде, показуя смирения образ. И сих научая, любомудрено последовати тебе.
И ныне. Источник рождьши нам Владычице, житие мирно рабом Си испроси. И державе нашей на иноплеменники пособствуй. Яко Ты еси спасение наше Богоневестная. Катавасия.