Канон обретению честныя главы Иоанна Предотечи


Глас 6.

Песнь 1. Ирмос.

Яко по суху ходив Израиль, по бездне стопами, гонителя фараона видя потопляема. Богу победную песнь, поя вопияше.

Запев с поклоном: Святый великий Иоанне, Предотече Господень моли Бога о нас.

Грядите похвалим языком, и Всесильным плещуще Духом, устны благочестивыми, Слова Предотечю глас, песньми духовными вернии прославим.

Запев. Мирным устроением и тихим, и безмерными совокупленьми Христова Церкви, благостоятельно упасается. Тебе молебную песнь вопиющи Предотече.

Слава. Юже от Бога даную яко сокровище нам неотъемлемо, богоносную главу Предотечеву, вси песньми достойно вернии почтем.

И ныне. Своего приемши Содетеля, яко Сам восхоте, от безсеменна чрева Твоего, паче ума воплощаема Чистая. Тварем воистину явися Владычица.

Катавасия: Избави от бед рабы своя, святый великий пророче Иоанне, Предотече Господень, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

Несть свят, яко же Ты Господи Боже мой, вознесыи рог верных Си Блаже. И утверждь их на камени исповедания Ти.

Запев. Утроба неплодна, прозябление тя изнесе божествено, язычестей церкви славна таинника. Христови истинному Богу, и Жениху сию обручающа.

Запев. Твоего Боговещаннаго гласа Предотече Иоанне, ни мечь посече окаяннаго прелюбодеяния. Божественую бо свою нам являеши главу от земли.

Слава. Торжествующи светло, чтущее тя стадо насыщается, яко богатство обрет тайное. И о крин неоскуден исцелением Предотече главу твою.

И ныне. Божественаго Рожества Ти Чистая, всякого естества чин преходит чюдо. Бога бо паче естества зачала еси во чреве, и рождьши пребываеши Приснодевая. Катавасия.

Седален. Глас 4. Подобен. Вознесыися.

Издавшися яко злато от земли, священная твоя глава преславно, от незаходимых недр земленых. И обогати верных всех мысли, разумением Божественым. Ныне покайтеся вопиющи разумно. Ей же покланяющеся Предотече Христов, велегласно верою славим.

Слава и ныне. Богородичен. С Богом в Твой Богородице прибег смиреныи покров божественыи, призывая молюся, помилуй Чистая. Яко превзыдоша ми главу греси, и боюся Владычице мучения и трепещу. Молитву сотвори Чистая к Сыну Своему, сих избавити мя.

 

Песнь 4. Ирмос.

Христос мне Сила Бог и Господь, честная Церкви боголепно зовет вопиющи. От совести чисты о Господе празднующи.

Запев. Ветхому был еси образ пребогате, яве закону и пророком скончание был еси. И чертожник Божествен, новому явился еси Предотече.

Власяными рубы обычно Предотече, честную обвил еси и славную главу свою. Покрывается царскою багряницею, яко ризою радуяся.

Запев. Божественую главу твою отбежением нищий и скитаяися, твоими божествеными наставленьми, яко же не завистно богатство Иоанне приемлет.

Слава. Зарею Предотече Божественаго Духа, чтущии тя град всегда моли уяснити, и в Божественей памяти твоей, безплотным срадоватися.

И ныне. Мертва мя показа сада вкушение, Животное же Древо, из Тебе явльшеся Пречистая воздвиже, и райстей пищи причастника мя сотвори. Катавасия.

 

Песнь 5. Ирмос.

Божиим Светом Ти Блаже, утренюющих Ти душа любовию просвети молюся, Тя ведети Слово Божие, Истиннаго Бога, от мрака греховнаго изимающа.

Запев. Не поколебася яко же трость Крестителю, искусителными вражии ветры, всегда веющими. Столп же божественым людем не поколебим, силою Илииною явился еси, и духовною.

Запев. Иже Божества отметаяся, и умаляя славу, тобою крещьшагося Христа, и божественую благодать твою укоряя, праведным судом да посрамится.

Слава. Отверзл еси независтнаго источника дверь, поющим тя любовию славныи Предотече, божественыя благодати источающа воды. И струи исцелением всех веселящия.

И ныне. Носящи доброту мысленую, прекрасныя души Твоея, Невеста Божия была еси, запечатленна девьством Чистая. И зарею чистоты, мир просвещающи. Катавасия.

 

Песнь 6. Ирмос. 

Житейскаго моря, воздвизаема зря напастей бурею, в тихое пристанище притек вопию Ти, возведи от тля живот мой, Многомилостиве.

Запев. Пророка тя истинна нарече Христос, и пророк превышьша, Крестителя же и Предотечю Жизни. Того бо узрил еси, Его же пророцы и закон провозвестиша.

Запев. Не терпяше крытися чюдесем источник, сокровище благодати, славная глава твоя Крестителю, пророче и Предотече. Но явльшися, проливает исцелением источник.

Слава. Всебогатно похваление, и украшение светло, и щит спасителен, христолюбивыи сыи, и благочестивыи предлагает град твой, честную ти и божественую главу Предотече.

И ныне. Великии прописа во пророцех Моисей, Тя Ковчег и Трапезу, и Светилник и Ручку. Образно назнаменуя воплощение, еже из Тебе Вышняго Мати Дево. Катавасия.

Кондак. глас 2. Подобен. Вышних ища.

Пророче Божии, и Предотече Благодати, главу твою яко дар освящен, от земли обретшии, исцеление всегда приемлем. Ибо паки, яко первие проповедуеши в мире покаяние.

Икос. Господня свидетельства прием Иоанне, паче всех человек вышьши был еси. Тем же похвалы принести тебе ужасохся, но любовию понудився, песнь начати дерзнух. Тем же не отрини, помощник ми быти прехвалне, да возмогу венчати верх твой святыи. Ибо сей в мире проповедует покаяние.

 

Песнь 7. Ирмос.

Хладодателну убо пещь сотвори ангел, преподобным детем. Халдея же опали велением Божиим, мучителя увеща вопити, благословен Бог отец наших.

Запев. Девыя Прозябление, тя паче всех рече рожденных женами. Яко же бо безплотен, и равноангелен на земли пожил еси. Тому вопия, благословен еси Господи Боже отец наших.

Запев. От пустыни Пресвятым Духом научен явился еси, яко же утро светоносно, ангел света, нас научая вопити, благословен еси Господи Боже отец наших.

Слава. Ублажися яко воистину, во градех сей преславныи, стяжавыи тебе сокровище Предотече Христов. Тем же празднуя вопиет, благословен Бог отец наших.

И ныне. Очищение естеству Ты бысть, Едина Богоблаженная. Иже бо на раму херувимску седящаго Бога, на руку носящи вопиеши, благословен еси Боже отец наших. Катавасия.

 

Песнь 8. Ирмос.

Из пламене святым росу источи, а праведнаго жертву и воду попали. Вся бо твориши Христе, елико хощеши. Тем Тя превозносим Господа во веки.

Запев. Послан бысть Вопиющаго глас Предотеча, опустевшим сердцам, сына Божия веру благочестивую водружая сущаго Бога. Его же превозносим во веки.

Запев. Уготовите вопиет ныне Предотеча, Господни стези освящением. Се бо пришед со Отцем и Духом, в ваша сердца добре вселитися.

Слава. Из чрева освятися Божественым духом, и пророк явися во чреве носим. Ныне же наслаждение, иже в недрех тебе имущему граду показася пророче.

И ныне. Пресвятая Дево Ты мя окорми. Моей немощи буди помощь. Устави страстем безмерную бурю. И спаси мя, Спаса рождьшая мирови. Катавасия.

 

Песнь 9. Ирмос.

Бога человеком неудобь видети, Нань же не смеют чини ангельстии зрети. Тобою бо Пречистая явися нам, Слово воплощенно. Его же величающе, с небесными вои Тя величаем.

Запев с поклоном. Яве исполнению десятим Предотече заповедем, ты хранитель крепок быв. Сугубо от Христа почтеся, даровании десятицею. Тем же Слову тя таинника и друга ведяще, ныне ублажаем.

Запев. Божии пророк же и апостол, ангел же и Предотеча Божественаго Воплощения. Креститель и священник, и мученик верен. Проповедник же сущим во аде ты был еси, и девьствующим правило, и пустыни прозябление.

Слава. Твое явление провозвещающе зрителю, возвещаху ангельстии чини неложно. Гавриила подобящеся божественому благовещению, иже прежде рожества твоего, священныи Захария приемлет.

И ныне. Страстем исцеления почерпаем, в славныи храм Предотечев притекающе. В той бо приходят ангельстии лицы, дуси же праведных, и всех Владычица, с Крестителем Иоанном, исцеления подавающе. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?