Канон, глас 6.
Общее начало и конец всем канонам →
Порядок чтения по уставу
Тропарь, глас 6-й
Помилуй нас, Господи, помилуй нас, на Тя бо уповахом. Непрогневайся на ны зело, ниже помяни беззаконии наших. Но призри на ны яко милосерд, и избави нас от враг наших. Ты бо еси Бог наш, и мы людие Твои. И вси дела руку Твоею, и имя Твое призываем.
Слава. Людей согрешьших Ти непрезри Боже, со слезами припадающих Ти, помилуй яко благ руку Своею дело. Молящуюся за ны приими Богородицу, и Тою ущедри мир неначающиися. Ты бо еси Бог наш, един Человеколюбец.
И ныне. Богородичен. Надеяние миру благословеная Богородице Дево. Твоея единоя помощи просим. Умилосердися Госпоже на скорбящая люди. Моли всемилостиваго Бога, избавити душа наша от всякого прещения, едина благословенная.
Песнь 1. Ирмос
Яко по суху ходив Израиль, по бездне стопами, гонителя фараона видя потопляема. Богу победную песнь, поем вопияше.
Запев: Пресвятая Госпоже Богородице, услыши молитву раб Своих, молящихся Тебе (поклон).
Приидете воспоем песнь нову глаголюще. Владычице Богородице моли Сына Своего и Бога, помиловати люди согрешьшая.
Запев. (Повторить стих).
Слава. Приими молитву и слезы молящихтися раб Твоих, подаждь времена ведреная, на плод земли.
И ныне. Богородичен. Ускори Владычице Марие, Пречистей си руце милостивно, воздети к Сыну Своему и Богу. Да подаст ведро на кормлю верным.
Катавасия: Спаси от бед рабы Своя, Богородице Дево, яко вси по Бозе к Тебе прибегаем, яко к нерушимей стене и заступлению (поклон). Господи помилуй (3 раза с поклонами).
Песнь 3. Ирмос
Несть свят яко же Ты Господи Боже мой, вознесыи рог верных си блаже. И утверждь их на камени исповедания Ти.
Запев. Милостиве Господи, услыши молитву раб Своих молящихся Тебе.
Неяростию си обличи нас, якоже пророк поет, ни гневом покажи нас, но молитвами Пречистыя Ти Матере, излей на ны обилно милости Твоя.
Запев. (Повторить стих).
Слава. Новозванный язык, со слезами вопиет Ти. Молитвами Пречистыя Ти Матере, подаждь нам ведро на землю, и обильную милость.
И ныне. Богородичен. Непрезри слез наших Богородице Владычице, и немерзко Ти буди со воздыханием моление наше. Но преклоньшися на щедроты Твоя. Подаждь ведро на землю, и велию милость. Катавасия.
Песнь 4. Ирмос
Христос мне сила Бог и Господь, честная церкви боголепно зовет вопиющи. От совести чисты о Господе празднующи.
Запев Господу. Того ради Владыко верху тверди положи воду, солнечнаго делма Ефирьскаго, теплотнаго и дождевнаго. Но обое, по хотению раб Своих даруй.
Запев. (Повторить стих).
Слава. Исповедающим Тя Владыко, строителя всея твари, держай кормлю небесную. Подаждь обилие земли, молитвами Пречистыя Ти Матере.
И ныне. Богородичен. Велико дерзновение имееши к рождьшемуся из Тебе. Яко никто же ин Владычице. Да молишися о рабех Ти, избавитися нам от глада, и находа иноплеменник. Катавасия.
Песнь 5. Ирмос
Божиим светом Ти Блаже, утренюющих Ти душа любовию просвети молюся. Тя ведети слово Божие истиннаго Бога, отмрака греховнаго изимающа.
Запев Господу. Тихое ошествие плавающим, и надежде ненадежным. Державе нашей утвержение, тружающимся рабом скорое поможение, и немедленыи податель.
Запев. (Повторить стих).
Слава. Врачу болящим душам, скорбящим щедрителю, небесныи Царю Исусе Христе. Призри с высоты безмерныя Своея, услыши плачь раб Своих.
И ныне. Богородичен. Скоро приими Госпоже молитву раб Своих изо уст грешных, непоминающи наших безчисленых зол. Но испроси нам Дево ведро на ползу, и плод земли. Катавасия.
Песнь 6. Ирмос
Житейскаго моря воздвизаема зря напастей бурею, в тихо пристанище притек вопию Ти. Возведи от тля живот мой Многомилостиве.
Запев Господу. Молением си пророка, затворив небеса на три лета, и шесть месяц. Наказуя противныя, хотя покаяния. Его же и ныне от нас приими Господи, и милостию ущедри ны.
Запев. (Повторить стих).
Слава. Приимыи разбойниче покаяние. И того спасе единем часом, глаголюща: помяни мя Спасе, егда приидеши во Царствии си.
И ныне. Богородичен. Помолися о нас Владычице к Сыну и Богу си, да не яко содомлян и гоморян огнем пожжет, грех ради наших. Но яко ниневитян покаявшихся помилует. Катавасия.
Слава, и ныне. Кондак, глас 6-й. Заступнице християном непостыдная, и ходатаице ко Творцу непреложная. Непрезри грешных моления гласы. Но предвари яко блага на помощь нашу, верно вопиющих Ти. Ускори на молитву, и потщися на умоление. Заступающи присно Богородице чтущих Тя.
Икос. Простри длани Свои, имаже всех Владыку яко Младенца прият, за множество благости. Не остави нас всегда надеющихся на Тя. Бодреною си молитвою, и неисчетною простынею ущедри нас. И подаждь душам нашим милосердие Свое во веки источающи. Тебе бо имамы грешнии заступницу, от находящих на ны бед и зол. Но яко имущи милосердия щедроты, ускори на молитву, и потщися на умоление, заступающи присно Богородице чтущих Тя.
Песнь 7. Ирмос
Хладодавицу убо пещь сотвори ангел, преподобным детем. Халдея же опали велением Божиим, и мучителя увеща вопити. Благословен Бог отец наших.
Запев Господу. Никогда же отлучися Спасе всещедрыи, пастырю овец Своих. Но присно в них почивай, имея молящуютися Матерь о вопиющих. Благословен еси Господи Боже отец наших.
Запев. (Повторить стих).
Слава. Ты убо Боже Царю Пресвятыи, пропныи небеса яко кожу, и море песком оградив. Посли нам теплоту солнечную вопиющим. Благословен еси Господи Боже отец наших.
И ныне. Богородичен. Накажи Владычице язык мой глаголати полезная, надежде всем концем земля. Молися Сыну си подати ведро на землю, вопиющим. Благословен Бог отец наших. Катавасия.
Песнь 8. Ирмос
Из пламени святым росу источи, а праведнаго жертвы и воды попали. Вся бо твориши Христе елико хощеши. Тем Тя превозносим Господа во веки.
Запев Богородице. Твои раби есмы Пречистая Владычице, и Тебе молимся. Услыши наша худыя молитвы, посли ведро на землю, и росу полезную. Да Тя превозносим во веки.
Запев. (Повторить стих).
Слава. Рекл еси милостивыи Владыко, показуя нам покаяние. Ищите, обрящете. Толцете, отверзется вам. Просите, приимете. Зело бо еси щедр и премилостив.
И ныне. Богородичен. Святая Владычице Богородице, избави молитвами си люди Своя, отстрасти и брани всякия. Подающи обилныя милости, и плоды на кормлю хвалящим Тя, и превозносящим во веки. Катавасия.
Песнь 9. Ирмос
Бога человеком не удобь видети, нань же несмеют чини ангельстии зрети. Тобою бо Пречистая явися нам слово воплощенно. Его же величающе, с небесными вои Тя величаем.
Запев. Господу с поклоном. Яко Павел покаявся отгонительства, сосуд избран бысть Тебе Владыце и Богу всех. Тако же и мы грешнии, того умолению надеющеся вопием. Посли нам ведро на землю, и росу благу и полезну. Молитвами Пречистыя Ти Матере.
Запев. (Повторить стих).
Слава. Тако и блаженныи Петр, верховныи ученик Твой, и ключа Царства Небеснаго от Тебе приим Владыко Христе, не единою ни дважды, но трижды Тебе отвергся, и потом плакася горко. Нетокмо прощение прият но и пастырь бысть словесным Твоим овцам.
И ныне. Богородичен. Избави ны Пречистая от всякаго належания зла, приходима от потока воднаго, находящаго ныне на ны. И нашествия иноплеменник. Подающи с выше рабом Ти гобизныи плод на кормлю. Да Тя непрестанно величаем. Катавасия.
Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.
Отпуст: Господи Исусе Христе Сыне Божии, молитв ради пречистыя Твоея Матере и всех ради святых, помилуй и спаси нас, яко Благ и Человеколюбец. Аминь.