Канон, глас 8.
Общее начало и конец всем канонам →
Порядок чтения по уставу
Тропарь, глас 6-й
Господи помилуй нас, на Тя бо уповахом. Не прогневайся на ны зело, ниже помяни беззаконии наших. Но призри на ны яко милосерд, и избави нас от враг наших. Ты бо еси Бог наш, и мы людие Твои. И вси дела руку Твоею, и имя Твое призываем.
Слава. Людей согрешьших Ти, непрезри Боже, со слезами припадающих Ти, помилуй яко благ руку Своею дело. Молящуюся за ны приими Богородицу, и Тою ущедри мир неначающиися. Ты бо еси Бог наш, един Человеколюбец.
И ныне. Богородичен. Надеяние миру благословеная Богородице Дево. Твоея единоя помощи просим. Умилосердися Госпоже на скорбящая люди. Моли всемилостиваго Бога, избавити душа наша от всякого прещения едина благословенная.
Песнь 1. Ирмос
Истрясшему в мори мучительство фараоне, и по суху Израиля наставльшу, воспоем Богови. Яко прославися во веки.
Запев: Милостиве Господи, услыши молитву раб Своих, молящихся Тебе (поклон).
Неизреченными судбами слове сыи промыслом, вся правящему Богу. Поразившему, и паки исцеляющему, припадаем умилитися на ны. Отвратите от нас гнев бездождия, зовущих, Господи помилуй нас.
Запев. К Ною Твоего завета незабывай Боже, еже заповедав водою нерастлити всякоя плоти. Не затвори небес до конца. Яко отсюду нам погибнути.
Слава. Оком си всевидным, видя великое Свое наследие, от сущаго Ти гнева сокрушаемо. Умилосердися Боже, пусти дождь достойныи на землю.
И ныне. Богородичен. Убо спешную молитву прилежащих Ти людей, молебным прилежанием, приими Владычице. Подати воду земли, Сына Твоего и Бога благоволением.
Катавасия: Сохрани от бед рабы Своя, Милостиве, яко усердно к Тебе прибегаем, к милостивому Избавителю и всех Владыце Господу Исусу (поклон). Господи помилуй (3 раза с поклонами).
Песнь 3. Ирмос
Утвержеи рукою Своею Сыне Божии небеса, на утвержение истинна разума. Утверди наша сердца, на Тя надеющихся.
Запев. Время блистая и помрачая внутрь, многомилостиве Господи. Дождь подобныи нам посылая на утешение много, насыщающее поднебесную.
Запев. Прелагаяи воздух растворен, и воду земли проливая, вольныи отлучити дождь нам сподоби. Наследие бо Твое есмы Спасе.
Слава. Пресыхание росою сотворив, при Гедеоне пророце Твоем. Ныне землю невлажну Свою видя Спасе наш, яви море южное течением дождя.
И ныне. Богородичен. Чертоже святыи Господень, и престоле Серафимы объстоимыи. Обычною Ти молитвою, ныне даруй воду земли почерпсти Препетая. Катавасия.
Песнь 4. Ирмос
Из горы присенныя слове пророк, из единыя Богородица хотящуся воплотити, боговидно разсмотрь. И со страхом славословяше силу Твою.
Запев. Знамение гнева Твоего носящи тварь, яве творит нам грех. Пощади убо Господи пощади, и того ради воду посли, послужити жаждущей земли.
Запев. С небеси земля росы просит, да Твоего образа непогубит. Его же обновил еси Господи, от Девы яко на руно дождь сшед.
Слава. Благоволи Господи тучами гнев Свой, псаломскую песнь Ти вопиющим. Яко благодать даруеши. Яко щедр и плод земли подаждь.
И ныне. Богородичен. Всех к Богу ближьши сущи, имущи Чистая Матерне дерзновение. Молимся, милостивы к Тому принести молитвы, посетити тучами землю. Катавасия.
Песнь 5. Ирмос
Утренюет дух мой к Тебе Христе Боже, зане свет повеления Твоего пришествия. Но в них озарив ума нашего Владыко, настави нас на стезю животную.
Запев. Божественное Твое повеление, болезнующи земля, дождь просит Человеколюбче. Да плод носящи, хвалу принесет Ти нами рабы Твоими.
Запев. Затворивыи бездну небесного дождя, и отверзая в меру землю Свою напоити. Но не собери всего, и да нерастлиши создание Твое Человеколюбче.
Слава. Ты воду удержал еси на облацех Боже многомилостиве. Твоим благоволением дуга да явится, дождем наводняющи землю.
И ныне. Богородичен. Велие утвержение верным, и прибежище. Богоогражденыи град Твой всех царствующаго. Настоящая беды рабы Своя избави, молитвами си Препетая. Катавасия.
Песнь 6. Ирмос
Яко же пророка избави из глубины преисподняя, Христе Боже. И мене от грех моих избави Человеколюбче, и направи живот мой молютися.
Запев. Возмущаяи ширину морскую, и одождяя от нея землю. Бразды ея напой, и исполни жит. Да возвеселятся семена сеющеи.
Запев. Да не в клятву будет нам небо медяно, превышнии Слове. Аще и согрешихом закону Твоему Господи. Но посети на пищу землю Свою, плодоносити рабом Твоим.
Слава. Облачаяи небеса облаки Всещедре, и проливая на лице дождь всея земля. Утиши гнев Твой, подаждь нам вся прошения. Ты бо владееши животом и смертию.
И ныне. Богородичен. Песньми Тебе вси молимся, Владычице предвари, умоли о нас Бога. Да подаст подобныя туча земли Своей. Катавасия.
Кондак, глас 6-й. Водами превыспреними напояя Владыко, и дождь лия на времена естеству земному. Не гневом Твоим покажи нас Милосерде, ни ярости Твоея излей на нас, сведыи немощь нашу. Ты бо еси Отец нам, и имя Твое нарицаем. Отверзи хляби небесныя, и подаждь нам дождь на времена, яко Человеколюбец.
Песнь 7. Ирмос
Отроки в пещи прохлажеи. И Деву сохрань рождьшую Тя по рожестве. Благословен еси Господи Боже отец наших.
Запев. Огнем гнева Твоего землю попаляя, пременися вскоре. Мерилным Ти ставилом, потребную подаждь воду земли Своей зовущим. Благословен еси Господи Боже отец наших.
Запев. Небесныя отверзаяи хляби, мерилным Ти ставилом. Потребную воду подаждь земли Своей, да зовем Ти. Благословен еси Господи Боже отец наших.
Слава. Исчитаяи капля дождевныя, дождь нам пусти подобныи, Спасе щедрыи, зовущим. Благословен еси Господи Боже отец наших.
И ныне. Богородичен. Не возбранная истинная Заступнице, ускори, спаси рабы Своя Чистая Дево от сущих скорбей. Да зовем Ти, благословен плод Твоего чрева. Катавасия.
Песнь 8. Ирмос
Проявленаго на горе святей и в купине огненей, девическую Моисеови тайну явльшаго, Господа пойте, и превозносите Его во веки.
Запев. Изводяи от сокровищь Своих ветры, и изливаяи дождя земныя. Летнии нам дождь посли Господи славы. Да Тя славим во веки вся.
Из камене древле воду источивыи, и напоивыи жаждущая люди Своя. От облак Твоих воду мирови, источи Господи славныи. Да Тя славим во веки.
Слава. Немощную вопиющу видя Свою тварь, и от состава воднаго лишающуся. Тучею вскоре исцели, Господи славы. Да Тя славим во веки.
И ныне. Богородичен. Прежде начинающи молити Тебе, яко болши всех. Со ангелы и со всеми святыми, мольбы за ны к Богу принеси Владычице мира. Да пустит воду жаждущей земли. Катавасия.
Песнь 9. Ирмос
Проявленаго на горе законодавцу огнем и купиною, рожество присно Девыя. В наше верных спасение, песньми немолчными величаем.
Запев с поклоном. Заповеждь облаком Спасе наш превыше дати воду. И отверзи двери небесныя вскоре одождити землю, угашая прещения Твоего всеснедающий огнь.
Запев. Ты дождь удержаи, и землю попаляя, пощади Господи одожди ю. Да не едина часть измокнет точию, но всю напой землю изнемогшую молимся.
Слава. Воззри Боже на вся люди Своя, и на младенца ссущая. На юныя же и старца. На скоты же и на землю. И на создание все умолен быв, пусти дождь на землю.
И ныне. Богородичен. Востани умоли Богородице за ны. И гнев удержи кроткою Ти молитвою. Яко Ты еси наше прибежище велие в напастех Пречистая. Катавасия.
Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.
Отпуст: Господи Исусе Христе Сыне Божии, молитв ради пречистыя Твоея Матере и всех ради святых, помилуй и спаси нас, яко Благ и Человеколюбец. Аминь.