Песнь 1. Ирмос.
Поражеи Египта, и фараона мучителя погруж в мори, и люди спасл от работы, Моисейскую вопиющя песнь победную, яко прославися.
Запев: Слава Тебе, Боже наш, слава Тебе (поклон).
Иже Крест волею плотию прием, тридневно воскресл еси от мертвых. Адова сокровища Живоначалниче Господи истощив, извел еси окованныя душя.
Запев. Погребеныи воста, и с Собою воздвиже род человеческий, да радуется тварь вся и мыслении днесь облацы да кропят правду яве.
Запев. Зраком блистающеся мироносицы видевшее ангела, страхом бежаща от гроба, Христово же восстание уведевше, и возвестити тщахуся учеником.
Запев. Покрываяи водами превыспренняя Господи, Вода Жизни Сыи. Самаряныни просящи Твоея чистыя воды, подал еси раземевшеи благоутробие Твое.
Слава. О Троице иже верою Тя чистою славящих Отче и Сыне и Душе, Творче всем, спасай, и очищение даруй нам согрешением, яко Преблагий.
И ныне. Радуися Престоле Всезлатыи. Радуися Свещниче Огненыи. Радуися Светлыи Облаче. Радуися Полато Слова, и Мысленная Трапезо. Жизни Хлеб достойно Христа носивши.
Катавасия: Сохрани от бед рабы своя, Милостиве, яко усердно к Тебе прибегаем, к Милостивому Избавителю и всех Владыце, Господу Исусу.
Песнь 3. Ирмос.
Утвердися сердце мое о Господе, дающему молитву молящемуся, яко лук сильных изнеможе, а немощнии препоясашася силою.
Запев. С душею Тя пришедша Слове ко аду, видевшее вся души праведных, от вечных уз отрешахуся, воспевающее яже паче ума силу Твою.
Запев. Волею на древо вознесеся Слове, зрящее Тя, распадашеся камение, и тварь прекланяшеся вся, и мертви из гробов, якоже от сна воставаху.
Запев. Что чюдитеся, что во гробе вы ищете с миром жены Владыку. Воста, и мир совоздвиже, ангел блистаяися мироносицам вещаше.
Запев. Жизнь Сыи Господи, и Источник Безсмертия, сел еси при источнице Щедрыи. И Твоих премудрых вод исполнил еси самаряныню просящю и пиющю Тя.
Слава. Един надо всеми в Троице Бог поется, Отец и Сын и Божественыи Дух. Его же со страхом славят небеснии чинове, ясно вопиюще, Свят, Свят, Свят еси Господи.
И ныне. Несказанно заченши во утробе Своей всех Бога Дево Мати, и паче ума и слова родила еси. Пребывши Девою яко преже Рожества Богоневесто. Катавасия.
Седален, глас 4. Подобен. Вознесыися.
Да радуется небесная, и ликоствуют земная, яко Христос явися от Девы яко человек и избави из истления все человечество Своею смертию чюдесы бо воссиял есть. И жене самаряныне воды просящей подав источник исцелением, яко Един Безсмертен.
Слава, и ныне, тойже.
Песнь 4. Ирмос.
Услышах Боже слух Твой, и убояхся. Разсмотрих дела Твоя, и дивихся Господи, яко Твоея хвалы исполнися земля.
Запев. Небеса да веселятся, да празднует тварь вся. Воста Господь, и явися премудрым апостолом Своим.
Запев. Пожерта бысть смерте твоя сила, Христу явившуся. Мертвии же яко от чертога, восстанием Сего от гроб изыдоша.
Запев. Что рыдаете о жены; что с миром ищете Безсмертнаго, воста якоже рече, мироносицам глагола ангел.
Запев. Самаряныне Господи просившей подал еси воду, ведение державы Твоея, темже во веки невжаждет воспевающи Тя.
Слава. О Троице Пресущная, Отче и Слове и Божественыи Душе, Единосущне Собезначалне, спаси нас всех верою поклоняющихтися.
И ныне. Не опалимую купину Тя, Законодавец зрящее древле, Даниил же Гору Святую смотряше. Едина Дево Мати Владычице. Катавасия.
Песнь 5. Ирмос.
Восияй ми Господи свет повелении Твоих, яко к Тебе Христе дух мой утренюет и вопиет Ти. Ты бо еси Бог мой, и к Тебе прибегаю, Смирения Царю.
Запев. Гроб Твой святыи достигше рано мироносицы, блистающася видеша юношу, и ужасошася Твоему научившеся Божественому востанию Христе.
Запев. Смерть умертвися, и ад пленися связании свободишася Христовем востанием. Возрадуемся и руками восплещем, празднующе светло.
Запев. Апостоли взыграйте, и ангели ликуйте, земнороднии вси возрадуйтеся. Господь воскресе, тля испровержеся, и печаль преста, и ликоствует Адам.
Запев. Источник Сыи Господи Жизни, Вода оставления и разумения даровася, жене просившей древле самаряныни. С нею же воспеваем, неизреченныя щедроты Твоя.
Слава. Единицу Трисоставную, Троицу Единосущную Отца и Слова и Духа Святаго, Неразделна Естеством Бога Единаго почитаем, Творца и Господа и Владыку всех.
И ныне. Тя Дверь Непроходимую, и Ниву Неделанную, и Ковчег Манну Носящии, и Ручку и Свещник и Кадилницу Невещественаго Югля именуем Чистая. Катавасия.
Песнь 6. Ирмос.
Да не потопит мене буря водная, ни да пожрет мене глубина снидох бо во глубину сердца морскаго зол моих. Темже Ти зову яко Иона, да взыдет из истления живот мой к Тебе Боже.
Запев. На Кресте Тя беззаконии июдеи Исусе пригвоздиша, и копием прободоша Христе. Иосиф погребе благообразныи в нове гробе. Из него же со славою воскрес, совоскресил еси Спасе всю тварь, поющыя Державу Твою.
Запев. Вереи и врата Владыко силно сокрушил еси адовы, и воскресл еси яко Бог. И срел еси радуйтеся рече женам, и сих рещи послал еси учеником, яко воста Живот и виден бысть, просвещая всяческая.
Запев. Что плачетеся, что носите яко мертвецу жены масти; воста Христос, вопияше древле блистаяися велми явлеися юноша. Истощив плащаницу оставив, шедше и возвестите другом Его востание.
Запев. Струя Сыи Господи жизни независтныя, и бездна милости Щедре, путь шествовав, седиши близ источника клятвенаго. И самаряныни жене вопияше, даждь Ми воду пити, яко да приимеши оставление грехов.
Слава. Пою Отца Безначална, и Сына Сопрестолна, и Духа Единосущна верно, Едино Существо и Естество и Славу, и Едино Царьство Бога всех и Творца, и Содержителя всех, со бесплотными силами.
И ныне. Деву едину рождьшую и утробу нетленну сохраньшу, поем Тя Чистая Престол Господень, и Дверь и Гору, и Мысленыи Свещник, Чертог Всесветлыи Божии, и Сень Славы яве, Ковчег же и Ручку и Трапезу. Катавасия.
Кондак, глас 8. Верою пришедши на источник самаряныни виде Премудрости Воду Тебе Христе, напившися обилно. И царьствия вышняго наследовавши вечно, приснославная.
Икос. Честных таин услышим, Иоанну нас учащу яже в Самарии бывшая, жене яко беседоваше Господь, воду просив, иже воды в сонмища их собрав, иже Отцу и Духу сопрестолен, прииде бо искии образ Свой, яко Человеколюбец.
Песнь 7. Ирмос.
Не предаждь нас до конца имене Твоего ради, и не разори Завета Твоего, и не остави милости Твоея от нас, Господи Боже отец наших Прехвалныи во веки.
Запев. Со беззаконными Христе щедре волею вменися, во время божественыя страсти. И сия видящи, колебашеся вся земля, и камение вседетелным Ти мановением распадашеся Долготерпеливе, и восташа мертвии иже от века.
Запев. С душею сошед во страны преисподния ада, и взял еси мужеством связаныя вся, яже из Адама, смерть прият горкии мучитель, вопиющия, Исусе Боже, слава Твоему страшному смотрению.
Запев. С мертвыми что вы ищете Живущаго во веки, воста якоже рече. Се якоже видите праздны плащаницы, и испражнен гроб, явлеися глаголаше мироносицам юноша, скоро шедше рцыте апостолом.
Запев. Вода еси Жизни, вопияше Христу самаряныня, напой мя убо Слове жаждущую всегда Твоея Божественыя Благодати, яко да не к тому тружюся Господи, неразумия одержима мглою, но да проповедую Твоя величия.
Слава. Отца и Сына и Божественаго воспеваем Духа, Неразделную Троицу, Естеством сущу, Разделену Лицы, Едино Существо, сраслено безначално. Его же вси небеснии поют чинове.
И ныне. По Рожестве страшнем, Девою Чистая сохранися Святая Владычице. Темже Тя вси ангельстии лици, и человечестии роди, всегда немолчными воспевают гласы, Вместилище чисто Невместимаго. Катавасия.
Песнь 8. Ирмос.
Всяческая Владыко Своею Мудростию составил еси, землю же паки водрузил еси якоже веси. Глубине восходы утвердив на водах безмерных. Темже вопием воспевающе, благословите вся дела Господня непрестанно Господа.
Запев. Вознесеся Долготерпеливе волею на древо, и камение распадеся. И Солнце угасе, и завеса церковная раздрася. И земля поколебася, и потрясеся всесмешныи ад, и вся узники разреши.
Запев. Смерть претерпел еси, Едине Безсмертне волею, ада пленив. Врата медная стерл еси Царю Вечныи. Восхитив узники от века тамо сущыя, воспевающих державу непрестанно Твоея Благости.
Запев. Явился еси Господи сущим во тме седящим, Свет Сыи Незаходимыи, и Живот всем. Темже Тя яко виде праведныи сонм, взыграся Слове и возопи, пришел еси вся связаныя разрешити, поющыя славу Твою.
Запев. Близ сел еси источника в час Спасе шестыи, и самаряныне Воду Живу подал еси, и разумения воды за многое Милосердие. С нею же вси поем воспевающе, благословите вся дела Господня Господа, пойте и превозносите Его во веки.
Слава. Отца Безначална, и Сына Собезначална поем, и Духа Святаго, Бога Единаго в Трех, Несмесна Непресекома, и Содетеля всем, Единосилную Державу Самовластну. И вопием, пойте дела вся Господа, и превозносите Его во веки.
И ныне. Углем очищается Исаиа, проповедуя Мысленыи Угль воплощаемь Чистая Дево из Тебе паче ума, опаляющь человеком вся вещная согрешения. И обожающь Милосердием естество наше Всенепорочная. Катавасия.
Песнь 9. Ирмос.
Сотвори Державу мышцею Своею, низложи бо силныя со престол, и вознесе смиреныя Бог Израилев. В них же посети нас Восток Свыше, и направил ны есть на путь смирения.
Запев с поклоном. Се виден бысть Живот всех Христос, повешен волею на древе, и сия видящи Земля, поколебася, и многа святых восташа яве телеса усопших, и связанныя иже во аде пленил есть.
Запев. Красен из гроба яко Жених от чертога изшел еси, смерти разорь мучительства Христе, и адовы вереи сокрушь силою Си, и востания Твоего Светом, видимыи мир просветил еси.
Запев. Составим вси ныне лики духовны, и взываем, Христос воскресе, да радуется земля, да веселится небо и облацы да кропят нам правды тучю, празднующим светло, и Христа поющим.
Запев. Жизнь живущих, Источник Благих Господь, богатно источая воду учением, вопиет жене, подаждь Ми воду пити, яко да подам ти воду, согрешением твоим изсушение.
Слава. Света Единого Неразделна, Трисолнечное Единьство, Безначалнаго Отца и Сына и Духа, Божество Едино Жизнь всех и Творец. Того воспоем вернии со бесплотными, трисвятыми песньми священнославяще.
И ныне. Свету бывши жилище Чистая, озари зеницы души моея, омраченыя многими козньми врага, и видети сподоби ясно, иже от Тебе восиявшии Свет, паче ума чистым сердцем. Катавасия.