Канон в неделю о разслабленом


Песнь 1. Ирмос.

Дивен в Cлавах Творяи чюдеса Ты еси Боже иже бездну Изсушивыи, и оружие Погрузивыи, и люди Спасыи, поющих Ти Избавителю Богу нашему, яко прославися.

Запев: Слава Тебе Боже наш, слава Тебе.

Во Христове востании людие, днесь ликуем верно, яко пленен бысть ад, и яже узники имяше, отдал есть со тщанием, поющыя величия Божия.

Запев. Действуяи чюдеса, и творя знамения Царю Едине, распятие волею претерпел еси яко щедр, и смерть смертию умертвив оживил еси нас.

Запев. Иже силою Божественою, иногда разслабленаго словом своим Христе укрепивыи, и повелев ему одр взяти, мнозем временем болящую люте душу мою исцели.

Запев. В купель иногда Овчюю ангел прихожааше, и единого исцелевааше на всяко лето, крещением же Божественым ныне очищает, бесчисленая множества Христос.

Запев. Святыи Архангеле Михаиле, моли Бога о нас.

Началниче ангелом, архистратиже вышним слугам, сошедшыяся в честнем храме твоем, и Бога воспевающыя, покрыи и сохрани от всякаго искушения.

Слава. В Трех Лицех, во Едином же Естестве, Безначална Бога поем непрестанно со бесплотными, Отца и Слова и Духа, Царство имуща и Державу Неразделну.

И ныне. Чтущии Тя сей Чистая град Твой всегда верно, спасай от бед и пленения варварска, и междоусобнаго убийства и меча, и всякого иного прещения.

Катавасия. Сохрани от бед рабы своя, Милостиве, яко усердно к Тебе прибегаем, к Милостивому Избавителю и всех Владыце Господу Исусу.

 

Песнь 3. Ирмос.

Неплоды душе бесчадна, стяжи плод о Бозе, и веселящися возопии, утвердихся Тобою Боже, несть Свята, и несть Праведна, паче Тебе Господи.

Запев. Зря Тебе иногда Солнце на древе висяща Слове, свет сокры, и трясашеся земля вся, и мертвии восташа, мертву бывшу Ти Всесилне.

Запев. С Душею быв, во утробе земли, душы яже стяжа, издавааше ад со тщанием, вопиющия Державе Твоей песнь радостную, Едине Господи.

Запев. Иже в летех многих изнемогшую люте душю мою Преблагии, исцели якоже и разслабленаго преже, яко да хожю по Твоим стезям, их же показал еси любящим Тя.

Запев. Святыи Архангеле Михаиле, моли Бога о нас. С вышними чинми Божии Архангеле, молбу сотвори о иже верою поющих тя, соблюдая и храня нас, от житейских страстей нападающих.

Слава. Слава Отцу вопием, и Сыну и Духу, Един бо Сыи Естеством Бог, Его же силы вся небесныя со страхом славят, Свят, Свят, Свят еси зовуще.

И ныне. Безсеменно име Зачатие, и паче ума Рожество Дево Мати Чистая, дело страшно, и чюда исполнено, ангелы почитаемо, и человеки славимо, Отроковице Владычице. Катавасия.

Седален, глас 3. Глаголом токмо единем укрепив разслабленаго Всемирное Слово, иже нас ради на земли явившееся за Милосердие. Тем же и иже одр носяи мимо хождаше. Егоже и книжници зрети содеянное не терпяху, злобою разслаблени и завистию, еюже душы разслабляюще.

Слава и ныне. Той же.

 

Песнь 4. Ирмос.

Присенную гору Аввакум провиде, пречистую Ти утробу Чистая. Тем же взывааше, от юга приидет Бог, и Святыи из горы присенныя часты.

Запев. Еврейскии собор завистию растаяваемь, на древе распят Тя Господи. И разорив осуждение смертное, яко Силен востал еси, и мир воздвигл еси.

Запев. С миром жены, что Неистощимаго Мира ищете; Востал есть к мироносицам рече, седяи в белах ризах, поднебесную исполняя мысленаго благоухания.

Запев. Рабии нося Образ, за многое Милосердие хотя пришел еси на землю и здрава показал еси, иже во многих летех лежащаго, повелев и одр носити.

Запев. Ангел убо Господень на всяко лето сходя, и воду в купели возмущаше, творя здрава единаго точию. Христос же множества бесчислена божественым крещением спасает.

Запев. Святыи Архангеле Михаиле, моли Бога о нас. Началниче ангелом, и наставниче заблужающим, Господень началныи воеводо, в час сей посреди нас прииди, и молитвы всех принеси Единому Творцу и Владыце.

Слава. Соединена Естеством, и разделена Лицы есть Святая Троица, Отец Пресущественыи, и Соприсносущественыи Сын, и Святыи Един Всесилныи Дух.

И ныне. Чистая рцы, како родила еси; и како доиши Младенца, Адама древнейша; како на руку носиши Сына, иже Сыи на раму херувимску; якоже Той весть Един иже вся Осуществовавыи. Катавасия.

 

Песнь 5. Ирмос.

Светом Твоим невечерним Христе Боже, озари смиренную ми душю, и настави в страх Твой, зане Свет повеления Твоя.

Запев. Вознесеся на древе Крестнем, и совознесл еси мир весь, и быв в мертвых яко Бог иже от века мертвыя совоздвигл еси.

Запев. Воскресе яко же рече Христе, истощив вся адова царьства. И явися апостолом, Радость подавая Вечнующую.

Запев. Разслабленаго якоже воздвигл еси Христе, разслабленую ми душю преступленьми оздрави, и шествовати ми на Твою правую стезю настави.

Запев. Белообразен бяше женам зовыи ангел, не к тому плачите, Живот наш воскресл есть, и яже во гробех мертвыя сооживил.

Запев. Святыи Архангеле Михаиле, моли Бога о нас. Ангелом начальниче Михаиле, яже собирающыяся в храме твоем люди днесь, и проповедующыя Божия величия спасай.

Слава. Равночестная Тричисленая Единице, разделена верно составы, Соединена же Естеством познавается, Отец и Сын и Божественыи Дух.

И ныне. Безсеменное зачатие Твое Чистая, и непостижимое поем Рождение, блажаще Тя яко Матерь Творцу всех и Владыце. Катавасия.

 

Песнь 6. Ирмос.

Глубина страстей на мя воста, и буря сопротивных ветров, но предварив мя Ты спаси Спасе, и избави от тля, якоже спасл еси от зверя пророка.

Запев. Вознесеся волею на древо, и положися яко мертв во гробе, и сущыя во аде мертвыя вся вкупе, совоскресил еси Христе Божественою Властию.

Запев. Ад усрет Тя Слове Щедрыи доле, огорчися, и связанныя отдавая скоростию, Твое страшное поющых Спасе воскресение, во гласех немолчных.

Запев. Тя божествении ученицы видевше, Жизнь всех из гроба воставша Ххристе, любовию многою и нравом правым, и веселием душевным поклоняхуся.

Запев. Иже древле на одре болезнене влетех мнозех слежаи, Твоим Христе повелением исцелев, и славит и поет, благоутробие Твое Благодателю.

Запев. Святыи Архангеле Михаиле, моли Бога о нас. Ангелом начальниче Михаиле, предстояи Престолу Владычню, прииди посреди нас, наставляя к стезям жизни. Иже Тебе предстателя тепла стяжавших.

Слава. Троицу Лицы Тя чту, Единицу же Существом проповедую, Безначалне Отче, и Сыне, и Душе Правыи, Боже всех, с вышними страшными воиньствы.

И ныне. Иже вся божественым мановением носяи, держимь есть Богородице Дево на руку Твоею, всех нас восхищая, от руки работы лукаваго, яко щедр. Катавасия.

Кондак, глас 3, подобен. Девая днесь.

Душю мою Господи во гресех всяческих, безместными деяньми люте разслаблену, воздвигни божественым Си человеколюбием, якоже и разслабленаго Воздвигл еси древле, да зову Ти спасаемь, Щедрыи Христе, даждь ми исцеление.

Икос. Иже руки Своея горьстию содержаи концы, Исусе Боже. Иже Отцу Собезначальныи, и Духу Святому Совладычествуяи всяко, плотию явился еси, недуги исцеляя, и страсти очистил еси, слепца просветил еси, и разслабленаго словом Божественым совоставил еси, и сему внезаапу ходити, и свой понести одр повелел еси на раму взяв. Темже вси с ним воспеваем и поем, Щедрыи Христе даждь нам исцеление.

 

Песнь 7. Ирмос.

Пламень оросивыи в пещи, и отроки Неопалноспасыи, благословен еси во веки Господи Боже отец наших.

Запев. Распростерта Тя на древе яко зряще Солнце, свет сокры, немогии миру светити, Тебе Волею зашедшу Царю, на просвещение всем человеком.

Запев. Воскресл еси, истощив гробы, и пленив ада Силою Всемощною. Тем же поем Востание.

Запев. Яко мертва что Живаго ищете; воста несть во гробе, мироносицам вопияаше древле, блистаяися зраком божественыи ангел.

Запев. Слежаща в летех мнозех разслабленаго, словом исцелил Христос, вопияаше, возми одр свой и ходи, поя величия Божия.

Запев. Святыи Архангеле Михаиле, моли Бога о нас. Михаиле начальныи воеводо Господень, иже верно в божественем ти и честнем храме собирающихся, наставляй и покрывай от всяческих зол, ходатайством си.

Слава. О Троице, иже верою поющих Тя, яко Бога всех и Владыку, от всяких напастей спасай, и Твоих Благ причастники сотвори.

И ныне. Девьствуеши и Рождьши паче слова, иже прежде всех век Родившагося, от Безначална Отца несказанно. Сего ради Чистая Тебе ублажаем. Катавасия.

 

Песнь 8. Ирмос.

Иже ангелы немолчно в вышних славимаго Бога, небеса небес, земля и горы и холми и глубина, и весь род человеческии, песньми Его яко Зиждителя и Избавителя благословим, и превозносим во веки.

Запев. Завеса раздрася распеншутися Спасе наш, и подавааше мертвецы их же пожре смерть, и ад обнажаашеся, Тебе зря в преисподних земли бывша.

Запев. Где ти есть жало смерте; где ти аде ныне победа; воскресшу Царю, умертвился еси и погибл, и не к тому царьствуеши, крепки ибо отпусти их же имяше связаныя.

Запев. Тецыте скоро возвестите апостолом воскресение, мироносицам явлеися юноша вещааше, восресе Владыка, и с ним иже от века мертвецы преславно.

Запев. В летех многих слежаи разслабленыи возопи, помилуй мя Избавителю, недоумением содержима, Сей же повеле ему, возми тщательно одр свой и право ступай.

Запев. Святыи Архангеле Михаиле, моли Бога о нас. Яко не вещественым вождь, чиноначалниче силам, с ними проси нам согрешением избавление, и исправление же житию, и тамошних наслаждение благ вечных.

Слава. Несозданно и Несекомо Существо, Трисоставно Божество, Отца Безначална Бога, и Сына, и Духа, Пресвятаго, поем согласно, серафимскую взывающе страшную песнь.

И ныне. Свиток Тя древле зряще Исаия Приснодево, в нем же перстом Отчим Слово Безначалное написася, от всякого безсловесия спасая нас, иже словесы Тя священными воспевающыя. Катавасия.

 

Песнь 9. Ирмос.

На Синайстей горе видев Тя в купине Моисей, неопално огнь Божества приемшю во чреве. Данил же Тя виде Гору Несекому. И Жезл Прозябшии Исаия взывааше, от корене Давыдова.

Запев. Ты Исусе на древе возвышаемь, совознесл еси нас. И положися волею во гробе, из гроб мертвыя воскресил еси вся поющыя державу Твою непостижимую, и Силу Твою непобедимую.

Запев. Красен от гроба восиял еси, яко Жених от чертога, краснейшии Слове. И разрушил еси адово мрачное царьство, и узники извел еси согласно зовущыя, Слава Силе Твоей, Слава Исусе Боже восстанию Твоему.

Запев. Воздыхания же и слезы носяще, с мастьми и со тщанием, Всесвятыи Гроб достигоша жены. И Христову учими бяху верою славному востанию, еже празднуем в радости душевней веселящеся.

Запев. Последоваше здравие телу повелением Ти Христе, иже и видим бяше прежде разслабленыи, скакаше скоростию, и одр нося на нем же лежаше лета многа, песнословя многую Силу Твою.

Запев. Святыи Архангеле Михаиле, моли Бога о нас. Просвещение нам испроси великии чиноначалниче, Свету Великому присно предстояи. И умири нашю жизнь, искушеньми всегда змиевыми, и напастьми жития колеблющими присно досточюдне.

Слава. Свет и Светове, Жизнь же, и Жизни, славим Тя благочестно, Отче и Слове и Душе Святыи, Трисоставная Единице, и Неразделимая Державо, и Божество Неслитное. Свят, Свят, Свят вопиюще с вышними силами.

И ныне. От светоносных пройде ложесн Твоих Великое Солнце Христос, и мир просвети Пречистая осияньми светлыми, и от тмы изъят преступления. Тем же поем Тя яко вину всем добрым Богоневесто. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?