Канон в неделю о блудном сыне


Творение Иосифово. Глас 2.

Песнь 1. Ирмос.

Моисейскую песнь восприимши, возопий душе, Помощник и Покровитель, бысть мне во спасение, Cе ми есть Бог, и прославлю И.

Запев с поклоном: Слава Тебе Боже наш, слава Тебе.

Исусе кающася приими и мене яко блуднаго сына, все житие в лености живша, и Тебе прогневавша.

Запев. Еже ми даде прежде, зле расточих, Божественое богатьство, и удалихся от Тебе блудно жив. Благоутробне Отче, приими мя убо ныне обращающася.

Слава. Руце ныне Отечестии простер, приими Господи и мене, якоже блуднаго Всещедре, яко да благодарно славлю Тя.

И ныне. На мне Боже всю показав благостыню, презри ми множество согрешении яко Благодатель, божествеными Матере Твоея мольбами.

 

Песнь 3. Ирмос.

Неплоднаго ми ума, плодоносна Боже явьствуй, Делателю душам, и Насадителю благим милосердием Си.

Запев. Весь вне себе быв умовредно, прилепихся страстей обретателем. Но приими мя Христе якоже блуднаго.

Запев. Блуднаго гласу уподобихся, вопию, согреших Отче, яко же оного убо и мене приими ныне и не отрини мене.

Слава. Руце свои Христе простри милостивно, приими мя от страны далния, греха и страстей обращающася.

И ныне. Добрая в женах, обогати и мене добрыми виды, грехи многими обнищавшаго Чистая яко да славлю Тя.

Седален, глас 1. Подобен. Гроб Твой.

Обьятия Отча отверсти ми потщися, блудно мое изжих житие. Но богатьство не изживущее взираю щедрот Твоих Спасе, ныне обнищавшее ми не презри сердце. Тебе бо Господи умилением зову, согреших Отче на Небо и пред Тобою.

Слава и ныне. Богородичен. Матерь Тя Божию свемы вси, Девою воистину, в щедроты Твоя вопием, любовию прибегающе в Твою благость. Тя бо имамы грешнии Предстателницу, Тебе стяжахом в напастех Спасение, Едина Всепетая.

 

Песнь 4. Ирмос.

Иже от Девы Твое Рожество пророк предзря, проповедаше вопия, слух Твой услышах, и убояхся, яко от юга из горы Святыя Присенныя, пришел еси Христе.

Запев. Богатьство доброе еже ми даде Небесныи Отче, расточих зле, странным гражданином порабощен. И ныне вопию Ти согреших, приими мя яко блуднаго древле, простер объятия Своя.

Запев. Всякой злобе поработихся, приникнув окаянне к страстным деянием, и себе вне бых несмотрением. Ущедри мя Отче Небесныи, и спаси мя прибегающа во многия Ти щедроты.

Слава. Всякого студа исполнихся, не смею возрети на высоту Небесную, ибо безсловесно приникнух к греху. Ныне же обращься вопию со умилением, согреших Ти приими мя Всецарю.

И ныне. Иже человеком Помощь, и Упование твердое всем християном, Прибежище Чистая спасаемым, спаси мя Дево Матерьними Си мольбами, и будущия сподоби жизни.

 

Песнь 5. Ирмос.

Нощь мимо шедши приближися День и Свет Присный возсия, сего ради Тя хвалят ангельские чини и славословят Тя всяческая.

Запев. Поработихся гражаны странными, и во страну тлетворну поидох, и исполнихся студа. Ныне же обращься зову Ти Щедре согреших.

Запев. Отеческое Си Благоутробие ныне отверзи ми, от злых обратившуся Небесныи Отче. И не отрини мене имеяи премногую милость.

Слава. Не смею взирати горе на высоту, без числа Христе прогневах Тя. Но ведыи Твоя щедроты милостивныя, взываю согреших, очисти и спаси мя.

И ныне. Всесвятая Дево Прерадованная яже очищение всем рождьши, моих согрешении тяжькое бремя, Твоими молитвами облегчи.

 

Песнь 6. Ирмос.

Во глубине греховней одержимь есмь Спасе, и в пучине житейстей влаемь. Но якоже пророка Иону, из глубины мя от страстей возведи, и спаси мя.

Запев. Глубина согрешении обуревает мя, и треволнение греховное погружает мя, окорми мя ко Пристанищу Жизни Христе Боже, и спаси мя Царю Славы.

Запев. Богатьство отеческое расточих люте, и обнищав студа исполнихся, порабощен неплодными помышленми. Тем же Ти вопию Человеколюбче ущедрив спаси мя.

Слава. Гладом истаявша всяких благ, и устранившася от Тебе Всеблагии, ущедри обращающагося ныне, и спаси мя Христе поюща Ти Человеколюбие.

И ныне. Спаса и Владыку рождьши Христа, спасению мя сподоби Дево, обнищавша от всяких благ, Отроковице Чистая, да пою Твоя величия.

Кондак, глас 3. Подобен. Девая днесь.

Отеческия славы Твоея удалихся безумно, в злых расточих еже ми предал еси богатьство. Тем же Ти блуднаго приношаю глас, согреших пред Тобою Отче Щедрыи, приими мя кающася, и сотвори мя яко единаго от наемник Твоих.

Икос. Спасу Христу всегда учащу Своим гласом в Писаниих, услышим о блуднем, и целомудренем паки. И сего ради верою уподобимся доброму покаянию. И ведящему всех тайная, смирением сердца взываем. Согрешихом Ти Отче Щедрыи, несмы достойни, николиже нарещися чада Твоя, якоже преже. Но яко Естеством Сыи Чадолюбив Ты приими, и сотвори мя яко единаго от наемник Твоих.

 

Песнь 7. Ирмос.

Херувимом подобящеся отроци в пещи ликоствоваху вопиюще, благословен еси Боже, яко истинною и судом навел еси сия вся грех ради наших, Препетыи и Препрославленыи во веки вся.

Запев. Сладостьми телесными преклонихся все окаянне. И поработихся волею страстным изобретением. И странен бых от Тебе Человеколюбче. Ныне же зову блуднаго гласом, согреших Христе, не презри мене яко Един Милостив.

Запев. Взываю согреших, никако же смею возрети на высоту Небесную Всецарю, яко безумием един аз Тя прогневах, отвергся Твоих повелении. Тем же яко Благ не отверзи мене от Твоего Лица.

Слава. Апостол Господи и пророк Твоих, и честных мученик, и преподобных молитвами, прости ми вся яже согреших, прогневах Христе Благость Твою, яко да пою Тя и славословлю во веки.

И ныне. Херувим явльшися, и серафим Богородице, и всех Светлейши небесных воиньств. С сими умоли Его же воплотила еси Пренепорочная, Божественое Слово Безначальна Отца. Яко да благ вечнующих, вси сподобимся.

 

Песнь 8. Ирмос.

В купине Моисею Девическое Чюдо, на Синайстей горе Проображьшаго древле, пойте вся дела Господа, и превозносите Его во веки.

Запев. Иже Сшедыи на землю спасти мир, вольною нищетою, за милосердие многое, обнищавшаго мя ныне от всякого благодеяния, яко Милостив спаси.

Запев. От Твоих заповедей удалихся, поработихся окаянне льстивым. Обращающа же ся ныне, яко блуднаго древле припадающа Ти приими Небесныи Отче.

Слава. Тлетворными помышленьми обьемся, омрачихся и от Тебе удалихся, весь вне себе бых Щедре. Тем же в покаянии припадающа мя спаси.

И ныне. Богородительнице Чистая, яже низверженым исправление Едина, исправи и мене, всяцеми грехи сокрушена всего и смирена.

 

Песнь 9. Ирмос.

Земен кто слыша таковая; ли кто виде колиже, яко Дева обретеся во чреве имущи и без болезни Младенца породи. И Тя Чисту Богородице Марие величаем.

Запев с поклоном. Виждь ми ныне печаль сердца, виждь ми обращение, виждь ми слезы Спасе и не презри мене. Но объими паки милосердием множеству спасаемым причитая, яко да пою благодарно милости Твоя.

Запев. Яко разбойник вопию помяни мя.. яко мытарь умилихся бия в перси зову ныне очисти, яко же блуднаго приими мя, и прости мя от всех моих зол Всецарю, яко да пою Ти крайнюю Благость.

Слава. Воздохни ныне душе преокаянная, и возопи Христу, иже мене ради волею обнищав Господи, обнищавша мя от всякого благодеяния. Добрых богатьством, яко Благ и Многомилостив Един, обогати мя.

И ныне. Светлыми молитвами Си Дево, мысленеи мои очи омрачении злобою, просвети молюся, и к путем покаяния введи мя, яко да должно Тя песнословлю, яже паче слова Слово рождьшую.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?