Канон на Лазареву субботу


Творение Феофаново. Глас 8.


Общее начало и конец всем канонам →
Порядок чтения по уставу


Песнь 1. Ирмос.

Поем Господеви проведшему люди Своя, сквозе чермное море, песнь победную, яко прославися.

Запев: Слава тебе Боже наш, слава Тебе. Поем Господеви воскресившему Лазаря, четверодневнаго из гроба, осанна вопиюще всех Богу.

Лазаре гряди вон, Христу возгласившу. Услыша бездушныи, и изыде связан повойми, воспевая Бога.

Лазаря умершаго, манием Божественым воскресил еси, яко Зиждитель Сыи, и животу сокровище Человеколюбче.

Запев. Словом четверодневнаго Лазаря, возгласил еси Безсмертне, и темнообразное адово разрушил еси ужасно царство.

Всем Пребожественое познание Божества показал еси, из мертвых воставил еси четверодневнаго Лазаря Господи.

Слава. Днесь Вифания предвозвещает воскресение Христа Жизнодавца, в воскресении Лазареве ликовствующи.

И ныне. Богородичен. Чистая Богородице, Воплощенна Присносущна, и Пребожествена Слова, паче естества рождьши, поем Тя.

 

Песнь 3. Ирмос.

Ты еси утвержение, притекающим Ти Господи, Ты же и Свет омраченным, и поет Тя дух мой.

Запев. Два предлагая действа Своя, показал еси существ Спасе сугубицу, Бог бо еси и человек.

Запев. Бездна Сыи разума, Ты вопрошаеши, где положен бысть мертвыи, хотя воскресити Живодавче лежащаго.

Слава. Места испытаяи, яко земен человек был еси описан, исполняя всяческая, яко Бог не описан.

И ныне. Богородичен. Даждь нам помощь молитвами Твоими Всечистая, нахождения отгоняющи, лютых обьстоянии.

Седален, глас, 8. Подобен. Премудрости.

Проведыи всяческая яко Творец, в Вифании прорекл еси учеником Своим, друг наш Лазарь успе днесь, и ведыи вопросил еси рекл, где положисте и. И Отцу помолился еси прослезив яко человек. Темже и возгласив, егоже любляше, от ада воставил еси Господи, четверодневнаго Лазаря. Сего ради вопием Ти, приими Христе Боже, дерзающих песнь принести Ти. И сподоби всех Славе Твоей.

Слава, и ныне. Глас, 4. Вкупе предсташа Христу Лазаревы сестры, и слезяще горце, и плачуще жалостно, реша, умре владыко Лазарь. Тыже яко Бог не неведыи погребения, вопрошаеши яко человек где положисте его. И приступим ко гробу, возглашааше четверодневнаго Лазаря. Онже абие воста и поклоняшеся возгласившему его.

 

Песнь 4. Ирмос.

Ты ми Христе Господь, Ты же и сила ми. Ты ми Бог, Ты ми радование. Не оставль недра Отча, но милостию Си нашу нищету посетив. Темже с пророком Аввакумом зову, силе Твоей слава Человеколюбче.

Запев. Ты яко пастырь исхитил еси человека, растлевша уже четверодневна Содетелю, от волка лютаго поистине всеядца, яко Всесилен и Господь. Сим прославляя всемирную славу, Своего тридневнаго востания.

Запев. Тебе жизнь видяще, иже с Марфою Христе вопияху, аще бы был зде Господи, Просвещение всех и Жизнь, отнюд небы умерл Лазарь. Жизнь же умерших Ты еси Человеколюбче, в радость плачь их прелагаеши.

Яко милостив слезы точиши Человеколюбче, ущедрив Марфе болезнь, Слово Божие и всех Жизнь. Якоже неведыи вопросил еси Спасе, где положен бысть Лазарь. И сего возгласив воздвигл еси яко всесилен.

Слава. Тебе источника боятся Господи бездны. Тебе работают источници и моря. Тебе трепещут Христе вереи адовы, и ключи державою Ти разрушаются, Лазарю воскресшу из мертвых, гласом Твоим Всесилне Спасе Человеколюбче.

И ныне. Богородичен. Тебе чистую Богородицу Пречистая стяжах, молитвеницу непостыдну. Прилоги вражия и греха стену ныне прелезу, твердым предстательством, иже в Тя водруженым и силою Твоею утвержаем.

 

Песнь 5. Ирмос.

Вскую мя отрину от лица Твоего Свете Незаходяи, покрыла мя есть чюжа тма окаяннаго. Но обрати мя, и к свету заповедей Твоих пути моя направи молютися.

Запев. Отцу славу приношая, яко Богу не сопротивен Сыи моляся, предстоящии уверяя народ долготерпеливе. И благодарение Своему Отцу принося, самовластно воздвизаеши Лазаря.

Запев. Молитвами Лазаревыми, Марфы же и Марии, сподоби нас зрителей быти, Боговидному Кресту, и страстем Ти Господи, и светлости днем, и Царя Праздником Праздника славити Тя.

Слава. Представ Лазареву гробу Человеколюбче, сего призвал еси, и жизнь подал еси, яко Жизнь Сыи безсмертная человеком всем. Еюже яко Бог будущее прообразуя воскресение.

И ныне. От гласа Боговещаннаго, и Божественыя силы Спасе Державы Твоея, еюже адова врата, и всеядныя смерти сокрушил еси, но исхити мя от страстей моих, якоже преже Твоего друга исхитил еси Лазаря.

 

Песнь 6. Ирмос

Иону в ките Господи единаго вселил еси, мене же связаннаго вмрежах вражиих, яко от тли того возведи молюся.

Запев. Возлюбил еси Вифанию Господи, иде к Лазарю, и сего уже смердяща воскресил еси яко Бог, и от уз адовых спасл еси. (дважды с запевом)

Слава. Марфа убо отчаявся Лазаря, яко уже четверодневна. Христос же истлевшаго воскреси, яко Бог, и к жизни престави гласом.

И ныне. Марфа убо отчаявся Лазаря, яко уже четверодневна. Христос же истлевшаго воскреси, яко Бог, и к жизни престави гласом.

Кондак. глас 2. Подобен. Вышних ища.

Иже всех радость Христос Истина, Свет и Живот, и миру возвание, сущим наземли явися. Своею благостию, быв образ воскресения. И всем подая Божественое оставление.

Икос. Учеником Зиждитель всем предвеща глаголя, братие моя знаемии, наш друг успе. Сие предглаголя и уча, иже ведыи вся яко Зиждитель всех. Идем убо к нему, и видим странное погребение, и рыдание Мариино, и Лазарев гроб узрим. Тамо бо хощу чюдодействовати, совершая Креста предначинание, и всем подая Божественое оставление.

 

Песнь 7. Ирмос.

Дети еврейския в пещи, попраша пламень дерзнувше, и наросу огнь преложьшу вопияху, благословен еси Господи Боже во веки.

Запев. Прослезив яко человек щедре, воскресил еси яко Бог сущаго во гробе. И разрешься от ада Лазарь взываше, благословен еси Господи Боже во веки. (дважды с запевом)

Слава. Изыде повойми обязан, пропасти же адовы и тмы убег, владычним словом Лазарь взываше, благословен еси Господи Боже во веки.

И ныне. Изыде повойми обязан, пропасти же адовы и тмы убег, владычним словом Лазарь взываше, благословен еси Господи Боже во веки.

 

Песнь 8. Ирмос.

Мусикийским органом согласящимся, и людем без числа кланяющимся образу сущю на молебнем. Трие отроцы песнословяху, Господа пойте и превозносите Его во веки.

Запев.  Яко Пастырь агньца взыскал еси, от волка лютаго и губителя исхитив. Одержимаго тлею обновляеши, поюща Тебе непрестанно, Господа пойте и превозносите Его во веки. (дважды с запевом)

Слава. Яко человек гроба взыскал еси мертваго яко Содетель воскресив повелением Твоим Владычним. Егоже ад ужасеся зря, вопиюща Тебе. Пойте и превозносите Его во веки.

И ныне. Яко человек гроба взыскал еси мертваго яко Содетель воскресив повелением Твоим Владычним. Егоже ад ужасеся зря, вопиюща Тебе. Пойте и превозносите Его во веки.

 

Песнь 9. Ирмос.

Чистую и Славную почтем, людие Богородицу, яже огнь Божества приемшую, во чреве не опално, песньми величаем.

Запев. Людие видевше ходяща мертвеца четверодневна, удивившеся чюдеси, вопияху, Избавителю, Бога Тя песньми величаем. (дважды с запевом)

Слава. Предуверяя славное востание Твое о Спасе мой, от мертвых четверодневнаго из ада свободил еси Лазаря, песньми Тя величающа.

И ныне. Предуверяя славное востание Твое о Спасе мой, от мертвых четверодневнаго из ада свободил еси Лазаря, песньми Тя величающа.

Отпуст: Пришедыи в Вифанию воздвигнути друга Своего праведнаго Лазаря, Господи Исусе Христе, Сыне Божий, молитвами Пречистыя Твоя Матере, и всех ради святых, помилуй и спаси нас, яко Благ и Человеколюбец.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?