Канон преподобному Кириллу Белозерскому

Тропарь, глас 1. Яко крин в пустыни Давыдски процвел еси отче Кириле, злострастия терние искоренил еси. И в ней собрал еси ученик множество, страхом Божиим и твоим учением наставляеми. Их же и до конца яко чадолюбивыи отец не остави посещая. Да вси вопием. Слава Венчавшему тя. Слава Дающему тобою всем исцеление.

 

Песнь 1. Ирмос.

Яко по суху ходив Израиль, по бездне стопами, гонителя фараона видя потопляема. Богу победную песнь, поем вопияше.

Запев с поклоном: Преподобне отче Кириле, моли Бога о нас.

Прекрасная лоза винограда Христова, был еси премудре Кириле. И грозд пресладкии явися. Божественую сладость верным источаеши блаженне, купно же и радование поющим тя.

Запев. Отче Кириле, нетерпя враг, в начале твоего жития бурю воздвиг, древом напрасно хотя умертвити тебе. Аще не бы Божественыи глас возгласи тя, богомудре.

Слава. Христа нас ради смирившагося подражав. И крест свой взем преподобне, Того стопам последовал еси. Всяко мирское пристрастие от себе оттрясл еси пребогате.

И ныне. Во Двою Естеству Един от Святыя Троица, от чистых кровей Твоих воплотися, Боголепне пройде. Иже от Адама спасая Пречистая благостию.

Катавасия: Избави от бед рабы своя, преподобне отче Кириле, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

Несть свята яко же Ты Господи Боже мой, вознесыи рог верных си блаже. И утверждь их на камени исповедания Ти.

Запев. Аще и в мире сущая отче преобидел еси, но тамо премирная и нетленная стяжал еси. Идеже глас празднующих, и райское наслаждение.

Запев. Льстивыи враг хотя тебе пакость сотворити преподобне, лукавых человек на тя вооружает. Тебе же приразився постыдеся, Христу бо тя соблюдающу.

Слава. Уже преславное твое житие, всюду преподобне прославляется, и чюдеса твоя в концех проповедаются. Темже в память твою сошедшеся, почитаем тя.

И ныне. Плоти бренней соединився, иже от Отца Единородныи в ложеснах Твоих, Един от двою пройде без истления. Соблюде невредимо Девство Ти Всепетая. Катавасия.

Седален, глас 4. Подобен. Вознесыися.

Приспе праздник честнаго ти успения блаженне Кириле. Просвещая всех празднующих память твою светло. И Христа непрестанно песньми всегда славящих. Дважды.

Слава и ныне. Богородичен.

Иже на престоле херувимстем седяи, и в недрех отеческих водворяемыи. Яко на Престоле седит Святем Своем, Владычице на лону Твоею Плотию. Бог бо воистину воцарися над всеми языки, и разумно ныне поем Ему. Его же моли, спасти рабы Твоя.

 

Песнь 4. Ирмос.

Христос мне сила Бог и Господь, честная Церкви боголепно зовет вопиющи. От совести чисты, о Господе празднующи.

Запев. Отче преподобне, сна своима очима не дал еси, ни веждема дремания. Дондеже сподобился еси видети праведных селения, яже уготова Бог любящим Его. (Дважды с запевом)

Слава. Уже не к тому врази, ниже человецы лукавии могут к тебе приближитися, Кириле преподобне. Видеша бо благодать Божию, тебе всегда соблюдающую.

И ныне. К Тебе упование мое возложих, Мати Присно Дево спасения моего. И Тя Предстательницу имею животу моему, тверду же и непоколебиму. Катавасия.

 

Песнь 5. Ирмос.

Божиим светом Ти Блаже, утренюющих Ти душа любовию просвети молюся. Тя ведети Слово Божие Истиннаго Бога, от мрака греховнаго изимающа.

Запев. Изрядно твое житие, в последняя роды и преславно явися. Чюдеса же твоя, всюду верным излияшася. Темже тя вси отче ублажаем.

Запев. Райскую доброту желая, преподобне Кириле. И тоя ради в слезах и воздыханиих, бдениих же и молитвах, свою жизнь препроводил еси. И оттуду наследил еси, желаемое тебе блаженьство.

Слава. Иже пресветлыи твой праздник отче, благочестно празднующим, подавай свыше спасение и избавление. Да тя вси блаженне Кириле, непрестанно воспеваем.

И ныне. Людем яко воистину, тихое пристанище Христос Тебе яви. Иже верою и любовию Тя Истинную Владычицу Всенепорочная, от совести чисты Богородицу исповедающим. Катавасия.

 

Песнь 6. Ирмос.

Ят бысть, но неудержан в персех китовех Иона. Твой бо образ нося, пострадавша и погребению дана. Яко из чертога от зверя изшед. Приглашаше же кустодии, иже хранящеи суетная и лжа. Милости ваша оставили есте.

Запев. Владыку ум поставил еси, над страстьми телесными блаженне. Темже и Пресвятаго Духа селение богоносе был еси. Егоже моли, и нас свободити от страстей, да тя почитаем.

Запев. Яко победив века сего князя тме, вшел еси к небесным. Победы венец нося, от Вседержителныя Руки Бога нашего. Моли от бед спастися, тебе почитающим.

Слава. Плотьское мудрование, еже на земли отче умертвил еси. И на небесех житие стяжал еси, идеже святых дуси радуются, поюще с тобою Владыку своего.

И ныне. Пречистая Владычице, рождьшия человеком Кормчию и Господа. Страстей моих непостоянное, и лютое отжени смущение. И тишину подаждь сердцу моему. Катавасия.

Кондак, глас 8. Подобен. Взбранной.

Яко преобидев тленная, и долу влекущая мудрования отче. К вышнему течению радостно устремился еси. И тамо со святыми Пресвятей Троице предстоя. Моли от враг сохранитися стаду твоему. Яко да святое твое успение празднующе вопием. Радуися преблаженне Кириле отче наш.

Икос. Аще и человек отче бысть по естеству, но паче человека житие совершил еси. Вся бо яже в мире сладкая и красная преобидев, последовал еси Христу. Темже и от всех слышиши. Радуися яко Пречистою наставляем пустыню достигл еси, радуися яко в той пречестен храм Божии Матери воздвигнувыи. Радуися яко в нем Бог прославляем есть, радуися собравыи тамо ученик множество. Радуися яко с теми прилежно Господеви работал еси, радуися удививыи ангелы житием своим. Радуися яко тобою человецы ползовашася, радуися иже чюдесы всех удививыи. Радуися прешедыи от земных на небесная, радуися Троице предстоя о нас молишися. Радуися источниче чюдес неизчерпаемыи, радуися верных пленник избавителю. Радуися преблаженне Кириле отче наш.

 

Песнь 7. Ирмос.

Хладодавицу убо пещь сотвори ангел преподобным детем. Халдея же опали велением Божиим, мучителя увеща вопити. Благословен Бог отец наших.

Запев. Очистив от страстей преподобне отче ум свой. И Вседержителю с преподобных лики и праведных предстоя, всегда вопиеши. Благословен Бог отец наших.

Запев. Врачь преизрядныи мирови явился еси блаженне. Исцеляя всех, иже верою притекающих ко храму твоему святому. И Христови от душа вопиющих непрестанно. Благословен Бог отец наших.

Слава. Постом и воздержанием, лице свое украсил еси преподобне. Светлейши наипаче явился еси, многоразличными брашны питающихся. Темже и Христу вопиеши. Благословен Бог отец наших.

И ныне. Тя Пресвятая Мати Присно Дево, познахом землении спасение. Ибо в недрех Отца неразлучно живыи, из Тебе воплощается. Тем же Благословена еси в род и род. Катавасия.

 

Песнь 8. Ирмос.

Ис пламени святым росу источи, а праведнаго жертвы и воды попали. Вся бо твориши Христе елико хощеши. Тем Тя превозносим Господа во веки.

Запев. Гроб идеже положено бысть честное тело твое преподобне, освяти всех к нему притекающих. Источник исцеления истачая, иже от душа Христу вопиющим, и превозносящим Его во веки.

Запев. Во время глада, раздробляя преподобне нищим хлеб свой, тех алчьбу устави. И мене тающаго гладом, божественых деянии напитай. Да возмогу и аз со всеми пети Господа во вся веки.

Слава. Иже с тобою ученицы твои, учению твоему повинующеся преподобне. Земленая оставльше, во след тебе к небесным преидоша. И с тобою поют Христу, и превозносят Его во веки.

И ныне. В Рожестве болезни избежала еси Пречистая, и рождьши паки Девою пребыла еси. Вся бо творит Исус Бог и человек. Катавасия.

 

Песнь 9. Ирмос.

Бога человеком неудобь видети, нань же не смеют чини ангельстии зрети. Тобою бо Пречистая явися нам Слово Воплощено. Егоже величающе, с небесными вои Тя величаем.

Запев с поклоном. Жития сего непостоянную пучину, немятежно прешел еси преподобне. Кормчию Матерь Божию имея, на сие наставляющую тя. Тем же и пристанищем пристал еси, ангельскаго пребывания.

Запев. Яко зрелая и чистейшая пшеница, кроме всех злобных плевел, в небесных житницах соблюдеся преподобне. Хлеб сладкии желая принестися Небесному Царю. Егоже ради вся в мире преобидел еси.

Слава. Великим отцем иже древле в постех и подвизех просиявшим, подобяся отче. Вся дни жизни своея, во слезах и трудех препроводил еси. Дондеже достиже блаженную кончину, юже Ионе наследоваша.

И ныне. Сына Безлетна от Отца возсиявша, Ты во утробе несказанно заченши родила еси, Богомати Чистая Дево. Моли непрестанно о рабех Своих того, яко человеколюбца Бога, спасти род наш. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?