Канон, творение Феофаново, глас 4. В неделю первую Великаго Поста, в ню же торжество Православия воспоминается
Тропарь, глас 2. Пречистому Ти Образу поклоняемся Благии, просяще прощения прегрешением нашим, Христе Боже, волею бо благоизволил еси взыти на Крест, да избавиши их же созда от работы вражия. Тем благодарьствено вопием Ти, радости вся Исполнивыи Спасе наш, Пришедыи спасти мир.
Песнь 1. Ирмос.
Моря Чермнаго пучину немокрыми стопами древле шествовав Израиль, крестообразно Моисеовыма рукама, Амаликову силу, в пустыни победил есть.
Запев с поклоном: Слава Тебе, Боже наш, слава Тебе.
Играюще с веселием днесь, вернии возопием, яко чюдна дела Твоя Христе, и велика Сила, яже наше единомышление и согласие Соделавыи.
Запев. День радостен богомудрении, грядите совершим, ныне небо веселитися и земля, ангельстии чини, и человечестии собори, различно празднующе.
Запев. Велие благодательство зряще руками восплещем разстоящиися уди Христови, совокуплени к соединению, и Бога восхвалим, мир подающаго.
Слава. Даны быша Церкви днесь победы, Богодвижным мановением и советом, Михаила же и Феодоры благочестивых веры, крепящимся царем нашим.
И ныне. Оружия злочестию исчезоша, яве ересем. Храм бо Твой Пресвятая Чистая, ныне образы украшаем. Благолепно зряще, и всесвященно радуемся.
Катавасия: Сохрани от бед рабы Своя Милостиве, яко усердно к Тебе прибегаем, Милостивому Избавителю и всех Владыце, Господу Исусу.
Песнь 3. Ирмос.
Веселится о Тебе Церкви Твоя Христе, зовущи, Ты ми крепость Господи, Прибежище и Утверждение.
Запев. Не к тому уже нечестивых еретик ныне брови возводятся. Божия бо сила, православие укрепи.
Запев. Облацы пророчески, животворную с Небесе днесь, росу нам да каплют о исправлении веры.
Запев. Благогласно тайныя, апостол Христовых трубы, выше естества да вопиют, честных образ исправление.
Слава. Воспоем Христа, показавшаго нам царицу, благочестиву и Христолюбиву, с боговенчанною отраслию.
И ныне. Селение Твое священное, достигше вернии Пречистая, световидною благодатию, ныне озаритися молимся. Катавасия.
Седален. Глас 1. Подобен. Лик ангельскии.
Божественыи Ти зрак, во образе начертающе, Воплощение Христе ясно разумеваем, Рожество Неизглаголанное, и Распятие вольное. Отнюду же бесове отгонятся страхом, и злославнии с плачем рыдают, яко сим сопричастницы.
Слава, И ныне. Глас 4. Подобен. Скоро предвари.
Собори приступите православных верно, божественому припадающе Божия Матере образу. Иже на иконе, ибо исцеление болящым радостно подавает, и уязвляет злославных, яко стрелою от лука, и нас всех веселит, молитвами Ея.
Песнь 4. Ирмос.
Воздвижена Тя видевши Церкви на Кресте Солнца праведнаго, ста в чину своем, достойно взывающи, слава Силе Твоей Господи.
Запев. Наитием Божественаго Утешителя, Твой храм освяти, и пришествием Сего, еретическую лесть отжени Слове Божии, Многомилостиве.
Запев. Нужнейшаго избавивыи злочестия Своя люди, покажи благочестия рвением горящя, и верно зовуща, слава Силе Твоей Господи.
Запев. Священнообразными начертаньми, образ Христовых зряще и Богородицы, сияющя Божественая воображения священнолепно радуемся.
Слава. Царица венцем украшена, истинно возжелевши Христова Царства, Сего написа образ Пречистыи, и святых воображения.
И ныне. Воплощенна родивши Божественаго Слова, боголепно священьство Богорадованная Сего показала еси. Тем же Ти Храм Световидныи, обновляем. Катавасия.
Песнь 5. Ирмос.
Ты Господи ми Свет в мир пришел еси, в Свет святых обращая из мрачна неведения, верою воспевающыя Тя.
Запев. Положи Господи Твоей Церкви утвержение, непоколебимой ей пребывати во веки Щедрыи, бурею ереси.
Запев. Во всю землю Светлость восия, еже свыше даннаго верным веселия, и Божественаго заступления.
Запев. Едине Благии, и Источниче Благости, Ты вознеси православных царей рог, чтущым образ Твой.
Слава. Свет Незаходимыи нам, благочестия восия, велением богодохновенным, верных царей, и манием богомудрым.
И ныне. Обнови нам древнее благолепие, Пречистая Богомати, и храм Твой сии освяти Своею благодатию. Катавасия.
Песнь 6. Ирмос.
Пожру Ти со гласом хваления Господи, Церкви вопиет Ти, от бесовския крове очищьшися милостию от ребр истекшею Ти кровию.
Запев. Пишется и почитается честне покланяемыи образ Владыки, и взимает паки Церковь дерзновение, благочестно Спаса славящи.
Запев. Обнажается печали, и тмы и ереси, Божия Церкви, и носит одежду веселия, и Божественою и Светоносною осеняется благодатию.
Слава. Благославия древняго, осияния получи, православных собор, Феодоры мановением царицы, и сея сыном благочестивым, Михаила самодержца.
И ныне. Иже древле свидения, повеле быти сени, яко в сени словесне, в Тя вселися един Препрославленыи, и прославляяи храм Твой Дево чюдесы. Катавасия.
Кондак. Глас 8. Неописанное Слово Отчее, ис Тебе Богородице написася Плотию, и оскверньшиися образ, в древнюю красоту Божественою добротою смеси. Но исповедающе спасение делом и словом Сие воображаем.
Икос. Се смотрения Таиньство еже, древле пророцы боговидне вдохновени бывше, нас ради на кончины веком достигших предвозвестиша, получивше Сего осияния. Разум убо Божественыи от Него вземше, Господа Бога знаем, в Триех Составех Покланяемаго. И Тому единому служаще, едину веру, и едино крещение имуще, во Христа облекохомся. Но исповедающе спасение, делом и словом Сие воображаем.
Песнь 7. Ирмос.
В пещи Авраамския си дети персидстей, любовию благоверия паче, нежели пламенем опаляеми взываху, благословен еси в Церкви славы Твоея Господи.
Запев. Да сликоствует с тварию, Церковней светлости любовию, ангельское воиньство, богомудрено воспевающе, благословен еси в Церкви славы Твоея Господи.
Запев. Церковь перворожденых, и торжество радуется, зрящи ныне божественыя люди единомудрено зовуща, благословен еси в Церкви славы Твоея Господи.
Слава. Избавлени первомрачныя ереси, манием Феодоры достолепныя царицы, воспеваем благословен еси в Церкви славы Твоея Господи.
И ныне. Паче вышних ликостоянии вознеслася еси Чистая, едина бывши Мати Вседетелю. Тем же радующеся взываем Ти, благословена Ты в женах, Пренепорочная Владычице. Катавасия.
Песнь 8. Ирмос.
Руце распростер Даниил, лвова зияния в рове затче. Огненую же силу угасиша, добродетелию поясавшеся, иже благочестия любители отроцы. Взывающе: благословите вся дела Господня Господа.
Запев. Законы Церкве отеческия сохраняюще, образы пишем, и *лобызаем усты и сердцем и хотением, Христовы, и яже того святых, зовуще, благословите вся дела Господня Господа.
Запев. На первообразное яве Образа почесть и покланяние возносяще, чтем, богогласных учением последующе, и Христу верою зовуще, благословите вся дела Господня Господа.
Слава. Ум озаривши просвещением Божественаго Духа, честная царица, плоды богомудрены имущи благолепие возлюби Церкве Христовы, и красоту, вопиющи, благословите вся дела Господня Господа.
И ныне. Лучами Света Умнаго освещаемь Божественыи Храм Твой, осеняет ныне всех, облаком Духа. И освещает верных, согласно вопиющих, благословите вся дела Господня Господа. Катавасия.
* Внимай. Целовати святыя иконы усты
Песнь 9. Ирмос.
Камень Нерукосечныя Горы, от Несекомыя Тя Девицы краеуголныи отсечеся Христос, иже совокупив разстоящаяся естества. Тем веселящеся, Тя Богородице величаем.
Запев с поклоном. Священнописанми образов, украшеную зряще паки честную Церковь, со благоговением вси стецемся, и Христу возопием, Тебе величаем Тресвятыи.
Запев. Честь и славу стяжавши Церкви Крест Твой, и Честныя образ, и святых изображения, с веселием Владыко, и радостию величает Тя.
Слава. Освяти Божественою Си Славою, цари нашя щедрыи. И ополчении ангельскими, и всеми оружии тех огради, языков свирепство покоряя им Владыко.
И ныне. Нашю пленицу согрешении, разреши Дево Богородице. Еретическая возношения низлагающи, и шатания. И православным помози, иже образу Твоему поклоняющимся. Катавасия.