Канон святым страстотерпцам благоверным князем Василию и Константину, ярославским чудотворцам.
Тропарь. Глас 8.
Возвысившеся на добродетель, к желанию крайнему, и достигоста к Небесней Высоте, благоверная великая князя, Василие и Константине. И безстрастным житием украсиста душа своя. Пощением же изрядно победиста бесовския полки. И восприяста чистую совесть, в молитвах яко бесплотная пребыста. Восияста в мире, аки Солнце преславная, молита спастися душам нашим.
Песнь 1. Ирмос.
Песнь нову воспоем людие, от Девы рождьшуся на спасение наше, и совокупльшему с Небесными земная яко прославися.
Запев с поклоном: Святая благоверная князя Василие и Константине, молита Бога о нас.
Агньче Непорочныи Слове Божии, даруй ми слово к похвалению, яко да возмогу от усердия моего воспети, страдавших Тебе ради, и вопиющих, яко прославися.
Запев. Безвестная и тайная, последнему роду явлена быша, честныя мощи боголюбивую князю Василия и Константина. Им же прикасающеся, исцеления приемлют, Христа воспевающе, яко прославися.
Слава. Во всем угаждающе своему Владыце Христу, благочестно живуще, Василие и Константине, и от Него данную власть добре правяще, за ню же кровей своих излиянием, венцема победныма увязостася, Господеви поюще, яко прославися.
И ныне. Господа Бога родившу, Богородицу Тя вси уведехом, яко от Троицы Единаго воплощенна ис Тебе рождьши. Его же моли о поющих Тя, и благодарно зовущих Ти со ангелом, благословен Пресвятая плод Твоего чрева.
Катавасия. Избавита от бед рабы своя, святая благоверная князя Василие и Константине, яко вси по Бозе к вам прибегаем, вы бо молита о нас Христа Бога нашего.
Песнь 3. Ирмос.
Неплоды душем бесчадна, стяжи плод о Бозе. И веселящися возопи, утвердихся Тобою Боже, несть свята и несть праведна, паче Тебе Господи.
Запев. Душевную чистоту сохранила еста от юности своея, праведне Василие, и незлобиве Константине, страсти наша, утолита молитвами ваю святую.
Запев. Единаго Бога от юности возлюбиста, славная Того молита, славящим честное торжество обретение мощей ваю, подати грехов разрешение, и муки избавление, и Царствию Небесному сподобитися.
Слава. Жезлом веры вооружившися, страсти подъяста, Царствия ради Небеснаго, его же от юности возжелела еста прияти Христа ради. Ему же предстояща, молитася, о иже верою ва восхваляющих.
И ныне. Зол моих безчисленых не помяни Владычице, но покрыи мя под кровом крылуТвоею, умиленым гласом вопиюща Ти, и спаси Чистая Богородице, достойно Тебе величающа. Катавасия.
Седален. Глас 1. Воздержанием увядивше юность свою, и страсти телесныя, яко пленника худа связавше духови повинула еста. И люди своя воспитаста во злаце Божественых наказании. И жезлом терпения звери отгнаста ересем. И от варварскаго нахождения грады своя соблюдоста. И сего ради прояви нам Господь честныя мощи ваю, богомудрыи Василие и Константине чюдне, и чюдесы преславными ва обогащь, Един прославляяи святых Своих.
Слава. И ныне. Божию Тя Матерь вси, и Деву воистину по Рожестве явльшуся вемы. Тем же любовию прибегающе к Твоей благости, имамы Тя грешнии Предстательницу и Тебе вси стяжахом в напастех спасение, едину Всенепорочную.
Песнь 4. Ирмос.
Тайну Ти Аввакум предзря, страшнаго смотрения Господи, рече, Сила и Крепость ми, услышах и дивихся. Разсмотрь чюдеса Твоя, и Тя прославих.
Запев. За православную веру пострадаста, благородная Василие и Константине, и венцама победныма увязостася. И ныне Господеви предстояща, молита о чтущих память ваю.
Запев. Истовая поборника, и доброте наставника, Василие и Константине блаженная, прогонита тму греховную, помрачита поганых безбожия, и погасита пламень страстей палящих нас.
Слава. Избавитися поющим ва, всякого озлобления и скорби, молита славная Василие, и Константине богомудре. Ва бо еста стена необоримая, и упование известно хвалящим ва.
И ныне. Корень и источник, и вину нетления, Тя Дево вси восхваляем Богородице. Ты бо составное безсмертие нам прозябе Пречистая, от чистых кровей Твоих. Катавасия.
Песнь 5. Ирмос.
Вопиет Ти Христе песнь немолчу, от нощи утренюя дух мой. Ты бо Свет Истинныи, и Незаходяи, просвещаяи всякого человека, в весь мир градуща.
Запев. Людие торжествуем светло. Днесь бо обретошася честныя мощи, хвалам достойнаго Василия, и Константина победоноснаго, предстателю нашею и хранителю.
Запев. Молитвами вашима, богомудре Василие, и Константине незлобиве, приходящии с верою к мощем вашим, исцеление неоскудно приемлют, Богу ва прославляющу, истинная Своя угодника.
Слава. Народи ярославстии сшедшеся, светло празднуем обретение честных мощей, Василия и Константина. Наполнишабося благоухания духовнаго, и благочестивых вод веселия.
И ныне. О страшному чудеси. Ты бо Дево Богородице таиньство прежде век и родов, сокровенное в Бозе, еже всяческая ведящем, рождьши Бога Слова, несказанно явила еси. Катавасия.
Песнь 6. Ирмос.
Во глубину сердца морскаго, беззаконии отвержен бых. Яко Иона вопию Ти, возведи мя из тли, да воздам Ти, молитвы моя Господи.
Запев. Приспе праздник радостен, обретения честных мощей, Василиа и Константина. Тем людие возопием глаголюще, богомудрая и преблаженная, яко цвети в райских селениих, предстояще Святей Троице, молита о поющих ва.
Запев. Росийская похвала, и утвержение роду християнскому, страстотерпца богомудрая, Василие славне, и Константине премудре, царю нашему на супротивныя победу испросита, и душам нашим очищение грехов, и велию милость.
Слава. В светлую память лик составльше, да торжествуем празднолюбцы, Василиа, и Константина. И возопием глаголюще, о предстоятеля блаженная, Тричисленей Троице, молита спастися поющым вам.
И ныне. Тебе Всенепорочная Отроковице, Всесветлую Полату Слова Божия, непрестанно вернии воспеваем, и блажим Тя рождьшую нам Началника Жизни, от Троицы единаго Христа Бога нашего. Катавасия.
Кондак. Глас 8. Яко цвети честнии различнии, в райстей пищи процветша, невеществено, отечеству своему, славу велию, и сродником похвалу и честь, явльша всеистинная победника, великии Василие, и славныи Константине. Но убо непрестайта молящеся о граде ваю, и о всех рабех своих, избавити их от напастей и бед, и всяких лютых обхождении вопиющым вама, радуйтася граду нашему Ярославлю, великое утвержение.
Икос. Новоявленная чюдотворца, свыше свое звание приемша преславно, и безсмертную жизнь наследоваста, с плотию бо на земли яко в чужих телесех пострадаста. Тем же ва восхваляем, благоверная князя, сице глаголюще, радуйтася светлая похвало, и слава отечеству ваю. Радуйтася твердая и непоколебимая столпа. Радуйтася иже множество всекрасное и временное мира сего презревша. Радуйтася в правду судящая, и в разсуждении правде известная совершителя. Радуйтася страдалца всечестная, благочестию исповедника. Радуйтася зрителя славы Господни, наслаждающася доброт неизреченных. Радуйтася всю тварь благочестно чюдесы удивляюща. Радуйтася иже вашима страданми, посрамишася бесове. Радуйтася яко вама всяка лесть и страсть неверных разрушися. Радуйтася источника животных вод, источающа различная исцеления. Радуйтася спасителя, иже верою поющым ва. Радуйтася граду Ярославлю великое утвержение.
Песнь 7. Ирмос.
Гордыи мучитель, но детем бысть игралище. Яко бо персть поправше седмичьныи пламень, пояху, благословен еси Господи Боже отец наших.
Запев. Усердно да поем людие, Василиа, и Константина. Радости бо исполниста вся, к похвалению человеки, созывающа вопити Господеви, прославльшему Своя угодника, отец наших Боже благословен еси.
Запев. Батыя зломысленаго потописта, течением кровей ваших, Василие славне, и Константине премудре. И востекоста в горнии Иеросалим, в нем же предстоита Господеви с лики мученик, вопиюща непрестанно, отец наших Боже благословен еси.
Слава. Хваление и честь принесем, сошедшеся людие поюще, Василия и Константина славная, чюдесы бо и знаменьми удивляются весь мир. И предстояще Святей Троице, вопию та немолчно, отец наших Боже благословен еси.
И ныне. От утробы Твоея пройде Умное Солнце Богородице. Сего моли яко Сына Своего и Господа, подати нам от скорбей разрешение, и болезнем облегчение, вопиющим Христови, отец наших Боже благословен еси. Катавасия.
Песнь 8. Ирмос.
Служити живу Богу, иже в Вавилоне дети претерпеша. О мусикии и арганех нерадиша. И в пламени посреде стояща, богоугодную песнь пояху, благословите всякая дела Господня Господа.
Запев. Церковь вместну, и храм одушевлен, себе Христу сотворивша, Константине и Василие, Его же ради и крови своя излияста. Ему же ныне предстояще вопиете, благословите вся дела Господня Господа.
Запев. Честное пение принесем вси, в настоящее торжество, нынешняго празднества, обретения честных мощей, Василиа и Константина предивную, вопиюще хХристови, благословите вся дела Господня Господа.
Слава. Шум с небесе слышашеся страшен, егда покрыта быста светилника под спудом. Егда же возложена быста на свещнице, тогда глас слышашеся благодарен всенародныи, в преславное торжество, Василиа и Константина. Пение бо празднующих слышати святая сподобистася, Господу прославльшу я во веки.
И ныне. Щедроты Твоя низпосли нам, Свещниче Света Трисияннаго, и зарею благоутробия Твоего, тму отжени прегрешении наших Богородице, избавление нужным болезнем подающи, верою поющым Тя, и превозносящим Рожество Твое во веки. Катавасия.
Песнь 9. Ирмос.
Тебе безсмертия Источника, и Святыню исцеления человечю роду, подавающю присно величаем, яко спасаеши душа наша.
Запев с поклоном. Просвещаема светом, Божия благодати, Василие славне, и Константине премудре, царю нашему на враги от Бога победу испросита. И молитася о чтущих ваша страдания, яко да непрестанно ва величаем.
Запев. Райския пищи наслаждающеся, источением бо кровей ваших, богомудре Василие, и Константине пречюдне победила еста мучителя. И того ради венцы Царствия Небеснаго прияла еста от Христа Бога. И ныне присно молитася, о чтущих честное ваше торжество.
Слава. Ко гробу мощей ваших, приходящим с верою, яко струи от источника приснотекущаго исцеление изливаета, верою ва восхваляющым, и любовию торжествующим, преславное ваю торжество.
И ныне. Пение с песнию, и хваление исплетенное, от болезненыя ми души приношаю с любовию, Тебе рождьшей естеством Бога, и прошения моя, богоприятными Ти молитвами, исполни Богородице и от душевных мя свободи страстей. Катавасия.