Канон святителю Алексию, митрополиту московскому


Канон иже во святых отцу нашему Алексию Чюдотворцу, митрополиту, святейшия митрополия всея Русии, глас 8

Тропарь, глас 8. Яко апостолом сопрестольна, и врача предобра, и служителя благоприятна, к раце твоей честней притекающии, святителю Алексие богомудре чюдоносче, сошедшеся любовию в память твою светло празднуем, в песнех и пениих радующеся. И Христа славяще, таковую благодать тебе Даровавшаго исцелением. И граду твоему Москве, великое утвержение.

 

Песнь 1. Ирмос.

Вооружена фараона погрузи, чюдотворяи древле, Моисейскии жезл крестообразно прорази, и раздели море, Израиля же бежаща, пеша ходяща спасе, песнь Богови возсылающа.

Запев с поклоном: Святителю Христов Алексие, моли Бога о нас.

Вооружи наша помышления Благодателю Господи, обуреваемых печальными наведении напастных облак. Да благодатию Твоею наставляеми, возможем умолити Твоего угодника святителя Алексия, ходатая тепла и молитвеника от находящих на ны.

Запев. Отягченых нас многими грехи, облегчи благодатию Христовою святителю Алексие. Очисти язык же и сердце твоих певец, яко да возможем достойно, песнь принести тебе.

Слава. Вооружився Духом, святителю Христов чюдотворче Алексие, услыши гласы наша, и умоли Человеколюбца Господа, победу на враги даровати стране нашей, и грехов отпущение, и житию исправление, твое бо есмы стадо.

И ныне. Вооружився Духом Чистая, воспет Тя иногда Давыд, Твой праотец, послушай Дщи радованна гласа от ангела. Радость бо возвещает Ти неизглаголанную.

Катавасия: Избави от бед рабы своя, святителю Христов Алексие, яко вси по Бозе к тебе прибегаем, ты бо молиши о нас, Христа, Бога нашего.

 

Песнь 3. Ирмос.

Небесному кругу, Верхотворче Господи, и Церкви Зиждителю, Ты мене утверди в любви Своей, желанием Сыи край, и верным Утвержение, едине Человеколюбче.

Запев. Небесному кругу и всей твари Господь, Всеведыи Бог, прежде зачатия во утробе освящает тя, Церкви Своей правителя, и душам пастыря изрядна, и вверяет тебе Свое стадо, яко  же и Петрови, Алексие святителю Христов.

Запев. Небесному кругу познав Творца, жезлом воздержания страстей море изсушил еси блаженне, и на безстрастия гору востече, разумныя скрижали приял еси. И закону духовному Церковь Христову научил еси.

Слава. К Небесному кругу возлетел еси, крилома богоразумия. И от туду уведел еси, в Троице Единаго Бога. И посреди церкве воспел еси, Троицу Лицы, Единицу же Существом, тем приял еси чюдес дар от Бога, преподобне святителю Алексие.

И ныне. С Небесных круг слетев Гавриил архангел, рече Пречистей, Божественыи Совет поведати Ти послан есмь. Что ся мене боиши Пренепорочная, паче Тебе боящагося, что ми говееши Владычице, говеющему Тебе честно. Катавасия.

Седален, глас 8. Подобен. Премудрости.

Почерпл еси от сосуда избраннаго, не изреченная преподобне. Церковь Христову соблюл еси, от всякия ереси не поколебиму, и облаки ересьския разгнал еси. Тем в Вышних радуяся наслаждаешися отче преподобне преблаженне, святителю Христов Алексие. Моли Христа Бога, грехов оставление даровати, празднующим любовию святую память твою.

Слава и ныне, богородичен. Повеленное Таинство приим в разуме, в крове Иосифове скоро предста бесплотныи, глаголя Неискусней браку, Преклонеи схождением небеса, вмещается неизменно весь в Тя, Его же и видя в ложеснах Твоих приимша рабии зрак, ужасаюся звати Ти, радуися Невесто Неневестная.

 

Песнь 4. Ирмос.

Ты ми Христе Господь, Ты же и Сила ми, Ты ми Бог, Ты ми Радование, не оставль Недра Отча, но милостию Си нашу нищету посетив. Тем с пророком Аввакумом зову, Силе Твоей слава Человеколюбче.

Запев. Ты ми Христе Господь, Ты же ми и Сила, вопия сыи исполнь Божия духа Алексие священныи отче. Лукавыя духи отгнал еси, от приходящих с верою честней раце твоей, хромым течение, и слепым прозрение, и больным исцеление даровал еси.

Запев. Ты еси светило Русстей земли, и прибежище всем скорбящим, и граду твоему Москве стена непоборима, пристанище и покров державен, и оружие спасения. Стране нашей во бранех пособник, и на враги победа.

Слава. Ты Единицу Несозданную богословил еси, Треми Лицы разделяему, Непресекому и Неразмесну, просвещая благочестивых совокупления, священныи наш учителю, святителю Алексие преподобне. Юже непрестай моля о нас.

И ныне. Ты со страхом Божественому Престолу предстоя Гаврииле Архангеле, Девей глаголаше с боязнию, смотрити стыжюся Тебе. Яко бо дождь на руно снидет на Тя Слово Отчее, якоже изволи. Катавасия.

 

Песнь 5. Ирмос.

Вскую мя отрину, от лица Твоего, Свете Незаходяи. Покрыла мя есть чюжа тма окаяннаго. Но обрати мя, и к свету заповедей Ти пути моя направи молютися.

Запев. Вскую отреваеши слезы раб своих отче святителю Алексие. Агарины убо внуцы, стрелы и мечи уготоваша погубити ны. Тем молимтися, противных дерзость низложи, и Церковь свою утверди.

Запев. Вскую отче святителю Алексие, забываеши нищету и печаль нашю, напастнии бо облацы покрыша ны, телесныя болезни умножишася. К тебе прибегаем, и тебе призываем, потщися на помощь, и ускори на молитву, от скорби изяти нас, и от зол находящих на ны.

Слава. Вскую унывающе молимся, приидите притецем к раце мощей великаго Христова святителя Алексия, глаголюще услыши нас беднующих, честныи наш учителю. И избави нас от бед и скорбей. И от враг видимых и невидимых, и напастей житейских.

И ныне. Вскую ми не веруеши, рече бесплотныи, Неискусней браку. Давыду бо Твоему праотцу обещася Бог, от Плода чрева Твоего, посадити на Престоле Царствия Твоего, Ияковлю Тя Доброту, едину избра Словесное Селение. Катавасия.

 

Песнь 6. Ирмос.

Очисти мя Спасе, многа бо беззакония моя, из глубины зол возведи мя молюся. К Тебе бо возвах и услыша мя Боже спасения моего.

Запев. Очисти ны Спасе, от многих согрешении наших, и болезней и скорбей, и супротивных дерзость низложи, молитвами Твоего угодника святителя Алексия. И вскоре мир Твой подаждь, и церквам соединение.

Запев. Очисти наша сердца и помышления, и язык умили смирено глаголати. И приими яже от нас приносимыя ти молитвы, Алексие премудре. И подаждь на пользу прошения.

Слава. Очистившеся сердце твое духом, и язык твой трость скорописца изощрен разумно, написа в сердца благочестивых слово Благодатное, всесвященне отче Алексие, Божиим мановением.

И ныне. Очистив свое сердце, Авраам праотец Твой. И прият обещание от Бога, благословитися от семене его языком, Чистая. Тобою же исполнение обета приемлет днесь. Катавасия.

Кондак, глас 8. Подобен. Взбранной воеводе.

Божественаго и пречестнаго святителя Христова, предивнаго чюдотворца Алексия верно вси поюще людие, любовию да ублажим, яко пастыря велика, служителя и учителя премудра земли Русстей. Днесь в память его притецем, радостно плетуще песнь, богоносе, но яко имыи дерзновение к Богу, многообразных нас избави обстоянии, да зовем ти, радуися утвержение граду нашему.

Икос. Дивнаго и пречестнаго чюдотворца видяще чюдеса, исцеления подавающа всем от души с верою притекающим, и Христовы люди невидимо посещающа, и землю Русскую просвещающа, радостно от души вси вкупе сошедшеся к раце мощей его. Слышаще же и видяще чюдес множество, и источник исцелением неисчерпаемь, чистыми сердцы и просвещеными разумы, яко благоуханно кадило, плоды добродетельны от души приносяще. И радующеся взовем ему глаголюще, радуися отче честныи наш учителю, яко приял еси трудов своих воздаяние. И в вышних водворяешися, о нас моля человеколюбца Бога. Чюдес дар приял еси. Земли Русстей отец и учитель. И святителем изрядная похвала, и стране нашей во бранех пособник крепок. Радуися святителю Алексие, граду нашему утвержение.

 

Песнь 7. Ирмос.

Иже от Июдеи, дошедше отроцы в Вавилон древле, верою утвержении, пламень пещныи попраша глаголюще, отец наших Боже благословен еси.

Запев. Иже от Июдеи дети в Вавилоне распаляеми верою, на огнь дерзнуша. Мы же ныне видяще чюдес твоих детель, радостию распалающеся, верою зовем, отец наших Боже благословен еси.

Запев. Иже от Июдеи отроком поревновал еси, Духом разжигаемь, огнепальныя страсти умертвил еси. И смирением своим, гордаго змия смирил еси блаженне, поя, отец наших Боже благословен еси.

Слава. Иже от Июдеи отроцы в пещи прохлаждаеми пояаху. Ты же отче живущю имел еси Благодать в себе, и от тоя просвещься. Троицу Несозданную богословил еси, поя, отец наших Боже благословен еси.

И ныне. Иже от Июдеи отроки, Твое прообразиша Рожество Чистая, ибо Огнь Божественыи ложесн Твоих не опали. Тем Ти поем, благословен Пречистая Плод Твоего чрева. Катавасия.

 

Песнь 8. Ирмос.

Царя Небеснаго, Его же поют вои ангельстии, хвалите, и превозносите Его во веки.

Запев. Царя Небеснаго умолил еси, великии святителю Алексие. И научил еси чада своя воспевати, хвалите пойте и превозносите Его во веки.

Запев. Царю Небесному предстоя, молитвою твоею Церковь твою невреждену соблюдай. И научи пети, хвалите пойте и превозносите Его во веки.

Слава. Царю Небесному предстоя невидимо нас посещай, бодреными си молитвами. Да радуешися поем, хвалите пойте и превозносите Его во веки.

И ныне. Царя Небеснаго родила еси Воплощенна, паче слова и смысла. Тем же радуяся вопию, хвалите пойте и превозносите Его во веки. Катавасия.

 

Песнь 9. Ирмос.

Воистину Богородицу Тя исповедающе, спасении Тобою Девице Чистая, с Небесными вои, Тя величаем.

Запев с поклоном. Воистину богоизбранныи святитель, ты Церковь Богом порученую ти соблюд непорочну, и чюдеса сотвори многа. Исцеления безчисленая подаваеши притекающим ти.

Запев. Воистину избра тебе Христос, Церкви своей основание. Стену и забрало крепко, и неподвижимо во веки.

Запев. Воистину постави тебе Христос, пастыря и учителя своему стаду. И свет миру, и соль земли, отче святителю Алексие.

Слава. Истиннаго святителя и великаго чудотворца Алексия, приидите вси святителие, и вси людие, память его светло празднуем.

И ныне. Воистину Даниил Тя Гору нарече мысленую. Божию Родителницу Исаия. Видит же яко Руно Гедеон. Давыд же священия Сень. Ин же Тя Дверь. Гавриил же Ти глаголет, радуися Обрадованная Господь с Тобою. Катавасия.

+

Авторизация

* *
*

Регистрация

*
*
*
*

Проверочный код Time limit exceeded. Please complete the captcha once again.


Восстановление пароля