Канон святому блаженному Прокопию, Христа ради юродивому, устюжскому чудотворцу. Глас 2.
Тропарь, глас 4.
Просветився Божественою Благодатию богомудре. И весь разум в сердцы, от суетнаго мира сего к Зиждителю неуклоно возложил еси. Целомудрием и многим терпением, во временней жизни течение добре скончав, и веру соблюл еси непорочну. Тем же и по смерти явися светлость жития твоего. Источаеши бо чюдесем источник неисчерпаемыи, верою притекающим ко святому ти гробу, Прокопие всеблаженне. Моли Христа Бога, спастися душям нашим.
Песнь 1. Ирмос.
Во глубине потопи древле, фараонитская вся воиньства, преоружена сила. Воплощьжеся Слово, преспеющыя грехи потребил есть, преславныи Господь, яко прославися.
Запев с поклоном: Святый праведный Прокопие, моли Бога о нас.
Высоко житие имея, и восхождении божествеными, весь светел быв, просвещение ми испроси, похваляющу честныя ти подвиги. Ими же добре пожив, получил еси их же надеяся, блаженне Прокопие.
Запев. Мироуханная любя учения, и во чтении Святых Писании упражняяся. Сластей уклонился еси блаженне, смрадных и безчестных. И облаговонился еси, Божествеными дарованьми удобряяся.
Слава. Дремание векома от души блаженне отгнал еси. Бдя и Богови приединеваяся, всенощными стоянии, непреклонен нуждами естествеными. Тем же ко Дни Невечернему прешел еси.
И ныне. Яко Чертог одушевленыи Божии, и Кадилницу Разумнаго и Светоноснаго Угля, Приснорадованную блажим Богородицу, зовуще, радуися Ходатаице спасенаго возвания.
Катавасия: Избави от бед рабы своя, святый праведный Прокопие, яко вси по Бозе к тебе прибегаем, ты бо молиши о нас Христа Бога нашего.
Песнь 3. Ирмос.
На камени мя веры утверди, разшири уста моя на враги моя. Возвеселибося дух мой воспевати, несть свята, яко же Бог наш. И несть праведна, паче Тебе Господи.
Запев. Глаголом Животочным внимая, испил еси воду спасения, возгнушався горкаго греха. И поя глаголаше Богу Прокопие, яко несть свят паче Тебе Господи.
Запев. Милование стяжал еси Христоподобно, раздал еси богатьство требующим, Небесное богатьство ходатайствующее тебе. Егоже и получил еси вопия Прокопие, яко несть свят паче Тебе Господи.
Слава. Присвоився Зиждителю, любовию божественою, приял еси Небесное наследие. Древа Животнаго получити сподобися блаженне. И благотворением обожаяся, и поя славне, яко несть свят паче Тебе Господи.
И ныне. Сущи ангел святейши, Зиждителя ангелом во Свою боку носила еси, и родила еси Богомати на избавление человеком, поющим Ти. Яко несть Пречисты, разве Тебе Владычице. Катавасия.
Седален, глас 4. Благоволив благими деянии. Искусися яко злато в пещи, напастьми Прокопие славне. Тем же и по смерти источаеши чюдеса, богатно яко воды, недуги уставляеши. О нас присно молися, яко да согрешением прощение приимем.
Слава и ныне. Глас тойже. Подобен. Удивися Иосиф. Послан бысть Гавриил к Девей Марии, принося Ей неизглаголанную радость. Яко зачнеши без семене, и родиши Сына Превечнаго Бога, и спасет люди от грех их. Послушествует Пославыи мя вопити Тебе радость, Благословеная Девою родиши, и по Рожестве Девою паки пребудеши.
Песнь 4. Ирмос.
Пришествовав от Девы, не ходатай ни ангел, но Ты Сам Господи воплощься, и спасе всего мя человека. Тем вопию Ти, слава Силе Твоей.
Запев. Повеления отеческая храня невредимо, правоверным смыслом. Ты от юности имел еси житие чисто, и милостивен нрав досточюдне.
Запев. Ни смущение мирское, ни власти держание, ни слава временная, твоего к Богу рачения Прокопие непреврати. Но благоволил еси воистину Божественым деянием.
Слава. Вознесеся Божествеными поучении выну, врага смирил еси. Исцеления детель приял еси Прокопие, Судом Праведным всяческая Правящаго.
И ныне. Препетая, воиньствы горе Препетаго Бога родила еси, Человека воистину бывша. Его же за рабы Своя молящи непрестай, Приснодево.
Катавасия.
Песнь 5. Ирмос.
Просвещение во тме лежащим, и спасение неначаемым Христе Спасе мой, к Тебе утреннюю Царю мирныи, просвети мя сиянием Си, иного бо разве Тебе Бога не знаем.
Запев. Светом чистым Святыя Тройцы просвещен. Законом же Сея огражден, нощь житейскую без претыкания прейде. Видении Божествеными возвышаяся блаженне, и в Божественыи Живот вселися.
Запев. Ныне на тебе чюдо велие видится, и ужаса исполнено. Како по погребении воистину надолзе соблюдается, неразоримо блаженне твое тело во гробе лежащо, Судом им же весть Бог прославляяи тя.
Слава. Блаженне Прокопие твое дерзновение к Богу, и любовь юже от сердца к Тому имети благоволив. Истинно имени тоже возсияв преславно, Божествеными светлостьми, просвети верных сонмища.
И ныне. За ны из Тебе Воплощьшагося Дево Мати, всегда моли, благочестно Тя блажащих, избавитися бед, душетленных страстей и печалей, и вечнующаго пламене мучения. Катавасия.
Песнь 6. Ирмос.
В бездне греховней одержимь, неизследную милосердия Твоего призываю бездну, от тля Боже мя возведи.
Запев. Капли сладкия искапавше блаженне, пот твоих сладость, и исцелении сеяния, на хвалу Христа Бога нашего.
Запев. Во дворех Бога процвел еси, виноград многоплоден прозябши. И добродетелей гроздие, Делателю душам обилие подав.
Слава. Царство Божие возжелел еси, над страстьми царьствовав Прокопие. И по благоволению лучшему, радость праведных получил еси.
И ныне. Избранно Богу бывши, яко прекрасное Селение и пространное Сему Дево бысть. И Чертог и Свещник и Трапеза. Катавасия.
Кондак, глас 4. Христа ради юродством воздушныя мытарства, на руках ангельских неприкосновенно прешед. Царьскаго достигл еси Престола. И от Царя всех Христа Бога дар прием благодать исцеленей. Многими бо чюдесы своими, и знамением страшным, удивил еси град твой Великии Устьюг. Яко и миро от честнаго образа Пресвятыя Богородицы молитвою изведе, и людем своим милость испроси, и недужным подаде целбы. Темже молим тя чюдоносче Прокопие, моли Христа Бога непрестанно, подати грехов наших прощение.
Икос. Како возмогу грешныи и скверныи аз, душею вкупе и телом, исписати еже во плоти сыи, равно ангелом житие твое, и преславная чюдеса; аще убо мнози премудрии недостигнут исповедати, многаго ти терпения и смирения, и теплыя еже ко Христу любве. Но обаче надеяся на твое беззлобие, о, блаженне, сице вопию ти. Радуися пресветлая звездо, от востока добродетелей восиявшая, и вселенную чюдесы озарившая. Радуися возненавидевыи родительскую любовь, Христа же единаго надо всеми Сущаго Бога всем сердцем возлюбивыи, и Тому невозвратным желанием последовал еси. Радуися яко буйственое и юродственое, еже по апостолу жительство избравыи. Радуися пременивыи тленная и нестоящая, надеждею будущих благ. Радуися иже древнему Иову уподобивыися терпением. Радуися страстотерпче Христов непобедимыи, но присно победивыи диявола своим смирением. Радуися яко древнии он Лазарь нищии ныне почиваеши в недрех Авраамлих. Радуися иже по отшествии мира сего, сущим в бедах и искушениих готов обретаяся предстатель и заступник. Радуися иже везде призывающих тя, быстро предваряяи. Молиши бо Христа Бога непрестанно, подати грехов наших прощение.
Песнь 7. Ирмос.
Богопротивное веление, беззаконнующа мучителя, высок пламень вознесло есть. Христос же простер богочестивым детем, хлад духовныи, Сыи Благословен и Препрославлен.
Запев. Крепостию возмог Живодавца, плотьское удержал еси желание пребогате. И ум возвысил еси на Небесная, и поя крепко, Сыи Благословен и Препрославен.
Запев. Сам ся неблагороден сотворь, благородны нравы стяжав, умом целым. Но учением же упражняяся богодохновенных писании. Все желание свое, к Богу Всевидцу блаженне возложил еси.
Слава. Горнее Царьство, Вышнии Град, Божии Рай, праведных Наслаждение, и Пищю Несодеянную, Богатство Некрадомое, Свет Невечернии, обрести сподобися блаженне Прокопие.
И ныне. Его же породи Владычице, присно моли, от работы избавити мя страстей, и осуждения, и стужающаго ми лютаго окаменения, и оскорбляющаго Чистая, одержания Богорадованная. Катавасия.
Песнь 8. Ирмос.
Пещь огнена иногда в Вавилоне, детели разделяше, Божиим велением, халдея опаляющи, верныя же прохлаждающи поющя, благословите вся дела Господня Господа.
Запев. Огнь помышляя страшныи, пред Престолом Христовым, хотящ изыти. Умилением сердца, теплы проливаеши потоки слезныя, погашая теми страстей пещь, Прокопие богомудре.
Запев. Любовию предложил еси свою мудре, к Богу душю. И к Тому прилепися, вопия песнено, Христе мой Ты ныне мя избави, страстей смертоносных во веки.
Слава. Терпением пождатель, и сердцем смирен, ты виден бысть. Милостив требующым, обычай присно благ имея, и нрав добродетельныи всечестне. В них же добре пожив, чюдес точиши благодать.
И ныне. Адамов Содетель, от кровей Твоих чистых зиждется. И млеком питается, Питаяи всяко дыхание Дево Богородице. Тем яко Матерь Тя Божию прославляем. Катавасия.
Песнь 9. Ирмос.
Безначальна Родителя Сын, Бог и Господь, воплощься от Девицы нам явися, омраченыя просветити, собрати расточеныя. Тем Всехвальную Богородицу величаем.
Запев с поклоном. Видети желая славу Бога нашего, добродетельми Богоразумия себе удобрил еси. И свещо нося вниде во светлыи чертог, со ангелы живыи яснее наслаждаяся Божества.
Запев. Яко утренее Солнце взыде память твоя, сущыя во мраце сердца просвещающи. Ты бо Света и Дне явися воистину сын, богомудре Прокопие. Сего ради тя почитаем.
Слава. Мудростию украшаяся, и разумом просвещаяся. Смирением сердца красуяся. Высотою жития досточюдне, в Разумныя Дворы вниде. Идеже нас помяни чтущих тя блажене Прокопие.
И ныне. Свету Жилище, вся Озарившаго, и Сень видена бысть Богоблагодатная. Мост и Лествица, на высоту земныя возводящи Дево. Тем Тя ублажаем, и верно величаем. Катавасия.