Канон преподобному Саве Сторожевскому


Глас 6.

Тропарь. Глас 8. Пустыни явился еси доброе прозябение преподобне, от юности бо изволи чистое житие, духовному си учителю последуя, и того учением ум к небесным вперив. И стаду своему, премудр наставник показася. Тем и Христос яко пресветла тя светилника чюдесы обогати, Саво отче наш, моли спастися душам нашим.

 

Песнь 1. Ирмос.

Яко по суху ходив Израиль, по бездне стопами, гонителя фараона видя потопляема, Богу победную песнь поем вопияше.

Запев с поклоном: Преподобне отче Саво, моли Бога о нас.

Настави мя Господи Боже мой, да возмогу благочестно, угодника Твоего преподобнаго Савы, славное и честное восхвалити торжество.

Запев. Мужески подвизася, и зарю духовную восприем, взятся к высоте небесней. И ныне со ангелы прославляешися.

Слава. Оружием крестным ограждаемь преподобне, всю силу сопротивнаго победил еси. И до конца сего безвести сотвори.

И ныне. Пресущное Слово, существо прием от чистых кровей Твоих, богосодела нас, истления избави Чистая, сего ради Тя присно славим.

Катавасия: Избави от бед рабы своя, преподобне отче Саво, яко вси по Бозе к тебе прибегаем, ты бо молиши за нас, Христа, Бога нашего.

 

Песнь 3. Ирмос.

Несть свята, яко же Ты Господи Боже мой. Вознесыи рог верных Си Блаже, и утверждь их на камени исповедания Твоего.

Запев. Молчанием язык обуздал еси. И немятежным житием, во плоти ангельски отче пожил еси.

Запев. Воистину благая жизни сподобися преподобне, чистотою и пощением сию обрет. И ныне со бесплотными вопиеши, несть свята паче Тебе Господи.

Слава. Трисиянным Светом озарен, и благодать Духа Святаго вселися в тя преподобне, возлюбльши чистую твою душю. И непрестанно вопиеши, несть свята паче Тебе Господи.

И ныне. Разумети Рожества Твоего Чистая, неизглаголанную глубину, недоумеет ум человечь. Бог бо излияв Себе за милосердие, во утробе Твоей, всего мя обнови. Катавасия.

Седален, глас 4. Мраз нощныи претерпел еси, и тяготу вара дневнаго понесе. И сих ради вечное наслаждение, и пищю присно живущую восприял еси, Христов угодниче блаженне Саво. Моли спастися душам нашим.

Слава и ныне. Богородичен. Чистая Всенепорочная, и Неискусобрачная, яже едина Безлетнаго Сына, и Слова Божия, в лето порождьши, Сего со святыми и честными патриархи, с мученики и пророки и преподобными, моли даровати нам очищение, и велию милость.

 

Песнь 4. Ирмос.

Христос мне сила Бог и Господь, честная Церкви боголепно зовет вопиющи, от совести убо чистыя, о Господе празднующи.

Запев. Безмерное смирение возлюбив, своея мысли зрительное очистил еси. И ныне в райских селениих водворяяся вопиеши, слава силе Твоей Господи.

Запев. Слезными потоки преподобне, землю сердца своего напоил еси, предстоя в молитве не поколеблем, Творцу всех взываше, слава силе Твоей Господи.

Слава. Не забуди стадо твое преподобне, еже мудре собрал еси, и в жизни сей упасе благочестно. Потщися отче наш Саво, привлещи во ограду небесную.

И ныне. Чистоте Жилище, Селение Владыки всех, и пророком всем сбытие, Богорадованная Чистая, поющыя Тя ущедри. Катавасия.

 

Песнь 5. Ирмос.

Божиим светом Ти Блаже, утренюющих Ти душа любовию, просвети молюся, Тя ведети Слово Божие Истиннаго Бога, от мрака греховнаго изимающа.

Запев. Бодреными бдении блаженне, и частыми воздыхании, Благодать Духа возрасте в тебе отче, и славна тя Саво показа.

Запев. Владычне смирение восприим, воду почерпая на раму своею носити изволил еси. Началника трудоположна, во всем себе показал еси.

Слава. Преблаженне богоприятне отче наш Саво, непрестанно стадо твое вопиет ти. Молитвами си ко Господу, спаси нас молимся.

И ныне. По рождении страшнем пребысть Девою, якоже прежде. Бог бе рождеися, устрояи вся волею, Безневестная Марие Богоблагодатная. Катавасия.

 

Песнь 6. Ирмос.

Житейскаго моря воздвизаема зря, напастей бурею, в тихо пристанище притек вопию Ти. Возведи от тли живот мой, Многомилостиве.

Запев. Страдании подвиг твоих преблаженне, клас божественыи возрастил еси. И питаеши благочестно восхваляющих тя, Саво преподобне отче наш.

Запев. Княжо прошение отче со тщанием исполняя, храм Богоматере воздвиже. В нем же праздничною радостию, инок множества веселятся, память твою прославляюще.

Слава. Каплями потов твоих преподобне, врагов ополчения попрал еси. И достигл еси ангельския невещественыя лики.

И ныне. Всеблагая Владычице, яже преблагаго Бога плотию рождьши, озлобленое страстьми мое сердце очисти, да верою и любовию величаю Тя. Катавасия.

Кондак, глас 2. Господним желанием распалився, страсти плотьския воздержанием оттряс. Божественаго света, незаходимое светило явися. Чюдес лучами всех просвещаеши, притекающих к раце мощей твоих, Саво преподобне отче наш.

Икос. Всесильное Духа Святаго действо, боговидно в тя вселися. И боголепными мановении благотечне идыи к горе, идеже хотяше обитель воздвигнути. И якоже небесныи рай благовонными насажден цветы, сию обрет вселися еси. И храм Богоматере чюден воздвиже, инок множество собрал еси. И сих добродетельными деянии светло облистающи, воздержании мудростная воображь. И ныне в память твою сшедшеся вопием ти, моли о нас Саво преподобне отче наш.

 

Песнь 7. Ирмос.

Хладодательну убо пещь сотвори ангел преподобным детем, халдея же опали, велением Божиим. Мучителя увеща вопити, благословен Бог отец наших.

Запев. Пучиною слез твоих пребогате, злоначальнаго змия потопил еси. Яко победоносец изряден, к небесным возлетел еси. Непрестанно вопиеши, благословен Бог отец наших.

Запев. Житие незлобиво имел еси, и непорочно и украшено. Поты страдания прехвальне, Божественаго светолития исполнь, взываше, благословен Бог отец наших.

Слава. Хвалится преподобне град твой, яко венцем царским обложися. Имея мощи твоя в себе, яко добра гражданина от Бога приял есть.

И ныне. Препетая Дево, Препетаго Бога порождьшая, поющыя Тя причастники покажи Света. И избави геены огня, и всякого вреда вражия молитвами Твоими. Катавасия.

 

Песнь 8. Ирмос.

Из пламени святым росу источи, а праведнаго жертву и воды попали. Вся бо твориши Христе елико хощеши, тем Тя превозносим Господа во веки.

Запев. Мудрование плотьское умертвил еси, чести имения совлечеся. От земли к небесным взыти тщася, и всех пети научая. Господа пойте, и превозносите Его во веки.

Запев. Сердца своего бразды отче Саво мудре возделал еси, слезными тучами сия напоил еси. И благоуханно миро принесеся Христови. Ему же вопиеши, Господа пойте, и превозносите Его во веки.

Слава. Христови принося блаженне пощение и слезы, и непорочную молитву. Ризную лепоту, и мякькия одежды, власяными рубы пременил еси, сим показуя глубокочайшее смирение.

И ныне. Избавльшеся первыя клятвы Рожеством Ти, Всеблагословеная Отроковице Богорадованная. Гавриилов Тебе глас возсылаем. Радуися виновная всех спасению. Катавасия.

 

Песнь 9. Ирмос.

Бога человеком неудобь видети, Нань же не смеют чини ангельстии зрети. Тобою бо Пречистая явися нам, Слово Воплощенно, Его же величающе, с небесными вои Тя величаем.

Запев с поклоном. Видети славу Вседержителя желая, обновил еси души крепость. И славою обогатися небесною.

Запев. Честное украшение благодати, отче преподобне Саво, испроси стране нашей во бранех крепость, и здравие людем. Яко да непрестанно тя величаем.

Слава. Чини ангельстии тебе отче сретоша, и праведных собори возвеселишася. И от Вседержительныя Десницы Владычни венчася, тем же тя достойно величаем.

И ныне. Светом Твоим мя, Богорадованная в женах Дево просвети молюся. И огня вечнаго избави мя, яко да величаю Тя, яко да подолгу воспою величия Ти. Катавасия.

Русская вера представляет
Полный учебник церковнославянского языка

Полный учебник церковнославянского языка

Уникальное издание «Полный учебник церковнославянского языка» с примерами из грамматики 1648 года — первая книга на русском языке, которая содержит исчерпывающее внутреннее описание церковнославянского языка, а также множество таблиц с примерами. Учебник написан без использования специальной филологической терминологии и предназначен для самого широкого круга читателей. Он будет незаменимым пособием для желающих во всей полноте понимать церковные книги и старинные русские источники, написанные с соблюдением правил церковнославянского языка.

Купить на ОЗОН

Святое Евангелие.
Прямой перевод с церковнославянского

Первый прямой перевод старого русского Евангелия на современный русский язык, доносящий до нас то, как читали и понимали Священное Писание наши предки. Перевод был сделан с церковнославянского дораскольного Евангелия Московской печати 1651 года. В книгу вошли все четыре канонических Евангелия: от Матфея, Марка, Луки и Иоанна. Для удобства, в книге приведено синодальное разбиение на главы и стихи, а также церковное деление на зачала. Двухцветная печать с киноварью. Предназначено для самого широкого круга читателей.

Русская вера представляет
Святое Евангелие. Прямой перевод с церковнославянского
+

Авторизация

* *
*

Регистрация

*
*
*
*

Проверочный код


Восстановление пароля