Канон преподобному Антонию Печерскому


Канон преподобному отцу нашему Антонию, первоначальнику Печерскаго монастыря, иже в Киеве. Глас 4.

Тропарь. Глас 4. От мирскаго мятежа изшед, в тихое пристанище Святыя Горы Афона достигл еси. Отвержением мира, евангельски Христу последова. Равноангельно житие пожил еси. И оттуду благословением отец в гору пришед, идеже трудолюбне в пещерах жизнь совершив. Отечество си просветил еси. И множеству иночествующих, стезю, ведущую к Небесному Царствию показав, и Христови сих привел еси. Его же моли преподобне, да спасет душа наша.

 

Песнь 1. Ирмос.

Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чюдеса.

Запев с поклоном: Преподобне отче Антоние, моли Бога о нас.

Зелным воздержанием и труды отче Антоние, и всенощным стоянием, душу свою царя над страстьми телесными поставил еси. Тем же со святыми веселящеся, Христа поем, иже тебе такову победу даровавшаго.

Запев. Приспе днесь всечестныи день успения твоего отче, богатно возвеселяя чада твоя всечестне, поминающая древнее твое житие и ангельскую жизнь. Тем же светло празднующе, воспеваем память твою.

Слава. От темных мест восхитився, к превышним светлостем, преславно прешел еси преподобне. И тамо со святыми, яко победитель страстем, отче венчался еси.

И ныне. Люте погружаему в пучине страстей, бурею безмерных ми обстоянии, спасения простерши ми руку, возведи Владычице из глубины зол моих.

Катавасия: Избави от бед рабы своя, преподобне отче Антоние, яко вси по Бозе к тебе прибегаем, ты бо молиши о нас Христа, Бога нашего.

 

Песнь 3. Ирмос.

Твоя певцы Богородице, живыи нетления Источниче, лик Себе совокупльши духовен утверди, и в божественней Ти славе, венцем славы сподоби.

Запев. Проповедует преславно, и паче трубы вопиет, священная твоя отче великая Лавра, яже тобою начало приемшая. Дом же Божия Матере, аще и не гласом, вещьми же хвалится, глаголя, утвердихся Тобою Господи.

Запев. Единаго Бога возлюбил еси, и Сего Крест на рамо взем Антоние преподобне, страннолепно пожил еси. В постех бдениих же и молитвах, образ быв своим учеником. Тем же и от Христа достойно прославися.

Слава. Плотьскаго желания преподобне отвергся, гордость возненавиде. Смирением же и нищетою обогатися, превысокая достигл еси святых жилища.

И ныне. Помилуй едина Богомати, помилуй и ущедри душу мою окаянную, потопляемую бесы, и лукавыми страстьми. И прежде времене исхода моего, сию очистити умилосердися. Катавасия.

Седален. глас 4. Подобен. Удивися.

Удивися твой духовныи настоятель, в тебе велико воздержание зря, и внимаше мыслию, хотящая от тебе напоследок быти Антоние. Видев бо твое велико по Бозе житие, вражиими прилоги никако же непоколебима. Темже и свидетельствует, яко отец и хранитель твоему житию, отцем Святыя Горы вопияше, сей иже посреде нас меншии видится, но последи в Русии велик светилник пребудет.

Слава, и ныне. Богородичен. Предстателнице нератная, Бородителнице, и молитвенице готовая, прибегающим к Тебе, от бед мя избави. И да не презриши мене Владычице.

 

Песнь 4. Ирмос.

Неизследному Божию Совету, еже от Девы воплощение, Тебе Вышняго, пророк Аввакум дивяся вопияше, слава Силе Твоей Господи.

Запев. Место в нем же лежит честное и священное тело твое, преподобне Антоние, многа исцеления оттуду приемлют вернии, Христу от души вопиюще, слава Силе Твоей Господи.

Запев. Не устраши тебе преподобне, долгота жестокаго пути, ниже еже тамо разбойническо нашествие. Темже Святую Гору достиг, со иже тамо отцы воспеваше, слава Силе Твоей Господи.

Слава. Видев Всеблагии Бог, твердое твое и доброе изволение, и тамо во святых местех, посреди отец славна тя сотворяет. И с ними сподоби воспевати, слава Силе Твоей Господи.

И ныне. Корень из чресл Тя царских, всех Царь яко сущю возлюбив. И вышьшю херувим и серафим содела Богородице, вселися в Тя. Катавасия.

 

Песнь 5. Ирмос.

Удивишася всяческая, о Божественней славе Твоей. Ты бо Браконеискусимая Девице, прият во утробе надо всеми Бога, и родила еси Безлетнаго Сына, всем воспевающим Тя, мир подавающа.

Запев. Иночествующим образ, и наказатель отче был еси. Темже и сильным запрещаеши, на восхищение не желати, наипаче маломощных миловати. И от сего убо прославися Антоние, и великии учитель наречеся.

Запев. Выше человека отче Антоние житие стяжал еси, равноангельно бо поживе на земли. Тем же равну яже ангелом почесть сподобился еси получити, и поеши с ними Владыку своего.

Слава. Богодарованная ти благодать отче Антоние, всяка слуха человеческа удиви и научи, иже зде мнящаяся велика, яко мала и худа презрети вся, и последовати стопам твоим. Отнюду же моли преподобне спастися нам.

И ныне. Упование мое Ты еси Пречистая, спасение и похвала. Темже прибегаю к покрову Твоему, негнушайся мене, грехи многими и болезньми и скорбьми ныне поглощеннаго. Но предварив спаси мя. Катавасия.

 

Песнь 6. Ирмос.

Пожру Ти со гласом хваления Господи, Церкви вопиет Ти, от бесовския крове очищьшися, милостию от ребр истекшею Ти кровию.

Запев. Всегдашним иже к Богу рачением, вне плоти и мира отче Антоние был еси. Темже и жилище достойно Духу Пресвятому был еси, яко же и Сам Христос рече. Пришед со Отцем и Духом, тамо вселюся.

Запев. Яко пресладкии некии виноград, Святая Гора тебе отче израстивши, преславно тобою красуется. И радующися Христа прославляет, иже тебе сим даровавшаго.

Слава. Нощь яко день, и день яко нощь, тебе отче вменяшеся. Не дал бо еси сна, по пророку, очима своима, ни векома дремания, ниже покой телеси своему, дондеже сие чисто с душею Богови представил еси.

И ныне. Твою подаждь ми помощь, и избави мя бед и скорбей, и прегрешении моих, яже и скорбей, и прегрешении моих, яже всех рождьшая присное Избавление. Катавасия.

Кондак, глас 8. Подобен. Взбранной.

В мире яко ангел отче пожил еси, в земли пещеру себе соделав. В ней же добре подвизася противу невидимаго врага кознем. И от туду веселяся прешел еси к Небесным Чертогам. Поминай нас чтущих память твою, да зовем ти, радуися Антоние отче наш.

Икос. Присносущнаго и немерцаемаго света, Святыя Троицы насладитися желая. И сего ради четыредесятолетное время, во единой пещере темне себе затворив. И оттуду не исходен отче пребыл еси. Дондеже тело свое чисто, с душею Господеви представил еси. И отсюду славен ангелом, и страшен врагом был еси. Темже и по преставлении, яко жив от Господа дарования чюдес приял еси, исцеляти различныя болезни, иже зле страждущих, и духи лукавыя от приходящих к тебе человек изгонити. Темже молим тя, молися отче, без вреда отечество твое сохранити, град же и люди, да зовем ти, радуися Антоние отче наш.

 

Песнь 7. Ирмос.

Непослужиша твари богомудрении, паче Зиждителя. Но огненое прещение мужески поправше, радовахуся поюще, препетыи иже отцем Господь и Бог благословен еси.

Запев. Повелением духовнаго настоятеля, блаженне Антоние, паки к своему отечеству посылаемь бываеши. Темже реченная ти отцем, яко от Бога повеленная радостию сотворил еси. И тамо пришед отче, многих душа Господеви привел еси.

Запев. Святейшаго места преподобне Антоние яко достиг, многих житием своим удивил еси. Выше бо человека восприим житие, им же и многих мирская презирати сотворил еси.

Слава. Архиепископа Илариона пещеру яко обрет, трудолюбно в ней пожил еси преподобне, в молитвах и пощениих, дондеже иную пещеру себе содела. В ней же сподобися и горняго звания.

И ныне. Человеческия напасти, и советы Чистая разори, божествеными Си молитвами, и рабы Твоя избави болезненых прегрешеней, яко да Приснодевую Тя ублажаем. Катавасия.

 

Песнь 8. Ирмос.

Отроки благочестивыя в пещи, Рожество Богородичо спасло есть. Тогда убо образуемо, ныне же действуемо, вселенную всю воздвиже пети. Господа воспевайте дела, и превозносите Его во веки.

Запев. Владыки своего Христа преподобне Антоние, смирению поревновал еси. И сего ради смиреное и жестокое житие возлюбил еси, земнаго пристрастия отреваяся. Темже и почести святых сподобися, и с ними поеши Господа во веки.

Запев. Ионе пророку подобяся. Людем преже бытия предвозвещаеши, зловерных на град людей нашествие. Сего прещения, и нас избавити преподобне помолися.

Слава. Благодарное сие пение приносящыя ти отче, с вышними милостивно назирай. И моли Избавителя, спасти всех Христови вопиющих Господа воспевайте дела, и превозносите Его во веки.

И ныне. На моление мое умилосердися ныне, и радость ми в печали место даруй. Да пою Тя Владычице, и вопию Сыну Твоему, Господа воспевайте дела, и превозносите Его во веки. Катавасия.

 

Песнь 9. Ирмос.

Всяк земен да взыграется, Духом просвещаемь. Да ликовствует же безплотных умов естество, почитая святое торжество Божия Матере. И да поет, радуися Преблаженная Богородице Чистая Приснодево.

Запев с поклоном. Печерскому житию первоначалник, и наставник отче был еси. И тамо подвизася яко безплотен. Темже и Христос, дарованием чюдес обогати тя преподобне.

Запев. Рукою твоею преподобне Антоние, еже к Богу воздеянием, преславно чюдодействовася. Молитвами бо своими огнь с небесе сводиши, во очищение места храму Пречистыя. Юже вси с тобою величаем.

Слава. Многогрешнаго оного, иже зле нерадением скончавша житие, тела возсмрадевшаго, и по смерти отче нетерпел еси, но повелеваеши прочее от пещеры изринути. Пакиже молбою отец о нем пременився, злосмрадие того паки во благовоние, молитвами си отче претворяеши.

И ныне. Светородителнице Дево, души моея облак отжени. И давай чисто зрети Владычице, спасеную доброту восиявшую неизглаголанно, из Твоея пречистыя утробы, во свет языком Препетая. Катавасия.

Русская вера представляет
Полный учебник церковнославянского языка

Полный учебник церковнославянского языка

Уникальное издание «Полный учебник церковнославянского языка» с примерами из грамматики 1648 года — первая книга на русском языке, которая содержит исчерпывающее внутреннее описание церковнославянского языка, а также множество таблиц с примерами. Учебник написан без использования специальной филологической терминологии и предназначен для самого широкого круга читателей. Он будет незаменимым пособием для желающих во всей полноте понимать церковные книги и старинные русские источники, написанные с соблюдением правил церковнославянского языка.

Купить на ОЗОН

Святое Евангелие.
Прямой перевод с церковнославянского

Первый прямой перевод старого русского Евангелия на современный русский язык, доносящий до нас то, как читали и понимали Священное Писание наши предки. Перевод был сделан с церковнославянского дораскольного Евангелия Московской печати 1651 года. В книгу вошли все четыре канонических Евангелия: от Матфея, Марка, Луки и Иоанна. Для удобства, в книге приведено синодальное разбиение на главы и стихи, а также церковное деление на зачала. Двухцветная печать с киноварью. Предназначено для самого широкого круга читателей.

Русская вера представляет
Святое Евангелие. Прямой перевод с церковнославянского
+

Авторизация

* *
*

Регистрация

*
*
*
*

Проверочный код


Восстановление пароля