Канон преподобному Антонию Великому


Творение Феофаново. Глас 8.

Тропарь, глас 4.

Ревнителю Илии, образы подобяся. Крестителю правыми стезями последуя, отче Антоние. Пустынныи быв житель, и вселенную утвердив молитвами. Моли Христа Бога, спастися душам нашим.

Песнь 1. Ирмос.

Вооружена фараона погрузи чюдотворяи древле, Моисейскии жезл крестообразно прорази, и раздели же море, Израиля же бежаща пеша ходяща спасе, песнь Богови возсылающа.

Запев с поклоном: Преподобне отче Антоние, моли Бога о нас.

Безсмертия жизнь прием вечную яве, и Трисиянныя зари отче насыщаяся. Просвещением благодати, омраченую душу мою озарити помолися, яко да достойно пою тя.

Запев. Млад сыи возрастом телесе, нов путь добродетели восприем сим не уклонно шествовал еси. Закону новому повинуяся Спасову, треблаженне. И живоносным велением Евангелия последуя.

Слава. Трисолнечным сиянием премудре озаряемь, злое блаженне бесов шатание, и зверем зияния и ранами болезней, якоже паучину разорил еси. Божественым разжигаемь желанием.

И ныне. Яко Божия Мати дерзновение имущи, к Рождьшемуся из Тебе, Единородному Слову, и Отцу Собезначалному, и Сраслена Духу, молящи непрестай от бед спасти Всенепорочная, иже Тя Богородицу славящая.

Катавасия: Избави от бед рабы своя, преподобне отче Антоние Великии, яко вси по Бозе к тебе прибегаем, ты бо молиши о нас Христа, Бога нашего.

 

Песнь 3. Ирмос.

Утвержеи небеса в начатце разумом, и землю на водах основав, на камени мя Христе Церковнем утверди. Яко несть Свят, паче Тебе Человеколюбче.

Запев. Утверженым помыслом, и крепким терпением, страстей увядил еси пламень. В безстрастия светлую одежду Антоние, облечеся отче спасения ризу.

Запев. Крепкими прилоги бесовскими устрашаемь, и зверскими образы, нерадил еси о тех немощней силе. Крепкаго бо во бранех имяше Заступника.

Слава. Иже богоносно, начала тме и власти обличив, воздержанием крепким, победитель доблественыи Антоние бысть, постником слава, инокующым похвала.

И ныне. Умерщвеныи мой ум, животным действом, иже из Тебе явльшымся мирови, воздвигни Чистая, и к жизни настави, яже смерти двери разорьшая, едина Рожеством Своим.  Катавасия.

Седален, глас 8. Подобен. Премудрости.

Душю свою связав любовию Христовою, земная возненавидев вся мудре. Водворился еси отче преподобне, в пустынях и горах, Разумнаго бо Древа вкуш славне. Яко от Незаходимых таиниче, ангельски просиял еси. Тем же и мрак прошед плоти своея, тму отгнал еси бесов, Антоние, и инокующим первыи. Моли Христа Бога, грехов оставление подати, чтущым любовию святую память твою.

Слава и ныне. Богородичен. Яко Всенепорочная Невеста Творцу, яко Неискусомужная Мати Избавителя. Яко Приятелище сущи Утешителя, препетая. Беззаконий мя суща скверно жилище, и бесом игралище в разуме бывша, потщися, и сих злодействия мя избавити. Светло жилище добродетелми соделавши, Светоприемнице Нетленная, отжени облак страстей, и Вышняго Причастия сподоби, и Свету Невечернему, молитвами Своими.

 

Песнь 4. Ирмос.

Ты ми Христе Господь, Ты же и Сила ми, Ты ми Бог, Ты ми Радование, не оставль недра Отча, но милостию Си нашю нищету посетив. Тем с пророком Аввакумом зову, Силе Твоей слава Человеколюбче.

Запев. Добродетелей на лествицу Божественую возшед, к Высоте отче возшел еси. И Бога видел еси на ней утвержена, и дарование подающа, рукою богатною, верою поющим, силе Твоей слава человеколюбче.

Запев. Весь Богови освятися Антоние, и един Единому совокупляяся премудре. Добродетелию приближаяся, и боговидением, яко чист сподобляемь. Земли бо и земных отступль, достойно и Небесное обрете Наслаждение.

Слава. Умом и душею преочищен Антоние, прелесть отче душегубную, и коварьствия и льсти горкия, и мечтания врагов обличил еси. Страстем бо навыкл еси. И научься, учиши инок множества пребогате.

И ныне. Бога иже из Тебе Воплощеннаго моли, непреложно еже бе Пребывша, иже Естеством равна Отцу, и Тебе рождьшей бывша Единосущна, прощение согрешением, и душам спасение, поющым Тя верою даровати. Катавасия.

 

Песнь 5. Ирмос.

Вскую мя отрину от Лица Твоего, Свете Незаходяи, покрыла мя есть чюжа тма окаяннаго. Но обратив мя к свету заповедей Ти, пути моя направи молютися.

Запев. Живуща с тобою имея, иже вся видящаго Бога, блаженне. Научающа тя и просвещающа, и умудряюща, душам преблаженне чистым и блаженным, восходы зрети сподоби тя. (Дважды).

Слава. Исцелением тебе благодать, на недузех различных дарова, и на духи нечистыя, Христос власть мудре. И естество бо отче побеждь, иже паче естества дарованием сподобися Духа.

И ныне. Тя стену имуще, и заступлением твоим соблюдаеми. Твоею Божественою славою хвалящеся, Тя ублажаем. Ты бо Пречистая душам нашим источаеши, веселие и радование. Катавасия.

 

Песнь 6. Ирмос.

Бездна греховная, и буря прегрешении мя смущает, и во глубину житейскую, реет мя нечаяния. Но Сам крепкую ми руку простри, яко Петрови Милостиве, из тля Боже мой возведи мя.

Запев. Законно страдальческое житие, от мягких ногтей восприем богомудре, даже до конца пребыл еси. И яко божествен доблественик, венец приял еси победы, от всех Царствующаго. (Дважды)

Слава. Имуще тя к Богу молитвеника крепка, блаженне. И обещника печалем, и предстателя и поборника, и ходатая благочестна, от всяких спасаемся бед, и напастей и обстоянии.

И ныне. Вознесла еси воистину, падшееся человеческое существо, иже образом Божественым, и Отца равенством видимым Сыном Неизменным, Богомати, без семене во чреве поносивши. Катавасия.

Кондак, глас 2. Подобен. Вышних ища.

Житейских молв оставль, безмолвное житие скончал еси, Крестителю подобяся всеми образы преподобне. С ним тя убо почитаем, отче отцем Антоние.

Икос. Христов глас услышав, шествовал еси в след того заповедем, наг жития быв. И отверг попечения вся, стяжания и имения, и раб своих, и сестры любве, богоносне Антоние. И един в пустынях Богови беседуя чисте, разума дарование приял еси. Еже ми посли в песнех поющему, отцем началниче Антоние.

 

Песнь 7. Ирмос.

Божия схождения, огнь устыдеся в Вавилоне древле. Сего ради отроцы, в пещи радованною ногою, яко во свете ликоваху. Поюще: благословен Бог отец наших.

Запев. Сосуды священны быша, благовонием ланиты твоя добродетелей, благоухание, и спасение благоухающе яко от сада, верою зовущим, благословен Бог отец наших. (Дважды)

Слава. Благодать Духа Пресвятаго, в тя вселшися, и духом отгонителя лукавствия отче содела, инокующим непрестанно зовуща, благословен Бог отец наших.

И ныне. Марию Пречистую, и Пресвятую восхвалим. Тоя бо ради благодать нам источает, иже паче ума даров. Яко от потока, Божественыя благости. Юже благочестивым помыслом ныне ублажаем. Катавасия.

 

Песнь 8. Ирмос.

Седмь седмицею пещь, халдейскии мучитель богочестивым люте разжже. Силою же лучшею спасеных видев, Творцу и Избавителю вопияше: дети благословите, священнии воспойте людие, и превозносите Его во веки.

Запев. В молитвах бодреное, и в пощениих крепкое, и терпением в напастех Антоние. Ума чистотою, на земли яко ангел показася, Господеви вопияше, дети благословите, священнии воспойте, людие превозносите Его во веки.

Запев. Молитвами преподобне и молбами, ты непрестанно к Богу востече, к высоте восходно. Бесовских сетей избег, свободивжеся тех томления. Богомудре вопиеши, священнии пойте, людие превозносите Господа во веки.

Слава. Новыи Моисей быв, в пустыни победу на враги и борение поставил еси. Люди предводя, постных собор. Иже веселием и новым житием вопиюща Владыце, священнии благословите, людие превозносите Господа во веки.

И ныне. Богородителнице Чистая, души моея язвы, и греховныя соблазны очисти. Ко источником примешающи, еже из ребр Рожества Твоего, и еже от них потекшим струям, к Тебе бо взываю, и к Тебе прибегаю, и Тя призываю Богоблагодатную. Катавасия.

 

Песнь 9. Ирмос.

Удивися убо о сем Небо, и земли ужасошася концы, яко Бог явися человеком плотию. И чрево же Твое бысть пространнее Небес. Тем Тя Богородице, ангел и человек чиноначалия величаем.

Запев с поклоном. Наста светоносныи твой праздник, преблаженне отче Антоние. Исполнь радости, исполнь веселия духовна. Исполнь святаго Духа, исполнь благоухания и просвещения. И ныне имуще тя воздержания правило, и законоположника, радуемся.

Запев. Непрестай моля Избавителя, всечестныи отче, даровати благочестно память твою творящим священную, согрешением оставление. Дарованием пажить, и Божественое заступление. Душам спасение, и вечное радование.

Слава. Равноангельно пожив на земли, равноангельну обрете светлость. Тех бо боговидным сиянием, общник был еси. С ними же и радуешися всегда, яко божественыи пророк. Яко мученик венценосец. Яко инокующим верховник.

И ныне. Зачала еси Дево без семене, иже всяческая создавшаго Слова Божия, кроме хотения плоти. И без истления родила еси, без болезней матерних. Тем Тя Богородице и языком и сердцем, исповедающе величаем. Катавасия.

Русская вера представляет
Полный учебник церковнославянского языка

Полный учебник церковнославянского языка

Уникальное издание «Полный учебник церковнославянского языка» с примерами из грамматики 1648 года — первая книга на русском языке, которая содержит исчерпывающее внутреннее описание церковнославянского языка, а также множество таблиц с примерами. Учебник написан без использования специальной филологической терминологии и предназначен для самого широкого круга читателей. Он будет незаменимым пособием для желающих во всей полноте понимать церковные книги и старинные русские источники, написанные с соблюдением правил церковнославянского языка.

Купить на ОЗОН

Святое Евангелие.
Прямой перевод с церковнославянского

Первый прямой перевод старого русского Евангелия на современный русский язык, доносящий до нас то, как читали и понимали Священное Писание наши предки. Перевод был сделан с церковнославянского дораскольного Евангелия Московской печати 1651 года. В книгу вошли все четыре канонических Евангелия: от Матфея, Марка, Луки и Иоанна. Для удобства, в книге приведено синодальное разбиение на главы и стихи, а также церковное деление на зачала. Двухцветная печать с киноварью. Предназначено для самого широкого круга читателей.

Русская вера представляет
Святое Евангелие. Прямой перевод с церковнославянского
+

Авторизация

* *
*

Регистрация

*
*
*
*

Проверочный код


Восстановление пароля