Творение Питирима, епископа Пермскаго. Глас 6.
Тропарь, глас 8. Яко апостолом сопрестольна, и врача безмездна, и служителя благоприятна, раце твоей честней притекающии, святителю Алексие богомудре чюдоносче, сошедшеся любовию в память твою светло празднуем, в песнех и пениих радующеся. И Христа славяще, иже таковую благодать тебе Даровавшаго исцелением, и граду твоему Москве великое утвержение.
Песнь 1. Ирмос.
Яко по суху ходив Израиль, по бездне стопами, гонителя фараона видя потопляема, Богу победную песнь поя вопияше.
Запев с поклоном: Святителю Христов Алексие, моли Бога о нас.
Отверзи ми устне, благодатию Твоего Божества Христе. И озарив просвети душю же и сердце, несуменною верою, воспети обретение честных мощей, святителя Твоего Алексия.
Запев. От уст недостойных, и от сердца нечиста, и от недостижнаго ума нашего, приими малое хваление святителю Алексие, яко да воспоем, обретение честных мощей твоих.
Слава. Троицу Лицы, Единицу же Существом, проповедал еси святителю. И от Тоя беззавистныя дары приял еси. И исцеления различная подаваеши, верою приходящим к раце мощей твоих.
И ныне. Языком чаяние древле, Тобою даровася Пречистая Богородице. Ты бо Христа родила еси, от рова прегрешении возводяща, во тлю поползшыяся, и от бед избавляюща, Тя величающыя.
Катавасия: Избави от бед рабы своя, святителю Христов Алексие, яко вси по Бозе к тебе прибегаем, ты бо молиши о нас, Христа, Бога нашего.
Песнь 3. Ирмос.
Несть свята яко же Ты Господи Боже мой, вознесыи рог верных Си Блаже, и утверждь их на камени исповедания Ти.
Запев. Смиреномудрия нравом, и образа кротостию, ангельскому житию подобяся, нескверно и непорочно тело свое соблюл еси, пресвященныи отче святителю Алексие.
Запев. Яко звезда Многосветлаго Солнца, от гроба восияша, от мног лет сокровены честныя мощи, святителя Алексия, чюдес лучи испущающе, и исцеления всем подающе.
Слава. Радостию убо возрадовашася, вси московстии народи, архиереи великии со святители, и христолюбивии князи, и церковное все совокупление, егда обретошася честныя твоя мощи, ничим же вредими святителю Алексие.
И ныне. Рождьшая Свет всему миру, просвети наша помышления, Пречистая Владычице. И неразумия мглу далече отжени, едина Богоблаженная. Катавасия.
Седален, глас 1. Память обретения честных мощей твоих, наста нам светло праздньство, пречюдныи святителю Христов Алексие прехвальне. В ню же чюдес благодать приял еси, от всех Царя Христа Бога, различныя недуги от человек отгонити, и от уз избавляти, и обидимых от лют изимати. Тем же зовем, избави нас от враг наших.
Слава и ныне. Богородичен. Гавриилу провещавшу Ти Дево, еже радуися, и со гласом воплощашеся всех Владыка, в Тебе Святем Кивоте, яко же рече праведныи Давыд. Явися пространнейши небес, поносивши Зиждителя Своего. Слава Всельшемуся в Тя. Слава Прошедшему из Тебе. Слава Свободившему нас Рожеством Своим.
Песнь 4. Ирмос.
Христос мне сила Бог и Господь, честная Церкви боголепно зовет вопиющи, от совести чисты, о Господе празднующи.
Запев. Благодарьственыя песни принесем Христу Богу нашему, таковаго святителя даровавшему Церкви Своей, пречестное удобрение, и граду Москве великое утвержение.
Запев. Яко Аарон незлобием, Духа благодатию славне, в ризу свыше облечеся преподобия и правды. И предстоя престолу Христову, моли о нас непрестанно, святителю Алексие.
Слава. Яко луча Светозарнаго Солнца, от гроба нам взыде святителю, озаряя всех верою почитающих, обретение честных мощей твоих, богоблаженне Алексие.
И ныне. Радости нам Ходатаица явилася еси, яко приемши исполнение, всего Божества Всенепорочная. Тем вси радуися ангелово велегласно зовем, Богорадованная. Катавасия.
Песнь 5. Ирмос.
Божиим светом Ти Блаже, утренюющих Ти душя любовию, просвети молюся, Тя ведети Слово Божие истиннаго Бога, от мрака греховнаго изимающа.
Запев. Благодатию Божественаго Духа, молитва твоя поспешествуема. Егда убо церкви падеся, образы иже в ней святых икон ничим же вреди, яко ни праху прикоснутися им. Тако и ныне сохраняй град свой, от сопротивных враг.
Запев. Всем християном в бедах помощник, и граду Москве велии заступник, недугующим врачь безмездныи, и сущым в нужах и скорбех, готовейшии утешитель, и ходатай теплыи, ко всех Царю Христу Богу.
Слава. На земли положено бысть честное тело твое, святителю Алексие. Дух же возлете на небеса, со апостолы же и святители, и со ангелы ликоствуя, Святей Троице предстоиши, молися прилежно, за град и люди твоя святе.
И ныне. Тайны Твоея глубина Пречистая Богородице, ангельския чины удивляют, и образа Твоего икона, бесы смущает, и прогоняет. Мы же поклоняемтися, ведуще Тя, Божию Матерь. Катавасия.
Песнь 6. Ирмос.
Житейскаго моря воздвизаема зря, напастей бурею, в тихо пристанище притек вопию Ти, возведи от тли живот мой, Многомилостиве.
Запев. Христовою силою облечеся Алексие премудре, и священнодетель истинен показася, Божиим сиянием просветився, яко от окрина честны яти раки исцеления различна неоскудно подаваеши, празднующым верно честных ти мощей обретение.
Запев. Вседетельнаго Духа, пресветлыми лучами осияемь присно, от различных искушений и бед, и скорбей обдержащих нас, яко Христов угодник отче, избави рабы своя, иже светоносное твое торжество, всегда совершающих верно, святителю Алексие.
Слава. Ясно проповедал еси единство Троицы, и немудрых сердца в разум приведе, и Рождьшему Слово Сопрестолно, Богоразумием истинным равно славословив. Тем в небесных селениих водворяяся, от бед нас избавляй.
И ныне. Рождьшая Сияние Славы Отча, Дево Богородице Всепетая, просвети душя поющих Тя. Твоею бо благодатию нетленны сохранены быша, честныя мощи святителя Алексия, различная дарования источающа, верою чтущым память его. Катавасия.
Кондак, глас 8. Подобен. Взбранной.
Якоже Солнце незаходимое отче подобие образа твоего, от гроба восия нам. От мног бо лет сокровены честныя твоя мощи, обретошася нетленны святителю Алексие. Преименитыи же град Москва, тобою благодать приемлет, вся бо страны его осияваеши чюдес добротою. И обогащаеши всех нас содеянием благодати поющих аллилуия.
Икос. Похвалим ныне святителя песньми, Русьскаго пастыря и учителя, и благочестно притецем к раце мощей его, и почерпем дарования, яко от источника исцелении. Юже обстояще ныне радостно веселимся, и усердно обшедше, светоносными песньми прославим глаголюще, чюдотворче святителю Алексие, чюдесы обогащай всех нас, содеянием благодати поющих, аллилуия.
Песнь 7. Ирмос.
Хладодательну убо пещь сотвори ангел, преподобным детем. Халдеи же опали велением Божиим. Мучителя увеща вопити: благословен Бог отец наших.
Запев. От светоносныя десницы прием благодать чюдес, верою просящым отче исцеления различная подаваеши, святителю Христов Алексие, благочестно поющым, благословен Бог отец наших.
Запев. Гроб идеже положено бысть честное тело твое сокрушен бысть от многаго камения, егда распадеся церкви, мощей же твоих, никако же прикоснуся. Их же мы зряще неизреченно светящихся, радостно зовем, благословен Бог отец наших.
Слава. В Триех Составех Богоначалных, Державу Отца, равнодетелна Сына и Духа богословил еси. И Той тя прослави, и заступника тя показа, нам зовущым ти, избави нас святе от всех зол, находящих на ны.
И ныне. Тя Заступницу Чистая Богородице стяжахом, и на Тя вси надежду возложихом, и к Тебе прибегаем. Спаси нас Всенепорочная, и избави молитвами Си, от одержащия скорби и мятежа, и лютых напастей и бед. Катавасия.
Песнь 8. Ирмос.
Ис пламене святым росу источи, а праведнаго жертву и воду попали. Вся бо твориши Христе елика хощеши, тем Тя превозносим Господа во веки.
Запев. На небесех чинове ангельстии ликуют, и на земли верных собори светло празднуют, обретение честнаго твоего телесе, святителю Алексие, песньми славяще Христа во веки.
Запев. Воньми и услыши глаголы наша, святителю Христов Алексие. И спаси державу нашу, и святителя. Град же и люди изми от всякаго зла, тебе поющих, и превозносящих Христа во веки вся.
Слава. Единоначалная Троица, всеми Владычествующая, иже тобою воспеваемая, сим одари тя, мановением Божественым, цело и нетленно священное твое тело сохрани. Славящих бо Ю прославляет во веки.
И ныне. Не умолчим николи же величати и глаголати, заступление Твое еже твориши. Утишивающи мятежь, прибегающим к покрову Твоему Богомати. И надежду тверду, имущим Тя во веки. Катавасия.
Песнь 9. Ирмос.
Бога человеком неудобь видети, Нань же не смеют чини ангельстии зрети. Тобою бо Пречистая явися нам, Слово воплощенно, Его же величающе, с небесными вои Тя величаем.
Запев с поклоном. Со апостолы и со святители, Владычню Престолу, и с лики ангельскими предстоя, моли избавити нас, от печалей находящих на ны. Яко бо огнь палящь и разжизающь, лютыи пламень обыде нас, от него же нас избави, святителю Алексие премудре, да тя ублажаем.
Запев. Явися звезде подобно светоносивей, подобие образа твоего, духовными лучами просвещая сердца верных. Богоразумия же светом, лучи чюдес испущаеши, и исцеления подаваеши святителю, празднующим любовию, обретение честных мощей твоих.
Слава. Иже в Триех Богоначалных Составех, Един Сыи Бог славимыи всегда, и Царство имеяи непременно, Всемощною Твоею десницею шатания враг нечестивых, и братоубииц выи низверзи.
И ныне. Роди вси Тя ублажают ныне, Пречистая Богородице. И всяк град и страна, оружие и заступление, и забрало Тя имуще, хвалятся Тобою, яко крепость их рождьшую, Владыку всех Христа Бога, силу Имущаго непобедимую. Катавасия.