Канон преподобному Максиму Исповеднику


Творение Иоанна монаха. Глас 8.

Тропарь, глас 8.

Православию наставниче, и благочестия учителю и чистоте. Всей вселенней светилниче. Инокующым богодохновенное удобрение, Максиме премудре. Учением бо своим вся просветил еси, цевнице богодохновенная, моли Христа Бога, спастися душам нашим.

 

Песнь 1. Ирмос.

Поем Господеви, проведшему люди Своя сквозе Чермное море. Яко Един, славно бо прославися.

Запев с поклоном: Преподобне отче Максиме исповедниче, моли Бога о нас.

Всю ми богодохновенную, от медоточнаго и сладкаго ти искапи языка, божественыи Максиме, благодать Духа.

Запев. Огнь горящь явился еси, на ереси блаженне. Якоже бо тростие сия попалил еси, ревностию духовною.

Слава. Скотьско предложися от злочтива изволения, единохотенно учение. Словесы же твоими отче обличися.

И ныне. Весь Желание, иже из Утробы Твоея Богоневесто, Благоизволивыи родитися. И Сладость есть, и Свет Незаходимыи.

Катавасия: Избави от бед рабы своя, преподобне отче Максиме исповедниче, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

Ты еси Утвержение, притекающим Ти Господи, Ты же и Свет омраченным, и поет Тя дух мой.

Запев. Велик Максим благочестия Христовы веры, всеистинныи проповедник же и мученик, показася кровию.

Запев. Максиме блаженне, ты воздержанием был еси, благолепно любомудрию, и чисто жилище.

Слава. Источи язык твой яко река, Христова учения благочестна, Максиме всеблаженне, премудрости питатель.

И ныне. Да стезя Владыко ко Святыни ведущая, покажеши нам во утробу Пресвятую пресвято вселься. Катавасия.

Седален, глас 5. Подобен. Собезначальное Слово.

Гонения претерпев веры ради, отгнал еси отче всяку ересь. Отсечену же бывшу с рукою и языку Максиме, исповедания благолепна, от руки Творца прият венец блаженне. Его же ныне непрестанно моли, помиловатися душам нашим.

Слава и ныне. Богородичен. По Бозе в Твой Богородице прибег смиреныи, Покров Божественыи, молюся со умилением помилуй Чистая, яко превзыдоша ми главу греси, и боюся Владычице мук, и трепещу. Мольбу сотвори Чистая к Сыну Своему, от сих избавити мя.

 

Песнь 4. Ирмос.

Услышах Господи, смотрения Твоего Таиньство, разумех дела Твоя, и прославих Твое Божество.

Запев. Земнородных тя почитают, и небесных чинове, дивящеся. Любомудрием бо явился еси отче яко бесплотен.

Запев. Стражут с тобою Максиме, ученик твоих двоица пребогатая, твоим страданием приобщившеся. Тем же и почести равно улучивше.

Слава. Течением твоея крове, напаяема Церкви Христова, прозяблет отеческаго предания Божественое семя, твоим учением преподобне.

И ныне. Избавльшеся Рожеством Твоим, греховнаго долга, Пренепорочная, радостно пение возсылаем Ти, Богоневесто. Катавасия.

 

Песнь 5. Ирмос.

Утренююще вопием Ти, Господи спаси ны. Ты бо еси Бог наш, разве бо Тебе иного не знаем.

Запев. Иже разум земных собрав, и небесных, праведно любомудрец, именуется Максим.

Запев. Премудрости безмерным желанием, Христа своего подобник изряден явился еси, славныи Максиме.

Слава. Гневом изгнан был еси мучителя, обрете же блаженне Исуса утешение.

И ныне. Иже Тя Богородицу не ведущии, Богомати, Света да не узрят, Рождьшагося из Тебе Пречистая. Катавасия.

 

Песнь 6. Ирмос.

Ризу ми подаждь светлу, Одеяися Светом яко ризою. Многомилостиве Христе Боже наш.

Запев. Непрестанно приносиши Богови, богомудре мольбу. Душевных же и телесных страстей и тления мя избавити.

Запев. Изсушися ересем источник мутныи весь, славне Максиме. Затворяемь шумом языка твоего.

Слава. Очисти мя, Едине Благии. И Источник Благости Христе, сердцу моему, Твоего преподобнаго молитвами источи.

И ныне. Краснеиши паче всех человек, Сын Твой Пречистая, добротою Божества. Аще и нас ради плоть бысть. Катавасия.

Кондак, глас 6. Подобен. Еже о нас соверши.

Свет Трисиянныи, вселивыися в душу твою, сосуд избран показа тя преблаженне. Сказающа Божественая концем, не удобь разумная блаженне. И Троицу всем Максиме проповедая светло, Пресущную и Безначалную.

Икос. Подобник явлься Спаса страстем. И Того в души своей имея преблаженне, восхождения в сердцы своем возложил еси пребогате. Сам же тебе подаст благодать с небесе. Сопротивилбося еси мудре мужески. Безначалную и Божественую и Единосущную Троицу проповедуя. И обличая злославных и богоборныя, безмерныя претерпел еси напасти всехвалне, языку урезаему богословному преподобне, и твои руце вкупе. Непрестал же еси ты со дерзновением глаголя, и утвержая верныя божествеными ти учении. Троицу всем людем проповедая ясно, Пресущную и Безначалную.

 

Песнь 7. Ирмос.

Иже от Июдеи, дошедше отроцы в Вавилон древле, верою утвержении, пламень пещныи попраша глаголюще, отец наших Боже благословен еси.

Запев. Едино Естество Троицу, Едино хотение рекл еси, Едино действо. Бога воплощьшагося, два Естества хотеньми и действы проповедал еси. Отцем вопия, Боже благословен Еси.

Запев. Не хотении две разделяеме, разумом сопротивным. Дебельством паче проповедал еси отче, естеством лучшим. Благословен еси вопия Боже, отец наших.

Слава. Столп православия, божественая твоя словеса отче держаще. Единаго от Троицы во двою Существу и хотении почитаем, отец наших Боже благословен еси.

И ныне. Ново сущим ладя Превечнаго Бога, Всенепорочная из Тебе воплощьшася, непрестай молящи, спасти поющыя Тя, отец наших Боже благословен еси. Катавасия.

 

Песнь 8. Ирмос.

Седмь седмицею пещь, халдейскии мучитель, богочестивым люте разжже. Силою же лучшею спасеных видев, Творцу Избавителю вопияше, дети благословите, священнии воспойте, людие превозносите Его во веки.

Запев. До конца вожделев, вожделевшаго род человеческии. Крест свой взял еси, и Тому блаженне сраспялся еси. Благословите поя дела Господа, и превозносите Его во веки.

Запев. Устранився всякия сласти блаженне смертоносныя, себе соделал еси всего нескверно зерцало. Поя, благословите вся дела Господа, и превозносите Его во веки.

Слава. Живоносну Зарю, от Единаго Божества Трисоставна сказуя. Явился еси сущим во тме Солнце, заблуждьшим. Благословите вопия вся дела Господа, и превозносите Его во веки.

И ныне. Жизни Тя Матерь, и Богу Родительницу познавше, православною верою вси ублажаем Богородительнице. Благословяще вкупе Рожество Твое Чистая, и превозносяще во веки. Катавасия.

 

Песнь 9. Ирмос.

Проявленаго на горе законодавцу, огнем и купиною, Рожество Присно Девыя, в наше верных спасение. Песньми немолчными величаем.

Запев с поклоном. Единаче якоже Авелева твоя кровь, и во веки богодохновенная учения, гласом немолчным, Христова Церкви проповедует, Максиме преблаженне, и превеликии.

Запев. Отсечена бысть рука, пишет же Божественым перстом, якоже тростию и чернилом. Отсеченым языком,  и твоею кровию честною, веру в сердцых православную.

Слава. Стал еси на судищи божествене с мученики, их же ревности и веры приобщился еси отче. И нас приближай Владыце, себе подобники содевая.

И ныне. Ты еси Богородице, оружие наше и стена. Ты еси заступление, к Тебе прибегающим. Тя и ныне на молитву предлагаем, да избавимся от враг наших. Катавасия.

Русская вера представляет
Полный учебник церковнославянского языка

Полный учебник церковнославянского языка

Уникальное издание «Полный учебник церковнославянского языка» с примерами из грамматики 1648 года — первая книга на русском языке, которая содержит исчерпывающее внутреннее описание церковнославянского языка, а также множество таблиц с примерами. Учебник написан без использования специальной филологической терминологии и предназначен для самого широкого круга читателей. Он будет незаменимым пособием для желающих во всей полноте понимать церковные книги и старинные русские источники, написанные с соблюдением правил церковнославянского языка.

Купить на ОЗОН

Святое Евангелие.
Прямой перевод с церковнославянского

Первый прямой перевод старого русского Евангелия на современный русский язык, доносящий до нас то, как читали и понимали Священное Писание наши предки. Перевод был сделан с церковнославянского дораскольного Евангелия Московской печати 1651 года. В книгу вошли все четыре канонических Евангелия: от Матфея, Марка, Луки и Иоанна. Для удобства, в книге приведено синодальное разбиение на главы и стихи, а также церковное деление на зачала. Двухцветная печать с киноварью. Предназначено для самого широкого круга читателей.

Русская вера представляет
Святое Евангелие. Прямой перевод с церковнославянского
+

Авторизация

* *
*

Регистрация

*
*
*
*

Проверочный код


Восстановление пароля