Канон святому и праведному Исидору, Христа ради юродивому, Ростовскому чудотворцу. Глас 8.
Тропарь, глас 4.
Просветився Божественою Благодатию богомудре, целомудрием и многим терпением, во временней жизни течение добре скончал еси. Темже и по смерти яви тя светлость жития твоего. Истачаеши бо исцелением благодать, иже с верою притекающым ко святому ти гробу, Исидоре всеблаженне. Моли Христа Бога, спастися душям нашим.
Песнь 1. Ирмос.
Вооружена фараона погрузи, чудотворяи древле, моисейскии жезл крестообразно прорази, и раздели море. Израиля же бежаща, пеша ходяща спасе, песнь Богови возсылающа.
Запев с поклоном: Святый праведный Исидоре, моли Бога о нас.
Выспрь житие стяжав, благодеянием Божественым, весь светообразен бысть, просвещение ми низпосли. Яко даруя ся восхвалю пресветлое житие твое. Еже добре совершив, восприял еси яже уготова Бог любящим Его, богомудре Исидоре.
Запев. Божественым разжегся желанием, вся отеческая отвергл еси нравы, Христа же обрести потщася. И Сего ради бегая удалися нечестивых сожительства, благочестия светом озарен бысть. И Божествеными добродетелми украшен, досточюдне Исидоре.
Слава. Дремания веждема недал еси блаженне Исидоре, ниже покоя своему телу, дондеже сном праведным почил еси. И непоколебим быв яко столп, враг невидимых ополчением. Богу присно предстоя во всенощном стоянии и славословии тем же от него и ныне прославися.
И ныне. Яко Ложницу Божественую, и Лествицу к Небесней возводящую высоте, человеческое естество. Кадилницу же Невещественаго и Светоноснаго Угля, в ложеснех понесшу, Богоизбранную Отроковицу Марию, вси ублажаем, зовуще, радуися Чистая, рождьшая Началника Жизни нашея.
Катавасия: Избави от бед рабы своя, святый праведный Исидоре, яко вси по Бозе к тебе прибегаем, ты бо молиши о нас Христа, Бога нашего.
Песнь 3. Ирмос.
Утвержеи небеса в начатце разумом, и землю на водах основавыи, на камени мя Христе Церковнем утверди, яко несть свята, паче Тебе Едине Человеколюбче.
Запев. Глаголом Божественым последуя, и Сим выну поучаяся. Исполнися вод благодатных, источил еси потоки чюдесем. И чюжь быв всякаго плотьскаго желания, воспевая глаголаше Богу Исидоре, несть свята паче Тебе Человеколюбче.
Запев. Благоутробие стяжал еси, милостивому Богу подобьствовав, расточил еси богатьство убогим. Темже на Небесех присносущее блаженьство тебе уготовася. Егоже получив Исидоре вопиеши, несть свята паче Тебе Человеколюбче.
Слава. Благоугодив Зиждителеви, делы божествеными, наследовал еси благих восприятие. Древа убо Животнаго присно наслажаяся, блаженне Исидоре. Воспевая непрестанно, несть свята паче Тебе Человеколюбче
И ныне. Святых ангел сущи святейши, иже сих Содетеля во своей утробе понесшая, и рождьши Богоотроковице Чистая, Избавителя человеком. Темже Ти согласно вопием, несть святы и пречисты разве Тебе Владычице. Катавасия.
Седален, глас 4. От земли Возвавыи тя на вечныя обители, соблюдает и по смерти невреждено тело твое святе. Ты бо в целомудрии и чистоте житие пожил еси, не поработися плотьским страстем, Исидоре богомудре. Темже тя любовию почитаем.
Слава и ныне. Богородичен. Стена непобедимая нам християном еси Богородице Дево. К Тебе бо прибегающе, невредими пребываем. И паки согрешающе, имамы Тя Молитвеницу. Тем благодаряще вопием Ти, радуися обрадованная Господь с Тобою.
Песнь 4. Ирмос.
Ты ми Христе Господь, Ты же и сила ми. Ты ми Бог, ты ми радование, не остави недра Отча, но милостию Си, нашю нищету посетив. Тем с пророком Аввакумом зову, Силе Твоей слава Человеколюбче.
Запев. Заповедем Божественым свершитель явися, неуклонным разумом всеблаженне. Отеческаго небрегл еси неверьствия, и еже идолом приносимых гнушався. От юности бо житие имел еси нескверно, и милостивен разум досточюдне, зовыи безпрестани, Силе Твоей слава Человеколюбче.
Запев. Ни мира возмущение, ни власти удержание, ни слава временная, ниже тлеемое богатьство, твоея еже к Богу любве, возмогоша уклонити Исидоре. Но благоволил еси воистину житие изрядно, Божественым речением укрепляемь, взывая присно, Силе Твоей слава Человеколюбче.
Слава. Возвышаяся Божествеными повелении выну, враг невидимых смирил еси возвышения. Умиления слезами, якоже кедр присно сыи напаяемь. Приял еси исцелением детель Исидоре, судом праведным всяческая оправдающаго. Емуже предстоя вопиеши. Силе Твоей слава Человеколюбче.
И ныне. Преукрашена Божественою славою, иже всяческая от несущых словом Составльшаго, Бога Слова родила еси, Человека воистинну бывша. Его же о нас рабех Твоих молящи непрестай, Богородице Мати Приснодево, иже верою Тебе зовущих. Силе Твоей слава Владычице.
Катавасия.
Песнь 5. Ирмос.
Вскую мя отрину, от лица Твоего Свете Незаходяи, покрыла мя есть чюжа тма окаяннаго. Но обрати мя, и к свету заповедей Ти пути моя направи молютися.
Запев. Светом невещественым Трисияннаго Божества, озарен досточюдне Исидоре, нощь жития настоящаго непоткновенно прейде. И ныне в вечных обителех с лики преподобных водворяяся, поминай нас, всечестную ти память на земли торжествующих.
Запев. Ныне еже о тебе чюдо велие зримо есть, и ужаса исполнено богоблаженне Исидоре. Како на многа лета землею покровено, нетленно твое тело во гробе лежащо соблюдается. Судбами ими же весть Бог прославляя тя.
Слава. Богоприятному ти начинанию, и чюдному свершению, еже по Христе жития твоего, ангельстии чини удивишася богомудре Исидоре. Ибо во плоти сыи, тех житию подражатель явися. Тем же и дар прозрения от Бога приял еси, еже преславная творити чюдеса.
И ныне. Моли иже из Тебе рождьшагося Господа, Дево Отроковице Чистая, сохранити рабы Твоя, от супротивных обстоянии, и бесовьскаго искушения, иже Тя воистину Божию Матерь исповедающих, и страстей душетленных свободити, и вечнаго осуждения. Катавасия.
Песнь 6. Ирмос.
Очисти мя Спасе, многа бо беззакония моя, и из глубины зол возведи мя молюся. К Тебе бо возвах и услыша мя, Боже спасения моего.
Запев. Струя благодати яко миро благовонно, от святаго ти гроба истекает всебогате, веселящи сердца верных, иже от любве к тебе приходящих. И прогоняющи коварьства духов лукавых, силою Духа Пресвятаго Исидоре.
Запев. Во дворех Господа Саваофа насажден, якоже финик процвел еси богомудре. И страстем воистину тлетворным победитель явися Исидоре, поспешением божественым. Темже и радости праведных сподобися досточюдне.
Слава. Царствие Божие возжелев, течение добре скончал еси, и веру соблюл еси несквернену. Виноград быв благоплоден, богозванне Исидоре. Принося всекрасныя грозды добродетели, содетелеви всех Богу. Иже венцем нетления тебе украсившему.
И ныне. Избра Тебе Господь во всех родех, Благословеная в женах, Непорочная Дево Богородице, яко прекрасное селение пространное, Божественую Ложницу, и Кивот Святыни, и Свещник и Трапезу Чистая. Катавасия.
Кондак, глас 8. Подобен. Возбранной воеводе. Избранному и дивному в праведницех, иже убо от Христа дар чюдес приимшему, похвалныя ныне принесем глаголы. Но яко имыи дерзновение ко Святей Троице, Юже моли, избавитися от бед рабом твоим. Да зовем ти, радуися богомудре Исидоре.
Икос. Како возмогу грешныи и скверненыи аз вкупе душею и телом исписати, еже во плоти сыи равно ангелом житие твое, и преславная чюдеса, аще убо мнози премудрии недостигнут исповедати, многаго ти терпения и смирения, и теплыя еже ко Христу любве. Но обаче надеяся на твое беззлобие, о блаженне сице вопию ти. Радуися пресветлая звездо от запада восиявшая, и к востоку пришедыи. Радуися возненавидевыи отеческую и богомерзскую веру. Христа же единого надо всеми сущаго Бога, всем сердцем возлюбивыи, и Тому невозвратным желанием последовал еси. Радуися буйственое и уродствено, еже по апостолу жительство избравыи. Радуися пременивыи тленная и нестоящая надеждею будущих благ. Радуися иже древнему Иову уподобивыися терпением. Радуися страстотерпче Христов непобедимыи, но присно победивыи диявола, своим смирением. Радуися яко древнии он Лазарь нищии почивая ныне в лонех Авраамлих. Радуися иже по отшествии мира сего, сущим в бедах и искушениих готов обретаяся, предстатель и заступник. Радуися иже везде призывающих тя, быстро предваряеши. Радуися богомудре Исидоре.
Песнь 7. Ирмос.
Божия схождения, огнь устыдеся в Вавилоне древле. Сего ради отроцы в пещи радованною ногою, яко во свете ликоваху поюще, благословен Бог отец наших.
Запев. Силою укрепляемь всемогущаго Бога, плоти умертвил еси, иже долу влекущая мудрования всебогате, чистотою и бдением непрестанным. И разум горе стяжал еси, вопия безпрестани Исидоре, благословен Бог отец наших.
Запев. Светлости ради жития твоего, удивил тя есть Господь в чюдесех богомудре Исидоре. Купцу убо в мори утопающу, скорейшим явлением предстал еси досточюдне, и от глубины сего избавил еси вопиюща, благословен Бог отец наших.
Слава. Горнее Царствие, веселие присносущное, и славу неувядающую, богатьство неистощимое, и еже преподобных наслаждение. Почесть трудов своих восприял еси, от Бога Благодателя всех. Ему же ныне предстоя вопиеши, благословен Бог отец наших.
И ныне. Его же родила еси Господа, Владычице Чистая, непрестай молящи, изъяти мя присно от враг оскорбляющих мя. И тяжкое бремя грехов моих расточити Богоневестная. Яко да радуяся вопию, благословен Пречистая Плод Твоего чрева. Катавасия.
Песнь 8. Ирмос.
Седмь седмицею пещь, халдейскии мучитель, богочестивым люте разжже. Силою же лучшею спасеных видев, Творцу и Избавителю вопияше, дети благословите, священнии воспойте людие, и превозносите Его во веки.
Запев. Не токмо в житии сыи, но и по отшествии мира, множайшая чюдеса от честнаго ти гроба содеваются, приходящим с верою всеблаженне Исидоре. Ибо недуги прогониши силою духовною, и от бед изимаеши. Тем же непрестающе вопием, священнии воспойте людие, и превозносите Его во веки.
Запев. Дерзнувше убо иерея извещение прияти, о святем телеси твоем. Божественая абие сила напрасно порази, но твоими молитвами исцеление получи всехвалне Исидоре. Тем же и мы веселящеся вопием, священнии воспойте, людие превозносите Его во веки.
Слава. Добродетелным нравом, и сердцем смиренным, милостив ты явися, досточюдне Исидоре. Требующим яже от тебе помощи, присно помогая. И чюдес деянием удивляя, иже верою Господеви вопиющих, священнии пойте, людие превозносите Его во веки.
И ныне. Иже Адамови Содетель, в ложеснах Твоих Чистая зиждется, и млеком питается, питаяи всяко дыхание Дево Богородице. Тем же яко Матерь Божию, вернии Тя прославляем, и превозносим Чистую во веки. Катавасия.
Песнь 9. Ирмос.
Удивися убо о сем Небо, и земли ужасошася концы, яко Бог явися человеком плотию. Чрево же Твое бысть пространнее небес. Тем Тя Богородице, ангел и человек чиноначалия величаем.
Запев с поклоном. Зрети присно вожделев, славу Бога нашего Исидоре. Многих добродетелей, различными образы себе удобрил еси. И свещю нося украшену, елеом терпения твоего. Вниде в светоносныи чертог, со ангелы сыи яснее наслаждаяся Боговидения.
Запев. Яко утреняя, и яко Солнце восия память твоя, иже в мире сущим сердца озаряющи, Божественою светлостию. Ты бо Света и Дне, яко воистину сын явися богомудре Исидоре. Тем же тя непрестанно ублажаем.
Слава. Премудростию украшаяся, и разумом просвещаяся. Смирением сердца радуяся. Высотою жития сияя досточюдне, в небесная селения прейде. И тамо в лице праведных предстоя, нас поминай чтущих тя блаженне Исидоре.
И ныне. Света Божественаго Приятелище, иже лучами Божества мир озарившаго, видена бысть Богоблагодатная. Мост же и Лествица на высоту земныя возводящи Дево. Тем же вернии ублажающе Тя величаем. Катавасия.