Канон святому праведному Иоанну, Христа ради юродивому, устюжскому чудотворцу. Творение Феофаново. Глас 4.
Тропарь, глас 4.
Наготою телесною и терпением своим обнажил еси вражие коварство, обличая и посрамляя неподобное деяние зельное, стражда солнечныи вар. Ни нуждныя великия студени, мраза и огня не чюяше, Божиею помощию покрываемь, Иоанне премудре. Моли о верно творящих память твою, честно и усердно притекающих к раце мощей твоих, избавитися бед и напасти избежати.
Песнь 1. Ирмос.
Моря Чермнаго пучину не мокрыми стопами древле шествовав Израиль, крестообразно Моисеовыма рукама, Амаликову силу, в пустыни победил есть.
Запев с поклоном: Святый праведный Иоанне, моли Бога о нас.
Причастием иже к Богу преподобне был еси Свет. И к Нему отлучися, Иоанне блаженне, желанием крайним, благим надеждам своим, отче исполнение приял еси.
Запев. Желанием иже к Богу распалаемь мир оставил еси. И сопутника обрете Христа, отче Иоанне славне. С Ним же стезю прошел еси спасеную радуяся.
Слава. Обогатися ими же никако же искушаемыми вжелев, богатство и славу временную мудре, и пищю мимо текущую, мирское достояние доблемудрене отринул еси.
И ныне. Красную, Избранную, Всечестную, и Непорочную разумев Тя Божие Слово вселися в Тя и рождься ис Тебе, сыны сотвори Благодатию Богородицу чтущыя Тя.
Катавасия: Избави от бед рабы своя, святый праведный Иоанне, яко вси по Бозе к тебе прибегаем, ты бо молиши о нас Христа Бога нашего.
Песнь 3. Ирмос.
Веселится о Тебе Церкви Твоя Христе, зовущи, Ты ми крепость Господи, прибежище и утверждение.
Запев. Усердно мыслем совлечеся деянием, побеждая вражия полки Божественым пособием Духа.
Запев. Ранами Божествеными и воздержанием, и биением, страстей мирских, отче Иоанне, избегл еси.
Слава. Умориша врага постницы Твои Исусе. Умерщвение радостно Владыко Твое Живоносное вжелевше.
И ныне. Избавляющи человеки преслушания, и лютаго падения, иже всему Виновнаго, Чистая и Всенепорочная родила еси. Катавасия.
Седален, глас 5. Согласием Божественым озаряемь, в пути ведущия Божественым Сиянием ходив верно, отче праведне Иоанне. Врагов отбег прилог, сын же Света и Дне явился еси Иоанне преблаженне.
Слава и ныне, богородичен. Мати Божия Пречистая, град християнскии избави, и люди Своя обычно зовущыя, противитися врагом и гордым мыслем пособствуй, да вопием Ти, радуися Благословеная.
Песнь 4. Ирмос.
Воздвижена Тя видевши Церкви на Кресте Солнца Праведнаго, ста в чину Своем, достойно взывающи, слава Силе Твоей Господи.
Запев. Воединився ко стези праведне, и богоносне в Божественыи Град вниде, преподобне Иоанне, спасеным Сиянием обогатився.
Запев. Единообразен преподобне Иоанне смыслом Богоносным блаженне быв. Божествеными повестьми. И Божественою одеждою одеяся.
Слава. Сердце твое скрижаль очищену, Святаго Духа Благодать обретши отче, написав свершено безстрастие, веру и любовь нелицемерну.
И ныне. Седяи на Престоле превознесенне херувимстем, яко Престол Тя имея, на руку Твоею почив Марие Богоневесто, Преславныи Бог. Катавасия.
Песнь 5. Ирмос.
Ты Господи ми Свет в мир пришел еси, в Свет святых обращая из мрачна неведения, верою воспевающыя Тя.
Запев. Пресветлую зарю приим Иоанне, яко Солнце явился еси. Бесовскую тму отгна достоблаженне.
Запев. Твоим желанием Христе окрилився блаженныи Иоанн, желание телесное, якоже изгребие мирское мудре оттрясе.
Слава. Силою Божественою душю укрепив в мир вселився, опустевающии безстрастие, отче богомудре Иоанне.
И ныне. Речение пророк совершишася. Девая роди Бога Слова, выше естества и слова пребывши Девою. Катавасия.
Песнь 6. Ирмос.
Пожру Ти со гласом хваления Господи, Церкви вопиет Ти, от бесовския крове очищьшися милостию от ребр истекшею Ти кровию.
Запев. Ум свой весь к Богу простирая, непрестанными поучении, плотьскую любовь не пощаде, благим ходатайством Иоанне присвоения.
Запев. Ни скверныя вражды прият блаженне, посреди тебе мира живущу. Чистыми же паче мольбами, очищаеши скверны душевныя, притекающих к раце мощей твоих.
Слава. Ты плотьских мудровании, вышьши помысл имея, неуязвися посреди жен обнажаемь. Безстрастия бо одеждою Иоанне облечеся.
И ныне. Усты и помыслом и сердцем Пречистая, Тя Богородицу проповедаю. Тобою бо Богови примирихомся, отриновении преступлением первие праотца. Катавасия.
Кондак, глас 8. Вышния красоты желая, нижния сладости телесное ядение тщателно оставил еси, нестяжанием суетнаго мира. Возлюбил еси ангельское житие, преходя скончався Иоанне блаженне. С ними же моли Христа Бога непрестанно о всех нас.
Икос. Како возмогу грешныи и скверныи аз, вкупе душею и телом написати, еже во плоти сыи, равное ангелом житие твое, и преславная чюдеса. Аще убо мнози премудрии недостигнут исповедати многаго ти терпения, и смирения, и теплыя яже к Богу любве. Но обаче надеяся на твое беззлобие, отче блаженне, сице вопию ти: радуися пресветлая звездо от юга восиявшая, к востоку пришед. Радуися возненавидевыи отеческую любовь, Христа же единаго надо всеми Сущаго Бога, всем сердцем возлюбив, и Тому невозвратным желанием последовал еси. Радуися буйствено, и уродствено, еже по апостолу жительство избравыи. Радуися пременивыи тленная настоящая, надеждею будущих благ. Радуися иже древнему Иову уподобивыися терпением. Радуися страстотерпче Христов непобедимыи, присно победивыи диавола своим смирением. Радуися якоже древнии он Лазарь нищии, ныне почивая в лонех Авраамлих. Радуися иже по отшествии сего мира, в бедах и искушениих готов обретаяся предстатель, и заступник граду нашему Усть Югу. Радуися иже везде призывающих тя, быстро предваряя. Радуися богомудре Иоанне.
Песнь 7. Ирмос.
В пещи Авраамския си дети персидстей, любовию благоверия паче, нежели пламенем опаляеми взываху, благословен еси в Церкви славы Твоея Господи.
Запев. Содержимь сыи ко Христу преподобне отче Иоанне, Божественою любовию других спасти. Их же радостно спасл и избавил еси, вопия благословен Бог отец наших.
Запев. С Небесе тебе поданную отче Иоанне приим пищю, сею препитав еже всех благопокорно приемлющих твоя повеления, ими же долу влекущии грех оставляюще блаженне.
Слава. Последова отеческим преданием, отче Иоанне мудре, пагубу отринути заповеда, зовыи Богови, благословен Бог отец наших.
И ныне. Вышняго освященно Божие селение, радуися. Тобою бо дадеся Радость Богородице вопиющим ти. Благословена Ты в женах, Всенепорочная Владычице. Катавасия.
Песнь 8. Ирмос.
Руце распростер Даниил, лвова зияния в рове затче. Огненую же силу угасиша, добродетелию поясавшеся, иже благочестия любители отроцы. Взывающе: благословите вся дела Господня Господа.
Запев. Всесветлая звезда, сущих в тимении страстей приводя к животу, творити Божественыя заповеди, и, нечистыя, целомудрено жити, и отгониши лютыя недуги. Вопия благословите пойте, и превозносите Его во веки.
Запев. Ты цел умом в крове чюдных мудре, многих уловил еси уродствовати Господа ради, ведыи неругаемь быти. Вопия честнейшии, Иоанне блаженне, благословите пойте и превозносите Его во веки.
Слава. Совершен Един иже Своих Си славяи Господь, прославляя тя преподобне ко гробу твоему притекающыя исцеляя светлословеньми зовущыя, благословите пойте, и превозносите Его во веки.
И ныне. Избавляяи нас восия ис Тебе Господь Дево Чистая. Его же моли Владычице просветити поющыя Тя, и обстояния нас избавити поющих, благословите пойте, и превозносите Его во веки. Катавасия.
Песнь 9. Ирмос.
Камень нерукосечныя горы, от Несекомыя Тя Девицы Краеуголныи отсечеся Христос, иже совокупив разстоящаяся естества. Тем веселящеся, Тя Богородице величаем.
Запев с поклоном. Всем сердцем Троице усердно предложився. Иже от Нея лучю Богоделно приим, световиден быв со ангелы ликуеши.
Запев. Желанием Божественым приединився, и воздержанием просвещься, чаемых вечных благ во причастии быв, богоблаженне Иоанне и наслаждении.
Слава. Твоя болезни и поты во вселенней, конца никако же имуще. В ней же питаяся Иоанне, нас непрестанно поминай.
И ныне. Спаси мя всех рождьши Избавителя и Благодателя, разори души моея облак, Свету Облаче Святая Владычице, и силна соделай на страсти борющыя мя. Катавасия.