Творение Игнатиево. Глас 8.
Тропарь, глас 8. Слез твоих источники, пустыни безчадное напоил еси. И еже из глубины воздыхании, во сто труды разплодил еси. И бысть светилник вселенней сияя чюдесы, Иоанне отче наш. Моли Христа Бога спастися душам нашим.
Песнь 1. Ирмос.
Воду прошед, яко по суху, из Египетска зла избежав. Израильтянин вопияше: Избавителю Богу нашему поем.
Запев с поклоном: Преподобне отче Иоанне, моли Бога о нас.
Во Свете Невеществене и Мыслене, от печалей вещественых востек, Иоанне преподобне, молитвами си ко Господу мя просвети.
Запев. Яко воздержания сладость ссав, отрину горесть страстей. Тем же паче меда и сота, насладил еси отче чювства наша.
Слава. Возшед на высоту добродетелей, и долу влекущия оплевал еси сласти. Сладость показася спасения, отче преподобне стаду твоему.
И ныне. Премудрость и Слово Отчее, несказанно Рождьшая, души моея лютую исцели язву, и сердечную болезнь укроти.
Катавасия: Избави от бед рабы своя, преподобне отче Иоанне, яко вси по Бозе к тебе прибегаем, ты бо молиши о нас Христа, Бога нашего.
Песнь 3. Ирмос.
Ты еси утвержение, притекающим Ти Господи, Ты же Свет омраченым, и поет Тя дух мой.
Запев. Попалил еси углием воздержания преподобне, страстное терние. И прохлаждаеши иноком совокупления.
Запев. Миро священия, от воздержанных славне аромат весь положился еси, в воню благоухания Богу.
Слава. В законех постных поучаяся, страсти потопил еси, якоже другия ныне фараониты, потоки слез твоих.
И ныне. Устави неуставное помышлении Чистая смущение, Мати Божия, иже Сыну Ти направляющи движение. Катавасия.
Седален, глас 8. Подобен. Премудрости.
Видением и деянием паче естества восияв, облистаеши учении, законы нам положил еси Богомудрыя блаженне. Добродетелей доброты степени поставль, и злобе льсти показав и ловления. Отнюдуже возводиши, твоим последующыя божественым учением, от страстей к безстрастию. Иоанне равноангельне. Моли Христа Бога, грехов оставление подати, чтущим любовию святую память твою.
Слава, и ныне. Богородичен. Яко Деву в женах, Тя без семене рождьшую Бога плотию, вси ублажаем роди человечестии. Огнь бо вселися в Тя Божественыи, и яко младенца доиши Зиждителя и Господа. Тем же ангельскии и человеческии род, достойно славим Пресвятое Рожество Твое. И согласно вопием Ти, моли Христа Бога, прегрешением оставление даровати, воспевающим достойно славу Твою.
Крестобогородичен. Агньца и Пастыря и Избавителя, Агница зрящи на Кресте висяща, восклицааше слезящи, и горко взывающи. Мир убо радуется прием Тобою избавление. Утроба же Моя горит, зрящи Твоего распятия, еже терпиши за милосердие милости, Долготерпеливе Господи, милости Бездно, и Источниче Неисчерпаемыи, умилосердися и даруй согрешением оставление, иже верою Твоя воспевающим Божественая Страдания.
Песнь 4. Ирмос.
Услышах Господи смотрения Твоего Таиньство, разумех дела Твоя, и прославих Твое Божество.
Запев. Яко в породе благовонней добродетелей, в раи одушевлене, воздержанием процвел еси. Им же вся питаеши чтущыя тя.
Запев. Законоположника воздержанию, иноком правило кротости, яко Моисея тя и Давыда, воистину стяжавше, отче ублажаем.
Слава. Наслажден быв при водах воздержания, отче блаженне, лоза явися богораслена, благочестия грозды износя.
И ныне. Под летом бывша, иже от Отца безлетно Восиявшаго, Богомати нам родила еси. Его же моли, спасти поющыя Тя. Катавасия.
Песнь 5. Ирмос.
Вскую мя отрину, от лица Твоего Свете Незаходяи, покрыла мя есть чюжа тма окаяннаго. Но обрати мя, и к свету заповедей Твоих пути моя направи молютися.
Запев. Погасив страсти росою подвиг твоих, отче блаженне, богатно вжегл еси, огнем любве и веры, воздержания светилник. И просвещение безстрастия, и дни сын явился еси.
Запев. Веры грозд божественым деланием, отче воспител еси. И в точилех постави, и изгнете болезньми пощения. И чашю наполнил еси духовну воздержания, веселуеши сердца стаду твоему.
Слава. Претерпев доблествене, прилоги и биения невидимых враг, показася столп терпения. Утвержая стадо твое палицею Божественою, при пажитех воздержания, и на воде воспите е блаженне.
И ныне. Едина рождьши Девою. Едина Муженеискусна явися Всенепорочная. Во утробе бо Слово Отчее приемши Безначалное, млеком доиши Девице. Чюдо Страшно, и девьствующи, Законы обновляеши естества. Катавасия.
Песнь 6. Ирмос.
Очисти мя Спасе, многа бо беззакония моя, и из глубины зол возведи мя молюся. К Тебе бо возвах и услыша мя Боже спасения моего.
Запев. Собрал еси в души, Божествено богатьство Духа. Непорочну молитву. Чистоту красну. Бдение твердо, воздержания болезни. Ими же храм показася Богу.
Запев. Земленыя вещи мудре, мимо текл еси худость. Невещественою же молитвою на Небеса возлете, и Вышняго приятия наследник явися, жития совершением.
Слава. Поты постническими, угли стрел вражиих погасил еси воистину. И огнь веры вжег, попалил еси неверия ересем шатания.
И ныне. Прияла еси воистину Божественое Слово в ложесна Своя, и Сего паче естества Пречистая родила еси. Его же мольбами умоли от бед вся избавити рабы Твоя. Катавасия.
Кондак, глас 4. Подобен. Явися днесь.
На высоте Господь воздержания, воистину тя постави, яко же звезду нелестную, просвещающа концы, наставниче Иоанне отче наш.
Икос. Храм Богу яко воистину себе содела отче, божествеными добродетельми твоими мудре украсил еси, якоже злато издалеча. Веру и надежду и любовь истинную, Божествении обеты полагая. Воздержанием постився яко безплотен. Мудрость мужество целомудрие стяжав, смирением же вознесеся. Тем же и просвещься молитвами непрестанными. Видении тайными окрилатев, и Небесная достиже Жилища, наставниче Иоанне отче наш.
Песнь 7. Ирмос.
Иже от Июдеи дошедше отроцы в Вавилон древле, верою утвержении, пламень пещныи попраша глаголюще: отец наших Боже благословен еси.
Запев. В злаце Вышняго Царства, стадо отче воспител еси. И жезлом учении, звери отгнав ересем. Пояше, отец наших Боже благословен еси.
Запев. В Вышнюю вниде Чертожную Трапезу Царя Христа, во одежю облечен достойну звания. Наню же и зван бысть. Вопия, отец наших Боже благословен еси.
Слава. Не омочився грехи, река воздержания отче показася нам. Помышления потопляя и скверны очищая, вопиющим с верою, отец наших Боже благословен еси.
И ныне. Избавихомся вси, от страстей и бед обстоянии, и недуг многообразных, молитвами Ти пречистыми, Богомати взывающии, отец наших Боже благословен еси. Катавасия.
Песнь 8. Ирмос.
Царя Небеснаго, Его же поют вои ангельстии, хвалите людие и превозносите Его во веки.
Запев. Столп тя одушевлен яко воистину, и образ воздержания отче стяжавше. Вси твою Иоанне память почитаем.
Запев. Собор радуется иноческии, ликуют преподобных соньмы и праведных. Венец бо достойно приял еси.
Слава. Украшен добродетельми, в невестнице неизреченныя славы возлегл еси, песнь воспевая Христу во веки.
И ныне. Поглощена болезньми и падшася, возстави Богомати, яко да Тя славлю во вся веки. Катавасия.
Песнь 9. Ирмос.
Чистую и Преславную поем людие Богородицу, Огнь Божества приемшую во утробе неопально в песнех величаем.
Запев с поклоном. Целитель недугующим в падениих, от Бога показася. Очистник же блаженне, и прогонитель лукавым духом. Тем тя вси величаем.
Запев. Землю яко тлению жилище оставил еси отче, и в землю вселься кротких. И с ними радуешися, Божественым наслаждением.
Слава. Предел неуклонен веры, и воздержанию образ имуще, подвиги твоя воистинну, Зиждителя песньми величаем.
И ныне. В Тя вселься Пренепорочная иже первие родоначалным злообразно запенша, человекоубиицу низложь, родися, и вся ны спасл есть. Катавасия.