Канон святому Михаилу Тверскому


Глас 8.

Песнь 1. Ирмос.

Песнь возслем людие, Чюдотворцу Богу, избавльшему Израиля от работы, песнь победную поюща и воспевающа. Воспоем Тебе Единому Владыце.

Запев с поклоном: Святыи страстотерпче княже Михаиле, моли Бога о нас.

В помощь Тебе Христе призываю, и дерзаю воспети страстотерпца Твоего память, устнами недостойными. Владыко Христе утверди помышление, на хвалословление Твоего угодника.

Запев. Русское удобрение, и правоверным людям похвалу и крепость, свой показав доброумныи смысл, богомудре Михаиле досточудне.

Слава. С дерзостию приял еси Христово учение в сердцы, еже положити душу свою за други своя. Якоже Христос за ны кровь Свою пролия.

И ныне. Заступнице скорбящим, спасению надежда ненадеющимся Богородице Препетая, моли прилежно избавитися нам от бед.

Катавасия: Избави от бед рабы своя, святый благоверный княже и страстотерпче Михаиле, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

Утвердися сердце мое о Господе, вознесеся рог мой о Бозе моем, разширишася уста моя на враги моя, возвеселихся о спасении Твоем.

Запев. Обителище бысть Святаго Духа твое святое сердце. Им же не убоялся еси неправеднаго царя ярости, страстотерпче Михаиле.

Запев. От святою боку богомудрыя Ксении блаженне родился еси. С нею же тя блажим страдалче прехвалне, спаси град свой и люди поющыя тя.

Слава. Заколен бысть от неправедных твоих убииц, вопияаше владыце Христу, приими дух мой Владыко. На Тя бо упование мое возложих Господи.

И ныне. Глаголы проповедник богогласных исполняются. Сего роди Девая, Новыи Младенец, Адама стареиша, и сопрестольна Родителю. Катавасия.

Седален, глас 8. Подобен. Премудростию Божиею разумев мимоходящую жизнь, и о княжении небрег; но на Небесное Царство притече, повинуяся сын Отцу. Яко овча незлобиво бесправды ножем закалаху яко свирепии зверие.

Слава и ныне. Богородичен.

Безневестная Чистая Богородице Дево, Едина верным Предстательнице и Покрове, бед и скорбей, и лютых обстоянии всех избави, иже на Тя надежду Отроковице имущыя. И душа наша спаси божествеными мольбами Си.

 

Песнь 4. Ирмос.

Пророк Аввакум умныма очима провиде Господи пришествие Твое. Тем же и взываше, от юга приидет Бог, слава Силе Твоей, слава Христе пришествию Твоему.

Запев. Приидем братие к честней раце, воина Христова и мученика Михаила, и облобызаем сердечныма устнама, приимающе неоскудныя дары от трудоположника Христа, и Спаса душам нашим.

Запев. Божиим промыслом, и Святаго Духа детелию, твое святое тело от губительныя страны принесено бысть, источая нам реки исцелением, струями кровей твоих Михаиле.

Слава. Последовал еси Христу, и муце Его уподобился еси преблаженне богоносе Михаиле. Певцы своя сохраняй, и град наш заступи от нахождения поганых. И от всех бед, богоприятными твоими молитвами.

И ныне. Просвети Чистая души моея очи Свет родившая, да не постигнет мене греховная тма тяжкая, и глубина нечаяния покрыет мя. Но сама мя спаси, и направи к тишине божественаго хотения. Катавасия.

 

Песнь 5. Ирмос.

Господи Боже наш, Твое смирение даждь нам. Господи Боже наш, стяжи нас. Господи, разве бо Тебе иного не знаем, имя Твое именуем.

Запев. Господи Боже мой Михаил вопияаше, ты убо Господи нас ради смерти вкусил еси. И спасл еси род человеческии, своею кровию Христе Боже.

Запев. Господи Боже мой сподоби мя прияти Небеснаго Селения, и Славы неизреченныя. И в тленных место нетленная, подаждь Владыко вопияаше боговидче.

Слава. Тезоимените  вышняго воеводы Михаиле богозрачне. С ним же умоли Христа подати мир христианом. И утишити вражия стремления.

И ныне. Укрепи Владычице славящаго Тя царя на противныя враги, яко Давыда на Голияда. Да Тебе веселящеся воспеваем. Радуися Покрове Святыи, и Заступнице роду нашему. Катавасия.

 

Песнь 6. Ирмос.

Яко же пророка избави из глубины преисподния Христе Боже, и мене от грех моих избави яко Человеколюбец. И направи живот мой молютися.

Запев. Светом благодати озаряемь страстотерпче мудре, невозвратно шествовал еси путем вводящем к Вышнему Иерусалиму. Святыи бо Дух наставил тя есть, живыи в сердцы твоем Михаиле.

Запев. Тлеющими будущая измени, яко мечь обоюду остр, вооружься страхом Христовым. Горькую смерть нивочто же вменил еси, Славы Вышния желая.

Слава. Ум свой к Богу вперив, надежею и верою укреплься, яко воин непобедим. Заколения неправеднаго не убоялся еси мудре, боговидче Михаиле.

И ныне. Тебе припадающе Госпоже, и верою покланяющеся молим Тя. Радуися Богоблаженная Девице, Покрове и Ограждение наше, Помощнице в бедах сущим. Спаси ны не имущих помощи. На Тя бо надеемся. Катавасия.

Кондак, глас 2. Подобен. Вышних.

Вышних ища, и земную славу презрев. И Церковь Божию обагрил еси своею кровию. За Ню же пострадал еси святе Михаиле. Заколение неправедное приим веселяся. Со ангелы предстоя моли за вся ны.

Икос. Славу возненавидел еси тленную и мимотекущую. И добродетели явился еси сосуд славне от юности. И закон Божии от души возлюбив. И зрение к жизни грядущей. Чести земныя и сласти небрег. Нетленное Царство восприял еси. Христове заповеди последуя, положил еси душу свою за ны. И Христове Страсти уподобился еси, заколен в ребра, и кровию своею избавил еси нас, поганых нашествия и горкия смерти. Сего ради вопием ти страстотерпче Михаиле, со ангелы предстоя молися за вся ны.

 

Песнь 7. Ирмос.

Халдейская пещь огнем распалаема, прохлажашеся Духом. Божиим заступлением отроцы пояху, благословен Бог отец наших.

Запев. Величие наше и похвала, ты еси Михаиле богомудре. Тобою бо от поганския работы свободихомся. И ныне моли за род свой и люди вопиющыя, благословен Бог отец наших.

Запев. Ты уподобился еси Моисею Боговидцу, сокрушеным сердцем моляся о стаде своем, избавити град свой и люди от вражия работы вопиющыя. Благословен Бог отец наших.

Слава. Всепохвальныи глас и мольбу ти возсылаем, и раце мощей твоих кланяемся блаженне Михаиле. Проси мира православным христианом. И душам нашим оставление грехов поющым. Благословен Бог отец наших.

И ныне. Не исписанная многими пророки. Ни сведома же бысть Дево, небесными служащими Богу ангелы. Ныне же Тя вси свемы Богородицу, Твоея требуем помощи, и заступления благословеная. Катавасия.

 

Песнь 8. Ирмос.

Покрываяи водами превыспреняя Своя, полагаяи морю предел песок, и содержаи землю. Тя поет Солнце, Тя славит луна, Тебе приносит хвалу вся тварь, яко Содетелю всем во веки.

Запев. В нарочитыи день святаго преставления радостно празднуем, песнь молебную Христови возсылающе. Нетленным венцем венчавшу тя, прехвальне Михаиле. Проси нам оставления грехов славящим тя верно.

Запев. Похвальныя цветы, яко царскии венец богомудрей ти главе в память приносим. Юже Христос нетленным венча, преблаженне Михаиле. Молися о стаде своем, избавитися граду твоему от всякия беды.

Слава. Ливанскую гору наречем тя богомудрая Ксение. Или Фисонскую реку добреиши сапфира, и камения честнаго, блаженнаго Михаила рождьшу. Им же просветися Русская страна, и молитася за нас ко Господу.

И ныне. Гордыню и шатания низложи, и советы неправедныя князей разори и зачинающих рать погуби. О Мати Божия Пречистая Дево, верному людям рог возвыси, да Твой пречистыя праздник славим Богородице Дево во веки вся. Катавасия.

 

Песнь 9. Ирмос.

Чюже есть матерем девою быти, и странно девам дети раждати, на Тебе Богородице обое смотрение бысть. Тем Тя вся племена земная непрестанно величаем.

Запев с поклоном. Приими похвалу от раб недостойных, и молитву от нас сотвори к Богу, честно творящих твою память. Да от бед и печалей и грех лютых свободимся, тебе величающе.

Запев. Яко голубица целомудрая, на финик добродетели взыде, криле имущи священне и позлащенне. Имаже возлетевши, в райстей пищи водворяешися преблаженне.

Слава. Предстоя у престола всех Владыки боговидче Михаиле, о творящих честное твое празднество, граду нашему избавитися от напастей и бед. Здравие и победу благоверным людям на противныя враги, испроси молитвами твоими.

И ныне. Высокии Царю со Отцем седяи, и от серафим поемыи, призри на мольбу Матерьню юже Ти за ны днесь приносит. Очисти грехи наша, и спаси град и люди умножи. И даждь благоверным людям здравие телеси, и на поганыя победу, молитвами рождьшия Тя. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?