Канон, глас 6.
Тропарь, глас 8. Днесь возсия нам память твоя славне, яко Солнце светозарно лучами озаряя весь мир. И тму нощи злых дух от нас отгоня. Днесь Небесныя Силы и святых ангел, и душа праведных мыслено торжествуют радующеся. Днесь и мы грешнии припадающе молимся, отче преподобне Авраамие. Христа Бога моли непрестанно, спасти град и люди, иже тебе почитающих.
Песнь 1. Ирмос.
Яко посуху ходив Израиль, по бездне стопами. Гонителя фараона видя потопляема. Богу победную песнь поем вопияше.
Запев с поклоном: Преподобне отче Авраамие, моли Бога о нас.
Яко возсияв всем концем Христе, Праведное Солнце. Пречистыя Ти Матере молбами, покаяние и умиление и слезы даждь ми Боже. И молением преподобнаго спаси мя.
Запев. Ангельския безплотныя чины, приводим Ти Христе на моление. Сих молбами, избави и сохрани стадо Твое Блаже, от всех бед, молитвами преподобнаго спаси мя.
Слава. С лики пророк и апостол и мученик, святителей и преподобных, со всеми святыми моли святе отче, за молящая тя прилежно. Избавитися от всякия беды, и спасти ны.
И ныне. Вси молим тя прилежно, Госпоже Дево Мати Святая. Избавление от всех бед, подаждь молящися прилежно Сыну и Богу, помиловати и спасти ны.
Катавасия: Избави от бед рабы своя Преподобне отче Авраамие, яко вси по Бозе к тебе прибегаем, ты бо молиши о нас Христа Бога нашего. Господи помилуй (трижды, с поклонами).
Песнь 3. Ирмос.
Несть свята, яко же Ты Господи Боже мой. Вознесыи рог верных Си Блаже, и утверждь их на камени исповедания Твоего.
Запев. Моление послушав Господи иногда Анны, подал еси пророка, и Тебе отдаде служителя. Тако и наше услыши моление, молитвами преподобнаго, спаси ны.
Запев. Приими от душа молящихтися Христе. И даждь нам помощь Твою свыше, яко иногда учеником Твоим Христе на мори. И от бед избави нас молением преподобнаго.
Слава. Молися прилежно за ны, избавление подати отче Авраамие, от всех бед яже на ны приходят. Ускори святе на помощь нашу.
И ныне. Божия Рожества Ти Чистая, всяка существа чин преходит чюдесы. Бога бо паче естества зачат во чреве, и Рождьши пребываеши Приснодева. Катавасия.
Седален. Глас 4. Подобен. Удивися.
Удивися преподобне Авраамие, во всем мире богоносе житие твое. Яко от утробы матерня возван бысть, святе, яко Самуил, славне. Веселятся церкви Христовы, и радуются иноких стада. И весь мир празднует, Христу Богу молящеся прилежно. Господи спаси град и люди, молитвами Владычицы. И, преподобнаго ради, помилуй нас.
Песнь 4. Ирмос.
Христос мне сила Бог и Господь, Честная Церкви боголепно зовет вопиющи. От совести убо чистыя, о Господе празднующи.
Запев. Христов слуга воистину явися святе. Яко от утробы матерня освятися Богу. Яко жертва принесеся честна Господеви. От совести чисты моляся Ему.
Запев. Воистину Христов слуга быв отче Авраамие. Яко пророк и апостол, святителей и преподобных всех, напояя Благодати умиления сердца наша.
Слава. Воистину Христос Бог наш. Показа тя в напастех тихое пристанище святе и забрало, сиротам же всем утешение.
И ныне. Неизглаголанны и Непостижимы Твоего Богородице, Богоподобнаго воистину суть Рожества, небесным и земным Приснодевыя Тайны. Катавасия.
Песнь 5. Ирмос.
Божиим светом Ти Блаже, утренюющих Ти душа Любовию, просвети молюся. Тя ведети Слово Божие Истиннаго Бога, от мрака греховнаго изимающа.
Запев. Утренюя к Богу, от юности блаженне отче Авраамие, яко славнии, мудре, сладко глаголив. Яко ластовица многогласна святе принося молитву Богу.
Запев. Украсися священнолепно, богоносе отче Авраамие. Иерейскою лепотою, яко и Аарон и Самуил боголепно по вся дни служа Богу, и моляся ему.
Слава. Воистину от утробы познан бысть, отче, от Бога, позван бысть, яко другии пророк, святе, и Духом Божиим изходящим из уст его, наставляя ны к Богу.
И ныне. Богородицу Тя от душа Владычице миру Благая, исповедающая спасай. Тя бо Заступление имамы воистину Всечистая. Катавасия.
Песнь 6. Ирмос.
Житейскаго моря воздвизаема зря, напастей бурею. В тихо пристанище притек вопию Ти. Возведи от тля живот мой, Многомилостиве.
Запев. Житейскаго блаженне убежав злаго волнения, в тишину дошед Божия покоя и наслаждения. Молися подати и нам о Христе того наслаждения.
Запев. Бурно пристанище потопляет мя. Подаждь ми руку Твою Владыко Господи, яко иногда Петру утопающу. И спаси мя во отишие Твое преподобнаго Авраамия молением.
Слава. Помолися прилежно за ны отче преподобне Авраамие к Богу. Избавитися вскоре, от всех бед же и скробей. И подати мир и спасение.
И ныне. Пречистая Владычице, рождьши земным Правителя и Господа. Похотей ми злолютное укроти смущение. И тишину подаждь сердцу моему. Катавасия.
Кондак. Глас 3. Подобен. Девая днесь.
Возсия Господи граду Твоему яко светлое Солнце, радостно вселенную озаряя лучами. Тако и молитвами Пречистыя Богородица, от всех бед избави, и упраздни варварская шатания. Яко мы людие Твои, и град наш вельми Тобою хвалится, и спасается молитвами Авраамия преподобнаго.
Икос. Уясни ми язык, и укрепи ми ум Христе Боже, молитвами Пречистыя Ти Матере. Язык ми благ глаголати подаждь на похвалу, и на умоление Твоего угодника. Свещу душа моея унылую юже воздремався угасих, молитвами преподобнаго Авраамия просвети. И не отлучи мене Христе много согрешьша, лика преподобных Твоих. Все бо упование к Тебе возлагаю. Тобою бо град сохраняется, молитвами преподобнаго.
Песнь 7. Ирмос.
Хладодавицу убо пещь сотвори ангел, преподобным детем. Халдея же опали, велением Божиим. Мучителя увеща вопити. Благословен Бог отец наших.
Запев. Халдейскую оросив отроком пещь. И преложь на хлад. На ны иноплеменник нападение Христе погуби, молением преподобнаго Авраамия поюща. Благословен Бог отец наших.
Запев. Пророку Даниилу Владыко Христе, иногда дивия звери укроти и обузда. Тако же и ныне всех противных на ны, стремления укроти и обуздай, молением Боже преподобнаго Авраамия.
Слава. Егда приидеши Боже судити на землю Христе Царю, со ангельскими силами. Тогда Милостиве пощади ны поющыя, молитвами преподобнаго Авраамия. Благословен Бог отец наших.
И ныне. Тобою нам Дево Свет возсия темным и отпуст. Ты бо роди Зиждителя всех Бога. Его же моли Пречистая Приснодево, послати верным велию милость. Катавасия.
Песнь 8. Ирмос.
Ис пламени святым росу источи, а праведнаго жертву и воду попали. Вся бо твориши Христе елика хощеши. Тем Тя превозносим Господа вовеки.
Запев. Явися яко река умная, от уст Божественнаго Рая изходящи, преподобне отче Авраамие. И всех верных напаяя душа умиления, и омывая всех скверну, превозносящих Христа вовеки.
Запев. Яко небеса умная, явися уста твоя святе. Язык же ти отче, яко сот медвеныи сладя. И всех научая вопити. Господа пойте, и превозносите Его во веки.
Слава. Воздежи руце твои ко Владыце Богу святе. Моли за ны прилежно, помиловати град и люди. Избавитися глада же и труса, и нашествия иноплеменных. Его же превозносим во веки.
И ныне. Архангела гласом зовем Ти, Пречистая Дево Мати. Радуися Обрадованная Господь с Тобою. Ангелом и человеком Заченши и Рождьши Господа. Его же превозносим во вся веки. Катавасия.
Песнь 9. Ирмос.
Бога человеком не удобь видети, нань же не смеют чини ангельстии зрети. Тобою бо Пречистая явися нам, Слово Воплощенно. Его же величающе, с небесными вои, Тя величаем.
Запев с поклоном. Ныне блаженне водворяешися, и веселишися со ангельскими силами. Приемля покой противу трудом, отче святе Авраамие. И нас молящихся, помяни, богоносе, честно празднующих память твою, и Христа величающая.
Запев. Ныне собор святых ангел, и ликове святых апостол, пророк и мученик, святителей и преподобных, светло торжествуют радующеся, в память твою святе, отче Авраамие. С ними же молися богоносе, Христу Богу. Всех избавити бед, верою тя блажащих.
Слава. Приими Владыко Христе Царю, моление раб своих. И обрати на радость воздыхание наше. Молит Тя собор архангел, пророк и мученик, апостол и святитель, и преподобныи Авраамий. Егда приидеши судити всему миру, тогда спаси и помилуй величающая Тя.
И ныне. Достойно Тя ублажаем воистину и величаем, Пречистая Дево Мати Христа Бога. Ты бо еси Небесным Силам Радость, и всем святым Доброта и Украшение. Християном Прибежище и Стена. Грешным Путь и Поручница, Тебе величающим. Катавасия.