Память святаго славнаго и всехвальнаго апостола и евангелиста Иоанна Богослова Церковь чтит 9 октября (26 сентября по старому стилю). Этот день относят к великим праздникам, причтенным к двунадесятым. Апостол Иоанн занимает особое место среди учеников Христа. Неслучайно Церковь называет Иоанна апостолом любви, поскольку он учил, что без любви человек не может приблизиться к Господу. Апостол Иоанн является автором Евангелия от Иоанна, трех соборных посланий и Откровения Иоанна Богослова (Апокалипсиса). Иоанн Богослов — единственный из двенадцати апостолов, умерший естественной смертью.
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 2-й
Апостоле Христу Богу возлюбленне, потщися избавити люди безответны, приемлет бо тя припадающа, иже прием тя на перси возлегша. Его же моли Богослове, належащее прещение языческое яко облак разгнати, прося нам мира и велия милости. (2 раза).
Слава, и ныне. Богородичен. Вся паче смысла, вся преславная Твоя Богородице таинства, чистотою запечатленна, и девством хранима, Мати разумеся неложна, Бога рождьши истиннаго, Того моли спастися душам нашим.
Канон, глас 2-й
Песнь 1. Ирмос
Во глубине потопи древле, фараонитская вся воинства, преоружену силу. Воплощьжеся Слово преспеющия грехи потребило есть, преславныи Господь, яко прославися.
Запев: Святыи апостоле и евангелисте Иоанне Богослове, моли Бога о нас (поклон).
Царство Небесное блаженне, еже проповедал еси приим, и словеси собеседник быв Небесному, верующия честному ти проповеданию, и богословию, твоими молитвами сохрани.
Запев. Крепок смысл являя, о всех не брегл еси земных, и соуз естества и словеси премудре умножая, словесно приближися, и от безсловесия ускотившыяся свободил еси.
Слава. Небесных разум приим богословесно блаженне, Бога Слова проповедал еси, искони бе слово, и слово бе к Своему Родителю, и Бог бе Слово, благовествуя научил еси.
И ныне. Богородичен. Отроковиц божественыи лик, божествено в женах Тя добрую воспевают Богородице Владычице, добротами украшену Божества: добротворительное бо Слово, паче слова родила еси.
Катавасия: Избави от бед рабы своя, святыи апостоле и евангелисте Иоанне Богослове, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (3 раза с поклонами).
Песнь 3. Ирмос
Процвела есть пустыня яко крин Господи, язычна неплодящая церкви пришествием Ти, о ней же утвердися мое сердце.
Запев. Тройческую явил еси богословным языком си, юже паче ума тайну Иоанне богоблаженне, о ней же утвердися мое сердце.
Запев. Язык твой бысть книжника трость, Пресвятаго Духа, богописанно знаменающи, честное твое и божественое Евангелие.
Слава. Премудрости ты бездну почерпе премудре, возлег со дерзновением на премудрости Источник, и Сему богопроповедник был еси.
И ныне. Богородичен. Едину Богородицу Тя и Матерь чтем, яко спасения Ходатаицу бывшую нам Пренепорочная, и мир избавльшую молитвами си. Катавасия.
Седален, глас 8-й. Премудрости на перси возлег, и разум сущих навык, божествено возгремел еси, искони бе Слово, добре написав первие словеси воплощение, и проповедав един безначальное рожество. Тем же и языком уловляя языки, проповедаеши концем, и просвещаеши чудесы, Богослове апостоле, моли Христа Бога, грехов оставление даровати, празднующим любовию святую память твою.
Слава, и ныне. Богородичен. В напасти многоплетенныя впад, от враг видимых и невидимых бурею одержим бесчисленых согрешении моих, и яко к теплому заступлению и покрову Твоему Чистая, ко пристанищу притекаю Твоея благости. Темже Пресвятая, иже из Тебе воплощенному без семене, молися прилежно о всех рабех Своих, непрестанно молящихтися Богородице пречистая, молящи Его присно, согрешением оставление даровати, воспевающим достойно славу Твою.
Песнь 4. Ирмос
Пришествовав от Девы не ходатай ни Ангел, но Ты Сам Господи воплощься, и спасе всего мя человека, тем вопию Ти слава силе Твоей.
Запев. Слово тя Богослова достойно показа того Божеству, тайно научив преизящно, и еже по человеку, смотрению наказав неизреченному.
Запев. Ум божествен, и девствено тело стяжав, церковь был еси жива же и одушевлена славне, и жилище препетыя Троицы освященное.
Слава. Сыновством пречистыя Девы почтеся, девствениче блаженне, и брат показася избравшему тя, и ученика Богослова совершившему.
И ныне. Богородичен. Исцеляя Евжино древнее преступление, в Тя Пренепорочную и Пречистую вселися Пребожественыи, всего мя человека вообразити падша. Катавасия.
Песнь 5. Ирмос
Ходатай Богу и человеком бысть Христе Боже, Тобою бо Владыко к светоначальнику Отцу Ти, от нощи неведения приведение обретохом.
Запев. Небесен ум Богослове бысть благодатию, весь свет быв, еже к первоначальному свету приближением, и чистым ти зрением, еже к Нему обожением.
Запев. Умом чистым, и святыми устнами богодухновенне, и пречистыми усты свое благовествование проповедал еси, общее спасение всем верным предложил еси.
Слава. Со Христом живыи от младенства, сосуд благодати от Него сотворен бысть, богословие держа, и троичестей славе паче естества научая.
И ныне. Богородичен. Глаголы Твоя поминающе, Тя ныне блажим: Тобою Всенепорочная, блаженство неизреченное, и жизнь несостареемую воистину прияхом. Катавасия.
Песнь 6. Ирмос
В бездне греховней одержимь, не изследную милосердия Твоего призываю бездну, от тли Боже мя возведи.
Запев. Исус Бог мой и Господь твою чистоту приим, и совершеное очищение, и брата Богослове приятова.
Запев. Венчав святынею житие свое, сице надеяся дерзнув, премудрости возлег еси на перси славне, и благодать оттуду извлече.
Слава. Великая и божественая сияния богословия твоего, всю просветиша славне вселенную, и светом трисолнечным озариша.
И ныне. Богородичен. Небо прострыи волею, небо земленое другое, распростре Тя Богомати чистая, и из Тебе возсияв явися. Катавасия.
Слава, и ныне. Кондак, глас 2-й. Величия твоя девственниче кто исповесть; источаеши бо чудеса, и изливаеши исцеления, и молишися за душа наша, яко Богослов и друг Христов.
Икос. Высоты небесныя уведети, и моря глубины испытати, дерзостно есть и непостижимо. Якоже бо звезды исчести, и морьскии песок невозможно отнюд, сице и богословцевая изрещи недовольно есть: толице ми того венцы Христос, Его же возлюби венча, Ему же и на перси возлег, и на тайней вечери с Ним яде, яко Богослов и друг Христов.
Песнь 7. Ирмос
Богопротивно веление беззаконнующа мучителя, высок пламень вознесло есть: Христос же простер богочестивым детем хлад духовныи, сыи благословен и препрославлен.
Запев. Божественым сияя светолитием, Духа Святаго ясно богословил еси, исходяща из безначальнаго Отца, и почивающа на Сыне нераздельно, яко единосущна.
Запев. В тебе блаженне положи, праведное солнце селение, небо приснодвижимо, иже тебе соделавыи, и богословным ти языком, проповедаемыи Христос, возлюбленне, и препрославленыи.
Слава. Глагол сила божественая вещании твоих изыде, преблаженне досточудне, и премирное ти Евангелие всю обтече землю учением величествия.
И ныне. Богородичен. Пречистое зачатие, нетленно рожество Ты Едина показала еси, пречиста пребывши, Бога бо зачала еси над всеми сущаго Чистая, человека бывша верным на спасение и избавление. Катавасия.
Песнь 8. Ирмос
Пещь огнена иногда в Вавилоне, детели разделяше, Божиим велением халдеи опаляющи, верныя же прохлаждающи, поюща, благословите вся дела Господня Господа.
Запев. Якоже молния светлая мимоходящи, вселенней блаженне явился еси, чистоты светлостию, девства же блистанием, и благочестия учении мир просвещая, возлюбленне Христу Богу.
Запев. Телом и душею и умом очищеным, благовестил еси небесное Христово Евангелие, и Ангелом единожитель на небесех бысть, зовыи ныне, благословите вся дела Господня Господа.
Слава. Столп светел, возложение же божествено, небесному храму был еси, и престол чувствия, и премудрости приятелище, богословия сосуд. Поя, благословите вся дела Господня Господа.
И ныне. Богородичен. Да клятву первую потребиши, и смертное осуждение древле прабабы, от Девы Богоматере Слове Божии родися, всем даруя безсмертие негиблемо. Катавасия.
Песнь 9. Ирмос
Безначальна Родителя Сын Бог и Господь, воплощься от Девицы нам явися, омраченыя просветити, и собрати расточеныя. Тем всехвальную Богородицу величаем.
Запев с поклоном. Ныне не в гаданиих, но лицем к лицу, пищныи поток зрети сподобися, и реку смирения, и источник безсмертия, им же ныне напаяемь, наслаждаешися обожения.
Запев. На земли просил еси седалище прияти от Христа, но Он тебе перси Своя дарует, на ня же возлег Богослове, твердым и пребывающим седением добрым обогатился еси, апостолом украшение.
Слава. Мудрость погасил еси еллинскую безбожную, искони бе слово мудре провеща, и к Богу бе слово, и истинен Бог бяше Слово, им же вся быша, видимая же и невидимая.
И ныне. Богородичен. Яко утро обретеся заутренее, в нощи житейстей девства зарею блистающи, восток солнца мысленаго правде нам явися Богомати пречистая. Катавасия.
Задостойник: Владычице приими молитву раб Своих…
Отпуст: Господи Исусе Христе Сыне Божии, молитв ради пречистыя Твоея Матере, и святаго апостола и евангелиста Иоанна Богослова и всех святых, помилуй и спаси нас, яко Благ и Человеколюбец. Аминь.