Глас 8.
Песнь 1. Ирмос.
Воду прошед, яко по суху, из Египетска зла избежав. Израильтянин вопияше: Избавителю Богу нашему поем.
Запев с поклоном: Святии благовернии князи Феодоре, Давыде и Костантине, молите Бога о нас.
Мрак греховныи отжени светодавче Христе, свыше просвети окаянную мою душу, молитвами преподобнаго Феодора.
Запев. Просвещением Трисолнечнаго Божества озарившеся премудрии, Феодоре и Давыде и Константине, светила явистеся, и просвещаете светоносную вашу память верно чтущих.
Слава. Светом благодати озаряеми, преподобне Феодоре и Давыде и Константине славнии. Верно память вашу торжествующыя просветите, и от тмы греховныя молитвами си избавите.
И ныне. Плотию рождьши Бесплотнаго Богородительнице Пречистая, телесных нас и душевных скверн омый, окроплением Божественыя Ти молитвы.
Катавасия. Избавите от бед рабы своя, святии благовернии князи Феодоре, Давыде и Костантине, яко вси по Бозе вас величаем, вы бо молите о нас Христа Бога нашего.
Песнь 3. Ирмос.
Небесному кругу, Верхотворче Господи, и Церкви Зиждителю, Ты мене утверди в любви Своей, желанием Сыи край, и верным утвержение, Едине Человеколюбче.
Запев. Непрестанныя молитвы присно приносяще к Богу, блаженне Феодоре и Давыде с Константином за весь мир, и трисветлою зарею просветисте, яко молния вселенную.
Запев. Предстояще Господеви с бесплотными силами, неизреченною славою блистающе, преблаженне Феодоре и Давыде и Константине. За ны молитеся, творящыя честную и преславную память вашу.
Слава. Напоивше душя слезными потоки, содеясте их преподобнии плодоносны добродетельми. Всякия износяще чюдеса, на показание преславнии.
И ныне. Нива духовная, яко же из бразды Клас изнесла еси, всю тварь Питающаго всячески Присно Дево. Катавасия.
Седален, глас 1. Подобен. Явися великое солнце.
Житейское море воздержанием без труда преплывше, и в пристанище мысленое безстрастия пристали есте, сосуди воздержанием богатства некрадома благочестия явистеся блаженнии, Феодоре и Давыде и Константине. Безстрастием житие свое просветивше, и требующих милости обогащаете. Христа Бога моляще, даровати нам велию милость. Слава и ныне. Богородичен. Молитвы Своих раб приими Богородице, и избави нас от всякия беды, яко рождьши Христа Спаса, Избавителя душам нашим.
Песнь 4. Ирмос.
Ты ми Христе Господь, Ты же и Сила ми, Ты ми Бог, Ты ми Радование, не оставль Недра Отча, но милостию Си нашу нищету посетив. Тем с пророком Аввакумом зову, Силе Твоей слава Человеколюбче.
Запев. Ты на земли другии ангел наречеся чистотою, отче преподобне Феодоре. Полки вся бесовьския и ереси попаляя духовною благодатию. Тем сошедшеся в память вашу, прославляем Спаса Бога нашего.
Запев. Яко Христово смирение возлюбльше вознесостеся безстрастием, смиривше бесовския гордыни. Восиявше яко солнце от востока, чюдес лучами просвещаете всю подсолнечную.
Слава. Кадило благоухания Всевидцу преподобнии, Феодоре и Давыде с Константином богомудрым, своя молитвы принесосте, яже обоня и прият и в постнем купно празднице устраяет.
И ныне. Без семене зачат во чреве Творца и Господа, без порока явльшися Мати Богу. Весь мир крилома Своима покрываеши, Непорочная Госпоже Пречистая. Пречистей Си руце воздеющи к Нему, избави ны от грядущаго гнева. Катавасия.
Песнь 5. Ирмос.
Просвети нас повелением Си Господи. И мышцею высокою Твоего Мира подаждь нам, Едине Человеколюбче.
Запев. Просвети твое житие всю вселенную, преподобне отче Феодоре, правоверными словесы сияя яко Солнце, Трисолнечнаго Божества зарею просвещаемь.
Запев. Церкви ты бысть проповедник святе, всяку ересь и лесть бесовскую разоряя. Тем же со ангелы ныне ликуеши.
Единой любви Христове вы приложивше душя своя, Феодоре и Давыде с Константином славным. И исполнителие Божиим заповедем бывше, многих чюдес приясте благодать всехвалнии.
Слава. Незлобиви и кротцы, вся злобы вражия погубльше, и милостиви до конца явльшеся блаженнии. От Единого Милостиваго благодать приясте истинную и спасеную.
И ныне. Воспойте вся земля, пойте же восиявшему ис чрева боголепно Неискусобрачныя. И Сию верным показавшу тверду Надежду и Похвалу. Катавасия.
Песнь 6. Ирмос.
Молитву пролию ко Господу, и Тому возвещу печаль мою. Яко зол душа моя наполнися, и живот мой аду приближися. Но молюся яко Иона от тли Боже мой возведи мя.
Запев. Верою и любовию прилепився Владыце вышних сил, премудре Феодоре. Восияв на земли яко Солнце, мглу идольскую всюду потребляя, верныя же просвещая молитвами твоими.
Запев. Молитвами варяя к Богу, и Тому предстоя со ангелы. За весь мир молися, брань неприязненую всю потребити, и победу известну дати на сопостаты людем.
Благими нравы украсився, Христови прилепился еси от юности и плотьския страсти уморив воздержанием. И к животу преподобне Феодоре преставися.
Слава. Глаголом законным исполнитель Божиим был еси, исполнися отче премудре Давыде Божественых даров. И чюдес лучи всем испустил еси.
И ныне. Душевныя ми страсти исцели, яже безстрастия бывши Источник, и просветивши лики преподобных отец Рожеством Своим. Катавасия.
Кондак. глас 4. Подобен. Явися днесь.
Явися велие Солнце Христове Церкви, просвещая учения светлостьми всечестне. Яко черпалом златым от Кладязя Неископаннаго чюдес почерпл еси от Источника Неистощимаго, на успение свое испил еси блаженне Феодоре. Ныне всем даеши грехов прещение, слава преподобным.
Икос. На высоте Господь воздержания истины тебе положи яко звезду нелестну, просвещающа страны чюдотворче. Быстрины словес твоих источи божественых чюдес мирови, и душя верных напитал еси. Еретическия полки победил еси, яко другия египтяны. Поклонение Троическое во Едином Божестве чтити научил еси. Ею же соблюдая нас от враг видимых и невидимых всеблаженне Феодоре, всем даеши грехов прощение, слава преподобным.
Песнь 7. Ирмос.
Иже от Июдеи дошедше отроцы в Вавилон древле, верою утвержени, пламень пещныи попраша глаголюще, отец наших Боже благословен еси.
Запев. Прилежныя ти подвиги и труды почитающе, и сладость учения твоего преподобне отче Феодоре. Ими же просвети ны и научи воспевати Триипостасное Божество. Отец наших Боже благословен еси.
Запев. Оружием ваших молитв, Феодоре и Давыде с Константином славным, победисте бесы. И с небесе благодать приемше исцеляти болезни, и прогонити духи лукавыя, от взывающих, благословен Бог отец наших.
Слава. Постом и молитвою и бдением, преподобне Феодоре просветився, взыде на высоту добродетелей. И научи весь мир верно воспевати, отец наших Боже благословен еси.
И ныне. Оружие Чистая хранящее прежде врата Едемская, плещи Девице всем дает, низложившим постнически борителя врага, присно взывающим, отец наших Боже благословен еси. Катавасия.
Песнь 8. Ирмос.
Седмь седмицею пещь халдейскии мучитель богочестивым люте разжже. Силою же лучшею спасеных видев, Творцу и Избавителю вопияше, дети благословите, священнии воспойте людие, и превозносите Его во веки.
Запев. Слез ваших капли, погасиша соблазны греховныя. Реку же чюдес показасте всем нам, всякия страсти потопляющу притекающим к вам, преславнии отцы святии, Феодоре и Давыде с Константином славным.
Запев. Веру и надежду неразориму, и любовь истинную имевше отцы, и милостивое прилежание, терпение благо, и поучение словес духовных, смиреномудрие, и совершеное беззлобие.
Слава. Подвизастеся добре, победивше вражия, вся действа, и наконец жития венчастеся мудрии. Ко всем преподобным причтостеся. С ними же чтем вас, превозносяще Христа во веки.
И ныне. Мати Божия Чистая, страстей моих союзы греховныя и молвы и недуги отжени. Имаши бо к Нему дерзновение, и область помиловати ны Госпоже Милосердая, Спаса порождьши плотию. Его же непрестанно моли спастися нам. Катавасия.
Песнь 9. Ирмос.
Удивися убо о сем небо, и земли ужасошася концы, яко Бог явися человеком Плотию, и чрево же Твое бысть пространнее небес. Тем Тя Богородице ангел и человек чиноначалия величаем.
Запев с поклоном. Естество тленное пременивше, в вечныя обители взыдосте блаженнии. Житием чистым последовавше Владыце Богови. Тем же чтуще успение ваше святии, непрестанно Христа величаем.
Запев. Се отверзеся вам отцы Небесное Царство, скончавшем доброе течение. И видите яже видят ангели, воздаяние трудом подавает вам почести Бог. Тем же ублажаем вас.
Слава. Выспрь к Богу мысль имуще преподобнии, земная оставили есте. Труда ради воздержанием, за неослабное облегчеваеми. И со ангелы ныне водворяетеся, Христа величающе.
И ныне. Пощади мя Господи пощади, егда хощеши судити ми, не осуди мене во огнь, ниже яростию Си обличи мя. Молит Тя Девая Рождьшая Тя Христе, и ангельстии собори, и преподобных составы. Катавасия.