Канон, глас 2-й
Общее начало и конец всем канонам →
Порядок чтения по уставу
Тропарь, глас 4-й
И нравом причастник, и престолом наместник, апостолом быв. Деянии обрете богодохновенне в видениих восход. Сего ради слово истинное исправляя, и за веру пострадал еси до крове. Священномучениче Аввакуме, моли Христа Бога, спастися душам нашим.
Слава, и ныне. Богородичен. Иже от века утаенное, и Ангелом несведомое таинство, Тобою Богородице земным явися Бог в неразмесне снятии воплощаемь. И Крест волею нас ради восприим. Им же воскресив первозданнаго, и спасе от смерти душа наша.
Песнь 1. Ирмос
Грядите людие поем песнь Христу Богу, раздельшему море, и проведшему люди, их же испусти из работы египетския, яко прославися.
Запев: Святыи священномучениче Аввакуме, моли Бога о нас (поклон).
Христовым светолитием просвещаемь, священномучениче славне, Аввакуме, молитвами твоими преблаженне, омрачную душю мою просвети, яко да воспеваю тя.
Запев. Просвещение спасенаго проповедания, чистому сердцу твоему, яко зерцало нескверное отче восияв, лучи всем испустил еси.
Слава. Постом своим страстная играния вся, и воздержанием желание претворил еси. И различными подвиги взятся, к безстрастней высоте.
И ныне. Богородичен. Бога из тебе воплощьшагося свемы, безсеменнаго хотения, сущаго прежде всея твари, и прежде всех век. Тем же тя сущую Богородицу воспеваем.
Катавасия: Избави от бед рабы своя, святыи священномучениче Аввакуме, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (3 раза с поклонами).
Песнь 3. Ирмос
Утверди нас собою Господи, древом умерщвеи прегрешения. И страх твой всади в сердца наша, яко Человеколюбец.
Запев. Всесвершену жертву живу, себе Христови принесл еси мучением. Совестию мученическою, преди пострада воздержанием.
Запев. Житие твое священно, и слово божествено. И деяния божественая приемлюще, восхождения в сердцы своем, истиннаго боговидения, его же получил еси.
Слава. Управив богоразумно преподобне ум свой, заповедьми Спасовыми, достоин явися, и вере поборник непобедимыи.
И ныне. Богородичен. От мертвости ум наш оттрясла еси, рождьши сущее безсмертие. И одежду нам изткала еси нетления Девице, рожеством Своим. Катавасия.
Седален, глас 3-й. Божиим Духом просвещен, дерзость мучительскую, дерзновением священномучениче великомудрене посрамил еси. И преплыл еси лестную пучину, и ко пристанищу божественому пристал еси. Отче преподобне, Христа Бога моли, даровати нам велию милость.
Слава, и ныне. Богородичен. Кождо идеже спасается, в правду тамо прибегает. И кое ино таково прибежище, яко Твое Богородице, покрывающее душа наша.
Песнь 4. Ирмос
Услышах Господи славное Твое смотрение, и прославих Милосерде непостижимую Твою силу.
Запев. Всесожжение божествено ты, и чиста жертва принесеся Спасу всех, священномучениче премудре.
Запев. Стадо Христово преподобне, наставляя к свету богоразумия, и безбожия тму отгнал еси.
Слава. Безбожия глубину, рекою твоих потов отче, яко священномученик изсушил еси.
И ныне. Богородичен. Просвети Пречистая омраченую душю мою, светом Твоим, яже Свет рождьши един составныи. Катавасия.
Песнь 5. Ирмос
Света подателю, и веком творче Господи, во свете Твоих повелении настави нас. Разве бо Тебе иного бога не знаем.
Запев. Богатьство и славу светлую, и долготу жизни, и живот нетленен, истинная премудрость Христос, тебе дарова блаженне, яко изрядне того возлюбльшу.
Запев. Жезлом веры отгоняеши ересем ловитвы, и союзом любве спряг стадо свое, надежею и верою сохраняеши невредно.
Слава. Отрази воздержанием пищю, накормил еси душю свою, пищю имея непрестанныя молитвы и поучение, и еже к Богу возносящее смирение.
И ныне. Богородичен. Тя заступницу Чистая, и надежу тверду и державу и покров, и стену стяжахом вси, и в Царство Небесное вводящии мост. Катавасия.
Песнь 6. Ирмос
В бездне греховней одержимь, не изследную милосердия Твоего призываю бездну, от тли Боже мя возведи.
Запев. Жертва и жритель быв, пожерл еси себе Богови веры ради. И соблюдаеши безсквернено тому, служительства своего свершение.
Запев. Умертвися богоглаголиве миру всему, Единому же Богу жив пребывая. Ко Христови преставися, животом нетленным обогащаемь.
Слава. Ныне в безконечную славу прешед от земли, окалянную душю мою страстьми, преподобне прилежным очищением твоея молитвы уврачуй.
И ныне. Богородичен. Вземлющаго грехи всего мира, Пречистая Христа заченши, Пренепорочная непрестай просящи, грехов прощения рабом Твоим. Катавасия.
Кондак, глас 4-й. В святителех благочестно пожив, и мучения путь прошед, идольския угасил еси жертвы, и поборник быв своему стаду богомудре. Тем же тя почитающе тайно вопием ти, от бед избави ны, присно своими мольбами отче наш, Аввакуме.
Икос. Верно любовию совокупльшеся, в память священнаго страдальца, и сего песньми восхвалим днесь, яко да благодати от него насладимся. Душы бо спасает от страстей и бед, яко мученик, и яко верен святитель, и поборник молящих его от души. Тем же вопием ему, от бед избавити ны присно своими мольбами, отче наш, Аввакуме.
Песнь 7. Ирмос
О теле злате на поли Деире служимем трие отроцы не радиша о безбожнем велении. Но посреди пламене ввержени, прохлажаеми пояху, благословен Бог отец наших.
Запев. Премудрости чаша явися добродетели исполнена, и созвав проповеданием высокаго жития своего стадо свое, и сие управил еси богомудре, и с ними отче взываеши, благословен Бог отец наших.
Запев. В храмы тамо сущия в жилище честно достигл еси, со ангелы водворяяся, и с ними отче ликуеши. Тем же тя чтуще преблаженне, со дерзновением зовем, благословен Бог отец наших.
Слава. Блажен еси и добро ти есть ныне водворившуся, идеже праведных воиньства. Идеже мученическая селения. Идеже премудрых апостол лицы вопиют, благословен Бог отец наших.
И ныне. Богородичен. Ты едина Богу всяческая мудростию создавшему, Мати познася не искусобрачная Дево Пречистая. Тем же Ти благочестно взывающе глаголем, благословена яже Бога плотию рождьши. Катавасия.
Песнь 8. Ирмос
В пещь огнену к детем еврейским сошедшаго, и пламень на хлад преложьшаго Бога, пойте вся дела Господа, и превозносите Его во веки.
Запев. Священнодействовав благочестно, Христову службу тайную словесное овча сам принесеся Ему, жертва приятна и благоугодна, всесвершаема кровию преблаженне.
Запев. Священства одежду, делы своими премудре украсив, явися целомудрию ключарь. Воздержанию пища истинная, молитвы учитель, покаянию наставник, и закон жизни.
Слава. Предложению время, покаянию плод присно предлагает, и смоковница неплодная посечением претит, душе моя проклятия убойся, восприими же Христа, благоплодие добродетельно.
И ныне. Богородичен. Непрезри заступнице страшная, глас раб Своих и от всякия беды и прещения лютаго, Дево Святая всех исхити. Прекланяет бо богоматерняя молитва Твоя. Катавасия.
Песнь 9. Ирмос
Иже от Бога Бога Слова, не изреченною мудростию пришедшаго обнови ти Адама, ядию тления падшаго зле, от Святыя же Девицы, неизреченно воплощаема нас ради, вернии единомудрено песньми величаем.
Запев с поклоном. Увядил еси отче различныя вражия стрелы, огнем воздержания, и чистоты углием плотьскую попалив тину, истинней тамо сущей светлости преславно сподобися.
Запев. Светоносная твоя отче восиявши память, просвещает душы благоговейно, сию свершающих досточюдне. И причастники Божия света, явлено сих свершает. Юже достойно богомудре песньми величаем.
Слава. Венец носяща тя отче, и почесть победы приимша от Божия десницы, и подвиги скончавша. И света исполньшася Божия, верующе вернии ко Христу молебника тепла тя предлагаем.
И ныне. Богородичен. Яко Богородицу Тя Девице и Матерь Слову, Ходатаицу сущую нам, присносущнаго Божия живота, и праведное солнце восиявшую нам, вернии единомудрено, песньми величаем. Катавасия.
Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.
Отпуст: Господи Исусе Христе, Сыне Божии, молитв ради Пречистыя Твоея Матере, и святаго священномученика Аввакума, и всех ради святых, помилуй и спаси нас, яко Благ и Человеколюбец. Аминь.
Другой канон святому священномученику и исповеднику Аввакуму
Песнь 1. Ирмос.
Несть Ти подобен, Преславныи Господи. Рукою бо крепкою избавил еси люди, яже стяжа, Человеколюбче.
Запев с поклоном: Святыи священномучениче и исповедниче Аввакуме, моли Бога о нас.
Агнче Непорочныи, Божии Слове, отверзи моя недостойная уста, да возмогу воспети священнаго Аввакума, Твоего исповедника.
Запев. Воистинну не подобает приложити или оставити что, Священнаго Предания, православныя нашея веры. В ней же бо верно крестихомся. А иже преложители сея веры, в правду предани будут прещению проклятия.
Запев. Величайшии Аввакум, благочестивыя Христовы веры, всеистинно проповедник же и мученик, показася кровию.
Запев. Авраам явися нам нов, жертву принося Богу: Агнца вземлющаго грехи всего мира, воистинну хлебы сотворяя своима рукама чистыма.
Запев. Копием, словесы своими, вероотступники пронзил еси. И страдании своими, яко мечем, бесовския полки победил еси. Их же злобы избави чтущия тя, всесвященне Аввакуме.
Слава. Утвердився на камени веры Христовы, тверд пребыл еси во исповедании православия, и злочествующих обличал еси.
И ныне. Гору Святую, Превышнее Носило, Матерь Божию и Деву истинную по рожестве, воспоем.
Катавасия: Избави от бед рабы своя, святый священномучениче и исповедниче Аввакуме, яко вси по Бозе к тебе прибегаем, ты бо молиши о нас Христа, Бога нашего.
Песнь 3. Ирмос.
Не мудростию, ни силою, ни богатством хвалимся. Но Твоею Отчею составною мудростию Божиею, яко несть Свята, паче Тебе Человеколюбче.
Запев. Мечь обоюду остр язык твой показася. В Христов страх вооружився, блаженне. Разумно изобличив начальствующая. Во свидетельство, Христа всех Царя и божественных Его ученик, виновна на среду приводя.
Запев. Благовещанныи твой, пред мучительскими судищи, с дерзновением, Аввакуме славныи, язык взываше: яко несть свята паче Тебе Человеколюбче.
Запев. Блажен еси и добро ти есть ныне водворившуся, идеже праведных воиньства, идеже мученическая селения, идеже премудрых апостол лицы вопиют: яко несть свята паче Тебе Человеколюбче.
Запев. Управив богоразумно преподобне ум твой заповедьми Спасовыми. Достоин явился еси, и вере поборник непобедим.
Запев. Житие твое чудно, слово же дивнейшее, язык твой светозарен, уста огнедухновенна и духодвижима, ум же твой испытен, отче блаженне.
Слава. Писаниями своими всечестными, мудре, безбожных писания измазуеши, и тех богомерзкая и безбожная повеления. Возвещая чествовати Христа Исуса.
И ныне. Неискусобрачная, Бога плотию рождьшая. Утверди мя, преклоненна страстными прилоги. Яко несть помощницы, разве Тебе Чистая.
Катавасия.
Седален. Глас 3. Божественным Духом просвещен, проповедал еси со дерзновением православия Предание, всеблаженне Аввакуме, и мучителей беззаконных посрамил еси, в заточения и на смерть неправедно отсылаем. Отче преподобне, Христа Бога моли, грехом оставление подати, чтущим любовию святую память твою.
Слава, и ныне. Кийждо идеже спасается, тамо праведно и притекает. И кое иное таково прибежище, яко Ты Богородице, покрывающе душа наша.
Песнь 4. Ирмос.
Се Бог наш, от Девы рождеися и естество обложив. Его же поюще возопием: слава Силе Твоей Господи.
Запев. Се отче славне, течение свое свершив, православную веру соблюл еси непорочну. Ея же ради пострада законно, венец прият свыше, яко мученик непобедим.
Запев. Исполняя ты, Истины слово, раны искушения претерпел еси, и во изгнание вложен, священне Аввакуме, пел еси: слава Силе Твоей Господи.
Запев. Закон отеческии, всеблаженне, истино нося, пребеззаконнейша царствующа поплевал еси повеления несмысленная.
Запев. Злочестивых защитницы, тебе досточудна суща, лютыми ранами уязвиша. Его же ангельстии чини обимаху, яко Христова служителя и божественнаго мученика.
Запев. Неубояся уз, иерею, не устрашися бед, не ужасеся смерти. Безсмертныя тя Славы показующия причастника.
Слава. Украшенныи душею, яко жених в чертозе, в злодейстей, Аввакуме славне, темнице взывааше: Господи, Исусе Христе, Сыне Божии, помогай мне.
И ныне. Госпоже Всепетая Богородительнице. Моя помышления, молитвами Твоими очистивши, покажи мя благоподобна, Мати всех Бога.
Катавасия.
Песнь 5. Ирмос.
Создавыи нас сущая люди, кровию Своею Господи, Твой мир дай же нам, во единой мысли сохраняй стадо Свое.
Запев. Зарею просвещаем, мудре, Трисолнечнаго Сияния, могилу разорил еси еллинскаго злословия, и светом своих словес вся просветив, ныне прешед к Незаходимому Сиянию.
Запев. Стал еси пред Престолом Божественным с мученики, их же ревности и веры приобщился еси отче, и нас усвой Владыце и своя подражатели соделай.
Запев. На камени Божественных заповедей, сердца твоего утвердил еси столпа. Лютых мук ветром и ласкательными бурями не поколебася, Аввакуме премудре, и ересем начальники посрамил еси.
Запев. Пламенно, нечестие еретическое, попалил еси преславне Аввакуме, веры же християнския непорочныя Божественное исповедание изяснив.
Запев. Обличая, моля, советуя, непреставал еси призывати заблуждших овец от Христова стада, аще и не вси послушаша гласа твоего.
Слава. Неправедных игемон еретичествующих пред судищами став, Аввакуме, огня лютее дышущая стремления, благочестием сожегл еси, Троице вопия: во единей мысли сохраняй стадо Свое.
И ныне. Моли присно Сына Своего и Бога нашего Неискусобрачная Марие Чистая, послати нам, верным, милость.
Катавасия.
Песнь 6. Ирмос.
В ките, Христе, тридневен быв Иона, прописа Тя Безсмертнаго, яко мертвеца вольнаго, в сердцы земнем тридневно бывша.
Запев. Течением твоея крове напояема, Церковь Христова прозябает отеческаго предания Божественное семя, твоим учением, исповедниче.
Запев. Глагол твоих вещание, яко некии небесныи шум носим, безбожныя разумы огроми слово благодати, и велений Божественных зарями светлейшими, верных сердца просвети.
Запев. Утеснил еси нечестие, блаженне, пространством истиннаго благочестия. И пути в сие ведущия, заблуждьшим людем показал еси, и спасе люте потопляемыя прелести водами.
Запев. Яростно на Христа неивствующе, яко зверие свирепии, возлошиша отче, умертвити тя. Тем влекуще и биюще ввергоша во огнь. Свидетеля истине тя явственно содевающе.
Запев. Злобою живущии, на тя, незлобиваго агньца, яко дивие зверие восташа. Словесы твоими, яко осном уязвляеми не терпяще, завистию поощряеми, Аввакуме богомудре.
Слава. Недуговавша Никона всезлейшаго окаянно ересию, со дерзновением преподобне, обличил еси. Поборник быв православным, Аввакуме досточудне.
И ныне. Всякаго вышша существа Слово Божие родила еси, воплощенно нам. Тем же Богородицу Тя, устнама же и душею проповедаем.
Катавасия.
Кондак. глас 4. Во иереех благочестно пожив и мучения путь прошед, поборник быв православию богомудре. Тем же тя почитающе, тайно вопием ти: от бед избави ны присно своими мольбами, отче наш Аввакуме.
Икос. Верно любовию совокупльшеся в память священнаго страдальца, и сего песньми восхвалим днесь, яко да благодати от него насладимся: души бо спасает от страстей и бед, яко мученик. И яко верен иерей, и поборник молящих его от души. Тем же вопием ему: от бед избави ны присно своими мольбами, отче наш Аввакуме.
Песнь 7. Ирмос.
Искони Безначальное Слово, со Отцем и Духом, Сын Единочадыи, благословен еси, препетыи Боже отец наших.
Запев. Гневом заточен бысть мучителей, обрел же еси блаженне, Исуса утешение.
Запев. Гладом таем, в лютая влагаем заточения стражда, всеблаженне, мученически терпел еси, от совести чисты в Господе веселяся.
Запев. Стоял еси пред судищи преславне, мучителей. Светлым гласом проповедуя Церкви православныя догматы.
Запев. Облистав, славне, исправлении обощрен явися яко Христов мечь, ссецающь еретическая ухищрения. Божественным Духом укрепляем. Глаголы твоими собор поганскии обостряяся неистовством и смерть совещаша нанести на тя, страстотерпче Христов Аввакуме славне.
Слава. Огнь горящь явился еси на ереси, блаженне, яко бо тростие, сия изнурил еси ревностию Духа.
И ныне. Тя, вси стяжахом прибежище и стену нашу христиане. Тя славословим немолчно, Безневестная.
Катавасия.
Песнь 8. Ирмос.
Всяческая носяи неприступною Ти Силою Христе, преподобныя твоя отроки в пламени спасл еси зовуща: благословите дела Господня Господа.
Запев. Твоего не стерпя дерзновения богоненавистныи царь, смерти огненней, Аввакуме, верныи рабе Христов, осуждает тя богословяща: благословите дела Господня Господа.
Запев. Тя пастыря, христовых божественных овец добре упасшаго премудре, яко агня беззаконницы всего сожигают огнем, Аввакуме поюща: благословите дела Господня Господа.
Запев. Не поколеба столпа твоего сердца, беззаконнующих противление, мучениче страстоносче, тем же распаляем ревностию веры, явился еси огня сильнейши.
Запев. Тело огню предав мучениче, душу свою неблазнено соблюл еси. Жертву непорочну Владыце, тя самаго принесл еси, всечестне.
Запев. Всесожжение божественное ты и чиста жертва принесеся Спасу всех, священномучениче премудре.
Слава. Жертва и жритель быв, пожерл еси себе Богу, веры ради. И ныне со святыми на Небесех водворяешися.
И ныне. Всесвятая Дево, яже Бога Слова рождьшая Плотию, души моея мрак Твоими молитвами отгнавши, просвети взывающа: благословите дела Господня Господа.
Катавасия.
Песнь 9. Ирмос.
Тя Преславную Невесту и Пречистую Богородицу, Зиждителя рождьшую, видимых всех и невидимых, песньми величаем.
Запев с поклоном. Нов явися ревностию, яко же вторыи Моисей. Не знамении страшными удивляя, но Божественных словес учении наставляя к тихому пристанищу Новаго Израиля, страстнаго Египта изводяи.
Запев. Ревность Дому Господня, ревность догматом отеческим, священное сердце твоем объем согре, и честныи язык твой на новшества изостри.
Запев. Таинственным догматом православныя веры, не точию поборника истинна и верна себе показа, но и паче преостра секира на вся яже под небесем ереси явился еси.
Запев. Возвышаемая волнения лукавьствия, твоего ума не поколебаше, Аввакуме славне, на камени знания Христова стояща. Тем небурное пристанище яве обуреваемым был еси.
Запев. Излия язык твой реку Христовых учений благочестне, Аввакуме всеблаженне, премудрости питатель.
Слава. Престолу предстоя Христову, яко иерей благоприятен и мученик изряднейший, Аввакуме треблаженне. Яже любовию чествующия память ти светоносную, житейских избави соблазн.
И ныне. Ты Пресвятая Богомати, христовым апостолом похвала бысть, мучеником же слава и пророком основание. Тем же Тя, вернии вси достодолжно величаем.
Катавасия.