Рождество Христово — один из главных господских двунадесятых праздников, по значимости считается вторым после Пасхи. Этот праздник установлен в воспоминание Рождества Исуса Христа от Пресвятой Девы Марии в Вифлееме Иудейском и отмечается всегда в один и тот же день — 7 января (25 декабря по старому стилю). В этот день заканчивается Рождественский пост и начинаются Святки — время от Рождества до Крещения Господня.
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 4-й
Рожество Твое Христе Боже наш, возсия мирови Свет разумныи, в нем бо иже звездам служащии, звездою поучахуся, Тебе кланятися Солнцу праведному, и Тебе ведети свыше восток, Господи слава Тебе.
Канон, глас 1-й
Песнь 1. Ирмос
Христос раждается славите. Христос с небесе срящите, Христос на земли, возноситеся. Пойте Господеви вся земля, и веселием воспойте людие, яко прославися.
Запев. Слава Господи Рожеству Твоему (поклон).
Истлевша преступлением, по Божию образу бывшаго, всего нетления суща лучша, отпадша божественыя жизни, паки обновляет мудрыи Содетель, яко прославися.
Запев. Видев Зиждитель гиблема человека, рукама его же созда, преклонь небеса сходит. Сего же от Девы божественыя чистыя, всего осуществует. Воистину воплощься, яко прославися.
Слава. Мудрость слово Божие, и сила, Сын сыи Отечь, и сияние, Христос Бог, сил утаився, елико премирных, и елико на земли, и вочеловечься обновил есть нас, яко прославися.
И ныне. (Повторяем стих).
Катавасия: Сохрани от бед рабы Своя Милостиве, яко усердно к Тебе прибегаем к милостивому Избавителю и всех Владыце Господу Исусу (поклон). Господи помилуй (3 раза с поклонами).
Песнь 3. Ирмос
Первовечному от Отца рождену нетленно Сыну, и в последняя от Девы воплощенну без семене, Христу Богу возопием, воздвигнувыи рог наш свят еси Господи.
Запев. Иже духновения причащься лучшаго Адам перстныи, и к тлению поползеся женьскою лестию, Христа от Жены видя вопиет, иже мене ради по мне быв, свят еси Господи.
Запев. Сообразен бренному умалению, растворением Христе быв. И причастием плоти горшая, подав божественаго естества. Землен быв, и пребыв Бог, и воздвигнувыи рог наш, свят еси Господи.
Слава. Вифлееме веселися, князем июдовым сыи царь. Израиля бо пасыи, на раму херувимску, из тебе пройде Христос яве, и воздвигнувыи рог наш, надо всеми воцарися.
И ныне. (Повторяем стих). Катавасия.
Слава Отцу и Сыну и Святому Духу, и ныне и присно и во веки веком. Аминь.
Ипакой, глас 8-й. Иже от начаток язык небо Ти принесе, лежащему Младенцу в яслех, звездою волхвы призвав. Их же и удиви не скипетры ни престолы, но последнею нищетою. Что бо хуждьше вертепа; что же ли смиреннее пелен; в них же облиста Божества Твоего богатьство, Господи слава Тебе.
Песнь 4. Ирмос
Жезл из корене Иессеова, и цвет от него Христе от Девы прозябл еси, из горы хвальныя присенныя часты прииде воплощься, от Неискусомужныя, невещественыи Бог, слава силе Твоей Господи.
Запев. Его же древле прорече Иаков, языком ждание Христе, от колена Июдова восиял еси. И силу дамаскову, самарийскии же плен пришел еси изпроврещи, лесть пременяя в веру боголепну. Слава силе Твоей Господи.
Запев. Волхва древле Валаама, словес ученики мудрыя, звездоблюстители, радости исполнил еси. Звезда от Иакова восияв Владыко, языком начаток вводимым, прият же яве, слава силе Твоей Господи.
Слава. Яко на руно во чрево Девыя сшел еси дождь Христе, и яко капля на землю каплющая, Ефиопия и Фарсис, и Аравитьстии острови же Сава, Мидяньскую всю землю держащии припадоша Ти Спасе, слава силе Твоей Господи.
И ныне. (Повторяем стих). Катавасия.
Песнь 5. Ирмос
Бог сыи мира, Отец щедротам, великаго ти совета Ангела, мир подавающаго, послал еси нам. Тем богоразумия к свету наставляеми, от нощи утренююще, славословим Тя Человеколюбче.
Запев. В рабех кесаревым повелением написатися покорься. И нас рабы суща врагу и греху свободил еси Христе, весь иже по нас обнищав. И перстнаго от самого смешения и общения обожил еси.
Запев. (Повторяем стих).
Слава. Се Девая яко же древле рече, во чреве приемши родила есть Бога вочеловечьшася, и пребывает Девою. Ея же ради смиршеся с Богом грешницы, Богородицу сущую воистину вернии воспоем.
И ныне. (Повторяем стих). Катавасия.
Песнь 6. Ирмос
Утроба Иону младенчески не вреди, морскии зверь, якова прият. В Девицу же вселься Слово, и плоть прием, пройде сохрань нетленну. Иже бо не пострада истления, Рождьшую сохрани неврежденну.
Запев. Прииде воплощься Христос Бог наш, из чрева Его же Отец прежде денницы раждает. Правления же держа пречистых сил, в яслех скотиих возлежит, и пеленами повивается, разрешает же много плетенныя пленицы прегрешении.
Запев. (Повторяем стих).
Слава. Юно из Адама, Отроча смешения, родися Сын, и верным дастся. Будущему веку, сей есть Отец, и Князь, и нарицается велика совета Ангел. Сей крепок Бог есть, держаи областию всю тварь.
И ныне. (Повторяем стих). Катавасия.
Слава Отцу и Сыну и Святому Духу, и ныне и присно и во веки веком. Аминь.
Кондак, глас 3-й. Девая днесь,Пресущественаго раждает, и земля вертеп Неприкосновенному приносит. Ангели с пастырьми славословят, волсви же со звездою путь шествуют. Нас бо ради родися, Отроча младо превечныи Бог.
Икос. Едема Вифлеем отверзе, приидите видим, пищу в тайне обретохом. Приидите приимем, сущая райская внутрь вертепа. Ту бо явися корень не напоен, прозябая отпущение. Ту обретеся кладязь не ископан, его же Давыд пити древле вжадася. Ту Девая рождьши Младенца, жажду устави абие Адамову и Давыдову. Сего ради к Нему идем где родися, Отроча младо превечныи Бог.
Песнь 7. Ирмос
Отроцы в блазей вере воспитани, нечестива веления небрегше, огненаго прещения не убояшася. Но посреди пламене стояще пояху, отцем Боже благословен еси.
Запев. Пастырие свиряющии ужасно светоявление получиша. Слава бо Господня облиста их, и Ангел воспойте вопия, яко родися Христос, отцем Боже благословен еси.
Запев. Внезапу с словом Ангеловым небесная воинства, слава вопияху Богу в вышних, на земли мир, в человецех благоволение: Христос восия, отец наших Боже благословен еси.
Слава. Глагол что сей, рекоша пастырие, пришедше видим бывшее Божественаго Христа. Вифлеема же дошедше, с Рождьшею поклоняхуся, воспевающе, отцем Боже благословен еси.
И ныне. (Повторяем стих). Катавасия.
Песнь 8. Ирмос
Чудо превелие росодавицу вообрази пещь образ, яже бо прият не опали юноша: тако же и огнь божества Деву, Юже чисту пройде. Тем воспевающе поем, да благословит вся тварь Господа и превозносит Его во веки.
Запев. Влечет вавилоня дщи отроки плененыя Давыдовы от Сиона к себе. Дароносцы же слет волхвы дети, Давыдове богоприятней Дщери молящася. Тем воспевающе поем, да благословит тварь вся Господа, и превозносит Его во веки.
Запев. Органы уклониша плачевныя песни, не пояху бо в земли чуждей отроцы сионовы. Вавилонскую же разрешает лесть всю, и мусикийския составы, в Вифлееме восияв Христос. Тем воспевающе поем, да благословит тварь вся Господа, и превозносит Его во веки.
Слава. Корысть Вавилон царства сионя, и плененое богатьство прият, сокровища же Христос в Сион сего, и царя звездою наставляя звездоблюстителя приводит. Тем воспевающе поем, да благословит тварь вся Господа, и превозносит Его во веки.
И ныне. (Повторяем стих). Катавасия.
Песнь 9. Ирмос
Таинство странно вижу, и преславно: небо сущу пещеру, престол херувимскии Девицу, ясли, вместилище, в них же возлеже невместимыи Христос Бог, Его же воспевающе величаем.
Запев с поклоном. Ужасно течение зряще волсви необычно новыя звезды, ныне сияющу небес светлее, Христа Царя прознаменоваше на земли, рождьшагося в Вифлееме, на спасение наше.
Запев. Новорожденное, волхвом глаголющим, Отроча Царь, Его же звезда яви, где есть; тому бо поклонитися приидохом. Яряся Ирод смущашеся, Христа убити, богоборец шатаяся.
Слава. Испыта Ирод лето звезды, ея же вождением волсви в Вифлееме поклоняхуся Христу с дары, ея же ради ко отечеству наставляеми, лютаго детоубийца оставиша поругана.
И ныне. (Повторяем стих). Катавасия.
Задостойник: Подобаше убо нам, яко без беды страхом, удобь молчати. Любовию же Дево, песнь сложити, силою обостреною, дело есть драго. Но о, Мати силу, елико же бысть изволение даждь. (Поклон земной).
Отпуст: Рождеися в Вифлееме июдейстем, и во яслех возлегии, Господи Исусе Христе Сыне Божии, молитв ради пречистыя Твоея Матере, и всех святых, помилуй и спаси нас, яко Благ и Человеколюбец. Аминь.