Канон рождеству Иоанна Предотечи

Святой Предотеча и Креститель Господень Иоанн родился по предсказанию Архангела Гавриила. Когда нечестивый Ирод повелел избить всех младенцев, св. Елисавета (мать великого пророка Иоанна) убежала со своим сыном в пустыню, и там они скрывались в пещере. После преставления праведной Елисаветы, отрок Иоанн, охраняемый ангелом, находился в пустыне до своего тридцатилетнего возраста, после чего вышел со своей проповедью о покаянии на реку Иордан. Будем прославлять в своих молитвах рождество земного ангела — св. Пророка и Предотечу Иоанна, который сподобился стать Крестителем пришедшего в мир Господа нашего Исуса Христа. Рождество Иоанна Предотечи празднуем 7 июля (24 июня по старому стилю).
 

——————————————————————

Общее начало и конец всем канонам →
Порядок чтения по уставу
——————————————————————
 

Тропарь, глас 4-й

Пророче и предотече пришествия Христова, достойно восхвалити тя недоумеем мы, иже любовию чтущии тя. Неплодие бо рождьшия, и отчее безгласие разрешается, славным и честным рожеством твоим. И воплощение Сына Божия, мирови проповедается. (Дважды).

Слава, и ныне. Богородичен. Иже от века утаенное, и ангелом несведомое таиньство. Тобою Богородице земным явися, Бог в неразмесне снятии воплощаемь. И крест волею нас ради восприим. Им же воскресив первозданнаго, и спасе от смерти душа наша.

 

КАНОН, глас 4-й
 

Песнь 1. Ирмос

Тристаты крепкия, рожеися от Девы, безстрастия во глубине, души тричастное потопи молюся. Да Ти яко в тимпане, во умерщвеннем телеси, победное пою воспевание.

Запев: Святыи великии Иоанне предотече Господень, моли Бога о нас (поклон).

Яко утро благолепно, солнца предтекии, неплодныя прозябение, проповедает яве, Девыя рожество всей ныне вселенней, сияет концем, просвещение благочестия и благодати.

Запев. Пророк Вышняго истинен наречешися, предъидеши бо пред лицем Христа, вопиет Тебе Сыну Иоанне прехвалне, Духом Захария Пресвятым носимь, путь уготовати Зиждителю.

Слава. Глаголом Гавриила, Захария слышав, вещания божественаго, явися не веровав, и молчанием осудися. Решитжеся внезапу сего, глас бо бысть слова Иоанн предотеча.

И ныне. Богородичен. Град Божии, всех царя, богоприятное селение, сосуд честен, Богородице пренепорочная. Сохрани достояние Твое, еже присно восхваляющее Тя, и чтущее верою рожество Твое.

Катавасия: Избави от бед рабы своя, святыи великии пророче Иоанне предотече Господень, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).

 

Песнь 3. Ирмос

Не мудростию, ни силою, ни богатством хвалимся, но Твоею Отчею составною мудростию Божиею, яко несть свята паче Тебе Человеколюбче.

Запев. Владычне убо от Девы совершается рождение, но раба любезна от старицы, и неплодныя матере, в лепоту предтичет убо, чюдо чюдеси.

Запев. (Повторяем стих).

Слава. Старица и неплоды, Девую Матерь облобызает, познавши неложно сея рожество, яко разрешися соуз неплодства, божественым хотением.

И ныне. Богородичен. Неискусобрачно Бога воплощенна рождьши, страстей прилоги, обуреваема мя утверди. Несть бо Пречистая, разве Тебе помощницы. Катавасия.

Седален, глас 8-й. Захариин глас, светло разреши, словеси глас рождься предотеча, и закона неплодие всем показа, зовыи, покайтеся сущии на земли. Се бо прииде и явися Исус, вся хотя избавити от первыя клятвы, просвещая крещением. Воистину чюдо преславно.

Слава, и ныне. Богородичен. Непременнаго Бога яко рождьши, измененаго мя присно грехом, утверди сердце мое Благая, молитвами Матерьними Твоими, яко да и аз благодарно зову Ти, Богородителнице Марие, помилуй стадо Твое, еже стяжа Пренепорочная.

 

Песнь 4. Ирмос

Седяи во славе на престоле божественем, на облаце легце, прииде Исус пребожественыи от пречистыя Девы, и спасе вопиющыя, слава Христе силе Твоей.

Запев. Таин неизреченных, предходит таинство, новосечением законоположения естественаго. Болезни разрешение провозвещающи, исправление сея Христе, и обожение.

Запев. Исаия от Отца Сынови пророчествова, воплощенному, ангела землена равноангельна. Се Аз посылаю пред лицем Твоим, предзовуща, слава Христе силе Твоей.

Слава. Служити яко раб Владыце родихся, на се бо приидох, Сего возвестити пришествие. Яко да Девыя рожество предуверит, преславно неплодствующая старица прозябши.

И ныне. Богородичен. Святая Богородица, в Ню же вселитися благоизволи, яко во благовонен дом, Слово Отчее пребожественое, не растлеся утробою, ни поболе, ибо роди Еммануила Бога и Человека. Катавасия.

 

Песнь 5. Ирмос

Ныне востану пророчески рече Бог. Ныне прославлюся. Ныне вознесуся, падшаго восприем от Девы, и к свету чюдному, вознесу Моего Божества.

Запев. Земля израсти всеистинна проповедника гласа, всем проповедающа, языком духовным Девыя Сына. Правде с небесе тоя ради приничащи, вещию телесною.

Запев. Положи Господь, всеистинна светильника тя Христова, всех просвещающа. Едины одевающа враждующыя Его, яко ризою в студ, неложно Божия Слова Сына проповедающа.

Слава. Веселится вся тварь, твоим рожеством божествене. Ты бо землен ангел предотече, и небесныи человек показася, небеснаго Бога провозвещая нам воплощенна.

И ныне. Богородичен. От Тебе раждается от Отца, сыи с Тобою присно, Слово присносущное и нераздельное, яко Сын единородныи. И напоследок от Девы той же, Святым воплощается Духом. Катавасия.

 

Песнь 6. Ирмос

Приидох во глубины морския, и потопила мя есть буря многих ми прегрешении. Но яко Бог, ис тли возведи душу мою Премилостиве.

Запев. Бога Слова позна яко пророк, в матерне утробе. И сею объемся, языком богословуеши в сокровищи темне. Обожаемь светом неприступным.

Запев. (Повторяем стих).

Слава. Немолчно яко глас вопиющаго, избавителя миру крестителю моля непрестай, душевное разрешити неплодие, поющих твое рожество.

И ныне. Богородичен. Неприступнаго Божества селение, чистая Ти утроба явися о Богородице. На Ню же без боязни, небеснии чинове взирати не могут. Катавасия.

Слава, и ныне. Кондак, глас 3-й. Неплоды днесь, Христова предотечу раждает, и той есть совершение всякого пророчества. Его же бо пророцы проповедаша. На Том во Иордане руку положив, явися Божию Слову пророк и проповедник, вкупе и предотеча.

Икос. Восхвалим ныне Господня предотечу, его же священнику Елисаветь роди, из ложесн неплодове, но не без семене. Христос бо Един вместилище пройде непроходимо без семене. Иоанна неплоды роди, без мужа же сего не роди. Исуса же осенением Отца и Духа Божия, Девая роди чистая. Но Безсеменному явися от неплодове, пророк и проповедник, вкупе и предотеча.

 

Песнь 7. Ирмос

Юноши три в Вавилоне, веление мучителево на буйство преложиша. И посреде огня ввержени, прохлаждаеми вопияху, благословен еси Господи Боже отец наших.

Запев. Бяше первее во мраце, всяко земнородных естество, о предотече. Но утро вопия явился еси. Благословен еси Господи Боже отец наших.

Запев. Недуговавшее исцели естество все, славное от неплодове твое рожество, научившее предотече пети, благословен еси Господи Боже отец наших.

Слава. Родился еси предотече от неплодове. Прииде бо всеистинно, закону неплодствующу благодать. Христови поющи, благословен еси Господи Боже отец наших.

И ныне. Богородичен. Девице благословенная, моли о нас молящих Тя. На Тя бо уповаем вси, и Тебе вопием, Владычице не презри раб Своих. Катавасия.

 

Песнь 8. Ирмос

Избавителю всех Всесилне, иже посреди пламени благочествовавшыя сшед прохладил еси, и научи пети, благословите вся дела Господня Господа.

Запев. Законоположник раб бяше Моисей, Исус же Бог завету новому. Ныне же обема предотеча, поет яко ходатай, вся дела благословите Господня Господа.

Запев. От пуста чрева, горлица прииде, яко богосажденная, дубрава ныне принесе церкви, предотечу Христова. И воспевает, вся дела благословите Господня Господа.

Слава. Богоноснии людие, язык свят, горлице Христове уподобитеся. И медоточно воспойте, в целомудрии живуще, вся дела благословите Господня Господа.

И ныне. Троичен. Тричисленным светом озаряеми, несозданнаго единаго Божества, немолчными усты, православно вопиюще почтем, вся дела благословите Господня Господа. Катавасия.

 

Песнь 9. Ирмос

Сокровено божественое чистое в Тебе совершается, явльшееся таинство Дево чистая: ибо Бог ис Тебе воплотися за милосердие. Тем Тя яко Богородицу величаем.

Запев с поклоном. Се глас предотечи, неплодным и пустым предста сердцам вопиющь, путь Христов ныне уготовите, яко в славе грядет. Ему же повинующеся величаем.

Запев. Яко же древле Духом Пресвятым, яве проповедал еси Сына предотече, Агньца Божия, миру вземлющаго грехи, стаду Твоему согрешением разрешение испроси.

Слава. Единицу тричислену, Троицу единосущну, православно поюще вернии прославим, богодельне нас озаряющую, и светлостьми незаходимаго света, исполняющю душа наша.

И ныне. Богородичен. Всеми владущая творении, людем Твоим даруй победу одоления, непокориваго подложьши под нозе Цареви. Да Тя яко Богородицу величаем. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и честнаго и славнаго пророка и предотечи крестителя Господня Иоанна, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.

+

Авторизация

* *
*

Регистрация

*
*
*
*

Проверочный код Time limit exceeded. Please complete the captcha once again.


Восстановление пароля