Служба Пасхе

Чин пасхального Богослужения

Светлая утреня

Перед началом пасхальной утрени разжигают кадило и кладут в него благовонный фимиам, чтобы наполнить помещение благовонием. Под кадилом здесь подразумевается любой сосуд, в который кладутся горящие раскаленные остатки обугленной древесины и ладан.

Приходные поклоны. Затем старший:

За моли́тв святы́х оте́ц на́ших, Го́споди Ису́се Христе́, Сы́не Бо́жии, поми́луй нас. Ами́нь

Певцы: Аминь.

Старший: ограждаясь крестным знамением поет два раза:

Христос воскресе из мертвых смертию на смерть наступи, и гробным живот дарова.

В третий раз поет до половины, а дальше поют певцы: и гробным живот дарова.

Затем все певцы поют три раза: Христос воскресе из мертвых смертию на смерть наступи, и гробным живот дарова.

Старший читает:

Стих 1. Да воскреснет Бог, и разыдутся врази Его.

Стих 2. Яко исчезает дым да исчезнут.

Стих 3. Тако да погибнут грешницы от лица Божия, а праведницы да возвеселятся.

Стих 4. Сей день иже сотвори Господь возрадуемся и возвеселимся вонь.

Слава… Христос воскресе из мертвых.

И  ныне… Христос воскресе из мертвых.

Молящиеся после каждого стиха и после Славы, и после И ныне, поют по три раза ХРИСТОС ВОСКРЕСЕ ИЗ МЕРТВЫХ.

Старший поет: Христос воскресе из мертвых (до половины), молящиеся затем продолжают петь: и гробным живот дарова.

Господи помилуй (12 раз). Слава, и ныне.

 

Канон Святыя Пасхи

Глас 1-й

В пасхальную ночь ирмос каждой песни поем четыре раза. Затем поем тропари всего на 12 (в какой песни по 2 тропаря — каждый поем по 6 раз, где по три тропаря — каждый поем по 4 раза). Десять раз тропари поем с запевом Христос воскресе из мертвых. Одиннадцатый раз поем с запевом: Слава.., двенадцатый раз — с запевом: И ныне… (каждая песнь канона состоит из ирмоса и двух или трех тропарей. Тропари начинаются после слова: «Запев»). Катавасия после каждой песни есть ирмос той же песни, который поем 2 раза.

 

Песнь 1. Ирмос

Воскресения день просветимся людие, Пасха Господня, Пасха; от смерти убо к жизни и от земли на небо, Христос Бог нас превел есть, победную поюща (4 раза).

Запев: Христос воскресе из мертвых (поклон).

Очистим чувствия и узрим, неприступным светом Воскресения Христова, блистающеся и радуйтеся рекуще, ясно да услышим, победную поюще (6 раз).

Небеса убо достойно да веселятся, земля же да радуется, да празднует же мир, видимыи же весь и невидимыи, Христос Бог востал есть, веселие вечное (6 раз).

Катавасия. Воскресения день… (2 раза).

 

Песнь 3. Ирмос

Приидите, пиво пием новое, не от камене неплодна чудодеемое, но нетления источник, из гроба одождивша Христа; о Нем же утвержаемся (4 раза).

Ныне вся исполнишася света, небо же и земля и преисподняя; да празднует убо вся тварь востание Христово, о Нем же утвержается (6 раз).

Вчера сраспинахтися Христе, вчера спогребохтися, совостаю днесь совоскресшу Ти, Сам мя прослави Спасе, во царствии Своем (6 раз).

Катавасия. Приидите, пиво пием…(2 раза).

Господи помилуй (трижды).

Слава, и ныне. Ипакой, глас 4. Предвари́ша у́тро я́же с Мари́ею, и обрето́ша ка́мень отвале́н о́т гроба, слы́шаху от А́нгела, И́же во́ свете присносу́щнем Су́щаго с ме́ртвыми не ищи́те, я́ко челове́ка. Ви́дите гро́бныя пелены́, тецы́те и ми́ру пропове́дите: я́ко воста́ Госпо́дь, умертви́выи сме́рть; я́ко Той есть Сын Бо́жии, спаса́яи род челове́ческии.

 

Песнь 4. Ирмос

На Божии стражи, богоглаголивыи Аввакум да станет с нами, и явит светоносна Ангела, велегласно глаголюща: днесь спасение миру, яко воскресе Христос, яко всесилен (4 раза).

Мужескии убо пол, яко разверзыи девственую утробу, бысть Христос, яко человек же; Агнец наречеся, непорочен же, яко не вкуси скверны; наша убо Пасха, яко Бог истинен и совершен явися (4 раза).

Яко единолетен Агнец, благословеныи нам венец Христос, волею за всех заклан бысть, Пасха очистительная, и абие из гроба красно праведное нам возсия Солнце (4 раза).

Богоотец убо Давыд, пред сенным ковчегом скакаше играя; людие же Божии святии, образом сбытие зряще, веселимся Божественне: яко воскресе Христос, яко всесилен (4 раза).

Катавасия. На Божии стражи… (2 раза)

 

Песнь 5. Ирмос

Утренюем утренюю глубоку, и вместо мира, песнь принесем Владыце, и Христа узрим праведное Солнце, всем жизнь восияюща (4 раза).

Безчисленое Твое милосердие, иже адовыми узами содержими зряще, к свету идяху Христе, веселыми ногами; Пасху хваляще вечную (6 раз).

Приступим свещеноснии, исходящу Христу из гроба, яко Жениху; и спразднуем праздно любезными чинми, Пасху Божию спасительную (6 раз).

Катавасия. Утренюем утренюю глубоку… (2 раза)

 

Песнь 6. Ирмос

Сниде в преисподняя страны земли, и сокруши вереи вечныя преисподния связанныя Христе, и тридневно, яко от кита Иона, воскресе от гроба (4 раза).

Сохранив цела знамения Христе, воскрес от гроба, Иже ключа Девыя не вредивыи в рожестве Своем, и отверзл еси нам райския двери (6 раз).

Спасе мой живое, а не жертвенное заколение, яко Бог, Сам Себе волею привед ко Отцу, совоскреси же всеродна Адама, воскрес от гроба (6 раз).

Катавасия. Сниде в преисподняя… (2 раза).

Господи помилуй (трижды). Слава, и ныне.

Кондак, глас 8. Аще и во гроб сниде Безсмертне, но адову разрушил еси силу и воскресе, яко победитель, Христе Боже, женам мироносицам радость провещав, и Своим апостолом мир дарова, Иже падшим подая воскресение.

Икос. Иже прежде солнца, Солнцу зашедшу иногда во гроб; предвариша ко утру взыскающе, яко во дни мироносицы девы, и друга к друзей вопияху, о другиня, приидите вонями помажем Тело живоносное и погребеное, плоть воскресившаго падшаго Адама, лежаща во гробе; идем и потщимся, яко же волсви, и поклонимся и принесем миро, яко дары, не в пеленах, но в плащанице Обвитому, и с плачем возопием, о Владыко востани, Иже падшим подая воскресение.

Воскресе́ние Христо́во ви́девше, поклони́мся Свято́му Го́споду Ису́су, еди́ному Безгре́шному (поклон). Кресту́ Твоему́ покланя́емся Христе́ (поклон), и свято́е воскресе́ние Твое́ пое́м и сла́вим. Ты бо еси́ Бог наш, ра́зве бо Тебе́ ино́го не зна́ем, имя́ Твое́ нарица́ем. Прииди́те вси ве́рнии, поклони́мся свято́му Христо́ву Воскресе́нию (поклон), се бо прии́де Креста́ ра́ди ра́дость всему́ ми́ру; всегда́ благослови́м Го́спода и пое́м Воскресе́ние Его́: распя́тие бо претерпе́, и сме́ртию смерть разруши́ (трижды).

Воскре́с Ису́с о́т гроба, я́коже прорече́, и дарова́ на́м живо́т ве́чныи, ми́р и ве́лию ми́лость (трижды).

 

Песнь 7. Ирмос

Отроки от пещи избавив, быв убо Человек, страждет яко смертен, и страстию умерщвеное в нетление облачит благолепие; един благословен отцем Бог и препрославлен (4 раза).

Жены с миром богомудрыя, во след Тебе течаху; Его же яко мертва со слезами искаху, поклонишася и радующеся живому Богу, и пасху тайную Твоим Христе, учеником благовестиша (4 раза).

Яко воистину священная и всепраздньственная, сия спасительная нощь и светозарная, светоноснаго дне, востанию сущи проповедница; в ней же безлетныи Свет, из гроба плотски всем восия (4 раза).

Смерти празднуем умерщвение, адово разрушение, иного живота вечнаго начало; и играюще поем Виновнаго, единаго благословена отцем Бога и препрославлена (4 раза).

Катавасия. Отроки от пещи избавив… (2 раза).

 

Песнь 8. Ирмос

Сей убо нареченныи святыи день, един суботам Царь и Господь, праздник праздником и торжество есть торжеством, вонь же благословим Христа во веки (4 раза).

Приидите, новаго винограда чада, божественнаго веселия, в нарочитом дни воскресения, царствия Христова приобщимся, поюще Его, яко Бога во веки (4 раза).

Возведи окрест очи твои Сионе, и виждь, се убо приидоша к тебе, яко богосветлая светила, от запада и севера и моря и востока чада твоя, в тебе благословяще Христа во веки (4 раза).

Троичен: Пресвятая Троице, Боже наш, слава Тебе.

Отче Вседержителю и Слове и Душе, треми соединяемое в составех естество, пресущественыи и пребожественыи, в Тя крестихомся и Тя благословим во вся веки. (4 раза).

Катавасия. Сей убо нареченныи… (2 раза).

 

Песнь 9. Ирмос

Светися, светися, новыи Иеросалиме, слава бо Господня на Тебе восия; ликуй ныне и веселися, Сионе; Ты же Чистая красуйся Богородице, о востании Рожества Твоего (4 раза).

Запев (поклон). О божественаго, о любезнаго, о сладкаго Ти гласа, с нами убо неложно обещался еси быти, до скончания века, Христе; Его же вернии державу и надежду имуще радуемся (6 раз).

О Пасха велика и священная, Христе; о Мудросте, Слово Божие и сило, подавай нам истее Тебе причащатися, в невечернем дни царствия Твоего (6 раз).

Катавасия. Светися, светися… (2 раза).

После последней катавасии поклон земной. Господи помилуй (трижды).

Слава, и ныне. Светилен. Плотию уснув яко мертв, Царь и Господь, тридневен воскресе, и Адама воздвиг из тли, и упразднив смерть. Пасха нетления, миру спасение (2 раза). Слава, и ныне. И еще один раз поем тот же светилен.

Псалом 148. Хвалите Господа с небес, хвалите Его в вышних. Хвалите Его вси ангели Его, хвалите Его вся силы Его. Хвалите Его солнце и луна. Хвалите Его вся звезды и свет. Хвалите Его небеса небес, и вода яже превыше небес, да восхвалят имя Господне. Яко Той рече и быша, Той повеле и создашася. Постави я в век, и в век века. Повеление положи, и не мимо идет. Хвалите Господа от земли змиеве и вся бездны. Огнь, град, снег, голоть, дух бурен, творящия слово Его. Горы и вси холми. Древа плодоносна, и вси кедри. Зверие и вси скоти. Гади, и птицы пернаты. Царие земстии, и вси людие. Князие, и вси судии земстии. Юношы и девы. Старцы со юнотами, да восхвалят имя Господне. Яко вознесеся имя Того Единаго. Исповедание Его на земли и на небеси. И вознесет рог людей Своих. Песнь всем преподобным Его. Сыновом израилевым людем приближающимся ем.

Псалом 149. Воспойте Господеви песнь нову, хваление Его в церкви преподобных. Да возвеселится Израиль о Сотворшем Его. И сынове Сиони возрадуются о Цари Своем. Да восхвалят имя Его в лице, в тимпане и псалтыри да поют Ему. Яко благоволит Господь в людех Своих, и вознесет кроткия во спасение. Восхвалятся преподобнии во славе, и возрадуются на ложах Своих. Возношения Божия в гортани их, и мечи обоюду остры в руках их. Сотворити отмщение во языцех, обличение в людех. Связати царя их путы, и славныя их ручными оковы железными. Сотворити в них суд написан. Слава си есть всем преподобным Его.

Псалом 150. Хвалите Бога во святых Его, хвалите Его во утвержении сил Его. Затем чтец сказывает: Хвалите Его на силах Его.

Певцы поют на глас 1-й. Хвалите Его по премногому величествию Его.

Стихера: Поем Твою Христе спасенную страсть, и славим Твое воскресение.

Чтец: Хвалите Его во гласе трубнем.

Певцы: Хвалите Его во псалтыри и гуслех.

Стихера: Распятие претерпев, и смерть упразднив, и воскрес из мертвых, умири нашу жизнь Господи, яко един Всесилен.

Чтец: Хвалите Его в тимпане и лице.

Певцы: Хвалите Его во струнах и органех.

Стихера: Иже ада пленив, и человека воскресив, воскресением Своим Христе, сподоби нас чистым сердцем, Тебе пети и славити.

Чтец: Хвалите Его в кимвалех доброгласных, хвалите Его в кимвалех восклицания.

Певцы: Всяко дыхание да хвалит Господа.

Стихера. Боголепное Твое смотрение славяще, вопием Ти Христе, рождеися от Девы, и неразлучен бе от Отца, пострада яко человек. И волею претерпе распятие, воскресе от гроба, яко жених от чертога изшед, да спасеши всего мира, Господи слава Тебе.

Стихеры Пасце, глас 5-й.

Старший: Да воскреснет Бог.

Певцы на глас 5-й. И разыдутся врази Его.

Все поют: Пасха священная нам днесь показася. Пасха новосвятая, Пасха таинственная, Пасха всечестная, Пасха Христа избавителя. Пасха непорочная. Пасха великая, Пасха верным, Пасха двери райския нам отверзающая, Пасха всех освящающая верных.

Старший: Яко исчезает дым.

Певцы: Да исчезнут.

Все поют: Приидите от видения жены благовестницы, и Сиону рцыте, приими от нас радость благовещения, воскресения Христова. Красуйся и ликуй, и радуися Иерусалиме, Царя Христа узрев из гроба, яко Жениха исходяща.

Старший: Тако да погибнут грешницы от лица Божия.

Певцы: А праведницы да возвеселятся.

Все поют: Мироносицы жены, зело рано предсташа гробу Живодавца, и обретоша ангела на камени седяща и той провещав им, сице глаголаше, что ищите Живаго с мертвыми. Что плачите Нетленнаго во тли. Шедше проповедите учеником  Его.

Старший: Сей день иже сотвори Господь.

Певцы: Возрадуемся и возвеселимся вонь.

Все поют: Пасха красна, Пасха Господня Пасха, Пасха всечестная нам восия, Пасха, радостию друг друга приимем. О Пасха избавление скорби, ибо из гроба днесь яко от Чертога восия Христос, жены радости исполни глаголя, проповедити апостолом.

Старший: Слава. Певцы: И ныне. Воскресения день, просветимся торжеством, и друг друга приимем, и рцем братие, и ненавидящим нас. Простим вся воскресением, и тако возопием, Христос воскресе из мертвых, смертию смерть  поправ,  и  сущим   во  гробех  живот дарова.

В церкви после этого при многократном пении Христос Воскресе… происходит целование верующими Св. Евангелия, Креста, икон, а затем праздничное целование со священнослужителями и между собою со словами: Христос воскресе! — Воистину воскресе!

Затем в храме священник, стоя в царских дверях, читает, обращаясь лицом к молящимся, Слово Св. Иоанна Златоустаго на Св. Пасху. В домашних условиях это слово читает старший.

Павловы уста, Христовы уста, Христовы уста, Павловы уста. Уста Златоустовы и Павловы уста. Иже во святых отца нашего Иоанна Златоустаго, архиепископа Константинограда. Слово на святую Пасху учительно. И о еже опоздевших к подвигу Постному, благослови отче.

Иже аще кто, боголюбив, и благоверен и благочестив, да приимет сего добраго бисера, и насладится нынешняго честнейшаго торжества. Иже аще кто есть благоразумен от раб благонравных, да внидет радуяся в радость Господа своего. Аще кто делал есть постяся, да восприимет ныне сребреник. Аще кто от перваго часа делал есть, да приимет днесь праведныи долг. Аще кто по третием часе прииде, благодаря да празднует. Аще кто по шестом часе достиже, ни чтоже да усомнится, ибо ни чим же отщетевается. Аще ли кто и девятаго часа улишился, да приступит без сомнения, ни чтоже бойся. Аще кто и во единонадесятыи час прииде, да не устрашится срамляяся замедлением. Человеколюбив бо есть Владыка, приемлет последняго, якоже и перваго утешает, иже в единонадесятыи час пришедшаго, якоже делавшаго от перваго часа. И последняго милует, и перваго утешает. И одному дает, и сему дарствует. И делание почитает, и предложение хвалит, и спех умедлившаго любит. Тем же убо внидите вси, в радость Господа своего, и первии и втории и последнии, мзду приимите. Богатии и убозии и нищии, друг со другом ликуйте. Воздержницы и ленивии день почтите. Постившиися и непостившиися, возвеселитеся днесь. Трапеза церковная готова исполнь, насладитеся вси. Телец упитанныи предлежит. Никто же изыди алчен, вси насладитеся пира церковнаго, вси восприимите богатьство благости. Да никто же рыдаи нищеты, явибося общее Царство. Никто же да ослабеет, никто же да плачется согрешении, отпущение бо купно и оставление от гроба возсия, никто же да убоится смерти, свободи бо нас Спасова смерть. Угаси бо ея, иже от нея держимыи. Умучи ада сшедыи во ад. Горе бысть ему вкусившу плоть Его. И се предварив Исаия возопи, ад рече огорчися, срет тя доле. Огорчися, ибо наруган бысть. Прият тело и Богу приразися. Прият землю, и срете небо. Прият еже видяше, и впаде во еже неведяше. Где ти смерти жало, где ти аде победа. Воста Христос, и низложися ад. Воста Христос, и падоша бесове. Воскресе Христос, и радуются ангели.

Воскресе Христос, и жизнь живет во всем мире. Воскресе Христос, и мертвец ни един во гробе. Христос бо воста от мертвых, начаток умершим бысть. Тому слава и держава, во веки веком, аминь.

После этого поем тропарь св. Иоанну Златоусту.

От уст твоих, яко же светолучная заря восиявши, богоданная ти благодать, вселенную просвети. Несребролюбно мирови сокровище положи, но высоту нам смиреномудрия показа, и своими словесы наказуя, отче Иоанне Златоусте, моли Слова Христа Бога, спастися душам нашим. Господи помилуй (40 раз). Слава, и ныне. Господи помилуй (12 раз). Слава, и ныне.

Старший: Господи Исусе Христе Сыне Божий, помилуй нас.

Певцы: Аминь.

Утверди Боже веру христианскую, соблюди Господи и помилуй державу Российскую, спаси Господи и помилуй Архиепископа нашего (имя рек) и отец наших духовных яже о Христе с братиею нашею, и вся християны Господи спаси.

Христос воскресе… (3 раза с поклоном). Старший: Христос воскресе (до половины). Певцы поют: …и гробным живот дарова. Старший говорит отпуст: Воскрес из мертвых Господи Исусе Христе Сыне Божий молитв ради Пречистыя Твоея Матери силою Честнаго и Животворящаго Креста, Святых славных и всехвальных апостол и всех ради святых помилуй и спаси нас яко Благ и Человеколюбец.

Певцы: Аминь.

Старший говорит: Христос воскресе!

Молящиеся отвечают: Воистину воскресе!

И так повторяют три раза, при этом все ограждают себя крестным знамением.

Певцы поют: И нам дарова живот вечныи поклоняемся тридневному Его воскресению.

После этого начинается первый час.

Христос воскресе (3 раза). Воскресение Христово видевше, поклонимся (поклон) Святому Господу Исусу, Единому Безгрешному. Кресту Твоему поклоняемся Христе (поклон), и святое Воскресение Твое поем и славим. Ты бо еси Бог наш, разве бо Тебе иного не знаем, имя Твое нарицаем. Приидите вси вернии поклонимся (поклон) святому Христову Воскресению. Се бо прииде Креста ради радость всему миру, всегда благословим Господа, поем Воскресение Его, распятие бо претерпе, и смертию смерть разруши (3 раза).

Предвариша утро, яже с Мариею, и обретоша камень отвален, слышаху от ангела, иже во свете присносущнем сущаго, с мертвыми не ищите яко человека. Видите гробные пелены, тецыте и миру проповедите, яко воста Господь умертвив смерть, яко Той есть Сын Божии, спасаяи род человеческий (1 раз).

Аще и во гроб сниде Безсмертне, но адову разрушив силу, и воскресе яко Победитель Христе Боже, женам мироносицам радость провеща, и Своим апостолом мир дарова, иже падшим подая воскресение (1 раз).

Во гробе с плотию, во аде же с душею яко Бог, в раи же с разбойником, и на Престоле беяше Христе со Отцем и Духом, вся исполняя неописанныи.

Слава. Яко Живоносец, яко рая зело краснейши воистину, и всякого Чертога царьска, явися светлейши Христе гроб Твой Источник нашему Воскресению.

И ныне. Вышняго освященно Божие вселение радуйся, Тобою бо дадеся радость Богородице, вопиющим Ти, благословена Ты в женах Пренепорочная Владычице. Господи помилуй (40 раз). Слава, и ныне. Честнейшую Херувим…  Именем Господним благослови отче.

За молитв святых Отец наших… Христос воскресе (3 раза).                                                                           

Отпуст: Воскрес из мертвых Господи Исусе Христе, Сыне Божии, молитв ради Пречистыя Твоея Матере, преподобных и богоносных отец наших и всех ради святых, помилуй и спаси нас яко Благ и Человеколюбец. Аминь. Господи помилуй (3 раза).

 

Пасхальные часы.

3-й, 6-й, 9-й часы поются также как и первый час.

Начало каждого часа: За молитв святых… Аминь. Христос воскресе… (3 раза). И все так далее, как и первый час.

В конце каждого часа отпуст не бывает, а сразу после Честнейшую Херувим… и За молитв святых… начинаем следующий час.

 

Начало обедницы.

После 9-го часа (в домашних молитвах, где не бывает Литургии) Христос воскресе (3 раза), Воскресение Христово… (написано на первом часе) — 1 раз, Предвариша утро… (1 раз). Слава…, Аще и во гроб… (написано на первом часе) — 1 раз, И ныне…

Единородный Сын и Слове Божии, Безсмертне сыи. Изволивыи спасения нашего ради, воплотитися от Святыя Богородицы, и присно Девы Марии, непреложно в человечивыися. Распятся Христе Боже, смертию на смерть наступивыи, Едине сыи Святыя Троицы. Спрославляемыи Отцу и Святому Духу спаси нас.

Во Царствии си егда приидеши, помяни нас Господи.

Блажени нищии духом, яко тех есть Царство Небесное.

Блажени плачущии, яко тии утешатся.

Блажении кротцыи, яко тии наследят землю.

Блажени алчущии и жаждущии правды, яко тии насытятся.

Блажени милостивии, яко тии помиловани будут.

Ирмос 3-ей песни: Приидите пиво пием ново, не от камене неплодна чудодеемое, но нетления источника, из гроба одождивша Христа, о Нем же утвержаемся.

Блажени чистии сердцем, яко тии Бога узрят.

Ныне вся исполнишася света, небо же и земля и преисподняя, да празднует убо вся тварь, востание Христово, о Нем же утвержаемся.

Блажени миротворцы, яко тии сынове Божии нарекутся.

Повтори стихеру: Ныне вся исполнишася…

Блажении изгнани правды ради, яко тех есть Царство Небесное.

Вчера сраспинахтися Христе, вчера спогребохтися и совостаю днесь совоскресшу ти, Сам мя прослави Спасе во Царствии Своем.

Блажени есте егда поносят вам, и изженут вы, и рекут всяк зол глагол на вы лжуще Мене ради.

Песнь 6-я. Сохранив цела знамения Христе, воскрес от гроба иже ключа Девыя невредивыи в Рожестве Своем, и отверзл еси нам райския двери.

Радуйтеся и веселйтеся, яко мзда ваша мнбга на небесех.

Повтори стихеру:  Сохранив цела…

Слава… Спасе мой, живо, а не жертвенное заколение, яко Бог, Сам Себе волею приведе ко Отцу. Совоскреси же всеродна Адама, воскрес от гроба.

И ныне…

Повтори стихеру: Спасе мой…

Все вышеуказанные стихеры на Блаженны взяты из пасхального канона. На мотив пасхального канона они и поются.

Затем молитва Исусова: Господи Исусе Христе Сыне Божии, помилуй нас. Певцы: Аминь. И поют: Елицы во Христа крестистеся, во Христа облекостеся, аллилуия (3 раза). Слава, и ныне. Во Христа облекостеся, аллилуия.

Певцы поют еще один раз Елицы во Христа… (1  раз).

Чтец сказывает: Прокимен, псалом Давыдов: Сей день иже сотвори Господь возрадуемся и возвеселимся вонь.

Чтец говорит: Исповедайтеся Господеви яко Благ яко в век милость Его.

Певцы поют: Сей день…

Чтец говорит: Да речет убо дом Израилев, яко Благ, яко в век милость Его. Певцы поют: Сей день…

Чтец возглашает: От Деяний святых апостол, чтения (и читает апостол):

Первое убо слово сотворих о всех, о, Феофиле, о них же начат Исус творити же и учити. До Него же дне заповедав апостолом Духом Святым их же избра, вознесеся. Пред ними же и постави себе жива по страдании Своем во мнозех истинных знамениих, деньми четыредесятьми являяся им, и глаголя, яже о Царствии Божии. С ними же ядыи, повелеваше им от Иерусалима не отлучатися, но ждати обетование Отчее, еже слышасте от Мене: яко Иоанн убо крестил есть водою, вы же имате креститися Духом Святым, не помнозех сих днех. Они же убо сшедшеся вопрошаху Его, глаголюще: Господи, аще в лето се устрояеши Царствие Израилево. Рече же к ним: несть ваше разумети времена и лета, яже Отец положи Своею областию. Но приимете силу нашедшу Святому Духу на вы: и будете ми свидетели во Иерусалиме же и во всей Июдеи и Самарии и даже до последних земли.

Чтец возглашает: Псалом Давыдов, аллилуия.

Певцы поют: аллилуия.

Чтец сказывает стих: Ты воскрес ущедриши Сиона.

Стих 2-й: С небесе призре Господь видети вся сыны человеческии.

Стих 3-й: Тело Христово приимите, и Источника безсмертнаго вкусите.

Певцы после каждого стиха поют — аллилуия. Чтец — аллилуия и певцы поют тоже аллилуия (Аллилуия всего поют пять раз).

Старший положит три поклона и говорит: От Иоанна, Святаго Евангелие, чтение.

Певцы поют: Слава Тебе Господи (поклон).

Затем читает Евангелие:

В начале бе слово, и слово бе к Богу, и Бог бе слово се бе искони к Богу. Вся тем быша: и без Него ничто же бысть. В том живот бе и живот бе свет человеком: И свет во тме светится, и тма Его не объят. Бысть человек послан от Бога, имя ему Иоанн. Сей прииде во свидетельство, да свидетельствует о свете, да вси веру имут Ему. Небе той свет, но да свидетельствует о свете. Бе свет истинныи, иже просвещает всякого человека грядущаго в мир. В мире бе, и мир тем бысть, и мир Его не позна. Во своя прииде, и Свой Его не прияша. Елицы же прияша Его даде им власть чадом Божиим быти, верующим во имя Его. Иже не от крове, ни от похоти плотьския, ни от похоти мужеския, но от Бога родися. И слово плоть бысть, и вселися в ны и видехом славу Его. Славу яко Единороднаго от Отца исполнь благодати и истинны. Иоанн свидетельствует о Нем, и возва, глаголя: сей бе Его же рех, иже по мне грядыи предо мною бысть: яко первее мене бе. И от исполнения Его мы вси прияхом, и благодать возблагодать. Яко закон Моисеом дан бысть: благодать же и истинна, Исус Христом бысть.

Певцы поют: Слава Тебе Господи (поклон).

Чтец читает: Помяни нас Господи, егда приидеши во Царствии си (поклон).

Помяни нас Владыко, егда приидеши во Царствии си (поклон).

Помяни нас Святыи, егда приидеши во Царствии си (поклон).

Лик небесныи поет Тя и глаголет: Свят, Свят, Свят Господь Саваоф, исполнь небо и землю славы  Твоей.

Стих: Приступите к Нему и просветитеся, и лица ваша не постыдятся. Лик небесныи поет Тя и глаголет: Свят, Свят, Свят Господь Саваоф, исполнь небо и землю славы Твоея.

Слава. Собор святых ангел и архангел, со всеми небесными силами, поет Тя и глаголет: Свят, Свят, Свят Господь Саваоф, исполнь небо и землю славы Твоея.

И ныне. Верую во Единаго Бога Отца Вседержителя, Творца небу и земли, видимым же всем и невидимым. И во единаго Господа Исуса Христа Сына Божия единороднаго, иже от Отца рожденнаго прежде всех век. Света от Света, Бога Истинна, от Бога Истинна, рожденна, а не сотворена, Единосущна Отцу, Им же вся быша. Нас ради человек, и нашего ради спасения, сшедшаго с небес, и воплотившагося от Духа Свята, и Марии Девы вочеловечьшася. Распятаго за ны при Понтийстем Пилате, страдавша и погребена, и воскресшаго в третий день по писаниих. И возшедшаго на небеса, и седяща одесную Отца. И паки грядущаго со славою, судити живым и мертвым, Его же Царствию несть конца. И в Духа Святаго Господа Истнннаго и Животворящаго, иже от Отца исходящего, иже со Отцем и Сыном споклоняема и сславима, глаголавшаго пророки. И во едину Святую Соборную и Апостольскую Церковь. Исповедую едино крещение, во оставление грехов. Чаю воскресения мертвым. И жизни будущего века, аминь.

Ослаби остави, отпусти Боже согрешения наша, вольная и невольная. Яже в слове и в деле. И яже в ведении, и не в ведении. И яже во уме и в помышлении. Яже во дни и в нощи. Вся ми прости яко Благ и Человеколюбец.

Отче наш, иже еси на небесех, да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущныи даждь нам днесь, и остави нам долги наша, яко же и мы оставляем должником нашим. И не введи нас во искушение, но избави нас от лукаваго.

Молитва Исусова: Господи Исусе Христе Сыне Божии, помилуй нас. Аминь. Читают кондак Пасхи:

Аще и во гроб сниде Безсмертне, но адову разрушив силу, и воскресе яко Победитель Христе Боже, женам мироносицам радость провеща, и Своим апостолом мир дарова, иже падшим подая воскресение. Господи помилуй (40 раз).

Един Свят, един Господь Исус Христос, в славу Богу Отцу, аминь.

Певцы поют: Христос воскресе (трижды с поклонами).

Благословлю Господа на всяко время, выну хвала Его во устех моих. О Господе похвалится душа моя, да услышат кротцыи, и возвеселятся. Возвеличите Господа со мною, и вознесем имя Его вкупе. Взысках Господа, и услыша мя, и от всех скорбей моих избави мя. Приступите к Нему и просветитеся, и лица ваша не постыдятся. Се нищии возва, и Господь услыша и, и от всех скорбий его спасе и. Ополчится ангел Господень окрест боящихся Его, и избавит их. Вкусите и видите яко Благ Господь. Блажен муж иже уповает Нань. Бойтеся Господа вси святии Его, яко несть лишения боящимся Его. Богатии обнищаша и взалкаша, взыскающии же Господа не лишатся всякаго блага. (Для торжества великого Праздника желательно пропеть пением, начиная после Евангелия).

Задостойник певцы поют: Светися, светися… Затем: Христос воскресе (3 раза с поклонами).

Старший поет: Христос воскресе… (до половины).

Певцы поют конец: … и гробным живот дарова.

Старший читает отпуст: Воскрес из мертвых Господи Исусе Христе, Сыне Божии, молитв ради Пречистыя Твоея Матере, силою Честнаго и Животворящаго Креста и святых славных и всехвальных апостол и всех ради святых, помилуй и спаси нас, яко Благ и Человеколюбец. Певцы: Аминь.

Старший, ограждая себя крестным знамением, говорит: Христос воскресе! Молящиеся, также ограждая себя крестным знамением, отвечают: Воистину воскресе! И так до трех раз.

Певцы поют: И нам дарова живот вечныи, поклоняемся тридневному Его воскресению (поклон). Поют три раза: Христос воскресе… Господи помилуй (3 раза).

Исходные поклоны.

Обычно при такой службе приносят и пасхи, и они стоят здесь всю пасхальную ночь, и тем самым в какой-то мере освящаются самой пасхальной службой.

 

Пасхальное богослужение в pdf

Пасхальное богослужение. Скачать на церковнославянском
Пасхальное богослужение. Скачать на русском
Поучение Иоанна Златоустаго. Скачать на церковнославянском

+

Авторизация

* *
*

Регистрация

*
*
*
*

Проверочный код Time limit exceeded. Please complete the captcha once again.


Восстановление пароля