Канон блаженному Максиму Московскому 


Глас 4

Песнь 1. Ирмос.

Моря Чермнаго пучину, не мокрыми стопами древле шествовав Израиль, крестообразно Моисеовыма рукама, Амаликову силу в пустыни победил есть.

Запев с поклоном: Святый праведный Максиме, моли Бога о нас.

Причастием еже к Богу преподобне свет был еси. И к Нему отлучися Максиме блаженне, желанием крайним благим надеждам своим отче исполнение приял еси.

Запев. Желанием еже к Богу распалаемь, мир оставил еси, спутника отче обрет Христа Максиме славне. С Ним же стезю прошел еси спасеную радуяся.

Слава. Обогатитися иже никакоже истощаемым возжелев. Богатьство и славу временную мудре, и пищю мимотекущую, и мирское достояние, доблемудрено отринул еси.

И ныне. Красную и Избранную и Всечестную, разумев Тя Сын Божии Пренепорочная, Сын Твой бысть. Сыны сотвори благодатию Богородице чтущия Тя.

Катавасия: Избави от бед рабы своя, святый праведный Максиме, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

Веселится о Тебе Церкви Твоя Христе зовущи. Ты ми крепость Господи, Прибежище и Утверждение.

Запев. Усердно к мысленым совлечеся деянием. Побеждая вражия полки божественым пособием Духа.

Запев. Ранами и молитвеным воздержанием, и биении преподобне страстей мирских отче Максиме уязвил еси.

Слава. Умориша врага постницы Твои Исусе, умерщвение радостно Владыко, Твое Живоносное возжелевше.

И ныне. Избавляющаго человеки преслушания, лютаго падения. Иже всему Виновнаго Чистая, и Всенепорочная родила еси. Катавасия.

Седален. Глас 8.

Согласием Божественым озаряемь, в путь ведущии к божественым сиянием ходил еси верно, отче преподобне. И вражиих отбегл еси прилог. И сын свету и дни явился еси Максиме богоблаженне.

Другии седален. Глас, тойже. Подобен. Повеленное.

Отче богомудре и преблаженне Максиме, красная мира сего яко уметы вменив, весь умом изменися. Изменьшемуся нас ради Христу последовал еси, и юрод Его ради наречеся. И от неразумных скорби претерпев. И ныне о нас молися, память твою верно славящих Максиме прехвалне.

Слава и ныне. Предстательнице верным Богородителнице, скорбящым радость, и плачущим великое утешение, иже от чрева Твоего Дево Всесвятаго паче естества рождьшагося, непрестанно моли с Максимом преблаженным, избавити нас в час испытания, и лютаго осуждения.

 

Песнь 4. Ирмос.

Воздвижена Тя видевши Церкви, на Кресте Солнца Праведнаго, ста в чину своем. Достойно взывающи, слава Силе Твоей Господи.

Запев. Соединившися к стезе правды, в богоспасаемыи божественыи град вниде преподобне, спасеным сиянием обогатився.

Запев. Единообразныи преподобне смысл богоносныи видев, божествеными повестьми, и божественою одежею одеявся.

Слава. Сердце твое скрижаль очищену Святаго Духа благодать обретши отче, и написав совершеное безстрастие, и любовь не лицемерну.

И ныне. Седяи на Престоле превознесене херувимстем, яко престол Тя имея на руку Твоею почив, Марие Богоневесто Препрославленыи Бог. Катавасия.

 

Песнь 5. Ирмос.

Ты Господи ми Свет в мир пришел еси, Свет Святыи, обращая из мрача неведения, верою воспевающыя Тя.

Запев. Пресветлую зарю Максиме приим, яко Солнце явился еси. И бесовскую тму отгнав достославне.

Запев. Твоим желанием Христе отвергл всепреподобныи желание телесное. Яко же сгребие мирское оттрясе.

Слава. Силою Божественою душу укрепив, в мир вселился еси. Опустевая страстей отче богомудре Максиме.

И ныне. Рачение преста тленное. Девая бо Нетленная роди Бога Слова. Выше естества и слова Девою пребыла есть. Катавасия.

 

Песнь 6. Ирмос.

Пожру Ти со гласом хваления Господи, Церкви вопиет Ти, от бесовския крове очищьшися, милостию от ребр истекшею Ти кровию.

Запев. Ум свой весь к Богу простирая непрестанными поучении. Плотьскую любовь не пощаде благих тебе ходатайству Максиме присвоение.

Запев. Ни скверны ни враски прият блаженне, посреде тебе мира живущу. Честными же паче мольбами си очищаеши от душевныя скверны притекающия.

Слава. Ты плотьских мудровании вышьша помысла, не уязвися посреди жен обнажаемь. Безстрастия бо одеждею Максиме одеяся.

И ныне. Усты и помыслом и сердцем Пресвятая Богородице, Тя проповедуем. Тобою Богови примирихомся отриновении. Преступлением первие праотца. Катавасия.

Кондак, глас 2.

Вышния красоты желая, нижния сладости, телесная ни во что же вменил еси, нестяжанием суетнаго мира. Ангельское житие проходя скончася, Максиме блаженне. С ними же Христа Бога моли, непрестанно о всех нас.

Икос. Ангел на земли житием показася. Ангельския полки удивил еси, и бесы устрашил еси, и человеки просветил еси, чюдес твоих зарями, богоносе и преблаженне отче наш Максиме. И ныне нас вразуми воспевати песнь к твоему хвалению, радостным гласом сице глаголаше, радуися оставивыи тленно мудрование, и приемыи нетленныи венец. Радуися терпеливыи душею. Радуися целомудреныи разумом и Богу зрением. Радуися предоблий юроде, иже злокозненаго врага под ногами стры. Радуися яко нижнее мудрование оставль, и вышняго царствия достиг. Радуися целителю болезнем, и отгонителю страстем. Радуися Максиме блаженне, моли непрестанно о всех нас.

 

Песнь 7. Ирмос.

В пещи Авраамския си дети персидстей, любовию благоверия паче, нежели пламенем опаляеми взываху, благословен еси в Церкви Славы Твоея Господи.

Запев. Содержим Христу подобно отче божественою любовию других спасти, радостно весь самся спасти вопия издал. Благословен Бог отец наших.

Запев. С небесе тебе поданную отче приим пищу. Сею препитался еси. В сей же благопокорно приемлюще твое повеление, и долу влекущии грех оставляюще блаженне.

Слава. Последовав отеческим преданием отче мудре, пагубу отриновения заповеда зовущим, благословен Бог отец наших.

И ныне. Вышняго Освященно Божественное Селение радуися. Тобою бо дастся радость Богородице вопиющим Ти, благословена Ты в женах Всенепорочная Владычице. Катавасия.

 

Песнь 8. Ирмос.

Руце распростер Даниил, лвов зияния в рове затче. Огненую же силу угасиша добродетелию поясавшеся, иже благочестия любители отроцы. Взывающе, благословите вся дела Господня Господа.

Запев. Всесвятая звезда сущи в тине и страсти, приводя к животу. Твориши бо жены нечистыя целомудрено жити. И отгониши лютыя недуги, вопия, благословите вся дела Господня Господа.

Запев. Ты исцели ум мой в крове чюдных и мудрых, преподобне, повелениих божиих. Многи уловил еси юродствовати Господа ради. Ведыи наругаемь быти. Вопия чистейшею душею. Благословите вся дела Господня Господа.

Слава. Совершен Един иже весть Своих Си прославити Господь преподобных. Сии же гробу посылаем, и ангельскими светлословесии почитаем вопиюще, благословите вся дела Господня Господа.

И ныне. Избавляя нас возсия ис Тебе Господь Дево Чистая. Его же моли Владычице просветити поющыя Тя, и обстояния нас избавити вопиющих, благословите вся дела Господня Господа. Катавасия.

 

Песнь 9. Ирмос.

Камень нерукосечныя горы, от Несекомыя Тя Девицы Краеуголныи отсечеся Христос, и совокупив разстоящаяся естества. Тем веселящеся, Тя Богородице величаем.

Запев с поклоном. Всем сердцем Максиме, Троице усердно предложився. И от Нея лучи богодетелно прием, световиден бысть, и со ангелы ликуеши.

Запев. Желанием Божественым приединився, и воздержанием просвещаемь. Будущих благ в причастии уже быв, Максиме богоблаженне и в наслаждении.

Слава. Твоя болезни и поты прият, веселие никако же конца имущее. В нем же питаяся Максиме преподобне, и нас непрестанно поминай.

И ныне. Разори души моея облаки, Свету Облаче Святая Владычице. И силна соделай мя, на страсти борющия мя. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?