Канон святому князю Александру Невскому


Глас 4.

Песнь 1. Ирмос.

Моря чермнаго пучину, не мокрыми стопами, древле шествовав Израиль, крестообразно Моисеовыма рукама Амаликову силу, в пустыни победил есть.

Запев с поклоном: Святый благоверный княже Александре, моли Бога о нас.

Приимша в своем сердцы блаже, твою благодать духовную твердо, премудраго повеления, и в душа благочестивых вложившаго, похвалами даждь ублажити, Александра преславнаго.

Запев. Светилниче многосветлыи Русския земли, чюдесы яко же Солнце второе сияя, всех нас поминай, совершающих память твою Александре блаженне.

Слава. Церкви бысть Христове красота блаженне. Пением бо сию украсил еси преславне. И ныне молим тя свободи нас, от всякия брани борителя поющих тя Александре.

И ныне. Радуися Благодати Источниче. Радуися лествице и дверь Небесная. Радуися Светилниче, и Ручко златая, и Горо несекомая Дево, яже Жизнодавца Христа мирови рождьши.

Катавасия: Избави от бед рабы своя, святый благоверный княже Александре, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

Веселится о Тебе Церкви Твоя Христе, зовущи, Ты ми крепость Господи, прибежище и утверждение.

Запев. В весь мир пройде слава чюдес твоих блаженне. Ими же просвети вселенную, от всех напастей избавляя присно.

Запев. Благочестиваго и венценоснаго Александра, сошедшеся по достоянию восхвалим. Яко чюдес подателя обилнаго, и Господеви молящася о всех нас.

Слава. Источник чюдес гроб твой явися неисчерпаемыи. От него же реки исцеленей изливаеши, иже верно память твою творящым блаженне.

И ныне. Ты едина на земли, преестественым благим Ходатаица Мати Божия бысть. Тем Ти радуися зовем. Катавасия.

Седален, глас 8.

Яко звезда многосветлая, от востока произшед, явился еси светлаго ради жития твоего, и чистоты душевныя и телесныя сосуд Святому Духу. И сего ради по успении твоем от мног лет во гробе нетленны обретошася святыя ти мощи. От них же источаеши реки чюдес исцеленей, верно зовущым ти. Радуися благоверныи великии княже Александре.

Слава, и ныне. Радуйся яже от ангела миру Радость Приимшая. Радуйся, Рождьшая Творца твари. Радуйся, Сподобльшаяся быти Мати Христа Бога

 

Песнь 4. Ирмос.

Воздвижена Тя видевши Церкви на Кресте Солнца праведнаго, ста в чину своем, достойно взывающи, слава силе Твоей Господи.

Запев. Кто любовь твою и милость ко всем человеком, паче же к нищым изглаголет. И по смерти убо яко жив простерл еси руку свою, и прият от святителя свиток, грехов прощения.

Запев. Днесь день святаго празднественыи, многих созывает на веселие духовное и трапезу, и пищю нетленныя жизни, Божественаго наслаждения.

Слава. К Божественому свету ныне преставися, Свету сын возлюблен быв. В радости и красоте с лики ангельскими, ныне радостно ликуеши блаженне.

И ныне. Света Твоего блистаньми, озари Отроковице Всенепорочная, еже в нощи страстей искушении одержимое сердце мое. Правды Солнца Свет восиявши. Катавасия.

 

Песнь 5. Ирмос.

Ты Господи ми Свет в мир пришел еси, Свет святыи, обращая из мрачна неведения. Верою воспевающыя Тя.

Запев. Досточюдная и преславная память твоя, восия в Русстей земли блаженне. И радостно верных веселит соборы.

Запев. Отверзошася тебе двери Едемския, и несказанен свет и Трисиянен восия блаженне, в неподвижимем Царствии Небеснем. И праведных веселие прият радуяся.

Слава. Ныне Александр великии, сирым, и вдовицам милостивныи печалник, Отечествие свое и вся вкупе яве созывает. Приидите собравшеся, яко общему заступнику светло торжествуем.

И ныне. Сыи в зраце Божии Пребожественыи вселися в чрево Твое, в зрак мой облечеся Господь Пренепорочная. Катавасия.

 

Песнь 6. Ирмос.

Пожру Ти со гласом хваления Господи, Церкви вопиет Ти, от бесовския крове очищьшися, милостию от ребр истекшею Ти Кровию.

Запев. Твоя святая память Александре, вселенную веселит, созывающи верныя в честныи храм твой. В нем же ныне радостию совокупльшеся, тя молим, языческаго нашествия, избави люди своя преславне.

Запев. Веселия днесь вся исполнися Русская земля, в нарочитыи день праздника преславнаго чюдотворца, Александра блаженнаго. Соблюдает бо Отечество свое выну ненаветно.

Слава. Сирым и вдовицам заступника, и в бедах непоборимаго помощника, песньми Александра ублажим славяще. Празднующих бо память его весело, от бед избавляет и скорбей.

И ныне. Святыи Исус вселися во утробу Твою, иже во святых Дево почиваяи. И прославляя иже верою истинною, сего Отроковице славящих. Катавасия.

Кондак. Глас 8. Подобен. Яко начатки.

Яко звезду тя восиявшу Русстей земли днесь почтем. Всю бо страну сию чюдесы и добротою обогатив, просвещаеши верою чтущих память твою Александре блаженне. Тем вопием ти людие твои суще. Моли Христа Бога, спасти Отечествие твое державу русских князей. И всех притекающих к раце мощей твоих, и верно вопиющих ти. Радуися граду нашему заступление.

Икос. Велии чюдотворец явися Русстей земли, блаженныи Александр. Невидимо Христовы люди посещая, и исцеления подавая богатно, всем от души приходящым. И согласно вопиющым сице, радуися столпе пресветлыи, просвещая нас чюдес светлостьми. Радуися велехвалнаго краля победивыи пособием Божиим. Радуися свободивыи град Псков от неверных. Радуися римская учения презревыи, и прелесть их ни во что же вменив. Радуися яко восприял еси в тленных место нетленная. Радуися Света Неприступнаго зрителю. Радуися яко ликуеши со ангелы. Радуися облаче росныи, верных мысли орошаяи. Радуися темных страстей прогонителю. Радуися Русской земли заступниче. Радуися благоверному царю помощниче. Радуися граду нашему заступление.

 

Песнь 7. Ирмос.

В пещи Авраамския си дети персидьстей, любовию благоверия паче, нежели пламенем опаляеми взываху, благословен еси в церкви славы Твоея Господи.

Запев. Днесь Церкви Христова празднующи Александрово торжество бывшее о Бозе, сошедшимся воистину источает исцеление, прилежно молящымся, и любовию поющым его.

Запев. Во всех странах произыде вещание, яко нашему граду явися чюдотворец преславен. Источая исцеленей множество, всем просящым тепле.

Слава. Днесь веселия исполняется храм Бога нашего, в нем же лежат честныя мощи блаженнаго. И вси притекающии облобызают со страхом святую раку преславнаго, и приемлют исцеление.

И ныне. Вышняго освященное Божие Селение, радуися. Тобою бо дастся радость Богородице вопиющым Ти. Благословена Ты в женах Пренепорочная Владычице. Катавасия.

 

Песнь 8. Ирмос.

Руце распростер Даниил, львов зияния в рове затче. Огненую же силу угасиша, добродетелию поясавшеся иже благочестия любители отроцы взывающе, благословите вся дела Господня Господа.

Запев. Ангельстии чини хвалят тя преславне. И человечестии роди поют непрестанно. Творяще верно память твою, Александре великоимените.

Запев. Тебе в чюдесех славна Русским странам показа Бог Александре, и украси тя Небесными дарми. Того моли помиловати всех нас.

Слава. Победо истинноименит, воистину верным людем в бедах, и крепок помощник явися, Александре блаженне.

И ныне. Священныи Тя пророк, благообразно проповеда, Дверь и Гору и Сень и Землю святую, и Облак Света из него же во тме сущым, восия Солнце, Дево, Един Светодавец.

Катавасия.

Песнь 9. Ирмос.

Камень нерукосечныя горы, от несекомыя Тя Девицы, краеуголныи отсечеся Христос, иже совокупив разстоящаяся естества. Тем веселящеся, Тя Богородице величаем.

Запев с поклоном. Красен телом и душею, и благочестием сияя славне Божественаго разума, орган бысть Святаго Духа. И по смерти убо к безсмертной жизни, и нескончаемому блаженству, прешел еси радуяся Александре богомудре.

Запев. Яко светозарное блаженне Солнце восияв от запада, и всю зарями благочестия Русскую землю просветил еси. И отгнал еси тму глубокую еретичествующих Александре преславне.

Слава. Твое святое преставление днесь светло празднуем. Исполни радости и веселия восхваляющих тя, Александре великоимените.

И ныне. Светом мя Твоего милосердия, иже во тме неразумия лежащаго озари, Едина Светодавца рождьшая, Избавителя и Бога, иже святых венчавшаго. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?