Тропарь, глас 1. Божественою любовию от юности распаляем, Дионисие преподобне. Вся яже в мире красная возненавидев, Христа единаго возлюбил еси. И сего ради во внутренюю пустыню вселися, со зверми живыи, весь Христови быв. Отнуду же и Всевидящее Око твоя труды видев, даром чюдес и по преставлении обогатил тя есть. И сего ради вопием ти, моли непрестанно о всех, иже честную память твою, присно в песнех почитающих.
Песнь 1. Ирмос.
Вооружена фараона погрузи, чюдотворяи древле, Моисейскии жезл крестообразно прорази, и раздели море, Израиля же бежаща, пеша ходяща спасе, песнь Богови возсылающа.
Запев с поклоном: Преподобне отче Дионисие, моли Бога о нас.
Озарением Святаго Духа озари. Иже благочестно любовию, песньми восхваляющих тя. Постником похвало, инокующим славо. Пустыни украсителю, благочестия учителю, Дионисие.
Запев. От юности желание к Богу возложив, и к нему радуяся возшел еси, имея все свое помышление. Взыграние плоти, и страстей нахождение, воздержанием умертвил еси, Дионисие прехвальне.
Слава. Поправ змия, и того сети легко прелетел еси, крылы благочестия вперився отче. Живот бо радуяся обьял еси от Сада Крестнаго, блаженне Дионисие.
И ныне. Устави неуставное помышление смущения, Пречистая Дево Мати Божия. Иже к Сыну Ти направляющи движения.
Катавасия: Избави от бед рабы своя, преподобне отче Дионисие, яко вси по Бозе к тебе прибегаем, ты бо молиши о нас Христа Бога нашего.
Песнь 3. Ирмос.
Ты еси Утвержение, притекающим Ти Господи, Ты же Свет омраченым, и поет Тя дух мой.
Запев. Во свете невеществене и мыслене, от печалей вещественых востече, к Небесным невещественым чином. Преподобне молитвами твоими, нас просвети.
Запев. Воздержания сладость искапав, отринул еси горесть страстей. Тем же паче меда и сота, насладил еси отче чювьствия наша.
Слава. Возшед на высоту добродетелей, идолу влекущая оплевал еси сласти. Сладость показася спасения отче преподобне. Стаду твоему проси грехов оставления.
И ныне. Премудрость и Слово Отчее, несказанно родила еси. Души моея лютую исцели язву, и сердечную болезнь утоли. Катавасия.
Седален, глас 8. Красоты мирския от младых ногтей, преподобне возненавидев. Единаго же Христа от сердца возлюбил еси. И Тому всею душею прилепися, яко безплотен на земли поживе с плотию. Славу же мимотекущую, и богатьство нивочтоже вменив. Небесное богатьство восприял еси, и Славу вечную. Тем же и ублажаем святое твое успение, и в нем торжествующе вопием ти. Богоблаженне отче наш Дионисие, моли Христа Бога, согрешением оставление даровати, чтущим любовию святую память твою.
Слава и ныне. Богородичен.
Яко Деву едину в женах, Тя без семене рождьшую Бога плотию, вси ублажаем родове человечестии. Огнь бо вселися в Тя Божества, яко Младенца доиши Зиждителя и Господа. Тем же ангельскии и человеческии род, достойно славим Пресвятое Рожество Твое. И согласно вопием Ти. Моли Христа Бога, согрешением оставление даровати, воспевающим достойно славу Твою.
Песнь 4. Ирмос.
Ты ми Христе Господь, Ты же и сила ми, Ты ми Бог, Ты ми радование, не оставль недра Отча, но милостию Си нашу нищету посетив. Тем с пророком Аввакумом зову, силе Твоей слава Человеколюбче.
Запев. Душевное очищая чювьство, и разширяя божествеными видении. Божественым дарованием сподобися богоблаженне. К раце мощей твоих притекающим Дионисие преподобне, подаеши скорое изцеление.
Запев. Законом Божиим повинуяся преподобне. К смотрению безплотных и мысленых, свое художьство управил еси. Преходя выну от славы в славу, от силы отче в силу.
Слава. Богоугодно пожив. Пустыни яко грады сотворил еси, богоподобны и душеполезны. Источник изцелении проливая, верою поклоняющимся раце мощей твоих.
И ныне. Новорасленыи Безсмертия Рай, и Красен воистину показася. Древо Жизни в Тебе насаждься Богоначално, во чреве носящи и раждающи. Еже всем искапая спасения надежду, верно Богородице исповедающим Тя. Катавасия.
Песнь 5. Ирмос.
Вскую мя отрину, от лица Твоего Свете Незаходяи. Покрыла мя есть чюжа тма окаяннаго. Но обрати мя, и к свету заповедей Ти пути моя направи молютися.
Запев. Угасив пламень страстей, росою подвиг твоих, отче блаженне Дионисие. Богатно вжегл еси, огнем любве веры, воздержания светилник. Просвещение безстрастия, и сын дни явился еси.
Запев. Веры грозд божественым деланием, отче воспител еси. И в точилех постави, изгнете болезньми пощения. И чашу наполнил еси духовную воздержания, веселуеши сердца стаду твоему.
Слава. Доблествене претерпев, биения невидимых враг, показася столп непоколебим, утвержая стадо свое палицею божественою, словесы медоточными, блаженне Дионисие преподобне.
И ныне. Едина рождьши девою, едина Мужунеискусная, явися Всенепорочная. Во утробе Слово Отчее приемши Безначалное, млеком доиши Чистая. Чюдо страшно, Девьствуеши и законы обновляеши естества. Катавасия.
Песнь 6. Ирмос.
Очисти мя Спасе, многа бо беззакония моя, из глубины зол возведи мя молюся. К Тебе бо возвах и услыша мя Боже спасения моего.
Запев. Изцелением реки источаеши. Страсти земнородных, божествено очищаеши. Радующеся верою восхваляем твоя подвиги чюдне.
Запев. Законно от всех Содетеля десницею венчася, преподобне Дионисие. Небесныи гражанин, ангелом равностоятелю.
Слава. Нетленна и божествена пребывания, и непостижных наслажаяся ныне благих. Ангелом собеседниче, Дионисие богомудре, восхваляющих тя спасай.
И ныне. Бога рождьши. Всякоя твари Владычице, яко воистину, едина Богородице превышьши явися. Катавасия.
Кондак, глас 8. Подобен. Взбранной.
К Богу все свое умное желание вперив, и Тому невозвратно от душа последовал еси. В пустыню вселився, ангельское житие пожив, многим путь быв ко спасению. Сего ради и Христос тебе прослави, и даром исцелении чюдес обогати. Тем же ти вси возопием. Радуися Дионисие преподобне, пустынныи жителю.
Икос. Храм Богу яко воистину себе содела отче, и Вышняго Иерусалима явися гражданин. Божествеными добродетельми твоими, безплотных чести сподобися. Тем же и мы зряще чюдеса, похвалению достойна, яже удивляют нас, и научают тебе звати таковая. Радуися благочестива отца отрасль, и матере благоговенны ветвь. Радуися целомудрия столпе, им же бесовьская шатания искоренишася. Радуися светилниче многосветлыи. Радуися яко увядил еси плотьская мудрования. Радуися пустыни доброе прозябение. Радуися праведным божественое наслаждение. Радуися яко презрел еси текущих и тленных. Радуися яко на небесех со ангелы живеши. Радуися яко инокующим известное правило. Радуися ленящимся к Богу дерзновение. Радуися источниче чюдесем боготочныи. Радуися честныи Духу сосуде, наставниче нашего спасения. Радуися Дионисие преподобне пустынныи жителю.
Песнь 7. Ирмос.
Иже от Июдеи, дошедше отроцы в Вавилон древле, верою утвержении, пламень пещныи попраша глаголюще, отец наших Боже благословен еси.
Запев. Временная отложив, вечными украсися. Со ангелы ликуеши, яко ангельское пожив житие, с ними же поеши. Благословен Бог отец наших.
Запев. Непрестанно молим, Дионисие богомудре. О стаде своем прилежно молися, тебе на молитву призывающих, и плоды приносящих, и любовию поющих. Благословен Бог отец наших.
Слава. В злаце Вышняго Царствия, стадо свое отче воспитал еси. И жезлом учении упасе верно поющая. Благословен Бог отец наших.
И ныне. Избави нас Христе, от страстей и бед, и обьстоянии и недуг многообразных. Молитвами Пречистыя Ти Матере, и преподобнаго Дионисия, взывающих. Благословен Бог отец наших. Катавасия.
Песнь 8. Ирмос.
Царя Небеснаго, Его же поют вои ангельстии, хвалите, и превозносите Его во веки.
Запев. Столп тя одушевлен яко воистину, и образ воздержания отче стяжавше. Всю твою Дионисие память почитаем.
Запев. Собор радуется иноческии, и ликует преподобных соньм. С ними же праведных венец достойно восприял еси.
Слава. Украшен добродетельми, в невестнице Неизреченныя Славы возлегл еси. Песнь воспевая Христу во веки вся.
И ныне. Поглощена болезньми, и падшася возстави Богомати. Яко да Тя славлю во вся веки. Катавасия.
Песнь 9. Ирмос.
Чистую и славную почтем людие Богородицу. Приимшую во чреве Огнь Божественыи неопално. Песньми величаем.
Запев с поклоном. Недугующим в падении, целитель от Бога показася, и очистник блаженне. И прогонитель лукавым духом, богоносе Дионисие. Тем тя вси величаем.
Запев. Яко тленно жилище, землю оставил еси отче. И вселися в землю кротких. И с ними радуешися, божественым наслаждаяся отче сиянием.
Слава. Неуклонен к вере предел, и образ воздержания имуще, подвиги твоя к Зиждителю воистину. Песньми тя величаем.
И ныне. В тя вселися Всенепорочная. Иже первие родоначалных, злообразно запеншаго, человекоубиицу низложь родися. И всех нас спасл есть. Катавасия.