Канон, Глас 4. Творение Таха иеромонаха Святыя Горы, Пахомия.
Тропарь, глас 4. Жизнь свою мученически совершивше, исповедания венцы украсившеся. К Небесным востекоста, Михаиле премудре, с доблим Феодором, молита Христа Бога, сохранити отечество ваю. Царя же и люди по велицей Его милости.
Песнь 1. Ирмос.
Моря Чермнаго пучину, немокрыми стопами древле шествовав Израиль. Крестообразно Моисеовыма рукама, Амаликову силу в пустыни победил есть.
Запев с поклоном: Святии мученицы и исповедницы, княже Михаиле и Феодоре молите Бога о нас.
Твоими молитвами страстотерпче Михаиле, благодать ми и просвещение с Небесе даруй, яко да возмогу похвалити дерзости и страдания твоя.
Запев. Божественым желанием разжигаемь, Михаиле святе, с Феодором, болярином, паки к своему отечеству возвращаетася, идеже мучения венцы от Десницы Вышняго прияста. Изрядно поминайта ваю почитающих.
Слава. Царствия Вечнующаго, и никакоже мимо текущаго, воспоминая наслаждение святе, царство земное преобидев. И вместо скипетра крест взял еси, самозван к подвигом устремися, купно со страдавшим с тобою Феодором болярином.
И ныне. Святых Святейшая бысть Дево Чистая, Святых Святаго на руку Христа носивши. Божественою силою, тварь Содержащаго.
Катавасия: Избавите от бед рабы своя, святии мученицы и исповедницы, княже Михаиле и Феодоре, яко вси по Бозе к вам прибегаем, вы бо молите о нас, Христа, Бога нашего.
Песнь 3. Ирмос.
Веселится о Тебе, Церкви Твоя Христе зовущи. Ты ми Крепость Господи, и Прибежище и Утвержение.
Запев. Яряся зверь нечестивыи, убити ваю повелевает, сего скверным повелением повинутися нехотящих. И твари паче Творца непослужиста, но Христу вопияста, Свят еси Господи.
Запев. Любовию своего Владыки, снедаемь быв Михайле, купно с Феодором болярином, ничтоже земнаго вменивше, и Того желанием, мучения чашю испивше усердно. Христу вопиюще, Свят еси Господи.
Слава. Самозван от далних стран отечество свое пришед посетити, и злоименитаго царя, богоборную прелесть обличити. От него же пострадав, жертва Богу принесеся.
И ныне. Воставила еси Чистая паки падшии мой образ, рождьшая Виновнаго паче естества Воскресения. Катавасия.
Седален, глас 1. Подобен. Камени знаменану.
Камение твердо явистеся, и непреборима быста мучитель прещением, Михайле славне и Феодоре премудре. Сего ради русстии собори вопиют радостно, Слава Укрепльшему ваю, Слава Венчавшему ваю, Слава Просвещьшему вама весь мир.
Слава, и ныне, глас 8. Подобен. Повеленное таиньство.
В раи мя прежде древо обнажи, вкушением враг внес мертвость. Древо же Крестное животу одеяние человеком нося. Водрузися на земли, и мир весь исполнися радости. Его же зряще возносима, Богу верою людие согласно зовем, исполнь Славы храм Твой.
Песнь 4. Ирмос.
Воздвижена Тя видевши Церкви, на Кресте Солнца Праведнаго. Ста в чину своем, достойно взывающи. Слава Силе Твоей Господи.
Запев. Богомерзскаго и злочестиваго царя, неправедна и лукавнейша паче всея земли, безбожную веру укориста. И лютаго беса обличивше прелесть. Яко агньцы за Христа заклани быста, и яко Солнце по кончине просияли еста.
Запев. Усты светлыми витийству, исповедал еси благочестно Единаго Бога Михайле с пострадавшим с тобою Феодором. И сего ради злочестивыи царь не терпя, повелевает убити ваю, иже на самей кончине Христа исповедающу.
Слава. О ярости царя злочестива, и неправеднаго убиения. О терпения непобедимую страдальцу, иже по вере добре подвигшася. Христови вопияху Слава силе Твоей Господи.
И ныне. Неискусобрачно родила еси о Девице, и по Рожестве явися, Девьствующи паки. Тем немолчными гласы, радуися Тебе Владычице, верою несуменною вопием. Катавасия.
Песнь 5. Ирмос.
Ты Господи ми Свет, в мир пришел еси, Свет Святыи. Обращая из мрачна неведения, верою воспевающая Тя.
Запев. Дивлюся о царю твоему безумию, и суетному глаголу, исповедниче Михаиле рекл еси, и с благородным Феодором. Твари паче Творца да не будет нама никакоже поклонятися. Она бо человека ради сотворена есть.
Запев. Злочестивыи он законопреступныи Доман, иже первее веры християнския отвергся, не терпя твоего исповедания, зле огорчися, ножем отрезает главу твою честную, исповедниче Христов Михаиле.
Слава. Аще честная святая телеса ваша и небрегома пребыша от кровоядец онех, повергома псом на снедение. Но Бог соблюдаше их, и столпом огненым сияюще суще пресветлыми зарями.
И ныне. Бог в Тя Богомати вселися. Человека назидая во истление впадшаго, прелестию змииною. Катавасия.
Песнь 6. Ирмос.
Пожру Ти со гласом хваления Господи, Церкви вопиет Ти. От бесовския крови очишьшися, милостию от ребр изтекшею Ти кровию.
Запев. Недоволен злочестивыи быв мучитель, о убиении благочестиваго Михаила, покушашеся и страдальца Феодора лестию увещати. Аще бо рече богом моим поклонишися, со мною в славе будеши. И имению господина твоего наследник будеши.
Запев. Мне да не будет о царю законопреступне, Христа отрещися, и ложьным твоим богом поклонитися. Мне бо еже жити Христу, и умрети зань приобретение.
Слава. От юности житие твое чисто явися, Пресвятаго Духа дарованием Феодоре. Посреде бо злочестивых мучитель, своему господину поборник был еси, и с ним на Небесех присно веселитася.
И ныне. Излияв первее яд во уши Еввины змий вселукавыи. Ты же сего едина оттрясла еси Богомати, Потребителя сему рождьши. Катавасия.
Кондак, глас 8. Подобен. Взбранной воеводе.
Царьство земное и славу яко преходящую оставил еси. Самозван пришед к подвигом. Троицу исповедал еси пред нечестивым мучителем. Страстотерпче Михайле, с доблим Феодором, Цареви Силам предстояста. Молите без вреда сохранити отечество ваю и царя, да ваю непрестанно почитаем.
Икос. Кто подвиги ваю и болезни возможет извещати страстотерпцы, их же мужески претерпеста за веру Господню. И дадовании их же сподобистася, не довлеют уста человеческа исповедати. Премудростию бо украшена и мужеством. Богатьство и славу временную возненавидеста, Михайле славныи, и спострадавшим с тобою дивным Феодором, с ним неразлучистася на земли и на Небеси. Тем молита без вреда сохранити отечество ваю и царя, да ваю непрестанно величаем.
Песнь 7. Ирмос.
В пещи Авраамския си дети персстей, любовию благоверия паче, нежели пламенем опаляеми взываху. Благословен еси в Церкви Славы Твоея Господи.
Запев. Ни любви супружницы, ни чад разлучению внимаше. Но сия вся в руце предал еси Богови, яко Творцу и Промысленику всем, вопияше, благословен Бог отец наших.
Слава. Поревновав мужеству иже прежде бывших мученик. И тех блаженьство и славу получил еси достохвалне Михайле, купно с Феодором, вопиюще, благословен Бог отец наших.
И ныне. Вышняго освященно Божественое Селение радуися. Тобою бо дастся Радость Богородице вопиющим Ти, благословена Ты в женах Пренепорочная Владычице. Катавасия.
Песнь 8. Ирмос.
Руце распростер Даниил, лвова зияния в рове затче. Огненую же силу угасиша добродетелию поясавшеся, иже благочестия любители отроцы взывающе. Благословите вся дела Господня Господа.
Запев. Взирая на воздаяние, иже на Небесех всечестне, их же любящим Христос проуготова, и вопиющим Ему от души, благословите вся дела Господня Господа.
Запев. Божественая мученик страдания воистину превзыдоша похваления, паче слова и помышления, яко тленным телом, бесплотныя враги победиша, вопиюще, благословите вся дела Господня Господа.
Слава. Непоколебим в подвизех пребыл еси, паче же нечестивых сердца поколебал еси. Видевших тя непреклонна, святе Михайле купно с Феодором, вопиюща, благословите вся дела Господня Господа.
И ныне. Таиньство странно воистину, под Солнцем едина показала еси. Бога бо родила еси Чистая Невидимаго и Безначалнаго, Невместимаго всем Непостижимаго. Ему же вопием, благословите вся дела Господня Господа. Катавасия.
Песнь 9. Ирмос.
Камень нерукосечныя горы, от несекомыя Тя Девицы краеуголныи отсечеся Христос, иже совокупив разстоящаяся естества. Тем веселящеся, Тя Богородице величаем.
Запев с поклоном. Приидите чистым сердцем и трезвящею совестию, великомученика Михаила, с советником крепким Феодором, паче злата светящеся зряще величаем.
Запев. Светлая ваша пребогатии, победная храборствия на враги, видев Всевидящее Око подвиги ваша, венцы одоления венчавает Спас душам нашим.
Запев. Воиньства ангельская удивишася, мученик же лики, и праведных собори согласно похвалиша Христа, иже таково терпение вам даровавшаго.
Слава. Непобедимая честная мученик двоица, на Небесех живуща, певцы своя поминайта, совершающих во хвалении священная ваю страдания, вас непрестанно величающих.
И ныне. Земля избавльшися от клятвы древния Рожеством Ти. Тем же Тя Богородителнице величаем. Катавасия.