Песнь 1. Ирмос.
Иже воды древле манием божественым, во едино сонмище совокупив. И раздели же море израильтеским людем. Се Бог наш препрославлен Сыи. Тому Единому воспоем, яко прославися.
Запев с поклоном: Святая благоверная княгиня инокиня Анна, моли Бога о нас.
Даждь ми Господи разумение, да достолепне воспою, и возпрославлю благоугождьшую Ти, предбывшую сию великую княгиню инокиню Анну. И возопию Тебе Христу моему, яко прославися.
Запев. О тебе блаженная мати Анно, хощу ныне язык подвигнути, и слово простерти. Споспеши ми недостойному молитвами твоими яже к Богу. Да достолепне воспою тя. И воспою Господеви моему яко прославися.
Слава. Со младых ногот своих, страх Божии имела еси, в сердце своем блаженная. Его же до конца содержащи, укрепляема божественною благодатию, тем и душу свою спасла еси. Выну поющи Христу, яко прославися.
И ныне. Ты от всех родов Произбранная Девице Пречистая Владычице. Тобою весь мир обновися. И весь род человечь от льсти дияволя свободися. И возопи ко Христу, яко прославися.
Катавасия: Избави от бед рабы своя, святая благоверная княгиня инокиня Анна, яко все по Бозе к тебе прибегаем ты бо милиши о нас Христа Бога нашего (поклон). Господи помилуй (трижды, с поклонами).
Песнь 3. Ирмос.
Неплоды душа безчадна. Стяжи плод о Бозе. И веселящеся возопии, утвердихся Тобою Боже. Несть свята, и несть праведна паче Тебе Господи.
Запев. Око душевное чисто и здраво имела еси от юности своея блаженная. Им же всегда зрела еси к горнему селению. Его же и достигла еси и воспе Христу, яко несть свята, и несть праведна, паче Тебе Господи.
Запев. Из благочестива корени произшла еси блаженная. И во вся дни живота своего, с супругом своим чисто и непорочно пребывающи. И Христу вопиющи, яко несть свята и несть праведна паче Тебе Господи.
Слава. Ничтоже у Бога вящши доброты душевныя. Ты же преподобная мати соблюла еси ю непредкновенно. Вопиющи ко Христу, яко несть свята, и несть праведна паче Тебе Господи.
И ныне. Отроковице Чистая Девице Мати Господа нашего. Помози ми недостойному рабу своему, воспети угодницу Сына Твоего, и Бога моего. Преподобную матерь Анну. И рещи ко Христу, яко несть свята, и несть праведна паче Тебе Господи. Катавасия.
Седален. Глас 3. Воспитанна была еси блаженная, от рождьших своих в заповедех Господних. Яко лоза в красно цветущих виноградех. Тем тя и ублажаем, и святую память твою верно почитаем. Моли Христа Бога да спасет душя наши (дважды).
Слава и ныне. Богородичен.
Света Превечнаго, иже от Отца прежде век рожденое Слово Божие, породила еси нам Пречистая Владычице Христа Бога нашего. Ему же вселенная поклонися, и от тмы смертныя свободися. Тем Тя с ним непрестанно поем и величаем.
Песнь 4. Ирмос.
Покрыла есть небеса добродетель Ти Христе. Ис кивота бо прошед святыя Твоея нетленныя Матере. В Церкви Славы Ти явися. Яко Младенец на руку носим. И исполнишася вся Твоего хваления.
Запев. Преукрашенна была еси преподобная мати, добродетельми своими, яко цветы благоуханными, и яко камыцы драгоценными. Тем и угодила еси Нетленному Царю и Владыце всех. Ему же и воспела еси, Господи, исполнишася вся Твоего хваления.
Запев. О твердое основание веры, о крепкое любление к Богу, в женстем убо естестве мужески победила еси невидимаго врага супостата. И тако угодила еси Христу, и возопи к Нему. Господи исполнишася вся Твоего хваления.
Слава. Христов храм была еси преподобная мати. Своею чистотою и целомудрием, и прочими добродетельми. Тем и вместила еси в себе Святаго Духа. К Нему же и возопила еси, Господи исполнишася вся Твоего хваления.
И ныне. Воистину всех тварей вышши явилася еси Владычице. И кто доволен по достоянию изрещи величие Твое. Ширши бо небес явися Чрево Твое, в нем бо носила еси всеми Невместимаго Бога. К Нему же и рекла еси, Господи исполнишася вся Твоего хваления. Катавасия.
Песнь 5. Ирмос.
Яко виде Исаия образно на престоле превысоце Бога, от ангел Славы дары приемлюща. О окаянныи аз. Провидех воплощаема Бога, Света Невечерня и миром обладающа.
Запев. Аще и во благоденьствии пребыла еси блаженная мати. И всякое изобилие близ себе имущи. И никакоже вдалася еси на пищныи покой и веселие. Но зелным трудом и воздержанием, тело свое удручающи. И воспевающи Жениха своего Христа, Света Невечерня и миром обладающа.
Запев. Любовию Христовою уязвившися блаженная мати великая княгиня инокиня Анно. Яко доброплодная лоза в винограде, во граде Кашине благими своими деянии. И победила еси бесовския полки. Воспевающи Христа, Света Невечерня, и миром обладающа.
Слава. Истинным светом Христовым осиянна была еси мати святая, великая княгиня инокиня Анно. Насыщающися от Него велия благодати. Воспевающи Его Света Невечерня, и миром обладающа.
И ныне. Ты убо Чистая Мати Господня, чистотою и девьством всех превозшла еси. Тем избранна еси в Божие Вместилище. И породила еси нам Христа Бога нашего, Света Невечерня и миром обладающа. Катавасия.
Песнь 6. Ирмос.
Бездна последняя грехов обыде мя. Изчезает дух мой. Но простер Владыка высокую Свою мышцу. Яко Петра мя Управителю спаси.
Запев. Из благочестиваго корене произошла еси преподобная мати великая княгиня инокиня Анно. Благочестием же и верою, аки цвет процвела еси, во своем отечествии во граде Кашине. И прешла еси к горнему ужичеству. И вопиющи ко Христу, яко Петра мя Управителю спаси.
Запев. Воистинну достойна еси велия похвалы, преподобная мати великая княгиня инокиня Анно. Яко в женстем естестве, мужескую крепость имела еси. И победила еси супротивоборца диявола. И воспела еси ко Владыце Христу, яко Петра мя Управителю спаси.
Слава. Ей убо велик и тверд ум имела еси преподобная. Вся бо красная мира сего, яко уметы вменила еси блаженная. Ничтоже возможе поколебати благородную твою душу. И воспела еси Христу, яко Петра мя Управителю спаси.
И ныне. Лестным убо змииным преступлением низпадохом. Но с Сыном Твоим Исус Христом Богом нашим совостахом Мати Господня. Его же родила еси нам, Свет и Живот и Воскресение. Катавасия.
Кондак глас 4. Подобен. Вознесыи.
Яко пресветлая звезда явилася еси в русстей земли во граде Кашине преподобная мати Анно. Во всех благочестивых верных женах, чистым своим и непорочным житием. Во инокинях же аки крин процвела еси, совершенными своими труды и подвиги. И взыде к Вышнему Граду радующеся и веселящися. Яко добре соверши свое течение. И ныне честныя твоя мощи, аки бисерие драгое явишася на исцеление всем приходящим ти с верою. Тем вопием ти, радуися всекрасная душею. И моли Христа Бога о спасении душ наших.
Икос. Господи Царю и Владыко всех, отверзи ми устне недостойному рабу Своему, и подаждь ми слово разума. Да достолепне воспою и восхвалю сию преподобную великую княгиню инокиню Анну. И реку к ней сице. Радуися мати святая и великоименитая княгиня инокиня Анно, яко от юности своея возлюбила еси Христа, и по заповедем Его шествовала еси. Радуися яко зелным своим трудом и воздержанием тело свое удручивши. Радуися яко сподобилася еси от Бога чюдотворнаго дара. Радуися яко озари Бог сердце твое, еже восхотела еси облещися во иноческое одеяние и последовати Христу. Радуися нищим питательнице, и сирым заступнице. Радуися всем русским женам похвала и удобрение. Радуися всему российскому царству твердое ограждение. Радуися вместо земнаго царства Небесное получила еси. Радуися яко по смерти твоей явишася мощи твоя много лет нетленны. Радуйся яко предстоиши с лики святых и преподобных жен Невечернему Свету. И молишися о спасении душ наших.
Песнь 7. Ирмос.
Якоже древле, благочестивыя три отроки прохлади, во пламени халдейстем, светоносным божества огнем. И нас озари. Благословен еси взывающе, Боже отец наших.
Запев. Ибо велие чюдо явися во граде Кашине. Яко честныя мощи твоя много лет землею покровенны быша. Ныне же Божиею благодатию, явишася верху земли, на исцеление всем приходящим ти с верою. И вопиющим, благословен Бог отец наших.
Запев. Како убо яко светлая Луна сияющая посреде звезд. Тако и ты блаженная пребыла еси, аки свеща светящися посреде российских жен, чюдным своим житием, выну воспевающи Христу, благословен еси Господи Боже отец наших.
Слава. Утверженна была еси мати преподобная, аки адамант крепкии, добродетелми своими. Яко невеста украшенна была еси манисты златыми. Делы своими благими. Воспевающи Христу, благословен еси Господи Боже отец наших.
И ныне. Юницу Тя Нескверную Деву и Богородицу, издалеча пророцы разными глаголы изрекоша. Ин бо Тя Гору Мысленную нарече. Другии же Родительницу Божию. Ов же Руно, ин же Священия Дверь. Тем же и мы вси достойно Тя поем и славословим во веки. Катавасия.
Песнь 8. Ирмос.
Служити живу Богу, иже в Вавилоне дети претерпеша. О мусикийских органех не радиша. И во пламени посреди стояще. Богоугодную песнь воспевающе пояху, благословите всякая дела Господня Господа.
Запев. Како убо изреку величие Божие на тебе преподобная мати Анно. Яко в толицех летех обретошася мощи твоя нетленны. На удивление всем человеком, поющим, благословите всякая дела Господня Господа.
Запев. Ничтоже дражайшее у Бога добродетельныя души, ей же весь мир недостоин. Тем ты преподобная мати паче всего прилежа о сицевей безсмертней вещи. Поющи Христа, благословите всякая дела Господня Господа.
Слава. Яко свещу светлу уготовала еси благородную душу свою, преподобная мати Анно. Тем и по смерти твоей чюдодействовася от Бога. Многа исцеления недужным быша от честных мощей твоих. Мы же поем, благословите всякая дела Господня Господа.
И ныне. Господа моего рождьши Мати Безневестная. Споспешница моему недоумию, и грубому недоразумию. Молютися Пречистая, сподоби мя пети Сыну Твоему, Христу Богу нашему, благословите всякая дела Господня Господа. Катавасия.
Песнь 9. Ирмос.
Иже сладкою Пречистаго Ти Рожества, стрелою унзени Чистая. Твоей достожеланней доброте дивящеся. Песньми ангельскими, достойно Тя яко Матерь Божию величаем.
Запев с поклоном. Иже весть Господь святых Своих прославляти, и имена их воспоминати. Написанны бо суть у Него на Небесех в Книгах Животных. Такоже и тебе прослави Своим милосердием преподобная мати Анно. Тем тя достойно поем и величаем.
Запев. Несть убо лепо о святых и праведных молчати. О нечестивых же и неверных воспоминати. Тем не умолчю же Божияго дарования збывшагося на тебе, преподобная мати Анно. Яко и по смерти твоей прослави тя Бог чюдесы Своими. Тем тя поем и величаем.
Слава. Юностным еще возрастом была еси преподобная мати Анно. Тесным и прискорбным путем шествовала еси. Всякия бо сладости, яко горести отвращающися. И достигла еси неизреченныя радости. Тем тя поем, и величаем.
И ныне. Ааронов жезл прозябшии Владычице, прежде убо безплоден быв. Послежде Цвет и Плод испусти. Тако же и Ты Пресвятая Дево безсемене, породи Христа Бога нашего. Тем Тя поем и величаем. Катавасия.