Глас 8.
Песнь 1. Ирмос.
Воду прошед яко посуху, из египетска зла избежав, израильтянин вопияше, Избавителю Богу нашему поем.
Запев с поклоном: Преподобне отче Аврамие, моли Бога о нас.
Божествеными сияя блистании, светоносный ти творящыя праздник, страстей омрачения всеблаженне молитвами си Аврамие избави.
Запев. Божественое разжже твою душю блаженне желание, угаси плотьская разжжения отче, и не вещественна на земли тя сотвори.
Слава. Умертвив уды яже на земли пощением и всяцеми страдании, отче премудре. Животу сподобился еси непреходимому на небесех, богоносе Аврамие.
И ныне. От кровей Твоих священных Бога Отца Слово воплотися паче Естества Дево Марие. Его же моли, плотьская ми умертвити взыграния.
Катавасия: Избави от бед рабы своя преподобне отче Аврамие, яко вси по Бозе к тебе прибегаем, ты бо молиши о нас Христа Бога нашего.
Песнь 3. Ирмос.
Небесному кругу Верхотворче Господи, и Церкви Зиждителю, Ты мене утверди в Любви Своей, желанием Сыи край, и верным Утверждение, Едине Человеколюбче.
Запев. Всеобразно возжелев Желание Конечное. Мира и плоти богоносе вне был еси. Тем восприят Преславную Славу, и Вечнующее отче Наслаждение.
Запев. Храм жив явился еси Вседетелнаго Духа, отче, в храмине тело затворив преподобне. Тем же облистал еси добродетелей свещами, священно обожаемь, блаженне Аврамие.
Слава. Деланием болезни и добродетелей зрел преподобне израстил еси клас сторичествующь. Им же питеются честно, иже божественое и честное твое успение торжествующии.
И ныне. В Тебе Святая, всяческим Виновныи, за премногое милосердие хотя, вселися, и освяти человеческое существо, преступлением первее поползшееся. Катавасия.
Седален. глас 1. Подобен. Гроб Твой.
Иже древнему Аврааму подобяся, отче, удалился еси сродник по плоти, повинуяся Аврамие Глаголу Бога нашего. Тем же постився, и душю светлейшю показал еси солнечных лучь, богомудре пребогате.
Слава и ныне. Богородичен.
Настави нас на путь покаяния, уклоньшихся присно к злым безпутию, и Преблагаго прогневавших Господа, Прибежище отчаянным человеком, Божие Жилище.
Крестобогородичен.
Нескверная Агница, Агньца и Пастыря повешена мертва на древе зрящи, рыдающи вещаше, Матерьски восклицающи, како воспою Твое еже паче слова Сыне Мой снитие, и вольныя страсти Боже Преблагии.
Песнь 4. Ирмос.
Услышах Господи смотрения Твоего Таиньство, разумех дела Твоя, и прославих Твое Божество.
Запев. Струями отче слез твоих душевныя скверны отмыв, божествено был еси Духа и честное всеблажене жилище. Бдение обнощно, молитву не престанну, нестяжание, и любовь не лицемерну и совершену удержал еси.
Слава. Исцеляти страсти, и отгонити преподобне духи, благодать приял еси Аврамие, яко Божии угодник истинен.
И ныне. Унынием одержима, и грехом ныне погружена, молбою си избави мя Богородице Мати Приснодево. Катавасия.
Песнь 5. Ирмос.
Вскую мя отрину от Лица Твоего Свете Незаходяи, покрыла мя есть чюжа тма окаяннаго. Но обратив мя, к свету заповедей Ти пути моя направи молютися.
Запев. Яко плодовитая лоза, грозды израстил еси отче Аврамие добродетелей божественых. Умиления вино источающи и страстей пияньство, от душ отгонящи, и сердца верных веселящи.
Запев. Напасти различны змий прелукавыи отче воздвиже, но того оружием Креста богоносе умертвил еси. И победы венец от Бога праведным судом приял еси, богомудре пребогате.
Слава. Священия храм отче Божественаго Духа верою быв, создал еси храм священныи. И всесвящен собор, нечестия прелесть преложь, наказаньми всех Богови освятил еси.
И ныне. Матерь Деву Отроковицу, Божественым просвещаеми Духом Пречистая священнии пророцы священными Тя гласы провозвестиша. Из Нея же Бог Слово паче вины и слова воплотися, за милосердие безчисленое. Катавасия.
Песнь 6. Ирмос.
Молитву пролию ко Господу, и Тому возвещю печаль мою, яко зол душа моя наполнися, и живот мой аду приближися. И молюся яко Иона, от тля Боже мой возведи мя.
Запев. Светилника тя иже во тме прелести, нелестно наставляюща обретше к Путем Живота богоносе, неведения тму отложиша, и явишася Светови дни верою божественою Аврамие.
Запев. Бодрено умолив Бога, посылаеши просвещение спасения, сущим в нощи идольскаго гнева одержимым богомудре Аврамие. И показал еси вся сыны Свету и Дни благодатию.
Слава. Безмолвно свою жизнь совершив, яже в житии треволнения преблаженне Божиими надеждами прешел еси. И к Тихим Пристанищем достигл еси Аврамие, Небеснаго Царства и Божественыя Светлости.
И ныне. Отягчена дреманием уныния, возстави Твоим ходатайством Мати Божия, и не даждь уснути в смерть греховную Дево. Заступницу бо и Наставление моей жизни написую Тя. Катавасия.
Кондак, глас 3. В плоти яко ангел на земли показася пощением насажден бысть яко древо при водах воздержания, напоен струями слез твоих, и скверну отмыв. Сего ради явися приятелище Божия Духа Аврамие.
Песнь 7. Ирмос
Дети еврейския в пещи дерзнувше, поправше пламень, и на росу огнь преложьшу вопияху, благословен еси Господи Боже во веки.
Запев. Да вышнее Царство получиши, и Славу Неизреченную. Славу же попираемую и тленную яко смыслен и разумен преобидел еси мудре.
Запев. Егда волк лукавыи агницу твою расторгну льстивне, тогда сего мудре челюсти сокрушил еси. Сию же яко пастырь изряден, к жизни приведе.
Слава. Законом повинуяся Владычним, заблуждьшее взыскал еси и обрете, и на раму своею взем преблаженне яко пастырь введе в ограду покаяния.
И ныне. Единого от Троицы породила еси в Двою Существу, составом Единем видима Дево. Ему же поем, благословен еси Господи Боже во веки. Катавасия.
Песнь 8. Ирмос.
Победители врагу и пламени Благодатию бывше, иже по заповеди зело поборающе дети пояху, благословите вся дела Господа, и превозносите Его во веки.
Запев. В пагубныи ров чистую вверже голубницу твою злодейственыи змий. Но ты ту изведе отче всемудре. Благословите поя дела Господа, и превозносите Его во веки.
Запев. И в житии ходя отче Аврамие, и по кончине врачь болящим явился еси, Духа благодатию Божественою. Благословите поя дела Господа, и превозносите Его во веки.
Слава. Незлобием блаженне, правдою же и целомудрием и верою просияв, со ангелы преподобне причтеся. Благословите зовыи дела Господа. И превозносите Его вовеки.
И ныне. Струи Животней Пресвятая Селение. От Нея же пиюще умертвившиися Жизнь наследуем. Вопиюще, благословите дела вся Господа, и превозносите Его вовеки. Катавасия.
Песнь 9. Ирмос.
Воистину Богородицу Тя исповедающе спасении Тобою Девице Чистая, с небесными вои Тя величаем.
Запев с поклоном. Видети сподобися, отче богоносе, яже упованием тебе древле желаемая, их же око не виде ни ухо слышало есть.
Красен явился еси, божественых добродетелей лучями сияя Аврамие. И Красному Владыце радуяся предстоиши.
Запев. Совокупися с лики всех преподобных, и с ними обожения преподобне получь, моли спастися всем нам.
Слава. День веселия приводит радостно, священное твое Аврамие успение, Церкви почитающи житие твое.
И ныне. Благолюбивая Дево, озлобленую грехми душу мою ублажи, и благ небесных причастника сотвори. Катавасия.