Канон, глас 5.
Песнь 1. Ирмос.
Землю нанюже не возсия, ни виде Солнце никогда же. Бездну, юже не узре нагу широта небесная, Израиля проведе немокрено Господи, и ввел еси его в гору святыни Твоея, хваляща и воспевающа победную песнь.
Запев. Слава Тебе, Боже наш, слава Тебе.
Распятие волное прием Спасе плотию, источил еси благословение и жизнь миру Владыко, Едине Преблагословенне, всех Содетелю. Темже благословим Тя, поем и славим, поюще и воспевающе победную песнь.
В рове Тя преисподнем мертва бывша Христе, положи благообразныи Иосиф, и привали к дверем гроба камень. Но востал еси Долготерпеливе во славе, и мира совоставил еси поюща и воспевающа победную песнь.
Миро что принесосте со слезами вы, глаголаше честным женам ангел явлеися. Христос воста. Текше рцыте боговидцем учеником, плачущим и рыдающим, яко да взыграют и ликовствуют верно.
Чюдеса преславная сотворяя Избавитель, исцели слепа от рождения, брением помазав, и рече иди умыися в Силоаме, яко да познаеши Мя Бога по земли шествующа, в плоть оболкшася, за милосердие щедрот.
Слава. Едино Трисоставно Существо почитаем вернии, прославляем Отца и Сына, и Духа Праваго, Творца и Господа, и Избавителя всех, Единаго Несозданна Бога, со безплотными зовуще. Свят, Свят, Свят еси Царю.
И ныне. Во утробу Неискусобрачную Твою, вселися Чистая Господь за милосердие щедрот, спасти хотя человека, истлевшаго козньми вражиими. Того убо моли стадо сие спасти, от всякого пленения, и язык нашествия.
Катавасия. Сохрани от бед рабы Своя, Милостиве, яко усердно к Тебе прибегаем, к милостивому Избавителю и всех Владыце Господу Исусу.
Песнь 3. Ирмос.
Колеблемое сердце мое Господи волнами житейскими, утверди, в пристанище тихое наставляя яко Бог.
Запев. Колеблющихся сердца утвердил еси, землю всю поколебав Долготерпеливе, честным распятием Си, еже претерпел еси плотию.
В нове гробе Тебе положи щедре, Иосиф благообразныи. Воскрес же из мертвых тридневен, обновил еси нас.
Что яко мертва ищете Господа, воскресе якоже рече ангел женам вещаше блистаяися Божественым зраком.
Слепа иногда от рождения пришедша к Тебе, исцели Всещедре, славяща смотрение Твое и чудеса.
Слава. Богу Отцу поклоняемся Пребезначалну, и Сыну, и Божественому Духу, Собезначалну Естеству, Трисоставну Единому Богу всех.
И ныне. Из Чрева Девическа, родила еси Бога воплощенна, Ему же молися Всесвятая Владычице, ущедрити нас. Катавасия.
Седален, глас 8.
Иже всех Владыка и Творец преходя, обрете на пути слепа седяща, плачуща и глаголюща, не видех в житии солнца сияюща, ниже луны светлость озаряющую, тем же вопию Ти, Рождеися от Девы, и Просвещеи всяческая, просвети мя яко Благоутробен, да зову припадая Ти Владыко Христе Боже, грехов оставление даруй нам, множества ради милости, Человеколюбче.
Слава и ныне, тойже.
Песнь 4. Ирмос.
Услышах Господи слух Твой, и убояхся, разумех смотрение Твое, и прославих Тя Едине Человеколюбче.
Запев. Умерша мя древом, простерся на древе Жизнь всех, оживил еси за великую милость, сего ради Слове славлю Тя.
Учеником Господи соводворяяся преславно, сим глаголаше, идите проповедите всюду Мое воскресение.
Уверяя Владыко любящим Тя, востание Свое еже из гроба, во дни многи совокупляяся с ними, радость творя им.
Во очив Господи слепа, изложесн рожена, рек иди и умыйся и прозри, Мое славя Божество.
Слава. Единочестная Безначалная Троице, неразделна Существом, разделна же составми, спаси вся иже верно Тя присно славящих.
И ныне. Рожество Ти Чистая иже паче естества, славословим, блажаще верно Тебе Пренепорочная, яко Бога всех Родителницу. Катавасия.
Песнь 5. Ирмос.
Окаянную душу мою, в нощи борющуюся со тмою страстей, предвари Христе ущедри, и восияй умное солнце, дне светящия лучи во мне, еже прозрачити нощь светлу.
Запев. Вознеслся еси на древо Щедре, и совознесл еси вся человеки, и борителя змия умертвил еси, и оживил еси создание руку Твоею, яко Един Бог всякому.
Положився во гробе волею Царю Безсмертне, и царствия адова вся истощил еси, мертвыя воскресением Своим воздвигнув.
Чюдеса велика соделавша Слове на земли, людие убиша Тя беззаконнии. Но Сам Господи, Един Всесилен Сыи, якоже предрече из мертвых воскресл еси Христе.
Очи отверзл еси, невидевшаго свет чювственыи, души просветил еси зеницы, и славити уверил еси сего, познавша Тя Творца, за милосердие явившася Человека.
Слава. Троицу во Единстве , и Единицу в Троице вернии славословим, Отца и Сына и Духа Праваго, Единого Бога Создателя всякому существу воистину.
И ныне. Како родила еси Богорадованная Дево Мати Чистая, не познавши искуса мужеска. Како питала еси иже всю тварь питающаго, яко же Един весть Сам, иже всем Творец и Бог. Катавасия.
Песнь 6. Ирмос.
Якоже пророка от зверя избавил еси Господи, и мене из глубины нечистых страстей возведи молюся, да приложю призрети ми, к Церкви Святей Твоей.
Запев. Распныися с разбойникома Владыко, избавил еси от разбойник лукавых, душетленных страстей Человеколюбче Господи, всех воспевающих Твое распятие и восстание согласно.
Положиша бездыхания Тебе мертва Христе во гробе, иже всем мертвым вдыхающа жизнь. Воскрес же Господи, всем истощив Слове гробы, Божественою Твоею Силою.
По востании Христе другом глаголаше, седите убо во Иеросалиме, дондеже облечетеся силою свыше не победимою, и известною помощию.
Брение сотворь, очи слепому иже от рождения, помазал еси, и дарова ему прозрети, поющу Ти Слове не изреченную Силу, Ея же ради спасл еси мир.
Слава. Трисоставная Единице, Отче Пребезначалне, Сыне Рожденне, и Душе Исходныи, Божество Неразделно, Едино Существо и Сила, спасай вся люди Своя.
И ныне. Величия Твоя Чистая кто исповесть, Бога бо плотию родила еси преестествено, Тобою избавляюща человека егоже созда древле, от всякаго греха. Катавасия.
Кондак, глас 4. Душевныма очима ослеплен, к Тебе Христе прихожю, якоже слепыи от рождения покаянием зову Ти. Ты еси сущим во тме Свет Пресветлыи.
Икос. Струю ми даруй Христе, премудрости неизреченныя, и разума горняго, Свете сущим во тме, и прельщаемым Наставниче. Да возмогу чудеса Твоя поведати, окаянныи аз, яже божественая книга научи Евангелие, смирению шествовати и слепаго чюдотворению, яко от рождения слеп сыи, очи убо чювственыя прием и душевныя. Верою взываю, Ты еси сущим во тме, Свет Пресветлыи.
Песнь 7. Ирмос.
Огню погашение, детей молитва, орошающи пещь, проповедник чюдеси, не опаляющи ниже сожизающи, песнословесники Бога, отец наших.
Запев. Воздвижену Тебе на древо Спасе, погасе солнце. Земля же волнуяшеся, и колебашеся тварь. И от гроб мертвии востаху.
Воставшу Ти из мертвых Царю, души совозсташа тамо седящих, славящих Силу Твою, Ея же ради смертныя узы разрешишася Христе.
Рано помазати женскии прииде лик. Уведевше же Господи воставша Тя, веселяхуся со священными ученики, их же ради подаждь нам очищение злым.
Брением помазал еси очи слепаго, и сему повеле к Силоаму ити. Омывжеся прозре, песнославя Тя Христе Царю всех.
Слава. Отца Безначална, Собезначална же Сына, и Духа Святаго песнословим, зовуще, Свят, Свят, Свят еси Боже всех Царю.
И ныне. По Рожестве Девою явилася еси Чистая. Бога бо родила еси, истощившаго естество адово Пречистая силою Своею, Его же моли присно спастися нам. Катавасия.
Песнь 8. Ирмос.
Ангельстии собори, и человеческое совокупление, Царя и Зиждителя всех, священнии пойте, благословите левити, людие превозносите Его во веки.
Запев. Ангельстии чинове, на Кресте Тя видевше висяща Христе всех Царю, и тварь всю изменяему страхом, ужасошася поюще Твое человеколюбие.
Ад доле Тебе видев стоняше, и подаваше скоро мертвецы, яже от века тамо держимыя, Христе песнославящыя Твое человеколюбие.
Сотворяя чюдеса Христе ужасна, волею воздвижеся на Крест. И с мертвыми совокупися, Умертвивыи ада, и всех доблестию разрешил еси от уз.
Слепаго воочил еси, к Тебе приступивша Христе, сему повелел еси в силоамову купель ити, омытижеся и прозрети, и Бога Тя проповедати, плотию явльшагося в мире Спасителя.
Слава. Троице Неразделная, Единице Несмесная, Боже всяческих и Зиждителю всех, песнославящыя, и верно покланяющыяся Державе Твоей, от всяких напастей избави.
И ныне. Дево Пречистая Богорадованная, Своего моли Сына всегда, да не посрамит мя в день осужения, но да причтет мя ко избранным овцам. Катавасия.
Песнь 9. Ирмос.
Яко сотвори Тебе величие Силныи, и Деву показав Тя Чисту и по Рожестве. Яко Рождьшую безсемене всяческих Творца, темже Тя Богородице величаем.
Запев. На древе крестнем пригвоздися Христе Боже, и вся обличил еси вражия сопротивная начала. И первую клятву потребил еси Спасе, тем же Тя подолгу величаем.
Яко видев Тя Слове с душею ад доле, возстона, и вся мертвыя от тли разреши, познавшыя Державу Власти Твоея. С ними же Тя подолгу величаем.
Знамения сотворяюща и чюдеса страшна, собор еврейскии зря, завистию уби Пленившаго ада восресением Своим, и всех Жизнодавца воставившаго.
Востал еси яко же рече Живодавче из мертвых. И явися святым учеником по воскресении, и знамения сотворь, и просвети слепыя. С ними же Тя во веки величаем.
Слава. Свет Отца чту, Свет славлю и Сына. Свет воспеваю и Духа Нероженна. Един Свет неразделен, в Триех Лицех разумеваем, Бога и Царя всякой твари.
И ныне. Явившися пространнейши небес Дево Чистая, вместила еси плотию, Бога не описаннаго, и родила еси всем на избавление, иже верою не суменною воспевающим Тя. Катавасия.