Тропарь, глас 4.
К Богородице прилежно ныне притецем грешнии, со смирением припадающе и покаянием, вопиюще из глубины душевныя, Владычице помози милосердовавши на ны, и потщися яко изгибаем от множества грехов. Не отврати раб Своих тощ, Тебе бо Едину Помощницу имамы. Дважды.
Слава, и ныне. Не умолчим никогда же Богородице силы Твоя глаголюще, мы убо недостойнии. Аще не бы Ты предстояла молящися за ны, кто бы нас избавил от толиких бед; ктоли бы нас сохранил и до ныне свободны; не отступим от Тебе Владычице, Своя рабы нас спасай от всякия беды, Едина Благословенная.
Глас 4.
Песнь 1. Ирмос.
Отверзу уста моя, и наполнятся духа, и слово отрыгну Царице Матери, и явлюся светло торжествуя, и воспою радуяся Тоя чудеса.
Запев. Пресвятая Госпоже Богородице, услыши молитву раб своих, молящихся Тебе.
Радостно Чистая, ныне наставшее хваление, приношаю, радуися. И тихим гласом Одигитрие вопию Ти, радуися, и исполни мя разума, пети начинающа.
Запев. Христа родившая, радость нам вечную, О радуися Всепетая, православным Надежда, Одигитрие Всепетая Девице, радости исполни мя мирови желанныя.
Слава. Ликуютъ вси человецы, и ангели, всегда согласно вопиюще, на небеси и на земли Одигитрие. Радуися Девице, радости бо Рожеством Ти всяческая исполнила еси.
И ныне. Радость Одигитрие, иже со страхом Ти вопиющих, радости сподоби Мати сущия Радости, избавляющи скорбей всяческих. И всех помилуй, иже к Тебе прибегающих. Катавасия: Спаси от бед рабы Своя Богородице Дево, яко вси по Бозе к Тебе прибегаем, яко к Нерушимей Стене и Заступлению.
Песнь, 3. Ирмос.
Твоя певцы Богородице, живыи нетления Источниче, лик Себе совокупльши духовен утверди, и в Божественней Ти Славе, венцем славы сподоби.
Запев. Христа Вышняго Царя, О радуися Непоколебимая Чистая, и Одушевленая Полато. Радуися Одигитрие. Радуися, Тобою бо нерушим наш град сохраняется.
Запев. Вместити Егоже невозможе тварь, во утробу Неискусобрачную, Одигитрие Девице телесно вместила еси. Темже Ти радуися поем, подолгу величающе.
Слава. Радость Многопетая мирови, Христа родила еси, радостно Ти поюще присно, вечнующия чистая радости сподобляемся, Твоими матерьними молитвами, к Рождьшемуся из Тебе Одигитрие.
И ныне. Златую Тя Стамну, и Свещник, и Жезл, и Трапезу Чистая, призываем Одигитрие. И глас еже радуися, Тебе присно привношаем, с симиже имены. Катавасия.
Седален. Глас, 2. Молитвеница теплая, купно и стена необоримая, милости источниче, мирови прибежище, прилежно Ти вопием, Богородице Владычице. Предвари от бед избавити нас, Едина вскоре заступающи.
Песнь, 4. Ирмос.
Седяи во славе на престоле Божествене, на облаце легце, прииде Исус Пребожественыи, от Пречистыя Девы, и спасе вопиющыя, слава Христе силе Твоей.
Запев. Радуися Чюдо Чюдесем, Одигитрие Владычице. Радуися всем Радосте, градовом и весем, непобедимое христианское в бедах Хранилище и Предградие, и на враги Побеждение. О Чюдотворная Царице, да молишися о нас к рождьшемуся ис Тебе, Владычице буди нам вскоре заступающе.
Запев. Радуися радуися, царем православным похвало, и христолюбивым воинством, Покров пребываеши всем Царице. Радуися Одигитрие, прибежище всем нам и утвержение.
Слава. Радуися всем скорое в бедах избавление, радуися готовое всем скорбящим утешение. Радуися Всепетая, радуися Одигитрие Всеблагословеная, всем немощным Исцелителнице.
И ныне. Радуися, Еяже величия вся тварь славити убо спешит подостоянию, но невозмогает Одигитрие. И сего ради зовет Ти, радуися Владычице Боговместимое Жилище. Катавасия.
Песнь, 5. Ирмос.
Удивишася всяческая, о Божественей славе Твоей. Ты бо браконеискусимая Девице, прият во утробе надо всеми Сущаго Бога, и родила еси Безлетнаго Сына, всем воспевающим Тя мир подавающа.
Запев. Благостыни Бездно и щедротам еси, радуися Одигитрие Девице. Радуися всем радость творящи верным. О радуися сущим в бедах, и скорбящим пребыстрая Заступнице. О Чудотворная Владычице, помози милосердовавши, и избави ны от враг наших Приснодево.
Запев. Радости от исполнения величия чюдес Твоих зряще, исполняемся вси незрящии, слышаще же вернии, темже радуися Тебе присно, всюду и вси Одигитрие поем.
Слава. Христа Бога нашего, О радуися Одигитрие, Жилище и Дом, неизреченней и Пребожественней Дево Славе Его. О радуися Полато Преукрашенная, радуися Граде Одушевленныи, Присноцарствующий.
И ныне. Радость неоскудную Тя разсмотряюще, яко море Отроковице, Одигитрие Девице. Радующеся вси, радуися вопием Ти, и поюще божественых даров невидимо присно всегда от Тебе ожидающе. Катавасия.
Песнь 6. Ирмос.
Божественное се и всечестное, совершающе празднество богомудрении Божия Матере, приидите руками восплещем, от Нея Рождьшагося верою славяще.
Запев. Христа Чистая приемлющи, глас еже радуися Одигитрие Девице слышаше. Егоже неизреченно рождьши, и радуися от всех слышиши всегда. О Чудотворная Владычице, умоли Сына Своего и Бога, испросити ми отпуст безчисленых соблазн моих.
Запев. Радости вся исполнила еси, вышняя и нижняя Ты совокупила еси Одигитрие. Темже радостно и согласно ныне, небо и вся земля зовет ти.
Слава. Вдовам О радуися Всепетая, и всем сирым Одигитрие утешение. Радуися всем источающи нищым, богатство неистощимое.
И ныне. Злата всякаго блистаема, и утра солнечнаго светлейши, Жилище Христово, радуися Одигитрие, радуися Девице, радуися Невесто Неневестная. Катавасия.
Кондак. глас 6. Не имамы иныя помощи, не имамы иныя надежды, разве Тебе Владычице. Ты нам помози, на Тебе ся надеем, и Тобою ся хвалим, Твои бо есмы раби, да ся непостыдим.
Другии кондак. глас той же. Заступнице християном непостыдная, Ходатайце к Творцу непреложная, непрезри грешных моления гласы. Но предвари яко Блага на помощь нашу, верно вопиющих Ти: ускори на молитву, и потщися на умоление, заступающи присно Богородице чтущих Тя.
Икос. Простри длани Свои, имаже всех Владыку яко Младенца прият, за множество благости не остави нас всегда надеющихся на Тя. Бодренною си молитвою, и неисчетною простынею ущедри нас, и подаждь душям нашим милосердие свое во веки источающи. Тебе бо имамы грешнии заступницу, от находящих на ны бед и зол. Но яко имущи милосердия щедроты, ускори на молитву, и потщися на умоление, заступающи присно Богородице чтущих Тя.
Песнь 7. Ирмос.
Непослужиша твари богомудреннии паче Зиждителя. Но огненное прещение мужески поправше, радовахуся поюще, препетыи иже отцем Господь и Бог благословен еси.
Запев. Радуися, радуися Богородице Одигитрие, всех и всегда наставляющая верных шествовати ко всякому пути спасенному. Радуися Владычице,Тобою бо присно избавляемся, настоящия варварския беды.
Запев. Радуися радуися Одигитрие, бдящи и молящися о нас к Богу, и всякия злобы ходатайством Ти, и всяческих скорбей Богородительнице, всех людей избавляющи.
Слава. Радуися радуися Пресвятая Одигитрие, иже прошения наша к пользе нам исполняющи, и хотящи всем присно всегда любодружное благое единство, спешное же во изящных.
И ныне. Радуися радуися кораблем Одигитрие нужно плавающим, избавляющи верных. И всем избавление от всякия скорби, и недуги пестротныя, и медленныя разрешающи вскоре. Катавасия.
Песнь 8. Ирмос.
Отроки благочестивыя в пещи, Рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.
Запев. Радуися Всеблагословенная Марие, из Тебе бо Всеблагословенныи Бог одеяся, во всего мя человека, и одеявся соедини Своему Божеству, неизреченным соединением, Дево Одигитрие. Радуися Обрадованная, Радосте всего мира.
Запев. Радуися лукавых духов прогонителнице. Радуися Богородице Одигитрие. Радуися Еяже небесная невидимая воинства славословят всегда, и величают яко Матерь Божию бывшую. Радуися яже нижняя сочетавши с вышними.
Слава. Радуися всех небесных сил без разсуждения Превосходящая, радуися Одигитрие. Радуися всякия твари, яко Бога Рождьшая господьствующи, ей Владычице Всепетая. Радуися яко пребываеши Девою чистая и по Рожестве.
И ныне. Радуися женам всем славо, Храме Преосвященныи Бога нашего, радуися Одигитрие. Радуися Душеспасителная всей вселенней. Радуися Покрывающии Облаче небес ширшая. Радуися Мироположнице Божественнаго Мира полна. Катавасия.
Песнь 9. Ирмос.
Всяк земен да взыграется духом просвещаемь, да ликовствует же безплотных умов естество, почитая священное торжество Божия Матере. И да поют, радуися Преблаженная, Богородице Чистая Приснодево.
Запев. Радуися Свеще, Свет Невечернии понесшая, и в Рожестве Твоем многобожия тму разрушивши, и адовы пропасти избавльшая люди. Радуися Одигитрие Богородице, доброт всех Предходатайце.
Запев. Радуися Земле, из Неяже Клас прозябшии Небесныи верным, и мира всего душегубнаго глада избави, Разумная и Одушевленная. О радуися Винограде, иже Грозд Животныи рождьшая, Богородице Чистая Одигитрие.
Слава. Радуися тайных цветов Прекрасныи Сущии Раю. Радуися Мати Дево, невидимых разум, чистотою страннолепно побеждьши Богородительнице. Радуися Отроковице, радуися Одигитрие, Всемирное Чюдо и слышание.
И ныне. Лето живота нашего прочее сохрани неврежденно, поможением Твоим Дево Отроковице, и сподоби конец благии получити нам, воспевающым Тя и взывающым, радуися Всеблаженная Богородице Чистая Одигитрие. Катавасия.
Таже. Достойно есть. Трисвятое и по отче наш.
Тропарь. К Богородице прилежно.
Другии тропарь. Не умолчим никогдаже. Слава. Не имамы иныя помощи. И ныне. Заступнице християном. Таже. Господи помилуй 40.
Посем, молитва Пресвятей Госпоже Богородице.
Пресвятая Госпоже Владычице моя Богородице, упование сущи и прибежище всем концем земли, отжени от мене смиреннаго и грешнаго, и недостойнаго раба Твоего, уныние, забвение, неразумие и небрежение, и потреби вся лукавыя и скверныя и хульныя помыслы от окаяннаго сердца моего, и от оскверненныя ми души, и от помраченнаго ума моего, и погаси пламень страстей моих, яко зело немощен есмь и окаянен. И избави мя от многих и лютых обстоянии, и лукавых помышлении и предприятии, и от всех злых свободи мя действ, яко благословена еси от всех родов, и славится Твое Пресвятое имя, всегда и ныне и присно и во веки веком, аминь.
Честнейшую херувим. Слава, и ныне. Господи помилуй, дважды. Господи благослови. И отпуст.
Господи Исусе Христе Сыне Божии, молитв ради Пречистыя Ти Матере, честнаго и славнаго ея явления чюдотворныя иконы Одигитрии Смоленския, и всех святых, помилуй и спаси нас, яко Благ и Человеколюбец.