Праздник Воздвижения Креста Господня является непереходящим, всегда отмечается 27 сентября (14 сентября по старому стилю). Он имеет один день предпразднества (26 сентября) и семь дней попразднества (с 28 сентября по 4 октября). Отдание праздника — 4 октября. Кроме того, празднику Воздвижения предшествуют суббота и Неделя (воскресенье), называемые субботой и Неделей перед Воздвижением.
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 1-й
Спаси Господи люди Своя, и благослови достояние Свое, победы державе нашей на сопротивныя даруй, и Своя сохраняя Крестом люди.
Канон, глас 8-й
Песнь 1. Ирмос
Креста начертав Моисей, впрям жезлом Чермное пресече, Израилю проходящу. Тоя же обращь на фараона с колесницами ударив совокупи, впреки написав непобедимо оружие. Тем Христа воспоем Бога нашего, яко прославися.
Запев: Слава Господи Кресту Твоему Честному (поклон).
Образ древле Моисей Пречистыя страсти на себе прообрази, священных среде стоя. Крест же воображь си, простертыма победу дланьма воздвиже, державу погубив, Амалика всегубителя. Тем Христа воспоем Бога нашего, яко прославися.
Запев. (Повторяем стих).
Слава. Воздвиже Моисей, на столпе исцеление, тлетворения избавление, и ядовитаго угрызения. И древо образно Креста, к земли пресмыкаема змия привязав впреки, лукавныи о сем обличи вред. Тем Христа воспоем Бога нашего, яко прославися.
И ныне. Показа небо крестную победу, благочестия держателю царю богомудру: врагом в том враждебным низложися шатание, лесть превратися, и вера простреся земленым концем божественая. Тем Христа воспоем Бога нашего, яко прославися.
Катавасия: Сохрани от бед рабы Своя силою Честнаго Креста Твоего Милостиве, яко усердно к Тебе прибегаем, к милостивому Избавителю и всех Владыце Господу Исусу. (Поклон). Господи помилуй (3 раза с поклонами).
Песнь 3. Ирмос
Жезл во образ тайны приемлется, прозябением бо разсуди иерея: неплодящей же прежде церкви, ныне процвете древо Креста, в державу и утверждение.
Запев. Яко испусти ударяемь, воду краесекомыи, непокоривым людем и жестосердым, богозванней Церкви проявляше таинство, ей же Крест держава и утверждение.
Запев. (Повторяем стих).
Слава. Ребром пречистым, копием прободенным, вода с кровию истече, обновляющи завет, и омывательное грехов. Верным бо Крест похвала, и царем держава и утверждение.
И ныне. (Повторяем стих). Катавасия.
Слава, и ныне. Седален, глас 4-й. О тебе треблаженне и жизнодавче Кресте, людие питаемии спразднуют. С безплотными лики, чин архиерейскии благоговейно поют. Множество же иночествующих, и постник покланяются. Христа же распеншагося вси прославляем.
Песнь 4. Ирмос
Услышах Господи смотрения Твоего таинство, разумех дела Твоя, и прославих Твое Божество.
Запев. Горькочадныя преложь древом Моисей, в пустыни древле воды, Крестом к благочестию язык, проявляя преложение.
Запев. В глубине погрязшу секущую издаст, Иордан древо. Крестом и крещением, пресечение льсти назнаменуя.
Слава. Священно воополчаются четверочастнии людие предходяще образы, свидетельствова скинии, крестообразными чинми проявляемь.
И ныне. Дивно простираемь, солнечныя лучи испущает Крест, и исповедаша небеса славу Бога нашего. Катавасия.
Песнь 5. Ирмос
О, треблаженное древо, на нем же распятся Христос Царь и Господь. Им же падеся иже древом прельщеи, тобою прельщен бысть, Христови пригвождьшуся плотию, подающему мир душам нашим.
Запев. Тебе присносущее древо, на нем же распятся Христос, Едема хранящее, обращаемо оружие устыдеся. Страшныи же Херувим уступает распятому Христу, подающему мир душам нашим.
Запев. (Повторяем стих).
Слава. Преисподния силы противныя Креста устрашаются, начертаема знамения на воздусе. По нему же ходят небесных и земных роди, колена прекланяюще Христу, подающему мир душам нашим.
И ныне. Зарями нетлеющими явлься божественыи Крест. Омраченным языком, заблуждением прелести, божественыи свет облистав, присвояет на нем распятому Христу, подающему мир душам нашим. Катавасия.
Песнь 6. Ирмос
Водна зверя во утробе длани Иона крестообразно распростер, спасеную страсть проображаше ясне. Тем и тридневно изшед, всемирное воскресение прописаше, плотию пригвождена Христа Бога. И тридневным воскресением, мира просвещьшаго.
Запев. Старостию преклонься, и недугом отягчен исправися, Иаков руце преложь, действие являше жизнодавца Креста. Обетшанием бо законнаго стеннаго писания, понови писав на нем пригвоздивыися плотию Бог, и душетленныи недуг льсти отгнал есть.
Запев. (Повторяем стих).
Слава. На юныя возложь длани божественыи Израиль, крестообразно главы являше, яко старейшии Слова, законослужебнии людие, мнев же тем спрельститися. Неизменныи живоносныи Образ. Превзыдут бо людие Христа Бога. Новоутвержении пояху, Крестом ограждаеми.
И ныне. (Повторяем стих). Катавасия.
Слава, и ныне. Кондак, глас 4-й. Вознесыися на Крест волею, тезоименитому Ти ныне жительству, щедроты Твоя даруй Христе Боже. Возвесели силою Своею державу нашу, победы дая ей на сопостаты, пособие имущу Твое оружие миру, непобедимую победу.
Икос. Иже до третияго небесе восхищен бысть в Рай, и беседы услышав божественыя и неизреченныя, их же не подобает языки человеческими глаголати. Что галатом пишет яко рачителем писанию, прочтосте и разуместе. Мне рече не буди хвалитися, токмо о Кресте Господни, на нем же страдав уби страсти. Того убо и мы известно держимся, Креста Господня похвалы всех. Есть бо нам спасение сие древо, оружие миру, непобедимая победа.
Песнь 7. Ирмос
Безумна заповедь мучителя злочестива, людьми поколеба, дышуща прещением и злохулением богомерзским. Обаче триех отрок не искуси ярость зверьская, ни огнь снедаяи. Но дышущу хладному духу, со огнем суще пояху, препетыи отец наших Боже благословен еси.
Запев. От древа вкушь первыи в человецех, в тление вселися: отпадением бо живота, безчестием осудився, всему роду телотленен некии, яко вред недуга подал есть. Но обретше землении возвание, крестное древо, зовем: препетыи отец наших Боже благословен еси.
Запев. (Повторяем стих).
Слава. Разруши повеление Божие ослушание, и древо изнесе смерть земленым. Еже не в благо время причастно. Во утверждение зело честному, отселе животное древо возбраняет, еже разбойнику люте умершу отверзе, благоразумно вопиющу, препетыи отец наших Боже благословен еси.
И ныне. Жезла ся касает краеви Иосиф, бывающих зря Израиль, царьствию державное. Яко преспеет преславныи Крест проявляя. Сея бо царем победная похвала, и свет верою зовущим, препетыи отец наших Боже благословен еси. Катавасия.
Песнь 8. Ирмос
Благословите дети, Троицы равночислении, Содетеля Отца Бога. Пойте сошедшаго Слова, и огнь в росу претворшаго. И превозносите всем живот дающаго, Духа Пресвятаго во веки вся.
Запев. Воздвизаемо древо окроплено кровию, воплощьшагося Слова Бога, пойте небесныя силы, и земленым воздвижение празднующе людие, поклонитеся Кресту Христову, им же миру воскресение во веки вся.
Запев. (Повторяем стих).
Слава. Земленыя длани смотритель благодати Креста, на нем же стоя Христос Бог. Возносите священнолепно копие, Божия слова тело прободшее. Да видят языцы вси спасение Божие, славяще Его во веки вся.
И ныне. Божественым судом избраннии веселитеся, християнстии вернии царие хвалитеся, победоносное оружие приемше от Бога, Крест честныи. О сем бо колена брани и дерзости имуще, разсыпаются во веки вся. Катавасия.
Песнь 9. Ирмос
Таин еси Богородице Рай, не возделанно возрастивши Христа, им же крестное и живоносное на земли насаждено бысть древо. Тем ныне возносиму, покланяющеся ему Тя величаем. (Поклон).
Запев с поклоном: Слава Господи Кресту Твоему Честному.
Да возрадуются древа дубравная вся, освящьшуся естеству их. От него же исперва быша насаждена, Христу распростершуся на древе. Тем ныне возносиму поклоняющеся ему Тя величаем. (Поклон).
Запев. (Повторяем стих).
Слава. Священныи воста рог, и глава всем богомудрым Крест, им же грешных мыслено стираются рози вси. Тем ныне возносиму, поклоняющеся ему, Тя величаем. (Поклон).
И ныне. (Повторяем стих). Катавасия.
Задостойник: Таин еси Богородице Рай, не возделанно возрастивши Христа, им же крестное и живоносное на земли насаждено бысть древо. Тем ныне возносиму, покланяющеся ему Тя величаем. (Земной поклон).
Отпуст: Господи Исусе Христе Сыне Божии, молитв ради пречистыя Твоея Матере, силою Честнаго и Животворящаго Креста, и всех святых, помилуй, и спаси нас, яко Благ и Человеколюбец. Аминь.