Приходные поклоны.
За молитв святых отец наших, Господи Исусе Христе, Сыне Божии, помилуй нас. Аминь.
Святыи Боже, Святыи Крепкии, Святыи Безсмертныи, помилуй нас (трижды, с поклонами).
Слава Отцу и Сыну и Святому Духу, и ныне и присно и во веки веком, аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святыи, посети и исцели немощи наша, имене Твоего ради.
Господи помилуй (трижды). Слава и ныне.
Отче наш, Иже еси на небесех; да святится имя Твое; да приидет царствие Твое; да будет воля Твоя, яко на небеси и на земли; хлеб наш насущныи даждь нам днесь; и остави нам долги наша, яко же и мы оставляем должником нашим; и не введи нас во искушение, но избави нас от лукаваго.
Господи Исусе Христе, Сыне Божии, помилуй нас. Аминь.
Господи помилуй (12 раз). Слава, и ныне.
Приидите, поклонимся Цареви нашему Богу (поклон).
Приидите, поклонимся Христу Цареви и Богу нашему (поклон).
Приидите, поклонимся и припадем к самому Господу Исусу Христу, Цареви и Богу нашему (поклон).
Псалом 142
Господи, услыши молитву мою, внуши моление мое во истине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живыи. Яко погна враг душу мою, и смирил есть в земли живот мой. Посадил мя есть в темных, яко мертвыя веку и уны во мне дух мой, во мне смутися сердце мое. Помянух дни древния; поучихся во всех делех Твоих и в делех руку Твоею поучахся. Воздех к Тебе руце мои, душа моя яко земля безводная Тебе. Скоро услыши мя Господи, исчезе дух мой. Не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах. Скажи мне Господи, путь вонь же пойду, яко к Тебе взях душу мою. Изми мя от враг моих Господи, к Тебе прибегох. Научи мя творити волю Твою, яко Ты еси Бог мой. Дух Твой благии наставит мя на землю праву. Имене Твоего ради Господи, живиши мя, правдою Твоею изведеши от печали душу мою. И милостию Твоею потребиши враги моя, и погубиши вся стужающия души моей, яко аз раб Твой есмь.
Слава, и ныне. Аллилуия, Аллилуия, слава Тебе, Боже (трижды, с поклонами).
Господи помилуй (12). Слава, и ныне.
Бог Господь и явися нам, благословен грядыи во имя Господне.
Исповедайтеся Господеви, яко Благ, яко в век милость Его.
Обышедше обыдоша мя и именем Господним противляхся им.
Не умру, но жив буду и повем дела Господня.
Камень, Его же не брегоша зиждущии, Сей бысть во главу углу, от Господа бысть Сей и есть дивна во очию нашею (и по коемждо стисе глаголем: Бог Господь).
Посем тропарь, глас 4-й: Правило вере и образ кротости, воздержанию учителя яви тя Господь стаду Своему, яже вещем истина. Сего ради стяжав смирением высокая, нищетою богатая, отче наш святителю Николае, моли Христа Бога, спастися душам нашим. (дважды)
Слава, и ныне, богородичен сей, глас 4-й: Иже от века утаенное, и Ангелом несведомое таинство, Тобою, Богородице, земным явися Бог, в неразмесне снятии воплощаем, и Крест волею нас ради восприим, имже воскресив первозданнаго, и спасе от смерти душа наша.
Псалом 50. Помилуй мя, Боже.
Господи Исусе Христе, Сыне Божии, помилуй нас. Аминь.
Канон святителю Николе, глас 2-й
Песнь 1. Ирмос
Во глубине потопи древле фараонистская вся воинства преоружену силу, воплощьжеся Слово преспеющия грехи потребил есть. Преславныи Господь, яко прославися.
Запев: Святителю Христов Николае, моли Бога о нас. (Поклон)
Венценосец Престолу Христову, премудре Николае, предстоя со ангельскими чинми, просвещение ми даруй, озаряющее души моея омрачение, яко да восхвалю радуяся твою преблаженне память.
Запев. Повторяем стих.
Слава Отцу и Сыну и Святому Духу. Прославляяи вся Господь, иже Того славящия, тя верным прибежище дал есть, напастей и бед избавляюща, притекающия к твоему крову, Николае, и призывающия тя верою и любовию, преславне.
И ныне и присно и во веки веком. Аминь. Богородичен: Изравнитися желание ми вложь, змий вселукавыи, Содетелю, яко пленника восхити, Тобою же Пречистая, призван бых, обожився истинно. Ты бо, о Богомати, иже мене обожившаго родила еси.
Катавасия: Избави от бед рабы своя, святителю Христов Николае, яко все по Бозе к тебе прибегаем, к скорому помощнику и теплому заступнику, и молебнику ко Спасу о душах наших. (поклон).
Господи, помилуй. (трижды с поклонами). Сия глаголем по коейждо песни.
Песнь 3. Ирмос
Процвела есть пустыня яко крин, Господи, язычная неплодящая церкви, пришествием Ти, о ней же утвердися сердце мое.
Запев. Николае блаженне, Владыки искренний ученик ты быв, спасаеши к тебе притекающия от лютых бед и смерти горькия.
Запев. Повторяем стих.
Слава. Очисти рабы Своя, и грехов оставление яко Благ даруй, Николы Твоего угодника, иже к Тебе ходатайствы, Многомилостиве.
И ныне. Богородичен. Устави смущение души моея, Пречистая, и жизнь окорми, Пресвятая, Бога рождьши, о Немже утвердися сердце мое. Катавасия.
Седален, глас 8-й. Возшед на высоту добродетелей, божественными оттуду отче озарися сиянии чюдес, пресветел воистину явися мiрови пастырь, и в напастех сыи престатель непобедим. Тем же преславно врага побеждь, лжу отгнал еси, и человеки спасл еси от смерти, Николае. Моли Христа Бога, грехов оставление даровати, чтущим любовию святую память твою.
Слава, и ныне, Богородичен. Яко Деву едину в женах Тя без семене рождьшую Бога плотию, вси блажим родове человечестии. Огнь бо в Тя вселися Божества, и яко младенца доиши Зиждителя и Господа. Тем же ангельскии и человеческии род достойно славим, Пресвятое Рожество Твое, и согласно вопием Ти, моли Христа Бога грехов оставление даровати, воспевающим достойно славу Твою.
Песнь 4. Ирмос
Пришествовав еси от Девы, не ходатай, ни Ангел, но Ты Сам, Господи, воплощься, и спасе всего мя человека. Тем вопию Ти: слава силе Твоей.
Запев. Приближився чисте зарям духовным, светоносец был еси, мiру просвещая концы. Всем предстоя, и вся спасая верою к тебе притекающыя.
Запев. Избавляя юноши от смерти, якоже явился Николае преподобне, тако и ныне мя спаси от всякаго обстояния, и напастей и бед, всеблаженне.
Слава. Облистал еси добродетелей сиянием всебогате, подражатель преизряден своему Владыце быв. Спасаеши же призываемь, иже благоговением и любовию тя славящия.
И ныне. Богородичен. Найде на Тя Владыка твари воплощаем, и спасая яко милосерд всего мя человека. Тем же вернии Богородицу Тя славим. Катавасия.
Песнь 5. Ирмос
Просвещение во тьме лежащим, и спасение неначаемым, Христе, Спасе мой, к Тебе утренюю, Царю мирныи, просвети мя сиянием Си, иного бо разве Тебе Бога не знаем.
Запев. Богоподобным житием, треблаженне, просвещаем, осужденныя неправедным мечем умрети, представ избавил еси, Владыце Христу зовущия, иного разве Тебе Бога не знаем.
Запев. Повторяем стих.
Слава. На Небесех присносущную славу ныне зря, неизглаголанныя Божественныя зари, пресветлыми наслаждаяся сиянии. Покрый мя предстанием си, преподобне, угодниче Христов всечестне.
И ныне. Богородичен. Да Свой взыщеши образ, погребенныи страстьми, Спасе, небесных утаився существ, воплощься от Девы. Явился еси Тебе зовущим, иного разве Тебе Бога не знаем. Катавасия.
Песнь 6. Ирмос
В бездне греховней одержимь, неизследную милосердия Твоего призываю бездну, от тли, Боже, мя возведи.
Запев. Иже победы Николае венец, на твоем версе достойно положися, яко победитель убо изряден, тя призывающыя спаси.
Запев. Повторяем стих.
Слава. Умерщвена мя, блаженне, согрешении, и страстными треволнении погружаема, явивлься спаси, направляя ко пристанищу Божественыя воли.
И ныне. Богородичен. На Тя упование возложих, Мати присно Дево, спасения моего, и Тя предстательницу положих животу тверду и непоколебиму. Катавасия.
Слава, и ныне. Кондак, глас 3. В Мирех святе Николае святитель быв, Христово бо преподобне Евангелие исполни, положил еси душу свою за люди своя, и спасл еси неповинныя от смерти. Сего ради освятися, и явися велии таинник Божия благодати.
Икос. Воспоем ныне святителя песньми, мvрским людем пастыря и учителя, да молитвами его просветимся. Сей бо явися чист весь, нетленен духом, Христови принося жертву непорочну, чисту и благоприятну, яко святитель очищен душею и телом, и истинен Церкви предстатель и поборник, и велии таинник Божия благодати.
Песнь 7. Ирмос
О теле злате на поле деире служимем, трие отроцы нерадиша о безбожнем велении. Но посреде огня ввержени, прохлаждаеми пояху: благословен Бог отец наших.
Запев. Острым искушением пресекаемь есмь, и люте пострекаемь, и ко вратом ада приближихся, нечаянием поражаемь. Спаси мя молитвами си, блаженне, и воздвигни пети: благословен Бог отец наших.
Запев. Повторяем стих.
Слава. Незаходимаго света Невеществеными лучами облистаемь, сущия во тьме скорбей и озлоблений исхити, и к посещению веселия настави поющыя: благословен Бог отец наших.
И ныне. Богородичен. Моли Своего Сына и Господа, Дево Чистая, проданныя лютыми согрешеньми и лестьми змииными, Кровию Его Честною избавити поющыя: благословен Бог отец наших. Катавасия.
Песнь 8. Ирмос
В пещь огненну к детем еврейским сошедшаго, и пламень на хлад преложьшаго Бога, пойте вся дела Господа, и превозносите Его во веки.
Запев. Яко благ и милосерд, иже во глубине напастей люте содержими вопием, свободи блаженне Николае, разрешение подая молитвами си, иже ко Спасу Христу, священнотаинниче.
Запев. Повторяем стих.
Слава. Таинник иже паче ума святым, и служитель Небесным сыи богомудре, архиерей же верен, согрешении оставления проси от Спаса нашего, священноявленне.
И ныне. Богородичен. Изнемогает ми ныне ум, во глубину впадшу нечестия, яко от всюду различными объят есмь злыми. Но Ты, Дево, исцели, безстрастия светом одевающи. Катавасия.
Песнь 9. Ирмос
Безначална Родителя Сын, Бог и Господь, воплощься от Девицы нам явися, омраченыя просветити, и собрати расточеныя, тем Всехвалную Богородицу величаем.
Запев с поклоном. Свещею благодати богомудре просвещаемь, и светильник благочестия яве быв, сущия в напастех спасаеши, и иже во глубине морстей избавляеши, и питаеши алчущыя преславно, всеблаженне.
Запев. Повторяем стих.
Слава. Иже в раи пищи ныне водворяяся, неизреченную славу ясно зря, от Небесных круг певцы своя назираеши, от страстей избавляя, богоносе преславне.
И ныне. Богородичен. Премудрость, и Сила, и Слово составное Отцу, Дево Чистая, Егоже зачала еси, от Своих Пречистых кровей, Богомати. Живыи Храм прием, и Сей по совокуплению себе соединив нераздельно.
Аще есть великий праздник, задостойник празднику. Аще ни, сей, на глас 8: Владычице, приими молитву раб Своих и избави нас от всякия нужды и печали. Ты еси Богородице оружие наше и стена. Ты еси Заступнице, и к Тебе прибегаем, Тя и ныне на молитву призываем, да избавиши ны от враг наших, возвеличим Тя вси, Пренепорочную Матерь Христа Бога нашего, Юже осени Дух Пресвятыи (поклон до земли).
Посем, Трисвятое и по Отче наш. Исусова молитва. Аминь.
Тропарь святителю: Правило вере.
Слава, кондак: В Мирех святе Николае.
И ныне, богородичен: Иже от века утаенное.
Посем, Господи помилуй (40) . Слава, и ныне. Честнейшую херувим и славнейшую воистину серафим, без истления Бога Слова рождьшую, сущую Богородицу Тя величаем.
Слава, и ныне. Господи помилуй (дважды), Господи благослови (с поклонами).
И отпуст: Господи Исусе Христе, Сыне Божии, молитв ради Пречистыя Твоея Матере, и иже во святых отца нашего Николы архиепископа Мир-Ликийских чудотворца, и всех ради святых, помилуй и спаси нас, яко Благ и Человеколюбец. Аминь.