Канон в Великий Четверг

Тропарь, глас 8.

Егда славнии ученици, на умовении вечери просвещахуся, тогда Июда злочестивыи, сребролюбием недуговав помрачашеся, и беззаконным судиям Тебе праведнаго Судию предает. Виждь имением любителю, иже сих ради несытство стяжавша, и удавлению вдавшася. Бежи несытыя души, иже Учителю таковая содеявшия иже о всех благии, Господи слава Тебе. (Трижды).

Канон, глас 6-й

Песнь 1. Ирмос.

Сеченым пресечеся, пучина чермная, волнами питаемая же, изсше глубина. Таже в купе бозоружным бывши прошествие, и все оружным гроб. Песнь же Богу, красная воспевашеся, славно бо прославися Христос Бог наш.

Запев: Слава Тебе Боже наш, слава Тебе (поклон).

Всевиновная и подателная животу, безчисленая мудрость Божия, созда Храм себе, от чистыя и не искусомужныя Матере. В церковь бо телесно оболкся. Славно бо прославися Христос Бог наш.

Слава. Тайно учаше други своя, душепитаемую уготовает трапезу. Безсмертия воистину мудрость Божия, и черплет чашу верным. Тем приступим благочестно, и возопием, славно бо прославися Христос Бог наш.

И ныне. Услышим вси вернии, созывающу с высоким проповеданием, не созданную и со естественую премудрость Божию, вопиет бо вкусите, и уразумевше яко благ Аз есмь, возопиите, славно бо прославися Христос Бог наш. Катавасия.

 

Песнь 3. Ирмос.

Господь сыи всем, и зиждитель Бог, созданнаго ради Безстрастныи обнищав, Себе соедини. И Пасха еюже хотяше умрети, Сам Себе преди пожре. Ядите вопия тело Мое, и верою утвердитеся.

Запев. Безумен муж иже в вас предатель, учеником си прорек. Спасе незлобиве, не имате бо разумети вси его. И тако безумен сыи не имать разума. Обаче во Мне пребудите, и верою утвердитеся. (дважды с запевом)

Слава. Той же стих.

И ныне. Той же стих. Катавасия.

Седален. Глас 1-й. Иже езера и источники и моря сотворивыи, смирению нас наказуя изрядному. Лентием препоясався, учеником нозе умы, смиряяся премножеством благоутробия, и возвышая нас от пропастей злобы, един Человеколюбец.

Слава. Глас 3-й. Смиряяся за милосердие, нозе умыл еси учеником си Господи, и к течению божественному сих направил еси. Неповинужеся Петр умытися, обаче божественому повинуся повелению, омываемь бывает, и к Тебе прилежно моляся, даровати нам велию милость.

И ныне. Глас 4-й. Ядыи Владыко со ученики Своими, тайно показал еси пресвятую Свою смерть, еяже ради от тли избавихомся, иже божественыя Твоя страсти чтущии.

 

Песнь 4. Ирмос.

Провидя пророк тайны Твоея неизреченное Христе, предвозгласи. Положил еси тверду любовь крепости Отче щедрыи. Единороднаго бо Сына благии, Очистника в мир послал еси.

Запев. На страсть иже всем из Адама источившуюся безстрастныи Христе грядыи другом Своим рекл еси, с вами Пасху сию снести вожделех, понеже единороднаго Мя ныне очищение, Отец в мир послал есть.

Слава. Приим чашу, учеником вопияше безсмертне, от плода лознаго его же пив, уже к тому не пию с вами. Единороднаго бо Мя ныне Очистника, Отец в мир послал есть.

И ныне.  Пиво ново паче словесе, во царствии Моем рече Христос другом преди испию, иже убо Богом Бог есмь ваш рече. Единороднаго бом я очищение, отец в мир послал есть. Катавасия.

 

Песнь 5. Ирмос.

Союзом любве связуеми апостоли, владущему всеми себе Христу предавше, красны ноги умывати, благовествующих всем мир.

Запев. Иже не одержимую держащая превыспренюю на воздусе воду, и яже бездны обуздавающая и моря востязующая Божия премудрость, воду во умывалницу вливает, ноги же умывает рабом си Владыка.

Слава. Учеником показует смирения образ Владыка, иже облаки облагаяи небо, препоясуется лентиом. И преклоняет колена, рабом умывати нозе. Ему же в руце дыхание всех сущих.

И ныне. Той же. Катавасия.

 

Песнь 6. Ирмос.

Бездна последняя согрешении обыде мя, и волнения уже не терпя, яко Иона ко Владыце вопию Ти, из тля мя возведи.

Запев. Господа глашаете Мя о ученицы и Учителя, есмь бо Спас, вопияше. Тем же подобитеся образу, якоже Мя видесте.

Слава. Скверны кто не имея, омыти не требует ногу. Чисти о ученицы вы есте, но не вси. Часом бо единем един от вас бесится.

И ныне. Той же. Катавасия.

Господи помилуй (3 раза). Слава и ныне.

Кондак. Глас 2-й. Хлеб прием в руце предатель, сокровенно тыя простирает, и приемлет цену создавшаго своима рукама человека. И не исправлен пребысть, июда раб и льстец.

Икос. К тайней трапезе со страхом приближившеся вси, честными душами хлеб восприимем, пребывающе со Учителем, да увидим, како умывает ноги учеником, и да сотворим яко же видим друг другу покаряющеся, и друг другу нозе умывающе. Христос бо тако повеле Своим учеником, сице творите. Но не послуша Июда раб и льстец.

 

Песнь 7. Ирмос.

Отроци в Вавилоне, пещи пламенныя не убояшася, но посреди пламене ввержени быша, прохлаждаеми пояху благодарьствено, благословен еси Господи Боже Отец наших.

Запев. Покивая главою июда, зле прозря подвизашеся. Подобна времена искии предати, Судию на осуждение. Иже всех есть Господь и Бог Отец наших.

Слава. Сам Христос другом си вопияше, един от вас предаст Мя. И веселие забывше, скорбию и страхом одержими бяху. Кто сей есть скажи глаголюще, Господи Боже Отец наших.

И ныне. Иже со Мною руку си в солило вложивыи дерзостию, тому обаче добро бы врат житейских николиже проити. Се же рек являше предателя Своего. Благословен еси Господи Боже Отец наших. Катавасия.

 

Песнь 8. Ирмос.

По законех отеческих преблаженнии, в Вавилоне юнии беду приемлюще, царева небрегоша повеления безумнаго. И совокуплени в нем же не изваришася огне, держащему достойную взываху песнь, Господа пойте дела, и превозносите Его во веки.

Запев. Сообедници преблаженнии, в Сионе с словом претерпевше апостоли, последоваху пастырю яко агньци. И совокуплении, его же не разлучишася Христа, божественым словом питаеми, благодарствено вопияху, Господа пойте дела, и превозносите Его во веки.

Слава. Законныя любве, злоименитыи Искариот волею забыв, иже нозе умыв, и готовяшеся на предание. И твой ядыи хлеб тело божествено, воздвиже кол на Тя Христе. И вопити не разуме, Господа пойте дела, и превозносите Его во веки.

И ныне. Приимаше решителное Тело прегрешением, несмысленыи, и Кровь изливаемую за мир божественую, нестыдяшеся пия, юже продаяше на цене. О злобе же ненегодова, и вопити не разуме, Господа воспевайте дела, и превозносите Его во веки. Катавасия.

 

Песнь 9. Ирмос.

Учрежения владычня, и безсмертныя трапезы, на горничнем месте, высокими умы, вернии приидете восприимем, возшедша слова, от слова научившеся, Его же величаем.

Запев с поклоном. Ядите учеником слово рече пасху на горничнем месте, ею же ум утвержается, и сею тайно водително сотворите безквасным истины словом. Твердо еже благодати величайте.

Слава. Содетельницу Отец прежде век премудрость ражает мя, в начаток путем Своим, в дела созда мя, яже ныне тайно совершаема. Слово бо несозданно сыи естеством, гласы присвояю си их же ныне приях.

И ныне. Яко Человек есмь существом а не привидением. Сице же Бог есмь нравом воздаяния. Естества совокупившася во мне, Христа единого в тех Мя знайте. И яже от них, и иже в них, иже убо есмь спасаяи. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?